အိုယ် ဘေ ဘီနွင်၊ အုဝ် ဆီ တဲး ဘေ နပ် ပီ ပါယ် ဂေဇူ ပီ ဒွါ နဝ်း ဖွိုမ် ဇဝ်ဖြာ။ 2 အာတ့် ညှိုမ် ဘေ ဇဝ်ဖြာ၊ အီ ဟဝ် ဟဲ့ ယဲတ့် တဲး ဘေ ညှိုမ် ကာလိုပ်၊ တဲး ဘေ ကြိုပ် အာရိုပ် အီ တူ မိုဝ်း ဖွိုမ်။ 3 ခုဝ်၊ အုဝ် ဆီ တဲး န့ ကာလှုး ဆီချာ ဒီ နဝ်း ဘေ။ ဆေ နဝ်း ဖွိုမ် ဇဝ်ဖြာ ဟဲ့ တဲး ဒူအီ ကာလာင် ဂြုဝ်း၊ အန် တူ ဒိူင် ဇဝ် ယေဆူ ဒေါ မှဝ်။ ပါယ် တီ၊ ဆေ နဝ်း ဖွိုမ် ဇဝ်ဖြာ တူ တဲး အန် ကာလာင်၊ န့ မိူဝ် တူ မိုဝ်း အာဆေ အီ ပွိုန် တဝ်း၊ “ဇဝ် ယေဆူ မုး ဇဝ်ဖြာ။”

4 ပီ ဂေဇူ နဝ်း ဖွိုမ် ဇဝ်ဖြာ ဒီ အီ ပီ ဘော ဟဲ့ မိုဝ်း ဘဲန် မျုဝ် ဘဲန် မျုဝ် မိူဝ်၊ နဝ်း ဖွိုမ် ဇဝ်ဖြာ အီ တဲး ဂေဇူ တီ ယီ မိုဝ်း မီ အူ ကာဒင်။ 5 ဂါန် ဇဝ်ဖြာ ပီ ဒီ ဘူင် အေ ဟဲ့ ကိူန် ဘဲန် မျုဝ် ဘဲန် မျုဝ်။ ဇဝ်ဖြာ အီ စ်ု အေ ဘူင် ယီ မိုဝ်း မီ အူ ကာဒင်။ 6 အေ မိူဝ် ဟဲ့ နပ် ဒီ ဘူင် ဘဲန် မျုဝ် ဘဲန် မျုဝ်။ န့ ယီ မုး ဇဝ်ဖြာ အူ ကာဒင် တီ အီ တဲး အေ နပ် ဒီ ဘူင်။

7 နဝ်း ဖွိုမ် ဇဝ်ဖြာ ဟဲ့ တဲး ဒွန် အီ နပ် ဒီ ဘူင် ဘဲန် မျုဝ် ဘဲန် မျုဝ်၊ တဲး န့ ဘဲန် အာဂျိုဝ် ဒီ ဒူအီ ကိူန်။ 8 နဝ်း ဖွိုမ် ဇဝ်ဖြာ တီ တဲး အူ ဝီ နပ် ဒီ ကာလာင် ဂြုဝ်း အီ မိုဝ်း အာငျာန်။ အန် တဲး ပေါ အူ ဝီ နပ် လွင် ဒါင် ဘဲန် မျုဝ် ဘဲန် မျုဝ်။ ယီ မုး နဝ်း ဖွိုမ် ဇဝ်ဖြာ အူ ကာဒင် အီ တဲး အီ နပ် ဘော အာ မျုဝ်။ 9 နဝ်း ဖွိုမ် ဇဝ်ဖြာ အူ ကာဒင် တီ၊ အန် တဲး ပေါ အူ ဝီ နပ် ဒီ ညှိုမ်။ အန် တဲး ပေါ အူ ဝီ မိုဝ်း ပွုန် အီ ပဲ ပီဟြာယ် ဆဝ် ရောဂါ အီ ဟဝ်။ 10 နဝ်း ဖွိုမ် အန် ဇဝ် တီ တဲး ပွုန် ဒီ ပေါ အူ ဝီ၊ တဲး အန် နပ် ဒီ ဘူင် အီ မွှိုမ် အာမ် ကာဆဝ်။ ပီ ဝီ တဲး ပေါ အူ ဝီ နပ် ဒီ ဘျာန် ဂြုဝ်း ဇဝ်ဖြာ။ အန် တဲး ပေါ အူ ဝီ မိုဝ်း အာငျာန်၊ တဲး အန် နပ် ဒီ ကာယဝ်း အီ မုး နဝ်း ဖွိုမ် ဇဝ်ဖြာ ဘော အီ မုး ကာနမ်။ နဝ်း ဖွိုမ် ဇဝ်ဖြာ တီ တဲး ပေါ အူ ဝီ နပ် ဒီ ကာလာင် ဂြုဝ်း ပီ တူ ဒွိုမ် နပ် အန်။ အန် တဲး ပေါ အူ ဝီ နပ် ဒီ ကာလာင် ပီ ပါယ် ဆီဖဝ် ဂြုဝ်း တီ။ 11 ပီ ဒွါ နဝ်း ဖွိုမ် ဇဝ်ဖြာ ဇိုဝ် တီ ဒွန် မျုဝ်၊ န့ မုး နဝ်း ဖွိုမ် ဇဝ်ဖြာ အူ ကာဒင် အီ ဒွါ။ ပီ ဂေဇူ အန် ဇိုဝ် တီ အန် ဒွါ ဒီ ဒူအီ အူ ဝီ အူ မျုဝ်၊ တဲး န့ ဒူပ် ပီ အိုင် အန်။

12 န့ ပီ ခဲင် ဒုဝ် ဘူင့် အူ ဘူင့် ဝီ မိုဝ်း ဘဲန် မျုဝ် ဘဲန် မျုဝ်။ န့ ပီ ဘော ဟဲ့ မိုဝ်း ဘဲန် မျုဝ် ဘဲန် မျုဝ် မိူဝ်၊ ယီ မုး ဒုဝ် ဘူင့် အူ ဘူင့်။ ဘော ဖိုင် ဇဝ် ယေဆူ အီ ပီ ဒုဝ် ဘူင့် အန်၊ န့ ပါယ် တီ။ 13 ခုဝ်၊ အေ ဘောကာဂ့လျီတ်၊ ဘော မုး ဒူအီ အာယူဒါ၊ ဘော မုး ဒူအီ အာမျုဝ် ဟဝ်၊ ဘော မုး မှာယ်၊ ဘော မုး အီ ဟဲ့ ကွယ် ထင်ဟာင် ဆေဆေ၊ အေ ဟဲ့ ခမ် ဒီ စိုပ် ခဲင် အိုမ် ကူပ် ဟဲ့ တဲး နဝ်း ဖွိုမ် ဇဝ်ဖြာ အေ ညှိုမ် ဇဝ် ယေဆူ။ အေ ပီ ဘော မုး အီ ကိူန်၊ အေ ဟဲ့ လိုပ် ခဲင် ဖိုင် အူ ဖိုင်။ န့ ပီ အေ ဟဲ့ ဘဲန် ဒုဝ် ဘူင့် အူ ဘူင့်။ အေ ဒွန် အီ မိူဝ် ဟဲ့ ပွိုန် နဝ်း ဖွိုမ် ဇဝ်ဖြာ အူ ကာဒင်၊ တဲး အန် လိုပ် ခဲင် နဝ်း အေ။

14 ဆေ န့ မုး အူ မျုဝ် အီ ကွယ် ခဲင် ဒုဝ် ဘူင့် အီ မိုဝ်း ဘဲန် မျုဝ် ဘဲန် မျုဝ်၊ အာဝ် ပွိုန် တဝ်း အူ မျုဝ် တီ ဟဲ့ မုး ဒုဝ် ဘော ဒုဝ်။ 15 အူဖာမာ အန်၊ ဆေ န့ မိုဝ်း ပ့လဝ် အီ တဝ်း၊ “အုဝ် တူ မုး ဒဲ။ ခုဝ်၊ အုဝ် တူ ဘာ့ ခဲင် ဒုဝ် ဘူင့်၊” အန် ပီ ဘော တဝ်း ပါယ် တီ မိူဝ်၊ အန် တူ နပ် ဒီ ပွိုန် ဒီ ကာယဝ်း ဒီ ဒုဝ် ဘူင့်။ 16 ဆေ န့ ယီ မုး အာဟျဝ့် အီ တဝ်း၊ “အုဝ် တူ မုး ငါယ်။ ခုဝ်၊ အုဝ် တူ ဘာ့ ခဲင် ဒုဝ် ဘူင့်၊” အန် ပီ ဘော တဝ်း ပါယ် တီ မိူဝ်၊ အန် တူ နပ် ဒီ ပွိုန် ကာယဝ်း ဒီ ဒုဝ် ဘူင့်။

17 ဆေ ဒုဝ် ဘော ဒုဝ် ယီ ဘဲန် တူတ့် ငါယ်၊ မှဝ် ဒုဝ် တီ ဒီ ပါယ် ဒီ ယိုဝ် ဒီ ထူမ် ဂြုဝ်း အီ ဟဝ်။း ဆေ ဒုဝ် ဘော ဒုဝ် ဘဲန် တူတ့် အာဟျဝ့်၊ မှဝ် အန် ဒီ ပါယ် ဒီ နပ် ဒီ ယိုဝ် အုး။း 18 ခုဝ်၊ ခဲ့ ပီ မိုဝ်း ဒွန် မျုဝ် ခဲင် ဒုဝ် ဘူင့်၊ ဇဝ်ဖြာ ဟဲ့ ဘ့လေး အုန် မျုဝ် မှဝ် မျုဝ် အန်၊ တဲး န့ ဒူပ် ပီ အိုင် အန်။ 19 ဆေ န့ ယီ မိုဝ်း မီ အူ မျုဝ်၊ န့ တူ ပွိုန် ဘဲန် ဒုဝ်။ 20 ဇဝ်ဖြာ ယီ တဲး န့ မိုဝ်း ဘဲန် မျုဝ် ဘဲန် မျုဝ် အီ ကွယ် ခဲင် ဒုဝ် ဘူင့် အူ ဘူင့်။

21 ပါယ် တီ၊ ငါယ် တူ ပွိုန် တဝ်း ဒီ ဒဲ၊ “အုဝ် တူ လုဝ် မဲ။” ဂိန့် တူ ပွိုန် တဝ်း ဒီ ပ့လဝ်၊ “အုဝ် တူ လုဝ် မဲ။” 22 ဒဲင် တီ၊ ဘော ဒွန် မျုဝ် အီ ကွယ် ခဲင် ဒုဝ် ဘူင့် အေ၊ ပီ ဘော ဟဲ့ ဒီလှး န့စမ် မိူဝ်၊ အေ တူ ပွိုန် ဝဲန်။ 23 ဘော မင် မျုဝ် အီ ကွယ် ခဲင် ဒုဝ် ဘူင့်၊ ပီ ထာင် အေ အာဝ် မိုဝ်း ဆာရေ၊ အေ ဝီ မျုက် ဂေ၊ တဲး ဂေ မိုဝ်း ဆာရေ။ ဘော မျုဝ် အီ တူ မွှိုမ် ယွတ်၊ အေ ကာဘိတ် တဲး န့ ဆီချာ။ 24 အာမျုဝ် အီ ဟဲ့ မွှိုမ် ယွတ်၊ အေ မိူဝ် တူ ဘော လုဝ် လိုမ်လာ ခဲ့ မှဝ်။ ဇဝ်ဖြာ ဟဲ့ ဘူင် ဒုဝ် ဘူင့် အေ တဲး ဘဲန် မျုဝ် ဘဲန် မျုဝ် ကွယ် ရိုမ်။ ကာဆိူဝ် တူ မွှိုမ် ယွတ်၊ အေ ယီ ဘူင် တဲး အန် မိုဝ်း ဆာရေ လွှိုမ် မျုဝ် ဟဝ်။ 25 အန် ဇဝ် ဘူင် ကွဲ့ တဲး ဒုဝ် ဘူင့် ကာယဝ်း။ ခဲ့ ကွယ် ဘဲန် မျုဝ် ဘဲန် မျုဝ်၊ အန် ဇဝ် ဆီ တဲး ဂေ လာယ် ယွတ် လာယ် မဲန်။ 26 ဆေ အူ မျုဝ် ခဲင် ဒုဝ် ဘူင့် ဟဲ့ ကာဒုး ဆဝ်၊ ဘော ဒွန် မျုဝ် ဘော ယိုဝ် ဆဝ် ဒူပ်။ ဆေ အူ မျုဝ် ဟဲ့ မိုဝ်း ဆာရေ ကိူန်၊ ဘော ဒွန် မျုဝ် ဘော ခူယ် ဒူပ်။

27 အီ မုး ဘေ၊ ဘေ ဟဲ့ ဟွတ့် ဘဲန် ပီ ဒုဝ် ဘူင့် ဇဝ် ယေဆူ။ ဒွန် အီ ဟဲ့ ဘဲန် အူ မျုဝ် ခဲင် ဒုဝ် တီ။ 28 ပါယ် တီ၊ ခဲင် ဖိုင် ဇဝ် ယေဆူ၊ ဇဝ်ဖြာ ဟဲ့ ကာဆာင် ဂါန် အာဆေ ဂါန် အန်၊ တဲး ဒွန် အီ နပ် ဒီ ဘူင်။ ဂါန် အီ အာရေ တာင် လွှိုမ် မျုဝ် ဟဝ် ဟဲ့ မုး ဂါန် ဂေ ဒူအီ ပီ ရဝ်း ပီ တိုယ် ဇဝ် ယေဆူ။ ဝါယ် အန် တီ ဟဲ့ မုး ဒူအီ အီ ဘျာန် ဂြုဝ်း ဇဝ်ဖြာ။ ဟဲ့ ဟွတ့်၊ ဟဲ့ မုး ဒါ ဆာရာ အီ မာနုဝ် အီ။ ဒဲင် တီ၊ ပီ ဝီ မိုဝ်း အီ နပ် ဒီ ဘူင် အီ မွှိုမ် အာမ်၊ အီ ပဲ ပီဟြာယ် ဆဝ် ရောဂါ အီ ဟဝ် ဘော အီ နပ် ဒီ စွယ် အီ ဟဝ် ခဲင် ဖိုင် ဇဝ် ယေဆူ ဘော အီ နပ် ဒီ ခြိုင် ဂါန် ပီ လုဝ် ဘူင် ဘော အီ နပ် ဒီ ကာလာင် ဂြုဝ်း ပီ တူ ဒွိုမ် နပ် ဂေ။ 29 အာဝ် မုး ဒွန် အီ ပွိုန် ဘူင် ဂါန် ဒူအီ ပီ ရဝ်း ပီ တိုယ် ဇဝ် ယေဆူ။ အာဝ် မုး ဒွန် အီ ပွိုန် ဘျာန် ဂြုဝ်း ဇဝ်ဖြာ။ အာဝ် မုး ဒွန် အီ ပွိုန် ဘဲန် ဒါ ဆာရာ။ အာဝ် မုး ဒွန် အီ ပွိုန် ဘူင် အီ မွှိုမ် အာမ်။ 30 အာဝ် မုး ဒွန် အီ ပွိုန် တဲး ဆဝ် ရောဂါ အီ ဟြာယ်။ အာဝ် မုး ဒွန် အီ ပွိုန် ကာလာင် ဂြုဝ်း ပီ တူ ဒွိုမ် နပ် အန်။ အာဝ် မုး ဒွန် အီ နပ် ဒီ ဘျာန် ဂြုဝ်း တီ။ 31 တဲး ဘေ မိုဝ်း နဝ်း ဆီ ပွိုန် ပီ ဂေဇူ အန် ဇဝ် အီ အာရေ တာင်။ မာလဲ၊ ဘော မုး ဇိုဝ် မှဝ် မိူဝ်၊ အုဝ် ဒီ ဘျ န့တေန့် တဲး န့ ဝဲ ဘွတ် ဝဲ မွှိုမ် ဒီ ဘေ။