ခါန် 14
တဲး ဘေ ဂျုဝ်ဂျာ ဒီ ဒူပ် နဝ်း ရွက့်။ တဲး ဘေ မိုဝ်း နဝ်း ဆီ ပွိုန် ဘော ပီ ဂေဇူ နဝ်း ဖွိုမ် ဇဝ်ဖြာ ဘဲန် မျုဝ် ဘဲန် မျုဝ် တွိုန်။ ခဲင် ပီ ဂေဇူ နဝ်း ဖွိုမ် ဇဝ်ဖြာ ဒွန် မျုဝ်၊ တဲး ဘေ မှာန့် ဒီ နပ် ဒီ ဘျာန် ဂြုဝ်း ဇဝ်ဖြာ အာတ့် မှာန့် ဘေ ဂေဇူ မျုဝ် ဟဝ် ပီ ဒွါ နဝ်း ဖွိုမ် ဇဝ်ဖြာ။ 2 ခုဝ်၊ ဆေ ဒူအီ အူ ဝီ ဒီ ဘော ကာလာင် ဂြုဝ်း ပီ တူ နပ် အန်၊ အာဝ် မုး အန် ကာလာင် ဒီ ဒူအီ၊ အန် ကာလာင် ဒီ ဇဝ်ဖြာ။ ခုဝ်၊ အာဝ် မိုဝ်း အာဆေ အီ နပ် နာ လှုး။ န့ မုး နဝ်း ဖွိုမ် ဇဝ်ဖြာ အီ တဲး အန် ကာလာင် ဂြုဝ်း ပီ တူ နပ် ဒူအီ။ 3 မာလဲ၊ ဆေ န့ မုး ဒူအီ အီ ဘျာန် ဂြုဝ်း ဇဝ်ဖြာ၊ အန် ကာလာင် တဲး ဂေ ဒူအီ နပ်၊ တဲး န့ စွယ် ဂေ၊ တဲး န့ ဘဲန် ပ့လူမ် ဘဲန် ဟဲန့် ဒီ နဝ်း ဂေ၊ တဲး နဝ်း ဂေ ဒါခိုယ်။ 4 ဝီ အီ ကာလာင် ဂြုဝ်း ပီ တူ နပ် အန်၊ န့ ဘဲန် အာဂျိုဝ် မီ ဒီ ဒုဝ် ဘြိမ် အန်။ ဆေ အီ ဘျာန် ဂြုဝ်း ဇဝ်ဖြာ၊ န့ ဘော ဘဲန် အာဂျိုဝ် ဒီ ဒူအီ ခဲင် ဖိုင် ဇဝ် ယေဆူ ဒွန် အီ။ 5 အုဝ် ဟဲ့ ဆီ တဲး ဘေ ဒွန် အီ ကာလာင် ဂြုဝ်း ပီ တူ နပ် ဘေ။ မာလဲ၊ ဒဲင် တီ၊ အုဝ် ယီ ဆီ တဲး ဘေ နပ် ဒီ ဘျာန် ဂြုဝ်း ဇဝ်ဖြာ။ ခုဝ်၊ ဝီ အီ ဘျာန် ဂြုဝ်း ဇဝ်ဖြာ ဟဲ့ အာရေ တာင် လွှိုမ် ဝီ အီ ကာလာင် ဂြုဝ်း ပီ တူ နပ် အန်။ ဆေ န့ ယီ မိုဝ်း အီ နပ် ဒီ ဘျာန် ဂြုဝ်း ပီ တူ နပ် အန် တီ၊ ဒူအီ အီ ဘျာန် ဂြုဝ်း ဇဝ်ဖြာ ဘော ဒူအီ အီ ကာလာင် ဂြုဝ်း ပီ တူ နပ် အန် ဟဲ့ မုး အူ မျုဝ်။ ပီ ကာလာင် ဂါယ် ဟဲ့ ဘဲန် အာဂျိုဝ် ဒီ ဒူအီ ခဲင် ဖိုင် ဇဝ် ယေဆူ။
6 အိုယ် ဘေ ဘီနွင်၊ ဆေ အုဝ် တး စ်ု ဘေ၊ ကာလာင် မီ ဂြုဝ်း ပီ တူ နပ် အုဝ်၊ အာဝ် မိုဝ်း ဒီခုဝ်။ အာဝ် ဘဲန် အာဂျိုဝ် မာဆေ ဒီ ဘေ။ ဆေ အုဝ် ယီ ကာလာင် ပီ ဆီ တဲး ဇဝ်ဖြာ အုဝ် ကာလာင်၊ ဆေ အုဝ် ဘော ဘျာန် ဂြုဝ်း ဇဝ်ဖြာ၊ ကာလာင် ပီ နပ် အုဝ် ဒီ ဘေ ဘော မာနုဝ် ဘေ၊ အာတီ အီ ဒီ ဘဲန် အာဂျိုဝ် ဒီ ဘေ။ 7 ဒိင် ဂေ ဝဝ် တူ မိုဝ်း ဖွိုမ်၊ ယီ နပ် ဒီ ဟမ်။ မာလဲ၊ ဆေ အေ တူ ဘုတ် တူ ဘး တဲး ဟမ် အန် လေး ကာဆမ်၊ အာဝ် မိုဝ်း အီ နပ် ကာဆမ် အန်။ 8 ပါယ် တီ၊ ဘော ဝဝ် နိုင် ပဲ၊ ဆေ အေ တူ ဘုတ် တဲး ဟမ် အန် လိုဝ်း ဆီချာ၊ အာဝ် မိုဝ်း အီ ဒီ ရဲန် ခြိုင် ကာဂုဝ်း။ 9 န့ ဘော ပါယ် တီ၊ ဆေ မဲ ကာလာင် မီ ဂြုဝ်း ပီ တူ နပ် ဂေ။ ဆေ မဲ တူ ကာလာင် ဂြုဝ်း ပီ နပ် အီ၊ အာဝ် မိုဝ်း အာဆေ အီ နပ် ဒီ ထူမ် ဂြုဝ်း မဲ တီ။ န့ ပီ မဲ ကာမွုန် ခဲင် ဒီဝူင့်။ 10 ဒဲင် ကာဒါယ် နီ၊ ဟဲ့ မိုဝ်း ဂြုဝ်း ဘဲန် မျုဝ် ဘဲန် မျုဝ်။ ဂြုဝ်း တီ ဒွန် မျုဝ် ယီ မိုဝ်း ဆီဖဝ် ဒွန် ဒဲ။ 11 ဆေ အုဝ် တူ နပ် ဒီ ထူမ် ဂြုဝ်း ဒူအီ အီ ကာလာင် ဒီ အုဝ်၊ အုဝ် ထာင် အန် မုး ဒူအီ အာမျုဝ် ဟဝ်။ ဘော အုဝ် တူ မုး ဒူအီ အာမျုဝ် အန်။ 12 ကာတဲ ဘေ န့ ဘော ပါယ် တီ။ ကူပ် ဟဲ့ ဆီ ပွိုန် ကာဆဝ် ဘေ ပီ ဂေဇူ နဝ်း ဖွိုမ် ဇဝ်ဖြာ၊ တဲး ဘေ ဂျုဝ်ဂျာ ဒီ ဘူင် ဒွန် မျုဝ်၊ တဲး ဒူအီ ခဲင် ဖိုင် ဇဝ် ယေဆူ ကြဲ ဒီ ညှိုမ် ဆီချာ။
13 ပါယ် တီ၊ ဝီ အီ နပ် ဒီ ကာလာင် ဂြုဝ်း ပီ တူ နပ် အန်၊ တဲး အန် ဆာခိုဝ် မှာန့် ဒီ ဇဝ်ဖြာ၊ တဲး အန် ဘော နပ် ဒီ ဘျာန် ဂြုဝ်း တီ။ 14 ဆေ အုဝ် ဆာခိုဝ် ကာလာင် ဂြုဝ်း ပီ တူ နပ် အုဝ်၊ နဝ်း အုဝ် ပီ ဘော ဟဲ့ ဆာခိုဝ် မိူဝ်၊ ပီ ကာဖာ အုဝ် ယီ တူ နပ် ဂြုဝ်း တီ။ 15 ဆေ ဟီ ပါယ် တီ၊ မှဝ် အုဝ် ဒီ ပါယ် ဒီ ဘူင်။း အုဝ် ဒီ ဆာခိုဝ် ဒူပ် ဂြုဝ်း ပီ ဒွါ နဝ်း ဖွိုမ် ဇဝ်ဖြာ ဒီ အုဝ်။ အုဝ် ဒီ ဆာခိုဝ် ဒူပ် ဘော အီ ကာလှုး ဒီ အုဝ်။ အုဝ် ဒီ တဝ်း မှုဝ် ပီ တဲး နဝ်း ဖွိုမ် ဇဝ်ဖြာ အုဝ် တဝ်း။ အုဝ် ဆီ တဝ်း ဘော မှုဝ် ပီ နပ် အုဝ် ဆီဖဝ် အန်။ 16 ဆေ ဘေ ဆာခိုဝ် အိူပ် ဇဝ်ဖြာ၊ ကာလာင် ဂြုဝ်း ပီ ဒွါ နဝ်း ဖွိုမ် ဇဝ်ဖြာ ဒီ ဘေ၊ ဆေ ဒူအီ ဟဝ် ဝီ ထူမ် ယီ တူ နပ် ဂြုဝ်း ပီ ကာလာင် ဘေ၊ မှဝ် အန် ဒီ ပါယ် ဒီ တဝ်း၊ “ဆာတူ” ဒူပ် ပီ ဆာခိုဝ် ပီ ဒါင် ဘေ ဂုင် ဂေဇူ ဒီ ဇဝ်ဖြာ။ 17 ဂြုဝ်း ပီ ဆာခိုဝ် ပီ ဒါင် ဘေ ဂုင် ဂေဇူ ဒီ ဇဝ်ဖြာ တီ ပီ ဘော ဟဲ့ ဘွတ် ဟဲ့ မွှိုမ် မိူဝ်၊ အာဝ် မိုဝ်း အာဂျိုဝ် မာဆေ ဒီ ဂေ ဒူအီ အီ တူ ကာလှုး ဒီ နဝ်း။
18 အုဝ် ဒါင် ဂုင် ဂေဇူ ဒီ ဇဝ်ဖြာ။ ခုဝ်၊ အုဝ် ကာလာင် ဂြုဝ်း ပီ တူ ဒွိုမ် နပ် အုဝ် ကိူန် လွှိုမ် ပီ ကာလာင် ဘေ ဒွန် အီ။ 19 မာလဲ၊ ဆေ အုဝ် ကွယ် ခဲင် ဖိုင် ဇဝ် ယေဆူ၊ ဆေ အုဝ် ကာလာင် ဂြုဝ်း ဖန် ဒဲ အီ ကာလှုး ဒီ နဝ်း ဒွန် အီ ဘော မာနုဝ် ဂေ၊ န့ မွှိုမ် လွှိုမ် အုဝ် ကာလာင် ဂြုဝ်း အူ မှိုန့် ဒဲ ပီ တူ နပ် ဂေ။
20 အိုယ် ဘေ ဘီနွင်၊ ပီ ကာဒွါ့ ကာဖာ ဘေ၊ ကွဲ့ တဲး န့ ပီ ဂွန်။ ဆေ န့ မုး လွင် နာ ဟာယ် နာ မိူက်၊ တဲး ဘေ ပီ ဂွန် င အီ တူ နပ် မာဆေ။ ဆေ န့ ယီ မုး ပီ ဇေန့်ဇာ ဘေ၊ တဲး န့ ပီ ဒူအီ တာင် ဒူအီ ဂဲ။ 21 ခဲင် ဘပ် ဇဝ်ဖြာ ဟဲ့ ဒဲမ် အုန် လွင် ဇဝ်ဖြာ တဝ်း၊ “အုဝ် ဒီ တဲး ဒူအီ ဟဝ် တး ကာလာင် ဂြုဝ်း ဒီ ဂေ ဒူအီ အာမျုဝ် အုဝ် အီ မုး ဂြုဝ်း ပီ တူ နပ် ဂေ။ အုဝ် ဒီ ဝီ စ်ု ဒူအီ အာမျုဝ် ဟဝ် ကာလာင် ဒီ ဂေ။ ဘော အုဝ် ဒီ ကာလာင် ဂြုဝ်း ဒီ ဂေ။ မာလဲ၊ ဒူအီ အာမျုဝ် အုဝ်၊ ဂေ ယီ တူ ထူမ် ဂြုဝ်း အုဝ်။”
22 ခုဝ်၊ ဆေ ဒူအီ နပ် ဒီ ကာလာင် ဂြုဝ်း ပီ တူ ဒွိုမ် နပ် ဂေ၊ န့ တဲး ဂေ အီ တူ ညှိုမ် အာမ်။ န့ ယီ တူ ပါယ် မာဆေ ဒီ ဒူအီ အီ ဟဲ့ ညှိုမ်။ ဆေ ဒူအီ ယီ နပ် ဒီ ဘျာန် ဂြုဝ်း ဇဝ်ဖြာ၊ န့ ဘဲန် အာဂျိုဝ် ဒီ ဂေ အီ ဟဲ့ ညှိုမ်။ ဂေ အီ တူ ညှိုမ် တူ နပ် လွင် အန် တီ။ 23 ဆေ ဒူအီ ခဲင် ဖိုင် ဇဝ် ယေဆူ ဘော ဖိုင် တး ကာဇု၊ ကာလာင် မီ ဂြုဝ်း ပီ တူ နပ် ဂေ၊ ဆေ န့ ဘော မိုဝ်း ဂေ အီ တူ နပ် ဆီဖဝ် အန် ဘော ဂေ အီ တူ ညှိုမ် တး ထူမ်၊ ဂေ ဒီ တဝ်း ဘေ မုး ဒူအီ ရိုဝ် ဒူအီ ဝှိုန့်။ 24 မာလဲ၊ ဆေ ဒွန် အီ ဘျာန် ဂြုဝ်း ဇဝ်ဖြာ၊ ဆေ န့ မိုဝ်း ဒူအီ အီ တူ နပ် လွင် အန် တီ၊ ဘော ဒူအီ အီ တူ ညှိုမ် တး ထူမ်၊ ဂေ ဒီ ဝီ လှုဝ်း မှာပ် ဂေ။ ဒဲင် တီ၊ ပဲ့ ဟဲ့ ထူမ် ဂေ ဒွန် ဒဲ၊ န့ ဒီ တဲး ဂေ ဝီ ခမ် မှာပ် ဂေ ခဲင် နဝ်း ဂေ။ 25 ဂေ ဒီ ဘျ မှာပ် ပီ ချြီင် ဂေ ခဲင် နဝ်း ဂေ။ ဂေ ဒီ ခမ် ဒီ ခြိုပ်ခြဝ် ကြိုပ် ဇဝ်ဖြာ တဝ်း၊ “ဟဲ့ မှာန် အာခါခ်ု။ ဇဝ်ဖြာ ဟဲ့ ကွယ် ရိုမ် ဒူပ် ဘေ။”
26 အိုယ် ဘေ ဘီနွင်၊ အုဝ် ဆီ တဲး ဘေ ဘူင် ပါယ် နီ။ ဒေါ တး ကာဇု ကြိုပ် ဘေ ဒီ ဇဝ်ဖြာ၊ တဲး ဘေ တဲး အူ ဝီ တဝ်း မှုဝ်၊ တဲး ဘေ တဲး ပေါ အူ ဝီ မာနုဝ် အီ။ တဲး ဘေ တဲး ပေါ အူ ဝီ ကာလာင် ပီ ဘျ ဇဝ်ဖြာ ဒီ အန်။ ပေါ အူ ဝီ၊ တဲး အန် ကာလာင် ဂြုဝ်း ပီ တူ ဒွိုမ် နပ် အန်၊ ပေါ အူ ဝီ၊ တဲး အန် ဝီ ဘျာန် ဂြုဝ်း တီ၊ တဲး အီ နပ် ဒီ ထူမ်။ ခဲ့ ပီ ဘူင် ဘေ ဒွန် မျုဝ်၊ တဲး န့ ဘော စွယ် ဒူအီ ခဲင် ဖိုင် ဇဝ် ယေဆူ၊ တဲး ဂေ ညှိုမ် ဆီချာ။ 27 ဆေ န့ မိုဝ်း ဒူအီ အီ ဆီ ကာလာင် ဂြုဝ်း ပီ တူ ဒွိုမ် နပ် အန်၊ တဲး ဂေ ကာလာင် အာ ဝီ အူယ် ဝီ၊ ခဲ့ တီ။ ဆေ အူ ဝီ ဟဲ့ ဟွတ့် ကာလာင်၊ တဲး ဘေ ပီ ဝီ တဲး ပေါ အူ ဝီ ကာလာင်။ န့ ယီ လုဝ် မိုဝ်း ပေါ အူ ဝီ အီ ဘျာန် ဂြုဝ်း တီ။ 28 ဆေ အာဝ် မိုဝ်း အီ နပ် ဒီ ဘျာန် ဂြုဝ်း တီ၊ အာဝ် လုဝ် တဲး ဂေ ကာလာင် ဂြုဝ်း ပီ တူ နပ် အီ။ တဲး ဂေ အီ ဆီ ကာလာင် ဂြုဝ်း ဇိုဝ် တီ ကွယ် ယေန်၊ ကာလာင် ဒီ ဇဝ်ဖြာ ခဲင် နဝ်း ဂေ။
29 ဆေ န့ ယီ မုး ဒူအီ အီ ဘျာန် ဂြုဝ်း ဇဝ်ဖြာ၊ တဲး ဘေ တဲး အာ အူယ် ဝီ ကာလာင်။ တဲး ဂေ အီ ဟဝ် ဆာခိ ဒီ ထူမ် ဂြုဝ်း ဂေ တီ။ 30 ဒေါ ကွယ် ကာဇု ဘေ တီ၊ ဆေ န့ မိုဝ်း ဒူအီ အူ ဝီ အီ ဟဲ့ ယိုဝ် ပီ ဘျ ဇဝ်ဖြာ ဒီ အန်၊ တဲး ဒါ အီ ကာလာင် ဂြုဝ်း ဂိူတ် အူ ကာစန်၊ ဝီ တဲး ဒါ အီ ယိုဝ် ပီ ဘျ ဇဝ်ဖြာ တီ ကာလာင်။ 31 ဘေ ဒွန် အီ ဟဲ့ ပွိုန် ဘျာန် ဂြုဝ်း ဇဝ်ဖြာ။ မာလဲ၊ အူ ဝီ ဟီ ဟွတ့် ကာလာင်၊ တဲး ပေါ အူ ဝီ ဝီ ကာလာင်၊ တဲး ဒွန် အီ ပွိုန် ဒီ ဟေန်၊ တဲး န့ ဘဲန် ပ့လူမ် ဘဲန် ဟဲန့် ဒီ နဝ်း ဂေ။ 32 ဆေ န့ မုး နဝ်း ဖွိုမ် ဇဝ်ဖြာ အီ တဲး ဒူအီ နပ် ဒီ ဘျာန် ဂြုဝ်း ဇဝ်ဖြာ၊ အန် ဒီ ဘော တဲး ဒူအီ ပွိုန် အူတ် နဝ်း၊ အူတ် ဖွိုမ် ဂေ။ 33 ခုဝ်၊ ဇဝ်ဖြာ တူ ဆီ တဲး အေ ဘူင် အီ ကာဝှ်ု ကာဝျှီန်။ အန် ဇဝ် ဆီ တဲး အေ ကွယ် ယေန် ဒါခိုယ်။ 34 ခဲင် ဖိုင် ဇဝ် ယေဆူ ဒွန် ပ့လုဝ့်၊ ဒေါ တး ကာဇု ကြိုပ် ဘေ ဇဝ်ဖြာ၊ အီဘိုန့် ဒွန် အီ လုဝ် ကွယ် ယေန် ကွယ် နှိမ်။ အီဘိုန့် တူ ပွိုန် ကာလာင် ဂြုဝ်း။ ဂေ လုဝ် တဲး အီမာယ် ဂေ အိုပ် ဂေ၊ တဲး န့ ဒူပ် ဒါရာ ယူဒါ။ 35 ဆေ ဂေ မိုဝ်း ပီ ဆီ ဒီမွှတ် ပီ ဆီ နပ် ဂေ၊ တဲး ဂေ ဒီမွှတ် အီမာယ် ဂေ ဒီ ကာင်။ မာလဲ၊ ဆေ အီဘိုန့် ကာလာင် ဂြုဝ်း ဒေါ တး ကာဇု ကြိုပ် ဒူအီ ခဲင် ဖိုင် ဇဝ် ယေဆူ ဒီ ဇဝ်ဖြာ၊ န့ မွှိုမ် ဆာယ်။
36 န့ ပီ ဘေ ဘီနွင် ထာင်၊ ဟဲ့ မုး ဘေ အီ ယိုဝ် ဂြုဝ်း ဇဝ်ဖြာ ဒီ အာတ့် အူ ဆိန့် ဒေါ ဂုဝ် အန်။ န့ ဘော ပီ ဘေ ထာင် ဇဝ်ဖြာ တး ကာလာင် ဂြုဝ်း မီ ဒီ ဘေ။ အာဝ် မုး ပါယ် တီ။ 37 ဆေ န့ မိုဝ်း ဒူအီ အီ ထာင် အန် ဟဲ့ နပ် ဒီ ဘျာန် ဂြုဝ်း ဇဝ်ဖြာ၊ ဆေ အန် ဘော ထာင် အန် ဟဲ့ မိုဝ်း နဝ်း ဖွိုမ် ဇဝ်ဖြာ ကွယ် ခဲင် နဝ်း အန်၊ အန် ဒီ လုဝ် ဒူပ် ဂြုဝ်း ပီ ဒဲမ် အုဝ် နီ၊ မာတ် န့ ပီ ဂြုဝ်း ဇဝ်ဖြာ။ 38 ဆေ အန် ယီ ဝဲန် ဂြုဝ်း အုဝ်၊ ဘော ဘေ လုဝ် ဝဲန် အန်။