ခါန် 11
တဲး ဘေ ညိုင် အုဝ် ပီ အုဝ် ဟဲ့ ညိုင် ဇဝ် ယေဆူ။
2 အုဝ် အိူပ် ဘေ ကူပ် ဟဲ့ လှုဝ်း ဘေ ဒီ အုဝ် ဆေဆေ။ ဘေ ဟဲ့ ဘူင် ဒူပ် ဘော ဒါရာ ဇဝ်ဖြာ ပီ မာနုဝ် အုဝ် ဒီ ဘေ။ 3 မာလဲ၊ အုဝ် ဆီ တဲး ဘေ နပ် ဆီချာ၊ အီမာယ် ဒွန် အီ ဟဲ့ ပွိုန် အာဆာက် ကာမာယ် ဒီ ဇဝ် ယေဆူ။ ခုဝ်၊ ဇဝ် ယေဆူ ဟဲ့ ပီ ဂိန့် အီမာယ် ဒွန် အီ။ အီဘိုန့် ယီ ဟဲ့ ပွိုန် အာဆာက် ဒီ အီမာယ်။ ခုဝ်၊ အီမာယ် ပီ ဂိန့် အီဘိုန့်။ ဇဝ် ယေဆူ ယီ တး ဒူင် ကွယ် ဇဝ်ဖြာ၊ တဲး န့ ပီ ဇဝ်ဖြာ ဟဲ့ ဘဲန် ဂိန့် အန်။ 4 ခုဝ်၊ အီမာယ် ဒွန် အီ၊ ဆေ အန် ဆာခိုဝ် ဒီ ဇဝ်ဖြာ ဘော ဘျာန် ဂြုဝ်း ဇဝ်ဖြာ၊ ဆေ အန် ယီ ကာမှုဝ့် ဂိန့် အန်၊ န့ ပီ အန် ဖျာက် ဆာရေ ဇဝ် ယေဆူ အီ ပီ ဂိန့် အန်။
5 ဘေ ယီ တဝ်း လွင် အီဘိုန့်၊ ဆေ အန် ဆာခိုဝ် ဘော ဘျာန် ဂြုဝ်း ဇဝ်ဖြာ၊ ဆေ အန် တူ ဒိုဝ်း မာဆေ ကာမှုဝ့် ဂိန့် အန်၊ န့ ပီ အန် ဖျာက် ဆာရေ အီမာယ် အန် အီ ပီ ဂိန့် အန်။ ဘေ တဝ်း၊ န့ မွှိုမ် ဆာယ်၊ ဟဲ့ ပီ အန် ကပ် ဂ့လ ဂိန့် အန်။ 6 ဘေ ဘော နပ် ဒီ တဝ်း၊ ဆေ အီဘိုန့် တူ ဆီ ကာမှုဝ့် ဂိန့် အန်၊ တဲး ဘေ ကပ် ဝဲန် ဟိုက် ဂိန့် အန်။ မာလဲ၊ အုဝ် တဝ်း၊ ဆေ ဘေ ကပ် ဂ့လ ဟိုက် ဂိန့် အီဘိုန့်၊ န့ မွှိုမ် ဆာယ် ကာဆဝ်။ ခုဝ်၊ တဲး အန် ကာမှုဝ့် ဂိန့် အန်။ 7 ဆေ န့ မုး အီမာယ်၊ အန် တူ လုဝ် ကာမှုဝ့် ဂိန့် အန် ကူပ် ဖာန် ဘ့လေး ဇဝ်ဖြာ အာရိုပ် အန်၊ တဲး အန် ပီ ဇဝ်ဖြာ။ အာဖုင် ဒင်ခုဝ် အန် ဇဝ် မိူဝ် ဟဲ့ ကွယ် ရိုမ် ဒီ အန်။ အီဘိုန့် ယီ မိုဝ်း ဆာရေ ကူပ် ဒူပ် အန် အီမာယ် အန်။ 8 ခုဝ်၊ ဒေါ ဖာန် ဘ့လေး ဇဝ်ဖြာ ဒီ ဒူအီ၊ အန် တူ ဒိုဝ်း ဒုဝ် အီမာယ် ဒီ ဒုဝ် အီဘိုန့်။ အန် ဒိုဝ်း အီဘိုန့် ဒီ ဒုဝ် အီမာယ်။ 9 ဒဲင် တီ၊ ဇဝ်ဖြာ တူ ဖာန် ဘ့လေး အီမာယ်၊ တဲး အန် စွယ် အီဘိုန့်။ အန် ဇဝ် ဖာန် ဘ့လေး အီဘိုန့်၊ တဲး အန် စွယ် အီမာယ်။ 10 ပါယ် တီ၊ ကူပ် ယိုဝ် ဂေ အာမူ အာမာတ် ဇဝ်ဖြာ ခဲ့ ပီ ဘူင် အေ ဒွန် မျုဝ်၊ အီဘိုန့် ဟဲ့ ဟွတ့် မိုဝ်း ပွုန် ဒီ ဘူင် ခဲ့ ကာအာပ် ဘူင် ဒီ ဂိန့် အန်။a
11 ဆေ အီဘိုန့် ဂါယ် အီမာယ် ညှိုမ် ဒူပ် ဇဝ်ဖြာ၊ အီဘိုန့် အာဝ် ပွိုန် တဝ်း၊ အန် တူ လုဝ် အီမာယ်။ ဘော အီမာယ် အာဝ် ပွိုန် တဝ်း၊ အန် တူ လုဝ် အီဘိုန့်။ 12 ခုဝ်၊ အီဘိုန့် ဟဲ့ လေး တး ဒီ အီမာယ်။ အီမာယ် ပီ ဝီ ဂွိုတ် တး ဒီ အီဘိုန့်။ ခဲ့ မိုဝ်း ဒွန် မျုဝ် ဟဲ့ တး တူတ့် ဒီ ဇဝ်ဖြာ။ 13 ခုဝ်၊ န့ ကွယ် ဒီ ဘေ၊ တဲး ဘေ ကာဖာ ရာင် ဘေ၊ ယုဝ် န့ ကာအာပ် အာဝ် ကာအာပ် အီဘိုန့် ကာမှုဝ့် ဂိန့် အန် ဒေါ ဆာခိုဝ် ကြိုပ် ဇဝ်ဖြာ။ 14 တဲး ဘေ ဒူပ် ပီ ထာင် နဝ်း ဘေ။ ဆေ အီမာယ် ဝါင် တဲး ဟိုက် ဂိန့် အန် ဒီတူင့်၊ ယုဝ် အန် မိုဝ်း တူ မိုဝ်း ဆာရေ။ 15 အီဘိုန့် မိူဝ် ပါယ် တီ။ ဆေ အန် ဝါင် တဲး ဟိုက် ဂိန့် ဒီတူင့်၊ ယုဝ် န့ တဲး တူ တဲး အန် မိုဝ်း ဆာရေ။ ခုဝ်၊ ဟိုက် ဂိန့် အန် တီ ဟဲ့ ဘဲန် အီ ကာမှုဝ့် ဂိန့် အန်။ 16 ဆေ န့ ယီ မိုဝ်း ဒူအီ အီ ဆီ ထဲန့် လွင် အန် တီ၊ ယေ တူ မိုဝ်း ဟိတ် ဒီ ဘူင် ပါယ် တီ။ ဘော ခဲင် ဖိုင် ဂေ ဒူအီ အီ ညှိုမ် ဇဝ်ဖြာ ဘဲန် ပ့လုဝ့် ဘဲန် ပ့လုဝ့် တူ မိုဝ်း ဟိတ် ပါယ် တီ။
17 လွင် ပီ ဒီ လုဝ် အုဝ် မာနုဝ် ဒီ ဘေ ပေါ မ့ပွါ၊ အုဝ် အာဝ် ဟူ ပွိုန် အိူပ် ဘေ။ ခုဝ်၊ ဒေါ တး ကာဇု ဘေ၊ ကြိုပ် ဆာခိုဝ် ဒီ ဇဝ်ဖြာ၊ ဘေ ဘူင် အီ တူ မွှိုမ် ကိူန် လွှိုမ် ပီ ဘူင် ဘေ အီ မွှိုမ်။ 18 ပီ ယိုဝ် အုဝ် လွင် ဘေ ဒီ အာတ့်၊ အုဝ် ယိုဝ် ဘေ ဒူအီ ခဲင် ဖိုင် ဇဝ် ယေဆူ မင် အီ၊ ဘေ တူ လာယ် ဖြူမ် ဒေါ တး ကြိုပ် ဆာခိုဝ် ဘေ ဒီ ဇဝ်ဖြာ။ ပဲ့ ဟဲ့ ယိုဝ် အုဝ် တီ၊ အုဝ် ထာင် ဟဲ့ မှာန် နာ ကိူန်။ 19 အူ မျုဝ် ဘော ဟဲ့ မှာန် လွင် အန် တီ။ ဘေ လုဝ် လာယ် ကာဘး၊ လာယ် ကာထဲန့်၊ တဲး န့ လေး ဆီချာ၊ အာဆေ မုး ဒူအီ အီ ဘူင် ပီ အိုင် ဇဝ်ဖြာ။
20 ဆေ ဘေ ယီ တး ကာဇု ဟူမ် ရိုမ်၊ အာဝ် မုး ဘေ တး ကာဇု ဟူမ် ဘ့လွယ် လှုဝ်း ဘေ ဇဝ် ယေဆူ။ 21 ခုဝ်၊ ဒေါ ဟူမ် ရိုမ် ဘေ တီ၊ ဘေ တူ လာယ် ဘ်ု။ ဘေ ဘော ပီခြန် ဒီ ဟူမ် ရာင် အာဆေ ရာင် အန်။ မင် အီ ဟဲ့ ဟူမ် ကော ယိုတ့်။ မင် အီ ဆီ ကာပြာန့်၊ ညှမ် ပွိုန် ဒီ ဟူမ် မာဆေ။ 22 တဲး ဘေ ဟူမ် ဘေ ဒျီင် ဒီ ကာင် ဘေ။ ဘေ တူ ရုဝ်ဆေ ဖိုင် ဇဝ် ယေဆူ အီ မုး ဒူအီ ပီ အိုပ် ဇဝ်ဖြာ။ ဘေ ဘူင် တဲး ဒူအီ ဂိန် ဒူအီ အေတ့် မွှိုမ် ဆာယ်။ အုဝ် ဟူ နပ် ပီ ဒီ ပါယ် အုဝ် ဒီ ကာလာင် ဒီ ဘေ လွင် အန် တီ။ ကူပ် ဘူင် ဘေ ပါယ် တီ၊ အုဝ် ဟူ ပွိုန် အိူပ် ဘေ။
23 အုဝ် ဒိုဝ်း ပီ မာနုဝ် ဇဝ်ဖြာ ဒီ အုဝ်၊ ဝီ မာနုဝ် ဘေ။ ပါယ် တီ၊ ခဲင် မှိုဝ် ဒေါ ဒီ အာပ် ဂေ ဇဝ် ယေဆူ ဒီ ရန်ဆူ အန် တွိုန်၊ အန် ဇဝ် ဟဲ့ ဒိုဝ်း ခါမုန် 24 ဘော ဒါင် ဂုင် ဂေဇူ ဒီ ဇဝ်ဖြာ၊ ကာဘက် ခါမုန် တီ တဝ်း၊ “ခါမုန် နီ၊ န့ ပီ ဒုဝ် ဘူင့် အုဝ် ပီ ဒွါ အုဝ် ဒါင် ဘေ။ တဲး ဘေ ဟူမ် ခါမုန် နီ၊ တဲး ဘေ လှုဝ်း ပဲ့ ဟဲ့ ဘူင် အုဝ် ဒါင် ဘေ။” 25 ပါယ် တီ၊ ဒေါ ဟဲ့ ဟွတ့် ဂေ ဟူမ်၊ အန် ဇဝ် ဝီ ဒိုဝ်း ဆီလယ့် အိုမ် မာငုန် တဝ်း၊ “ဆီလယ့် နီ၊ န့ ဘျ ကာဒိက် ဆတ်ဇာ ကာမာယ် ပီ ဒွါ ဇဝ်ဖြာ ဒီ ဘေ ကူပ် လေး နှာမ် အုဝ် ဒီ ဒုဝ် အုဝ်။ ဒွန် ဇေန့် ဒေါ ဒျီင် ဘေ အိုမ် ခဲင် ဆီလယ့် နီ၊ တဲး ဘေ လှုဝ်း ပဲ့ ဟဲ့ ဘူင် အုဝ် ဒါင် ဘေ။” 26 ခုဝ်၊ အုဝ် တဝ်း၊ ဒွန် ဇေန့် ဒေါ ဟူမ် ဘေ ခါမုန် ဘော ဒျီင် အိုမ် ခဲင် ဆီလယ့် နီ၊ ဘေ ဒီ ဘော တဲး အီ ဟဝ် နပ် လွင် ဇဝ် ယေဆူ ဟဲ့ ခမ် ဒီ ယမ် ကာဒါင် အေ။ ဘေ လုဝ် ဘူင် ပါယ် တီ၊ တဲး န့ ကော ဇမ် ပန် ဒီ ဝီ တး အန် ဇဝ်။
27 ခုဝ်၊ ဆေ န့ မိုဝ်း မင် အီ အီ ဘူင် ပီ တူ ကာအာပ် ဘူင်၊ ယီ ဟူမ် ခါမုန် တီ ဘော ဒျီင် အိုမ် ခဲင် ဆီလယ့် တီ၊ ဒူအီ ဂေ တီ ဟဲ့ ဟွတ့် လုတ့် ကူပ် တူ ရုဝ်ဆေ ဂေ ဒုဝ် ဘူင့် ဇဝ် ယေဆူ ဘော နှာမ် ဇဝ် ယေဆူ။ 28 ခုဝ် အန် တီ တဲး ဒူအီ ဒွန် အီ ဇဲတ် ဒီ ယွတ် ဒုဝ် ဘြိမ် အန် ရာင် အာဆေ ရာင် အန် အာတ့် ဟူမ် အန် ခါမုန် ဘော ဒျီင် အန် အိုမ် ခဲင် ဆီလယ့် တီ။ 29 ခုဝ်၊ အာဆေ ယီ ဟူမ် ခါမုန် ဘော ဒျီင် အိုမ် ခဲင် ဆီလယ့် တီ၊ ယီ တူ လှုဝ်း တူ ရုဝ်ဆေ ဒုဝ် ဘူင့် ဇဝ် ယေဆူ၊ ပီ ဘူင် အန် တီ ဝီ ဘဲန် မှာပ် ဒီ အန်။ 30 ကူပ် န့ ပါယ် တီ၊ ကာတဲ ဘေ ဟဲ့ မိုဝ်း ဒူအီ ကိူန် အီ မိုဝ်း ဆဝ် ရောဂါ။ မင် အီ မိူဝ် ဟဲ့ ဟွတ့် ယမ်။ 31 ဆေ အေ ဇဲတ် ဒီ ယွတ် ဒုဝ် ဘြိမ် အေ ဒီ အာတ့်၊ အေ ဒီ လွတ် ခမ် မှာပ် ပီ ဒမ် ဇဝ်ဖြာ ဒီ အေ။ 32 ဆေ ဇဝ်ဖြာ ဒမ် မှာပ် ဒီ အေ၊ အန် မာနုဝ် တဲး အေ လွတ် ခမ် မှာပ်၊ ကွဲ့ တဲး န့ ပီ ပီ ဆုင်ဖျာတ် ဇဝ်ဖြာ အာမူ ဂေ ဒူအီ အီ တူ ညှိုမ် အန်။