လွင် ယင် ဒုဝ် ဆတ် ပဲ့ ဟဲ့ လှူ အီ ဒီ အာရိုပ်၊ အုဝ် တဝ်း၊ အေ ဒွန် အီ ဟဲ့ ဟွတ့် နပ် ဘဲန် မျုဝ် ဘဲန် မျုဝ်။ ပီ နပ် အေ တီ ပီ ဘော ဟဲ့ မှာန် မိူဝ်၊ န့ နပ် ဒီ တဲး အေ ဘဲန် နဝ်း ပီခိုက်။ ဆေ အေ ယီ လာယ် ရွက့် လာယ် ကာဝေ၊ န့ နပ် ဒီ ဘဲန် ပ့လူမ် ဘဲန် ဟဲန့် ဒီ နဝ်း အေ။ 2 ဆေ န့ မိုဝ်း ဒူအီ အီ ထာင် အန် ဟဲ့ နပ် မင် မျုဝ်၊ အန် ယီ ညှမ် နပ် ခဲ့ ပီ လုဝ် အန် နပ်။ 3 ဆေ န့ ယီ မုး ဒူအီ အီ ရွက့် ဇဝ်ဖြာ၊ ဇဝ်ဖြာ မိူဝ် ဟဲ့ နပ် အန်။

4 လွင် ယင် ဒုဝ် ဆတ် ပဲ့ ဟဲ့ လှူ အီ ဟဝ် ဒီ အာရိုပ်၊ အေ ဟဲ့ နပ်၊ အာရိုပ် အာဝ် မိုဝ်း ဒီခုဝ်။ အေ ဘော နပ်၊ ဇဝ်ဖြာ မိုဝ်း မီ အူ ကာဒင်။ 5 အီ ဟဝ် တဝ်း၊ ဘော ဒဲင် ကာဒါယ် ဘော ခဲင် ဂါင်ဟြာဝ် န့ မိုဝ်း ဘဲန် ကာဒင် ဘဲန် ကာဒင် အီ မုး ဇဝ်ဖြာ။ (ပီ တဝ်း ဂေ၊ အူ မျုဝ် ဟဲ့ မှာန်။ န့ မိုဝ်း ဒါ ကာညာ ဘဲန် မျုဝ် ဘဲန် မျုဝ် အီ အိုပ် ဒူအီ။) 6 အေ ယီ ဟဲ့ နပ်၊ န့ မိုဝ်း မီ ဇဝ်ဖြာ အူ ကာဒင်။ အန် မုး ဂုန့် အေ အီ ဖာန် ဘ့လေး ဒွန် မျုဝ်။ အေ မိူဝ် ဟဲ့ ဘဲန် ဒူအီ ပီ အိုပ် အန်။ အေ ဘော မိုဝ်း ဒါ ကာညာ အူ ကာဒင် အီ မုး ဇဝ် ယေဆူ။ ခဲ့ ပီ မိုဝ်း ဒွန် မျုဝ်၊ န့ ဘော မိုဝ်း ကူပ် အန်။ အန် မိူဝ် ဟဲ့ ဒွါ အာဆာက် ဒီ အေ။

7 မာလဲ၊ အာဝ် မုး ဒွန် အီ အီ နပ် လွင် အန် တီ။ ဒူအီ မင် အီ ယီ ဆီ မာတ် အာရိုပ် ရာင် ပီ ဒေါ ညှမ် ညှိုမ် ဂေ။ ခုဝ်၊ ဒေါ ဟူမ် ဂေ ယင်၊ ဂေ ဝီ လှုဝ်း၊ ယင် တီ ဟဲ့ ဟွတ့် လှူ ဒီ အာရိုပ်။ ကူပ် နဝ်း ဂေ တူ မိုဝ်း ဟဲန့်၊ ဂေ ထာင် ပီ ဒီ ဟူမ် တီ ဟဲ့ ဘဲန် မှာပ် ဒီ ဂေ။ 8 ပီ ဒီ ဟူမ် တူ ပွိုန် တဲး အေ တး ကွယ် ကာဒိုက် ကာဒဝ့် ဒီ ဇဝ်ဖြာ။ ဆေ အေ တူ ဟူမ်၊ အေ မိူဝ် တူ စှိုမ် မာဆေ။ ဆေ အေ ဘော ဟူမ် အာဝ် ဘဲန် အာဂျိုဝ် မာဆေ။

9 ဆေ ဘေ ယီ ထာင် ဘေ ဟဲ့ ကွယ် ထင်ဟာင်၊ ဟဲ့ ပွိုန် ဘူင် ဒွန် မျုဝ်၊ တဲး ဘေ ဆာဒိက်၊ ကွဲ့ တဲး န့ ဒုက် ဒီ ဂေ ဒူအီ အီ ညှမ် မိုဝ်း ဟဲန့် ခဲင် နဝ်း။ 10 ဆေ မဲ ဟဲ့ နပ် လွင် အန် တီ၊ ဆေ န့ ယီ မိုဝ်း ဒူအီ အီ တူ မိုဝ်း ဟဲန့် ခဲင် နဝ်း၊ ဆေ အန် ဝီ ယိုဝ် မဲ ကွယ် ဟူမ် ခဲင် ဟုဝ် ကြိုပ် ဂေ အာရိုပ်၊ န့ ပီ မဲ ယဲတ့် အန် ဟူမ် ယင် အီ ဟဲ့ ဟွတ့် လှူ ဒီ အာရိုပ် တီ။ ဟဲ့ ဟွတ့်၊ န့ ဝီ ဘဲန် ဒုက် ဒီ နဝ်း အန် ကူပ် ထာင် အန်၊ န့ ဟဲ့ ဘဲန် မှာပ် ဒီ အန်။ 11 ပါယ် တီ၊ န့ ဒီ ဘဲန် ဒီ ဘီနွင် မဲ အီ ညှမ် မိုဝ်း ဟဲန့် ခဲင် နဝ်း အန်။ ဇဝ် ယေဆူ ယီ ဟဲ့ ယမ် ကာဒါင် အန်။ နဝ်း ဘီနွင် မဲ တီ ဒီ လိုဝ် စှိုမ် ကူပ် ပီ နပ် မဲ။ 12 ဆေ မဲ ဘူင် ကာလိုပ် ပါယ် တီ၊ န့ ဒီ တဲး ဂေ ဘီနွင် မဲ အီ ညှမ် မိုဝ်း ဟဲန့် ခဲင် နဝ်း ဝီ ဇမ် ဒုက်။ န့ ဘော ပီ မဲ ဟဲ့ ဘူင် နာ စီစိဝ် ဒီ ဇဝ် ယေဆူ။ 13 ခုဝ် အန် တီ ဆေ ပီ ဒီ ဟူမ် အုဝ် ဝီ ဘဲန် မှာပ် ဒီ ဘီနွင် အုဝ်၊ အုဝ် မိူဝ် တူ ဟူမ် ယင် ဒုဝ် ဆတ် ဒေါ မှဝ်၊ ကွဲ့ တဲး န့ ဘဲန် မှာပ် ဒီ ဘီနွင် အုဝ်။