အိုယ် ဘေ ဘီနွင်၊ အုဝ် ဆီ တဲး ဘေ လှုဝ်း၊ ဒေါ မုး စုဝ် ဂုန့် ဒင် အေ တွိုန်၊ န့အု ဟဲ့ ဂွင့် ရဲ ဂေ ဒွန် အီ။ ဂေ ဒွန် အီ ဘော ပွိုန် ဒီ ကာလုဝ်း ဆီချာ အိုမ် ဒီနှူင် ရေန့် တွိုန်။ 2 ဒေါ ဒူပ် ဂေ န့အု ဘော ဒေါ ကာလုဝ်း ဂေ အိုမ် တီ၊ န့ ပီ ဂေ ဒွန် အီ ဟဲ့ စိုပ် ခဲင် အိုမ်၊ တဲး ဂေ ဘဲန် ဒီဘဲ ဒါ ဆာရာ အာမုဝ်ဆဲ။ 3 ဂေ ဒွန် အီ ဘော ဟူမ် ပီ ဒီ ဟူမ် အူ မျုဝ် အီ ဟျီင် နဝ်း ဖွိုမ် ဂေ။ 4 ဂေ ဘောကာဂ့လျီတ် ဘော ဒျီင် အိုမ် အူ မျုဝ် အီ ဟျီင် နဝ်း ဖွိုမ် ဂေ။ ဂေ ဟဲ့ ဒျီင် အိုမ် အီ လေး ခဲင် ဒါအာင် မာဝ်။ ဒါအာင် မာဝ် တီ၊ န့ ပီ ဇဝ် ယေဆူ အီ ဟဲ့ ဟာဝ် ရိုမ် ဒူပ် ဂေ။ 5 ပီ ဘော ဟဲ့ ပါယ် တီ မိူဝ်၊ ဂေ ဒူအီ အီ တူ လဝ့် နဝ်း ဇဝ်ဖြာ ဟဲ့ ကိူန် ကာဆဝ်။ ဂေ ဘော ယမ် ခုင်ခြဝ်း ခဲင် ပြဲ ကာဟဝ်း။

6 လွင် အန် တီ၊ ဟဲ့ ဘဲန် အူဖာမာ ဒီ အေ ဒေါ တီ နီ၊ တဲး အေ နပ် ဒီ ဆာဒိက်၊ ကွဲ့ တဲး အေ ကာဒိုက် ကာဒဝ့် နာ မိူက် နာ ဟာယ် ပီ ဂေ။ 7 ကွဲ့ တဲး အေ ကြိုပ် အာရိုပ် ပီ ဂေ ဒူအီ မင် အီ။ န့ ဟဲ့ ဒဲမ် အုန် ခဲင် ဘပ် ဇဝ်ဖြာ တဝ်း၊ “ဂေ ဒူအီ ကိူန် ဟဲ့ ဟူမ် ရိုမ် ဒျီင် ရိုမ် ဒဲင် မာတိန့်။ ဟဲ့ ဟွတ့်၊ ဂေ ဘော ဝီ ယိတ့် ဂါ ဆီနန် ဆီနိူင်။” 8 ကွဲ့ တဲး အေ လာယ် လုတ့် လာယ် လာယ် ပီ ပဲ့ ဟဲ့ ဘူင် ဂေ ဒူအီ မင် အီ တွိုန်။ ကူပ် ဘူင် ဂေ ပါယ် တီ၊ အူ ဆီငဲ ဒူအီ ဂေ မိူဝ် ယမ် အာဒါ အာ မှိုန့် ဒီ အူယ် ဟြဲန့် ဝီ။ 9 ကွဲ့ တဲး အေ ထေဝ် ယုဝ် ဇဝ် ယေဆူ ဒီ ဒမ် မှာပ် ဒီ အေ ပီ ဂေ ဒူအီ မင် အီ အီ ဟဲ့ ထေဝ် ဇဝ်ဖြာ။ ကူပ် ဘူင် ဂေ ပါယ် တီ၊ ဂေ ဘော ခမ် မာဟန့် ဇုဝ့် ယမ် ဂေ။ 10 ကွဲ့ တဲး အေ ပိုန့် ပီ ပဲ့ ဟဲ့ ဘူင် ဂေ တီ။ ကူပ် ပိုန့် ဂေ မင် အီ၊ ဂေ လုဝ် ခမ် တဲး အာမူ အာမာတ် ဇဝ်ဖြာ ပျာတ့် ဂေ။

11 လွင် အီ ဟဲ့ ဒွိုမ် ဘဲန် ဒီ ဂေ ဒေါ မွိုန်၊ န့ ဟဲ့ ဒဲမ် အုန်၊ တဲး န့ ဘဲန် အူဖာမာ ဒီ အေ ဒူအီ ဘောကာဂ့လျီတ်။ တဲး အေ နပ် ဒီ ဆာဒိက် ကူပ် ဟဲ့ ကာတတ် ဒီ တူတ့် ဒွန် ဇာတ်။ 12 ခုဝ်၊ အာဆေ တဝ်း၊ အန် ဟဲ့ မန် ဆီချာ၊ တဲး အန် ဆာဒိက် ယုဝ် အန် ဒီ စှိုမ်။ 13 လွင် အီ ထေဝ် နဝ်း ပဲ့ ဟဲ့ ခမ် ဘေ ဒွန် မျုဝ်၊ အာဝ် မိုဝ်း ခေါ အူ မျုဝ်၊ ပီ တူ ဒွိုမ် ခမ် အီ ဟဝ်။ ဇဝ်ဖြာ ယီ မိုဝ်း နဝ်း ဆိူဝ် နဝ်း မှာန်။ အန် ဇဝ် တူ တဲး ဘေ ခမ် ပီ တူ ပဲ ဘေ ဒီ ခမ်။ ပါယ် တီ၊ ဒေါ ခမ် ဘေ အီ ထေဝ် နဝ်း တီ၊ အန် ဇဝ် ဒီ ဝီ နှဲ န့တေန့်၊ တဲး ဘေ ပွိုန် ဒီ လွတ်၊ တဲး ဘေ ပဲ ဒီ ခမ်။

14 ခုဝ် အန် တီ ဘေ ဘီနွင် ပီ ရွက့် အုဝ်၊ တဲး ဘေ စူ ကြိုပ် အာရိုပ် ရာင်။ 15 အုဝ် ဟဲ့ မာတ် ဘေ မုး ဒူအီ အီ မိုဝ်း အာငျာန်။ ဂြုဝ်း ပီ ကာလာင် အုဝ် တီ၊ တဲး ဘေ ကာဒွါ့ ကာဖာ ရာင် အာဆေ ရာင် အန်။ 16 ဒေါ ဟူမ် အေ ဘ့လွယ် အီ လှုဝ်း ဇဝ် ယေဆူ၊ အေ ဘော ဒိုဝ်း ဆီလယ့် ဘော ဒါင် ဂုင် ဂေဇူ ဒီ ဇဝ်ဖြာ။ ဒေါ ဒျီင် အေ ခဲင် ဆီလယ့် တီ၊ န့ ပီ အေ ဟဲ့ ဘျ အေ ဟဲ့ ကွယ် ရိုမ် ဒူပ် ဇဝ် ယေဆူ ကူပ် ဟဲ့ လေး နှာမ် အန် ဒီ ဒုဝ် အန်။ ဘော ခါမုန် ပီ ကာဘက် အေ၊ န့ ဘော ပါယ် တီ။ ဒေါ ဟူမ် အေ ခါမုန် တီ၊ န့ ဘျ လွင် ဟဲ့ ကာဒိုက် ကာဒဝ့် အေ ဒီ ဇဝ် ယေဆူ ကူပ် ဟဲ့ လိုဝ် ဒုဝ် ဘူင့် အန်။ 17 အေ ပီ ဘော ကိူန် ခဲ့ မှဝ် မိူဝ်၊ အေ ယီ ဟူမ် ခါမုန် အူ ဘူင့်။ ခုဝ်၊ အေ ဟဲ့ ပီ ဒုဝ် ဘူင့် အူ ဘူင့် ကူပ် ဟဲ့ ဟူမ် ရိုမ် အေ ခါမုန် အူ ဘူင့် တီ။

18 တဲး ဘေ ကာဖာ ယွတ် ပီ ပါယ် ဂေ ဒူအီ အီဆာရေလ ဒေါ မွိုန်။ ဂေ အီ ဟူမ် ပီ လှူ အီ ဒဲင် ကာစှူင့် လှူ၊ ဂေ ဟဲ့ လာယ် ဖြူမ် ရိုမ် ဘော ကွယ် ကာဒိုက် ကာဒဝ့် ဒီ ကာစှူင့် လှူ တီ။ 19 ဆေ န့ ယီ မုး ပီ လှူ အီ ဒီ အာရိုပ်၊ အုဝ် တူ တဝ်း၊ ပီ လှူ ဒီ အာရိုပ် တီ ဟဲ့ ဘွတ် ဟဲ့ မွှိုမ်။ အုဝ် ယီ တူ တဝ်း၊ ဟဲ့ လုဝ် ရီမာတ် အာရိုပ် တီ။ 20 အုဝ် တဝ်း၊ ပီ လှူ အီ ဒီ အာရိုပ် ရာင် တီ၊ အာဝ် မုး ဂေ လှူ ဒီ ဇဝ်ဖြာ။ ဂေ လှူ ဒီ ကာနမ်။ မာလဲ၊ အုဝ် တူ ဆီ တဲး ဘေ ကာဒိုက် ကာဒဝ့် ဒီ ကာနမ်။ 21 ဘေ တူ ပွိုန် ဒျီင် အိုမ် အီ ပီ နှာမ် ဇဝ် ယေဆူ ဘော ဒျီင် ပီ လှူ ဂေ ဒီ ကာနမ်။ ဘေ မိူဝ် တူ ပွိုန် ဟူမ် ခါမုန် အီ ပီ ဒုဝ် ဘူင့် ဇဝ် ယေဆူ ဘော ဟူမ် ပီ လှူ ဂေ ဒီ ကာနမ်။ 22 အေ တူ ပွိုန် ကာဘး ဒီ ဇဝ်ဖြာ၊ တဲး အန် ရူ ဒီ အေ။ အေ တူ မိုဝ်း ပွုန် လွှိုမ် အန်။

23 ဒူအီ မင် အီ တဝ်း၊ “အေ ပွိုန် ဘူင် တူတ့် ဒွန် မျုဝ်။” အုဝ် ယီ တဝ်း၊ န့ တူ မုး ဒွန် မျုဝ် အီ ဘဲန် အာဂျိုဝ် ဒီ အေ။ ဟဲ့ မှာန် ဆေ ဂေ တဝ်း၊ “အေ ပွိုန် ဘူင် တူတ့် ဒွန် မျုဝ်။” န့ ယီ တူ မုး ဒွန် မျုဝ် အီ စွယ် နဝ်း အေ။ 24 ဒွန် အီ တူ လုဝ် ဟြေတ့် ဘဲန် မျုဝ် ဘဲန် မျုဝ်၊ တဲး န့ ဘဲန် အာဂျိုဝ် ဒီ ဒုဝ် ဘြိမ် အန်။ အန် လုဝ် ဟြေတ့် အီ ဒီ ဘဲန် အာဂျိုဝ် ဒီ အီ ဟဝ်။

25 ယင် ပီ ယွင့် အီ ခဲင် ကာလး၊ ဟဲ့ ပွိုန် စိုဝ်း ဒီ ဟာပ် ဒွန် မျုဝ်။ မာလဲ၊ အာဝ် လုဝ် ဒီမွှတ် မာဆေ၊ ကွဲ့ တဲး ဘေ ဝီ ဘဲန် ဇေန့်ဇာ ခဲင် နဝ်း ဘေ ယုဝ် ပီ ဘူင် ဘေ ဟဲ့ မှာန် တူ မှာန်။ 26 ခုဝ်၊ ခဲင် ဘပ် ဇဝ်ဖြာ ဟဲ့ ဒဲမ် တဝ်း၊ “ကာဒါယ် ဘော အီ ကွယ် ဒဲင် ကာဒါယ် ဒွန် မျုဝ်၊ ဟဲ့ မုး တူတ့် ကြုဝ် ဇဝ်ဖြာ။”

27 ဆေ ဒူအီ အူ ဝီ အီ တူ ညှိုမ် ဇဝ် ယေဆူ ဘော ဘာင် မဲ တး ဟူမ် ဘူမ် ခဲင် ကာင် အန်၊ ဆေ မဲ ဆီ ဟူမ် ပီ ဘ့လေး အန်၊ တဲး မဲ ဟူမ်။ မာလဲ၊ အာဝ် လုဝ် ဒီမွှတ် မာဆေ န့ မုး၊ အာဝ် လုဝ် ဝီ ဇေန့်ဇာ ခဲင် နဝ်း၊ ယုဝ် ဟဲ့ ပွိုန် ဟူမ် တူ ပွိုန် ဟူမ်။ 28 မာလဲ၊ ဆေ န့ မိုဝ်း အီ တဝ်း ဒီ မဲ၊ “ပီ ဒီ ဟူမ် နီ၊ ဟဲ့ ဟွတ့် လှူ ဒီ အာရိုပ်၊” မဲ ကွဲ့ ဟူမ်။ မဲ လုဝ် ကာဖာ ဒါင် ဒူအီ အီ ကာလာင် ဒီ မဲ တီ၊ ကွဲ့ တဲး န့ ကာဝှ်ု ခဲင် နဝ်း အန်။ 29 အုဝ် တူ ကာလာင် လွင် နဝ်း မဲ။ အုဝ် ကာလာင် လွင် ဒူအီ အီ ကာလာင် ဒီ မဲ တီ။ မင် အီ ယီ နပ် ဒီ ဒီမွှတ် တဝ်း၊ “မှဝ် န့ ပါယ် ပီ လုဝ် အုဝ် တဲး အီ ဟဝ် အိုပ် နဝ်း အုဝ်။း အုဝ် ကွယ် ထင်ဟာင်။ 30 ဆေ အုဝ် ဟဲ့ ဟွတ့် ဆာခိုဝ် ဒါင် ဂုင် ဂေဇူ ဒီ ဇဝ်ဖြာ ဘော ဟူမ် ပီ ဒီ ဟူမ် တီ၊ မှဝ် န့ ပါယ် ပီ လုက်တာယ် အီ ဟဝ် ဒီ အုဝ် ကူပ် ဟူမ် အုဝ် ပါယ် တီ။း”

31 အုဝ် ယီ တဝ်း၊ ဘော မုး ဇိုဝ် မှဝ် အာဝ် တဝ်း၊ ခဲ့ ပီ ဘူင် ဘေ ဒွန် မျုဝ်၊ ဘော မုး ပီ ဟူမ် ပီ ဒျီင် ဘေ၊ တဲး ဘေ ဘူင် တူတ့် ဒွန် မျုဝ်၊ တဲး အီ ဟဝ် ပွိုန် ဒီ အိူပ် ဇဝ်ဖြာ။ 32 ခဲ့ ပီ ဘူင် ပီ ရန့် ဘေ ဒွန် မျုဝ်၊ ကွဲ့ ဘူင် တဲး န့ တဲး ဒူအီ ကာလိုပ်။ ဘော မုး ဒူအီ အာယူဒါ၊ ဘော မုး ဒူအီ အာမျုဝ် ဟဝ်၊ ဘော မုး ဒူအီ ခဲင် ဖိုင် ဇဝ် ယေဆူ အီ မုး ဒူအီ ပီ အိုပ် ဇဝ်ဖြာ၊ တဲး ဂေ ဘောကာဂ့လျီတ် အိူပ် ဇဝ်ဖြာ။ 33 တဲး ဘေ ဘူင် ပီ အုဝ်။ အုဝ် ဘော ဂျုဝ်ဂျာ ဒီ ဘူင် တဲး န့ လဝ့် နဝ်း ဒွန် အီ။ အုဝ် ယီ တူ ဘူင် တဲး န့ ဘဲန် အာဂျိုဝ် ဒီ အုဝ်။ အုဝ် ဆီ တဲး ပီ ဘူင် အုဝ် ဘဲန် အာဂျိုဝ် ဒီ ဒူအီ ကိူန်၊ တဲး ဇဝ်ဖြာ ပွိုန် ဒီ ချွတ် ဂေ ကိူန်။