အုဝ် ပီ ဘော နပ် ဒီ ကာလာင် ဂြုဝ်း ဒူအီ ဒွန် မျုဝ် ဒဲင် ကာဒါယ် ဘော ဂြုဝ်း အာမူ အာမာတ် ဇဝ်ဖြာ၊ ဆေ အုဝ် ယီ တူ မိုဝ်း နဝ်း ရွက့်၊ န့ ပီ ဒိင် ဂေ ဝဝ် အီ ဟမ် ပီယေန့်။ 2 အုဝ် ပီ ဘော နပ် အာငျာန် ဒူအီ အီ ဘျာန် ဂြုဝ်း ဇဝ်ဖြာ ဒွန် မျုဝ် ဘော နပ် ပီ တူ နပ် အီ ဟဝ်၊ ပီ ဘော နပ် တူတ့် ဒွန် မျုဝ် ဘော ညှိုမ် တူတ့် ဒွန် မျုဝ် တဲး ကော ပွိုန် စ်ု နွန် ကာထုဝ့် မိူဝ်၊ ဆေ အုဝ် ယီ တူ မိုဝ်း နဝ်း ရွက့်၊ အုဝ် တူ မိုဝ်း ဒီခုဝ် မာဆေ။ 3 အုဝ် ပီ ဘော ဒိုဝ်း ကြုဝ်ကြာမ် အုဝ် ဒွန် မျုဝ်၊ ကာဆာင် ဒီ အီ ဟဝ် ဘော ဒုဝ် အုဝ် ဘော ခမ် ဒီ ဒုဝ့် ခဲင် ငဝ်၊ ဆေ အုဝ် ယီ တူ မိုဝ်း နဝ်း ရွက့်၊ အာဝ် ဘဲန် အာဂျိုဝ် ဒီ အုဝ်။

4 နဝ်း ရွက့် တီ ဘော ခမ် ဒီ ယိူန် လှေန့်၊ ဘူင် တဲး န့ ဘဲန် ဂေဇူ ဒီ အီ။ နဝ်း ရွက့် တီ တူ တဲး အေ လာယ် ကာခဲန့်၊ တူ လုဝ် အီ အိူပ် အန်။ အာဝ် မိုဝ်း နဝ်း ပီခိုက်။ 5 န့ တူ နပ် ဒီ ဘူင် အီ တူ ကာအာပ် ဘူင်။ ဆေ ဒူအီ မိုဝ်း နဝ်း ရွက့် တီ၊ အန် တူ ဘူင် တဲး န့ ဘဲန် အာဂျိုဝ် ဒီ ဒုဝ် ဘြိမ် အန်။ အန် တူ ငှိုယ် ရူ။ 6 အန် တူ အုန် နဝ်း ဒီ အီ။ အန် တူ ခူယ် ဒေါ မိုဝ်း နာ တူ မွှိုမ် ဒီ အီ။ အန် ယီ ဒါခိုယ် ဆေ ဒွန် မျုဝ် ဟဲ့ မုး ဟဲ့ မှာန်။ 7 အန် နပ် ဒီ ဂူမ် တူတ့် ဒွန် မျုဝ်။ အန် ညှိုမ် တူတ့် ဒွန် မျုဝ်။ အန် နှဝ့် န့ဒဝ့် တူတ့် ဒွန် မျုဝ်။ အန် ခမ် ဒီ ယိူန် တူတ့် ဒွန် မျုဝ်။

8 နဝ်း ရွက့် ဇိုဝ် တီ တူ နပ် ဒီ တူတ့် ဒေါ မှဝ်။ ဒူအီ ပီ ဘော နပ် ဒီ ဘျာန် ဂြုဝ်း ဇဝ်ဖြာ၊ န့ နပ် ဒီ ဟြာယ်။ ဒူအီ ပီ ဘော နပ် ဒီ ကာလာင် ဂြုဝ်း ပီ တူ ဒွိုမ် နပ် အန်၊ န့ ဒီ ဟြာယ်။ ဒူအီ ပီ ဘော နပ် ဘဲန် မျုဝ် ဘဲန် မျုဝ်၊ န့ ဒီ ဟြာယ်။ 9 ဒေါ တီ နီ၊ အေ ယီ တူ နပ် တူတ့် ဒွန် မျုဝ် လွင် ဇဝ်ဖြာ။ အေ မိူဝ် တူ နပ် ဒီ ဘျာန် တူတ့် ဂြုဝ်း ဇဝ်ဖြာ။ 10 ပန် ဒီ လိုဝ်း တူတ့် ဒွန် မျုဝ် လွင် ဇဝ်ဖြာ၊ န့ ဒီ ဇေ့ဇုင် တူတ့် ဒွန် မျုဝ်၊ အာဝ် ဟူ မိုဝ်း ပီ တူ နပ် အေ။ 11 ဒေါ မုး အုဝ် ဂွန်၊ ဘော ဂြုဝ်း ဘော နဝ်း ဘော အာငျာန် အုဝ် ဟဲ့ ပီ ဂွန်။ အုဝ် ဘော ဝီ တာင်၊ အုဝ် မိူဝ် ဝဲန် တူတ့် အာဂျာင် ဂွန် တီ။ 12 ဒေါ တီ နီ၊ န့ ပီ အေ ယွတ် ခဲင် အဲပ် ဇမ် အီ ကာပျွယ်။ ခုဝ်၊ အာဝ် လိုဝ်း ဆီချာ။ ဆေ ဟီ ဇမ် ပန် ဒီ ကွယ် အေ ဒီ အာတ့် ဇဝ်ဖြာ၊ အေ ဒီ ဝီ ယိုဝ် ဆီချာ အန် ဇဝ်။ ဒေါ တီ နီ၊ အေ ညှမ် နပ် ဆီချာ ဇဝ်ဖြာ။ ပန် တီ အေ ဒီ ဝီ နပ် ဆီချာ အန် ဇဝ် ပီ အန် ဇဝ် ဟဲ့ နပ် အေ။

13 န့ ဒီ ဇမ် အာခြာဝ် ဒီ ဟြာယ် တူတ့်။ ဆေ အီ ယီ နပ် ဒီ ညှိုမ်၊ နပ် ဒီ နှဝ့် န့ဒဝ့်၊ နပ် ဒီ ရွက့်၊ နဝ်း အူယ် မျုဝ် တီ၊ တူ ဟြာယ် ဒေါ မှဝ်။ န့ ဒီ ကွယ် ဆေဆေ။ နဝ်း ရွက့် ဇိုဝ် တီ၊ ယီ မွှိုမ် လွှိုမ် တူတ့် မျုဝ် ဟဝ်။