လွင် ပဲ့ ပီ ဒဲမ် တိုယ် ဘေ ဒီ အုဝ် တွိုန်၊ ဘေ တဝ်း၊ ဆေ အီမာယ် တူ ဆီ ဟြေတ့် အီဘိုန့်၊ ဆေ အန် ဆီ ကွယ် ပါယ် တီ၊ ဟဲ့ မွှိုမ်။ 2 မာလဲ၊ ဟဲ့ မိုဝ်း ကိူန် ကာဆဝ် အီ လာယ် လုတ့် လာယ် လာယ်။ ကူပ် န့ ပါယ် တီ၊ အီမာယ် ဒွန် အီ လုဝ် ခတ် ဒိုဝ်း အီဘိုန့် ဒီ အန်။ အီဘိုန့် ဒွန် အီ လုဝ် ခတ် ဒိုဝ်း အီမာယ် ဒီ အန်။ 3 အီမာယ် လုဝ် ဘူင် ပီ ကာအာပ် ဘူင် ဒီ အီဘိုန့် အန်။ အီဘိုန့် လုဝ် ဘူင် ပီ ကာအာပ် ဘူင် ဒီ အီမာယ် အန်။

4 အီဘိုန့် တူ အိုပ် ဒုဝ် ဘြိမ် အန်။ အီမာယ် အန် အီ အိုပ် အန်။ အီမာယ် မိူဝ် တူ အိုပ် ဒုဝ် ဘြိမ် အန်။ အီဘိုန့် အန် အီ အိုပ် အန်။ 5 ကွဲ့ တဲး အီဘိုန့် အီမာယ် ဝး လွင် အိတ် ကာဒူပ် ကွယ် ကာဒူပ်။ ဆေ ဘော အာ ဝီ ဟဲ့ လာယ် ဆီဖဝ် ကူပ် မိုဝ်း ဂါယ် နဝ်း ဆီ ဆာခိုဝ်၊ ဟဲ့ ပွိုန် ဝး အူ ကာစန် အူ ကာဘြိုဝ်း၊ ဟဲ့ ဟွတ့် ပီ ဝီ တး လာယ် ဖြူမ် ရိုမ်။ တဲး ဘေ ဘူင် ပါယ် တီ၊ ကွဲ့ တဲး ဘုဝ် ကာနမ် ပွိုန် ဒီ ပျာတ့် ဘေ လိုဝ် ကူပ် တူ ခမ် ဘေ ဒီ ယိူန်။ 6 ပီ ကာလာင် အုဝ် တီ၊ န့ ယီ မုး အာကျာမ် အာငျာန် အုဝ်။ အာဝ် မုး ပီ စ်ု အုဝ် ဘေ ဘူင်။ 7 ဘူင့် မှာန် အန်၊ အုဝ် ဆီ တဲး အီမာယ် ဒွန် အီ ကွယ် ပီ အုဝ်။ မာလဲ၊ ဇဝ်ဖြာ ဟဲ့ ဂေဇူ အူ ဝီ အူ မျုဝ်။ မင် အီ ဘော မုး ပါယ် နီ။ မင် အီ ဘော မုး ပေါ အူ မျုဝ်။

8 ဒေါ တီ နီ၊ အုဝ် ဒီ ဝီ ကာလာင် ဒီ ဂေ အီ ညှမ် ခတ် ဘော ဂေ ယာ ဆီပြး၊ ဆေ ဂေ ဘော ကွယ် ဟာဝ် ပီ အုဝ် နီ၊ ဟဲ့ မွှိုမ် ဒီ ဂေ။ 9 မာလဲ၊ ဆေ ဂေ တူ ပဲ ဒီ ယိူန် နဝ်း ဂေ၊ တဲး ဂေ ခတ်။ ဆေ ဂေ ခတ် န့ မွှိုမ် လွှိုမ် ဂေ မိုဝ်း နဝ်း အီ ဆီ ခတ် ကာဆဝ်။

10 ဂေ အီ ဟဲ့ ဟွတ့် ခတ်၊ အာဝ် မုး အုဝ် အီ ဒမ် ဂေ။ န့ မုး ဇဝ်ဖြာ အီ ဒမ် ဂေ။ အီဘိုန့် တူ ပွိုန် ဝဲန်၊ တူ ပွိုန် ကာဂဝ်း ဒီ အီမာယ် အန်။ 11 ဆေ အန် ယီ ဝဲန်၊ တဲး အန် ကွယ် ပါယ် တီ။ ဆေ အာဝ် ပါယ် တီ၊ တဲး အန် ဝီ ကာဇု ဝိဝ် ဒီ အီမာယ် ဘြိမ် အန်။ အီမာယ် မိူဝ် တူ ပွိုန် ဝဲန် အီဘိုန့် အန်။

12 အီ မုး ဝီ ဟဝ်၊ ဇဝ်ဖြာ တူ မိုဝ်း ဒီ ကာလာင်။ အုဝ် ယီ မာနုဝ် တဲး ဘေ နပ်၊ ဆေ န့ မိုဝ်း ဘီနွင် အေ အူ ဝီ အီ ညှိုမ် ဇဝ် ယေဆူ၊ အီဘိုန့် အန် ယီ တူ ညှိုမ်၊ ဆေ အီဘိုန့် အန် တီ ယီ မိုဝ်း နဝ်း ဆီ ကွယ် ရိုမ် ဒူပ် အီမာယ် အန်၊ အန် တူ ပွိုန် ဝဲန် အီဘိုန့် အန် တီ။ 13 အီဘိုန့် မိူဝ် ပါယ် တီ၊ ဆေ အီဘိုန့် ညှိုမ် ဇဝ် ယေဆူ၊ အီမာယ် အန် ယီ တူ ညှိုမ်။ ဆေ အီမာယ် အန် ယီ မိုဝ်း နဝ်း ဆီ ကွယ် ရိုမ် ဒူပ် အီဘိုန့် အန်၊ အန် တူ ပွိုန် ဝဲန် အီမာယ် တီ။ 14 ခုဝ်၊ ဇဝ်ဖြာ တဲး အီမာယ် အီ တူ ညှိုမ် တီ ဘဲန် ဒူအီ အီ ဆီငါ ဘွတ် ကူပ် ဟဲ့ ညှိုမ် အီဘိုန့် အန်။ အီဘိုန့် အီ တူ ညှိုမ် တွိုန် မိူဝ်၊ ဇဝ်ဖြာ တဲး အန် ဘဲန် ဒူအီ အီ ဆီငါ ဘွတ် ကူပ် ဟဲ့ ညှိုမ် အီမာယ် အန်။ ဆေ ဇဝ်ဖြာ တူ ဘူင် ပါယ် တီ၊ ဘော ဂွန် ဂါယ် တူ ဘဲန် ဒူအီ ဆီငါ ဘွတ်။ ကူပ် ဘူင် ဇဝ်ဖြာ ပါယ် တီ၊ ဂွန် ဂါယ် ဟဲ့ ဘဲန် ဒူအီ အီ ဆီငါ ဘွတ်။

15 ဆေ ဂေ အီဘိုန့် အီမာယ် အီ တူ ညှိုမ် ဇဝ် ယေဆူ တွိုန် ဆီ ကာဂဝ်း၊ တဲး ဂေ ဟာဝ်။ ဆေ ဟီ ပါယ် တီ၊ ဂေ အီဘိုန့် အီမာယ် အီ ဟဲ့ ညှိုမ် တွိုန်၊ ဒီ ပွိုန် ဒီ ကွယ် ထင်ဟာင်။ ခုဝ်၊ ဇဝ်ဖြာ ဆီ တဲး အေ ပွိုန် ဒီ ကွယ် ဒါခိုယ်၊ ကွယ် နှိမ်။ 16 ဘေ အီ မုး အီဘိုန့်၊ ဘေ တူ နပ်၊ ယုဝ် ဘေ ဒီ ပွိုန် တူ ပွိုန် စွယ် အီမာယ် ဘေ၊ တဲး န့ ချွတ် အာဆာက် ဂေ။ ဘော ဘေ အီ မုး အီမာယ်၊ ဘေ တူ နပ်၊ ယုဝ် ဘေ ဒီ ပွိုန် စွယ် အီဘိုန့် ဘေ၊ တဲး န့ ချွတ် အာဆာက် ဂေ။

17 ဆေ န့ ပါယ် တီ၊ တဲး ဒွန် အီ ကွယ် ဒူပ် ပီ ဂေဇူ ဇဝ်ဖြာ ဒီ အန်။ အန် လုဝ် ကွယ် တဲး န့ ဒူပ် ပီ ဒွါ ဇဝ်ဖြာ ဒီ အန်။ လွင် အန် တီ၊ အုဝ် ဟဲ့ မာနုဝ် ပါယ် တီ ခဲင် ဖိုင် ဇဝ် ယေဆူ ဒွန် ပ့လုဝ့်။ 18 ဆေ န့ မိုဝ်း အီမာယ်၊ အီ ဟဲ့ ခမ် ဒီ ဆွာ့ ဝဲန် ဟုန် လခါနာ အန် ဒေါ ရဝ်း ဇဝ်ဖြာ ဒီ အန်၊ ကွဲ့ တဲး အန် ပျာတ့် ဝဲန်။ ဆေ န့ မိုဝ်း ဒူအီ အီ တူ မိုဝ်း ဒီ ဆွာ့ ဒေါ ရဝ်း ဇဝ်ဖြာ ဒီ အန်၊ အာဝ် ဟူ လုဝ် တဲး အန် ဆွာ့။ 19 ဟဲ့ ဆွာ့ တူ ဆွာ့၊ အာဝ် မိုဝ်း ဒီခုဝ်။ ဘူင် ဒူပ် ဒါရာ ဇဝ်ဖြာ ဟဲ့ အာရေ တာင်။ 20 ဒွန် အီ လုဝ် ကွယ် ပီ အာတ့် ရဝ်း ဇဝ်ဖြာ ဒီ အန်။ 21 ဆေ ဒေါ ရဝ်း ဇဝ်ဖြာ ဒီ မဲ၊ မဲ ပီ ဘော မုး မှာယ် မိူဝ်၊ အာဝ် လုဝ် က့လိုဝ်။ မာလဲ၊ ဆေ မဲ ဟဲ့ ပွိုန် ကွယ် ထင်ဟာင်၊ တဲး မဲ ဘော ကွယ်။ 22 ခုဝ်၊ ဆေ ဇဝ်ဖြာ ဟဲ့ ရဝ်း ဒူအီ အီ မုး မှာယ် အီ ကူပ် ညှိုမ် အန် ဇဝ်ဖြာ၊ အန် ဟဲ့ ပီ ဒူအီ အီ ကွယ် ထင်ဟာင်။ န့ ဘော ပါယ် တီ။ ဆေ ဇဝ်ဖြာ ရဝ်း ဒူအီ အီ ဟဲ့ ထင်ဟာင်၊ အန် ဟဲ့ ဝီ ဘဲန် မှာယ် ဇဝ် ယေဆူ။ 23 န့ ပီ ဇဝ်ဖြာ ဟဲ့ စိုဝ်း ဘေ၊ ဟဲ့ ဒွါ ငဝ်း တာင် ကာဆဝ်။ ကွဲ့ တဲး ဘေ ဝီ ဘဲန် မှာယ် အာဆေ။ 24 ဘေ ဘီနွင် ဒွန် အီ၊ ဒေါ ရဝ်း ဇဝ်ဖြာ ဒီ ဘေ၊ ဘေ ကွယ် ပါယ် မှဝ်၊ တဲး ဘေ ကွယ် ပါယ် တီ ဘော ဒူပ် ဇဝ်ဖြာ။

25 လွင် ဂေ ဒီဘျာ အီ တူ ခတ်၊ ဇဝ်ဖြာ တူ မိုဝ်း ဒီ ကာလာင် အုန်။ မာလဲ၊ ကူပ် မုး အုဝ် ဒူအီ ပီ ဂေဇူ ဇဝ်ဖြာ၊ န့ ကာအာပ် ဘေ ညှိုမ် အုဝ်၊ ဆေ အုဝ် မိုဝ်း အာကျာမ် အာငျာန် ဒီ ဒွါ ဒီ ဘေ။ 26 ကူပ် ဟဲ့ ကာတတ် ဒီ ဇမ် အာခြာဝ် ဒုက် တာင်၊ အုဝ် ထာင် ဘေ ဒွန် အီ လုဝ် ကွယ် ပီ ဒေါ ကွယ် ဘေ ဒေါ တီ နီ။ 27 ဆေ ဘေ အီမာယ် ဟဲ့ ဟွတ့် ခတ်၊ ကွဲ့ ကာဖာ ဒီ ဝီ ဝဲန် အီဘိုန့် ဘေ။ ဆေ ဘေ ညှမ် ခတ်၊ အာဝ် လုဝ် ခတ်။ 28 ပါယ် တီ၊ ဆေ ဘေ လာယ် ခတ် အာဝ် ဘဲန် မှာပ်။ ဆေ ဒီဘျာ ခတ် အာဝ် ဘဲန် မှာပ်။ အုဝ် ယီ နပ်၊ ဂေ အီ ဟဲ့ ဟွတ့် ခတ် တွိုန်၊ ဂေ ဒီ ခမ် ဒုက် ကာဆဝ် ဒဲင် ကာဒါယ် နီ။ အုဝ် ယီ တူ ဆီ တဲး ဘေ ခမ် ဒုက် တီ။

29 အိုယ် ဘေ ဘီနွင်၊ အုဝ် ကာလာင် ပါယ် တီ၊ ကူပ် ဟဲ့ ကာတတ် ဒီ ဝီ တး လူင် ဇဝ် ယေဆူ။ ဆိန့် ဒေါ တီ နီ၊ ဂေ အီ ဟဲ့ မိုဝ်း အီဘိုန့်၊ တဲး ဂေ ကွယ် ပီ ဒူအီ အီ တူ မိုဝ်း အီဘိုန့်။ 30 ဂေ အီ ဟဲ့ က့လိုဝ်၊ တဲး ဂေ ပီ ဒူအီ အီ တူ မိုဝ်း ဒီ က့လိုဝ် မာဆေ။ ဂေ အီ ဟဲ့ ခူယ် ကာညး မိူဝ်၊ တဲး ဂေ ပီ အီ တူ ဘျုဝ် အီ တူ ဒါခိုယ်။ ဂေ အီ ဟဲ့ စိုဝ်း ကြုဝ်ကြာမ် မိူဝ်၊ တဲး ဂေ မာတ် ကြုဝ်ကြာမ် တီ ပီ န့ တူ မုး ကြုဝ်ကြာမ် ဂေ။ 31 ဂေ အီ ဘူင် ဘဲန် မျုဝ် ဘဲန် မျုဝ် ပီ ဘူင် ဂေ ဒူအီ အီ ကွယ် ဒဲင် ကာဒါယ် နီ၊ ကွဲ့ တဲး ဂေ ထာင် အာရေ အန် ဟဲ့ တာင်။ ခုဝ်၊ ခဲ့ ကွယ် ဒဲင် ကာဒါယ် နီ၊ အာဝ် လှေန့် န့ ဒီ ဟြာယ် တူတ့် ဒွန် မျုဝ်။

32 အုဝ် ဆီ တဲး ဘေ လွတ် နဝ်း ကာဟွာ့ နဝ်း မှဲ။ ခုဝ်၊ ဂေ အီ တူ ခတ်၊ ဂေ ဟဲ့ ပွိုန် ဒီ ဘူင် ထင်ဟာင် ဂါန် ဇဝ်ဖြာ၊ ပွိုန် ဒီ ဂျုဝ်ဂျာ ဒီ ဘူင် ခဲ့ လဝ့် နဝ်း ဇဝ်ဖြာ။ 33 ဂေ အီ ဟဲ့ ဟွတ့် ခတ်၊ ဂေ ယီ လုဝ် ဂျုဝ်ဂျာ ဒီ ဘူင် ဘဲန် မျုဝ် ဘဲန် မျုဝ် ဒဲင် ကာဒါယ် နီ။ ဂေ ဘော ဘူင် တဲး န့ လဝ့် နဝ်း အီဘိုန့် ဂေ။ 34 ပါယ် တီ၊ နဝ်း ဂေ ဟဲ့ ဘဲန် အာ မျုဝ်။ ဘော အီဘိုန့် ဂေ ဒီဘျာ အီ တူ ဒိုဝ်း အီမာယ်၊ ဂေ နပ် ဒီ ဘူင် ခဲ့ ပီ အိုင် ဇဝ်ဖြာ။ ဘော ဒုဝ် ဘော နဝ်း ဂေ ဆီ ဘူင် ပီ အိုင် ဇဝ်ဖြာ။ အီဘိုန့် အီ ဟဲ့ ဟွတ့် ခတ်၊ အန် ဘော ဂျုဝ်ဂျာ ဒီ ဘူင် ဘဲန် မျုဝ် ဘဲန် မျုဝ် ဒဲင် ကာဒါယ် နီ။ အန် ဘော လုဝ် ဘူင် တဲး န့ လဝ့် နဝ်း အီမာယ် အန်။ 35 အုဝ် ကာလာင် ပါယ် တီ၊ တဲး န့ ဘဲန် အာဂျိုဝ် ဒီ ဘေ။ အုဝ် တူ ကာလာင်၊ တဲး န့ ပီ ဝန် အီ ပက် ဘေ။ အုဝ် ဒွါ အာကျာမ် အာငျာန် ဒီ ဘေ၊ တဲး န့ စွယ် ဘေ။ တဲး ဘေ ပွိုန် ဒီ ဘူင် နာ ဘွတ် နာ မွှိုမ်၊ ဘူင် နာ မုး နာ မှာန်။ ဒဲင် တီ၊ တဲး ဘေ ခတ် နဝ်း ဒီ ဘူင် မီ ပီ အိုင် ဇဝ်ဖြာ။ ကွဲ့ တဲး ဘေ မိုဝ်း နဝ်း အာ မျုဝ်။

36 ဆေ အီမာယ် အူ ဝီ ထာင် အန် ဟဲ့ ဘူင် ကာလိုပ် ဒီ ဒီဘျာ ပဲ့ ဟဲ့ ပါဝ် အုန် အန်၊ ဆေ အာဆာက် ဒီဘျာ တီ ဟဲ့ ကြဲ ဒီ ကိူန်၊ ဆေ အန် ယီ ဆီ မိုဝ်း နဝ်း ဆီ ဒိုဝ်း၊ တဲး အန် ဘူင် ဒူပ် နဝ်း အန်။ တဲး ဂါယ် ခတ်။ အန် တူ မိုဝ်း မှာပ်။ 37 မာလဲ၊ ဆေ န့ မိုဝ်း အီမာယ်၊ အီ ဟဲ့ နပ် ဆီချာ၊ အာဝ် ညှာပ် ဒီ နဝ်း အန်၊ ဟဲ့ ပဲ ဒီ အိုပ် ဒုဝ် ဘြိမ် အန်၊ အန် မိူဝ် ဟဲ့ အုန် နဝ်း တူ ဒိုဝ်း ဒီဘျာ တီ၊ ဘော ပီ ဘူင် အန် တီ ဟဲ့ မွှိုမ်။ 38 ပါယ် တီ၊ ဝီ အီ ခတ် ဒိုဝ်း ဒီဘျာ၊ အန် ဟဲ့ ဘူင် နာ မုး နာ မွှိုမ်။ ဝီ အီ တူ ခတ် ဒိုဝ်း၊ ပီ ဘူင် အန် ဟဲ့ ဝဲ ဘွတ် ဝဲ မွှိုမ်။

39 အီဘိုန့် အီ ဟဲ့ မိုဝ်း အီမာယ်၊ ဆေ အီမာယ် အန် ယီ ဆီ ကွယ်၊ အန် လုဝ် ကွယ် ရိုမ် ဒူပ် အီမာယ် အန် ကော ဇမ် ကတ် ယမ် အန်။ ဆေ အီမာယ် အန် ဟီ ဟွတ့် ယမ်၊ အန် ဟဲ့ ပွိုန် ဝီ ဒိုဝ်း အီမာယ် ပေါ အူ ဝီ ပီ ဆီ ဒိုဝ်း အန်။ မာလဲ၊ အန် ယီ လုဝ် ဒိုဝ်း ဒူအီ အီ ညှိုမ် ဇဝ် ယေဆူ။ 40 အုဝ် ယီ ထာင်၊ ဆေ အန် တူ ဝီ ခတ်၊ တူ ဝီ ဒိုဝ်း အီမာယ် ပေါ အူ ဝီ၊ အန် ဒီ ဝဲ မိုဝ်း နဝ်း ဒါခိုယ်။ ပီ ဇေန့်ဇာ အုဝ်၊ န့ ပါယ် တီ။ အုဝ် ယီ ထာင်၊ နဝ်း ဖွိုမ် ဇဝ်ဖြာ ဟဲ့ မာနုဝ် ဘော အုဝ်။