အုဝ် ဟဲ့ ဟွတ့် ကွယ် ထင်ဟာင်။ အုဝ် မိူဝ် ဟဲ့ မုး ဒူအီ ပီ ရဝ်း ပီ တိုယ် ဇဝ် ယေဆူ။ အုဝ် ဟဲ့ ဟွတ့် ယိုဝ် ဇဝ် ယေဆူ။ ဘော ဘေ ဟဲ့ ညှိုမ် ဇဝ်ဖြာ ကူပ် တး ကာလာင် အုဝ် ဒီ ဘေ။ 2 အီ ဟဝ် ပီ ဆ တဝ်း အုဝ် မုး ဒူအီ ပီ ရဝ်း ပီ တိုယ် ဇဝ် ယေဆူ မိူဝ်၊ ကာဆိူဝ် ဘေ အုဝ် ယီ ဟဲ့ မုး။ ခုဝ်၊ ဘေ ဟဲ့ ဘဲန် ပီ ဇိုမ် ပီ ဒွက် ဇဝ်ဖြာ ဒီ ဂါန် အုဝ် အီ မုး ဂါန် ဒူအီ ပီ ရဝ်း ပီ တိုယ် ဇဝ်ဖြာ။

3 န့ မိုဝ်း ဂေ အီ ဆီ ဒမ် မှာပ် ဒီ အုဝ်။ ဒေါ ဒီမွှတ် ဇဲတ် ဂေ ဒီ အုဝ်၊ အုဝ် ဝီ တဝ်း၊ 4 ယေ ဟဲ့ ပွိုန် ဟူမ်၊ ဟဲ့ ပွိုန် ဒျီင် ဒွန် မျုဝ်။ 5 ဒေါ ဟာဝ် ယေ ဒူပ် န့တေန့်၊ ယေ ဟဲ့ ပွိုန် ဒိုဝ်း ဘော အီဘိုန့် ယေ အီ ညှိုမ် ဇဝ် ယေဆူ၊ ဟာဝ် ရိုမ် ဒူပ် ယေ။ ဘော ဒူအီ ပီ ရဝ်း ပီ တိုယ် ဇဝ် ယေဆူ၊ အီ မုး ဂေ ဝါ ဇဝ် ယေဆူ ဘော အာခေဖာတ်^a ဟဲ့ ဘူင် ပါယ် တီ။ 6 န့ ဘော ပီ ဘေ ထာင် မီ ယာယ် အာဘာနာဘ လုဝ် ရန့် ဟျီင် ဒုဝ် ဘြိမ် ယာယ်၊ တူ ပွိုန် မှာန့် ဒီ အီ။

7 အာဝ် မိုဝ်း ဒါ ဆိုက် အီ ဝီ ရန့် ဟျီင် ဒုဝ် ဘြိမ် အန်။ န့ မိူဝ် တူ မိုဝ်း ဒါ ကာညာ မာန် မာငုန် အီ တူ ဝီ ဟူမ် ဘ့လေ မာငုန် ခဲင် မာန် အန်။ ဒူအီ အီ ဟျီင် မာပဲ အီ တူ ဝီ ဒျီင် အိုမ် ပူ မာပဲ အန် မိူဝ်၊ န့ တူ မိုဝ်း။

8 လွင် အန် တီ၊ အာဝ် မုး မီ ဒူအီ အီ ဘူင် ပါယ် တီ။ ဘော ခဲင် ဘပ် ဒါရာ ဇဝ်ဖြာ ဟဲ့ ဒဲမ် အုန်။ 9 ဒါရာ ဇဝ်ဖြာ ပဲ့ ဟဲ့ ဒဲမ် အုန် အာမုဝ်ဆဲ၊ န့ တဝ်း၊ “ကွဲ့ ဒိုဝ်း ဆီဘ့လုဝ်း စှိုပ် ဒီ မူတ့် မာမက် ဒေါ ညဲတ့် အန် ဒီ ငှုဝ်။” ဇဝ်ဖြာ တူ ကာလာင် ဂြုဝ်း တီ လွင် မာမက်။ 10 အာတီ ဇဝ်ဖြာ ကာလာင် လွင် အေ၊ တဲး န့ ဘဲန် အာဂျိုဝ် ဒီ အေ။ ဒူအီ ထဲ ဒူင် နာ ဘော ဒူအီ ဆုဝ့် ငှုဝ်၊ ဂေ ရန့် ဂါန် ကူပ် ဆီ ပွိုန် ဂေ ငှုဝ်။ 11 အီ မုး ယေ၊ ယေ ကာလာင် ဂြုဝ်း ဇဝ်ဖြာ တဲး န့ လိုပ် ခဲင် နဝ်း ဘေ၊ တဲး န့ ပီ အီ ဘြတ် ဆီမာ ငှုဝ်။ ဘေ ယီ ထာင်၊ ယေ တူ ကာအာပ် ဒိုဝ်း ပီ ဒီ ဟူမ် ပီ ဒီ တာ ဒီ ဘေ။

12 ဆေ ဘေ ယီ နပ် ဒီ ဒွါ ဒီ အီ ဟဝ်၊ ဒီ ယေ ဘေ ဟဲ့ ဝဲ လုဝ် ဒွါ ကိူန်။ မာလဲ၊ ယေ တူ ဒွိုမ် ဒိုဝ်း မာဆေ ဒီ ဘေ။ ဒဲင် တီ၊ ယေ ယီ ခမ် ဒီ အူတ် ဒီ ယိူန် ဒွန် မျုဝ်၊ ကူပ် တူ ဆီ ဘူင် ယေ မာဆေ အီ တဲး အီ ဟဝ် တူ ညှိုမ် ဂြုဝ်း ပီ ကာလာင် ယေ လွင် ဇဝ် ယေဆူ အီ တဲး နဝ်း ဒူအီ ဒါခိုယ်။ 13 ဘေ လုဝ် လှုဝ်း၊ အာဆေ ဘူင် ဂါန် ခဲင် ဟုဝ် ဇဝ်ဖြာ၊ အန် လုဝ် ဟူမ် ပီ လှူ အီ ခဲင် ဟုဝ် တီ။ ဒါ အီ ဘူင် ဂါန် ဒီ ကာစှူင့် လှူ၊ အန် လုဝ် ဟူမ် ပီ လှူ ဒူအီ ဒဲင် ကာစှူင့် တီ။ 14 ပါယ် တီ၊ ဇဝ်ဖြာ ဟဲ့ ဟွတ့် ကာလာင် အုန်။ ဂေ အီ ကာလာင် လွင် ဇဝ် ယေဆူ ဟဲ့ ပွိုန် ဒိုဝ်း ဒီ ဂေ ဒူအီ အီ ထူမ်။

15 မာလဲ၊ အုဝ် ပီ ဘော ဟဲ့ ပွိုန် ဒိုဝ်း၊ အုဝ် ယီ တူ ဒွိုမ် ဒိုဝ်း၊ တူ ဒွိုမ် မှာန့် မာဆေ ဒီ ဘေ။ ပီ ဒဲမ် အုဝ် ဒေါ တီ နီ မိူဝ်၊ အာဝ် မုး ကူပ် ဆီ မှာန့် အုဝ် ဒီ ဘေ။ ဆေ အုဝ် ယီ ဒိုဝ်း ပီ ဒွါ ဘေ၊ န့ တူ တဲး အုဝ် ပီဖုင် အုဝ် လွင် အန် တီ။ ဆေ အုဝ် ဒိုဝ်း ဒီ ဘေ၊ တ အုဝ် ယမ် ဒီ အာတ့်။ 16 ဆေ အုဝ် ယီ ကာလာင် လွင် ဇဝ် ယေဆူ ချွတ် ဒူအီ တဲး န့ ဘဲန် နဝ်း ဒါခိုယ် ဒီ ဂေ၊ အုဝ် တူ ပွိုန် ပီဖုင် အုဝ်။ ခုဝ်၊ ဇဝ်ဖြာ ဟဲ့ စ်ု အုဝ် ကာလာင်။ န့ ဟဲ့ မုး ဂါန် ပီ လုဝ် ဘူင် အုဝ်။ ဆေ အုဝ် ယီ တူ ကာလာင် လွင် အန် တီ၊ န့ ဒီ ဘဲန် ဝူတ် ဒီ အုဝ်။ 17 ဆေ အုဝ် ကာလာင် ကူပ် ဆီ ကာလာင် အုဝ်၊ အုဝ် မိူဝ် ဒီ ပွိုန် ဒီ ဒိုဝ်း ရုး အန်။ မာလဲ၊ အုဝ် ကာလာင် ကူပ် စ်ု ဇဝ်ဖြာ အုဝ် ကာလာင်။ 18 ကူပ် န့ ပါယ် တီ၊ အုဝ် တူ ပွိုန် ဒိုဝ်း မာဆေ၊ တဲး န့ ဘဲန် ရုး ပီ ကာလာင် အုဝ်၊ ဇဝ်ဖြာ ဟဲ့ ခ့ဝါင် အုဝ် ဝိန် ဒီ ကာလာင် လွင် အန်။ အန် တူ တဲး ဂေ အီ ပွိုန် ဒီ ထူမ် လုဝ် တူတ့် မာဆေ။ ခုဝ်၊ အုဝ် မိူဝ် တူ မှာန့် ခေါ အူ မျုဝ် ဆေ အုဝ် ကာလာင် လွင် ဇဝ်ဖြာ ချွတ် ဘေ၊ တဲး နဝ်း ဘေ ဒါခိုယ်။

19 အုဝ် ဟဲ့ မုး ဒူအီ အီ ကွယ် ထင်ဟာင်၊ ကွယ် ဒါခိုယ်၊ တူ မုး မှာယ် အာဆေ။ အုဝ် ယီ ခမ် ဒီ ဘဲန် မှာယ် ဒူအီ ဒွန် အီ ကူပ် ဆီ တဲး အုဝ် ဒူအီ ကိူန် ညှိုမ် ဇဝ် ယေဆူ။ 20 ဒေါ ကွယ် ရိုမ် အုဝ် ဒူပ် ဒူအီ အာယူဒါ၊ အုဝ် ဘူင် ပီ ဒူအီ အာယူဒါ၊ တဲး ဂေ မိုဝ်း နဝ်း ဆီ ညှိုမ်။ အုဝ် ပီ ဆ ဘူင် ဒူပ် ဒါရာ အာမုဝ်ဆဲ မိူဝ်၊ ဒေါ ကွယ် အုဝ် ဒူပ် ဒူအီ အီ ဒူပ် ဒါရာ တီ၊ အုဝ် မိူဝ် ဘူင် ဒူပ် ပီ ဂေ၊ တဲး ဂေ မိုဝ်း နဝ်း ဆီ ညှိုမ်။ 21 ပါယ် တီ၊ ဒေါ ကွယ် ရိုမ် အုဝ် ဒူပ် ဂေ ဒူအီ အီ တူ ဒူပ် ဒါရာ အာမုဝ်ဆဲ၊ အုဝ် မိူဝ် ဘူင် ပီ ဂေ၊ တဲး ဂေ အီ တူ ဒူပ် ဒါရာ တီ ဘော မိုဝ်း နဝ်း ဆီ ညှိုမ်။ (အာဝ် မုး အုဝ် ဘူင် ကာဘး ဒီ ဒါရာ ဇဝ်ဖြာ။ အုဝ် ဒူပ် ဒါရာ ဇဝ် ယေဆူ။)

22 ဒေါ ကွယ် ရိုမ် အုဝ် ဒူပ် ဂေ အီ ဒီလှး၊ တူ မိုဝ်း ပ့လူမ်၊ ဘော အုဝ် ဟဲ့ ဘဲန် ပီ ဂေ၊ တဲး ဂေ ဘော မိုဝ်း နဝ်း ဆီ ညှိုမ်။ ပါယ် တီ၊ အုဝ် ခမ် ဒီ ဘူင် ဒွန် မျုဝ် အာဒါ ဒူအီ ဒွန် အီ၊ တဲး အုဝ် ဘူင် ခဲ့ ပီ ပွိုန် အုဝ် ဒီ ဘူင် တဲး န့ ချွတ် ဒူအီ မင် အီ။ 23 ပီ ဘူင် အုဝ် ဇိုဝ် တီ ဒွန် မျုဝ်၊ အုဝ် ဘူင် ကူပ် ညှိုမ် အုဝ် ဇဝ်ဖြာ အီ တဲး ဒူအီ ဘဲန် နဝ်း ဒါခိုယ်၊ တဲး ဘော အုဝ် ပွိုန် အာဂျိုဝ် အန် တီ။

24 ဘေ လုဝ် လှုဝ်း၊ ဆေ ဒူအီ လာယ် ကာခဲန့် ကာဘ့လဲပ်၊ န့ မိုဝ်း ဒူအီ ကိူန် အီ လာယ် ကာခဲန့်။ န့ ယီ မိုဝ်း အူ ဝီ အီ ဒီ အွင်၊ အီ ပွိုန် လက်ဆွင်။ ကူပ် န့ ပါယ် တီ၊ တဲး အေ ပီ ဒူအီ အီ ကာဘ့လဲပ် ဟဲ ဟဲ၊ တဲး အေ ပွိုန် လက်ဆွင် ပီ ဒွါ ဇဝ်ဖြာ။

25 ဂေ အီ ဒီ လာယ် ကာခဲန့်၊ ဂေ ဘော နပ် ဒီ ခါနှာပ် ဒုဝ် ဘြိမ် ဂေ။ ဂေ ဘော ဖိုက် ပ့လူမ် ဖိုက် ဟဲန့် ဂေ ဒွန် မျုဝ်၊ တဲး ဂေ ပွိုန် လက်ဆွင် အီ မုး မင်ဂိုမ်။ ဒူအီ ယီ ဘူင် မင်ဂိုမ် တီ၊ တာ လှာ ဟေ အီ စှိတ် အူ ကာစန်။ ဟဲ့ ဟွတ့်၊ န့ ဝီ ဟျီ့ ကာဟဝ်း လိုဝ် တူတ့်။ အီ မုး ယေ၊ ယေ ဘော ဂျုဝ်ဂျာ ဒီ ဘူင်၊ တဲး ယေ ပွိုန် မင်ဂိုမ် အီ ကွယ် ဆေဆေ၊ အီ တူ နပ် ဒီ လိုဝ်၊ တူ နပ် ဒီ စှိုမ်။ 26 ကူပ် န့ ပါယ် တီ၊ အုဝ် တူ ပီ ဒူအီ အီ ကာဘ့လဲပ် ဒီလူယ် ဒီလာယ်၊ တူ မိုဝ်း ပီ ခြာမ်။ အုဝ် တူ ကာလိုမ် ဝတ် ခဲင် ဒီဝူင့် ဒီဝပ်။

27 အုဝ် ဘော အူတ် ဘော ယိူန် ခါနှာပ် ဒုဝ် ဘြိမ် အုဝ် တဲး အုဝ် အိုပ် တူတ့်၊ ယုဝ် အုဝ် ဝီ စှိုမ် ဝါယ် ဟဲ့ ဟွတ့် မာနုဝ် အုဝ် ဒီ အီ ဟဝ်။