အိုယ် ဘေ ဘီနွင်၊ ဒေါ တီ နီ၊ အုဝ် ဆီ တဲး ဘေ နပ် လွင် ဒါရာ အီ တဲး နဝ်း ဒူအီ ဒါခိုယ်။ အုဝ် ဟဲ့ ဟွတ့် ကာလာင် ဒီ ဘေ လွင် အန် တီ။ ဘေ မိူဝ် ဟဲ့ ထူမ်၊ ဟဲ့ ညှိုမ် ဆီချာ လွင် အန် တီ။ 2 ဆေ ဘေ ဘော ညှိုမ် ဟာဝ် ပါယ် တီ ဘော တူ ဝဲန် ဒါရာ ပဲ့ ဟဲ့ ကာလာင် အုဝ် ဒီ ဘေ တီ၊ န့ ဒီ ချွတ် ဘေ။ ဆေ ဘေ ယီ တူ ညှိုမ် ဟာဝ် ပါယ် တီ၊ ပဲ့ ဟဲ့ ညှိုမ် ဘေ အာဝ် မိုဝ်း ဒီခုဝ်။

3 ပဲ့ ဟဲ့ ကာလာင် ဇဝ်ဖြာ ဒီ အုဝ်၊ အီ အာရေ တာင် လွှိုမ် မျုဝ် ဟဝ်၊ အုဝ် ဟဲ့ ဝီ ကာလာင် ဒီ ဘေ။ လွင် အန် တီ၊ န့ မုး လွင် ဇဝ် ယေဆူ ဟဲ့ ခမ် ဒီ ယမ် ကာဒါင် မှာပ် အေ။ 4 န့ ဘော မုး ဘော လွင် ဟဲ့ ဘ့လေး ဂေ ဒူအီ ဇဝ် ယေဆူ ခဲင် ကာဒဝ် ဘာရေဝ်။ ဘော နုဝ့် အူယ် ဆီငဲ၊ ဇဝ်ဖြာ ဟဲ့ တဲး အန် ဝီ ယိတ့် ဝီ အိမ်။ လွင် အန် တီ ဒွန် မျုဝ် ဟဲ့ ဒူပ် တူတ့် ပီ ဒဲမ် အုန် ခဲင် ဘပ် ဇဝ်ဖြာ။ 5 ဝါယ် အန် တီ ဇဝ် ယေဆူ ဟဲ့ ဝီ ဘျ ဒုဝ် အန် ဒီ အာပေတာရူ။ ဟဲ့ ဟွတ့်၊ အန် ပီ ဝီ ကာပ့လုး ဘော ဒီ ဂေ ဒီဘဲ အန် ဂိုဝ် ဒီ အာ ဝီ။ 6 ဝါယ် အန် တီ ဇဝ် ယေဆူ ပီ ဝီ ကာပ့လုး ဒီ ဂေ ဘီနွင် ဖန် မာယဝ်း ဝီ၊ တဲး ဒွန် အီ ပွိုန် ဒီ ယိုဝ် အန်။ ဖိုင် ဂေ အီ ယိုဝ် အန် ဇဝ် တီ၊ ဂေ ကိူန် ဆီ ကွယ် ဇမ် ဒေါ တီ နီ။ မင် အီ ယီ ဟဲ့ ဟွတ့် ယမ်။ 7 ဝါယ် အန် တီ အန် ပီ ဝီ ကာပ့လုး ဒီ အာယာကူပ်။ ဟဲ့ ဟွတ့်၊ အန် ပီ ဝီ ကာပ့လုး ဘော ဒီ ဒူအီ ပီ ရဝ်း ပီ တိုယ် ဇဝ် ယေဆူ ဘောကာဂ့လျီတ်။ 8 ဒီ ကာဒဲ့ အန် နီ၊ အန် ပီ ဝီ ကာပ့လုး ဘော ဒီ အုဝ် အီ ပီ ဂွန် အီ ဂွိုတ် တူ ထွုန်။

9 အုဝ် တူ ကာအာပ် ဘဲန် ဒူအီ ပီ ရဝ်း ပီ တိုယ် ဇဝ် ယေဆူ။ အုဝ် မိူဝ် ဟဲ့ ကွယ် ခြိုမ် ဂေ ဒူအီ ပီ ရဝ်း ပီ တိုယ် ဇဝ် ယေဆူ ဒွန် အီ။ ခုဝ်၊ အုဝ် ဟဲ့ ဒွိုမ် ခါနှာပ် ဂေ ဒူအီ ခဲင် ဖိုင် ဇဝ် ယေဆူ အီ မုး ဒူအီ ပီ အိုပ် ဇဝ်ဖြာ။ 10 မာလဲ၊ ဂုင် ဂေဇူ ဇဝ်ဖြာ ဟဲ့ တဲး အုဝ် ဘဲန် ဒူအီ ပီ ဘဲန် အုဝ် ဒေါ တီ နီ။ ဂုင် ဂေဇူ ဇဝ်ဖြာ တီ၊ အုဝ် တူ တဲး န့ ကွယ် ပီယေန့်။ အုဝ် ဟဲ့ ဘူင် ဂါန် လွှိုမ် ဂေ ဒူအီ ပီ ရဝ်း ပီ တိုယ် ဇဝ်ဖြာ ဒွန် အီ။ အုဝ် ပီ ဘော တဝ်း ပါယ် တီ မိူဝ်၊ အာဝ် မုး အုဝ် အီ ဘူင်။ ဇဝ်ဖြာ အီ ကွယ် ရိုမ် ဒူပ် အုဝ်၊ အန် ဟဲ့ ဂေဇူ အုဝ် တဲး အုဝ် မိုဝ်း ပ့လူမ် မိုဝ်း ဟဲန့်၊ တဲး အုဝ် ပွိုန် ဒီ ဘူင်။

11 ဘော အုဝ် ဘော ဒူအီ ပီ ရဝ်း ပီ တိုယ် ဇဝ်ဖြာ ဒွန် အီ ဟဲ့ ကာလာင် ပါယ် တီ။ ဘေ ဒွန် အီ မိူဝ် ဟဲ့ ညှိုမ် ဒူပ် ပါယ် တီ။

12 ဆေ ယေ ယီ ကာလာင် လွင် ဇဝ် ယေဆူ ဝီ ယိတ့် ဝီ အိမ်၊ အာဝ် မှာန် ပီ ကာလာင် ဒူအီ ကာတဲ ဘေ မင် အီ။ အာဝ် ပွိုန် တဝ်း၊ ဒူအီ ယမ် တူ နပ် ဒီ ဝီ ယိတ့် ဝီ အိမ်။ 13 ဆေ ပီ တဝ်း ဂေ ဟဲ့ မှာန်၊ ဆေ ဒူအီ ယမ် တူ နပ် ဒီ ဝီ ယိတ့် ဝီ အိမ်၊ ဘော ဇဝ် ယေဆူ တူ ဝီ ယိတ့် ဝီ အိမ်။ 14 ဆေ ဇဝ် ယေဆူ တူ ဝီ ယိတ့် ဝီ အိမ်၊ ပီ ကာလာင် ယေ အာဝ် မိုဝ်း အာဂျိုဝ် မာဆေ။ ဘော ပီ ညှိုမ် ဘေ အာဝ် မိုဝ်း ဒီခုဝ် မာဆေ။ 15 ဒဲင် တီ၊ ဆေ ဒူအီ ယမ် တူ နပ် ဒီ ဝီ ယိတ့် ဝီ အိမ်၊ ဇဝ်ဖြာ မိူဝ် တူ တဲး ဇဝ် ယေဆူ ဝီ ယိတ့် ဝီ အိမ်။ ပဲ့ ဟဲ့ ကာလာင် ယေ လွင် ဇဝ်ဖြာ၊ န့ ပီ ယေ ကာလုဝ် အီ ဟဝ်။ ခုဝ်၊ ယေ ဟဲ့ ဟွတ့် တဝ်း ဇဝ်ဖြာ ဟဲ့ တဲး ဇဝ် ယေဆူ ဝီ ယိတ့် ဝီ အိမ်။ 16 ဆေ ဒူအီ ယမ် တူ နပ် ဒီ ဝီ ယိတ့် ဝီ အိမ်၊ ဘော ဇဝ် ယေဆူ တူ နပ် ဒီ ဝီ ယိတ့် ဝီ အိမ်။ 17 ဆေ ဇဝ် ယေဆူ တူ ဝီ ယိတ့် ဝီ အိမ်၊ ပီ ညှိုမ် ဘေ မိူဝ် အာဝ် မိုဝ်း ဒီခုဝ်။ မှာပ် ဘေ မိူဝ် ဆီ ကွယ်၊ ညှမ် ဂဝ်း ဝဲန်။ 18 ဒဲင် တီ၊ ဂေ အီ ညှိုမ် ဇဝ် ယေဆူ အီ ဟဲ့ ဟွတ့် ယမ်၊ ဘော ဂေ ဒီ စှိုမ် တူတ့်။ 19 ဆေ အေ ဘိုင် ဇဝ် ယေဆူ နှဝ့် န့ဒဝ့် အန် မီ စုဝ် နီ၊ ဇာတ် နီ၊ အေ မုး ဒူအီ အီ မွှိုမ် ကာဝေ လွှိုမ် ဒူအီ ဒဲင် ကာဒါယ် ဘောကာဂ့လျီတ်။

20 မာလဲ ဘူင့် မှာန် အန်၊ ဇဝ်ဖြာ ဟဲ့ ဟွတ့် တဲး ဇဝ် ယေဆူ ဝီ ယိတ့် ဝီ အိမ်။ ဟဲ့ တဲး အန် ပီ ဘ့လေ ဒင်။ အန် ဟဲ့ ယဲတ့် ဒီ အာတ့် ဂေ ဒူအီ ကိူန် အီ ဒီ ဝီ ယိတ့် ဝီ အိမ် ဝါယ် ဟဲ့ ဟွတ့် ယမ် ဂေ။ 21 န့ ပါယ် နီ။ ကူပ် မှာပ် ပဲ့ ဟဲ့ ဘူင် ဒူအီ အူ ဝီ၊ ဂေ ဒူအီ ဒဲင် ကာဒါယ် ဘောကာဂ့လျီတ် လုဝ် ယမ်။ လွင် ဒူအီ ဝီ ယိတ့် ဝီ အိမ် ဝါယ် ဟဲ့ ဟွတ့် ယမ် ဂေ မိူဝ်၊ န့ ပါယ် တီ။ ကူပ် ဟဲ့ ဝီ ယိတ့် ဝီ အိမ် ဒူအီ အူ ဝီ၊ ဂေ ဒူအီ ကိူန် ပွိုန် ဒီ ဝီ ယိတ့် ဝီ အိမ် ဒူပ် အန်။ 22 အေ ဒူအီ ဘောကာဂ့လျီတ် လုဝ် ယမ် ကူပ် မုး အေ အာမျုဝ် ဒူအီ ပီ အာဒါမ် တွိုန်။ အေ ဒီ ဝီ ယိတ့် ဝီ အိမ် ကူပ် ညှိုမ် အေ ဇဝ် ယေဆူ၊ 23 ဂါမ် အာဆေ ဂါမ် အန် ဒီ လာယ် ဒါမ်၊ အာခြာဝ် အာဆေ၊ အာခြာဝ် အန်။ ဇဝ် ယေဆူ အီ ပီ ဘ့လေ ဒင်၊ ဟဲ့ ဝီ ယိတ့် ဝီ အိမ် ဒီ အာတ့် အီ ဟဝ်။ ပန် ဒီ ဝီ တး လူင် ဇဝ် ယေဆူ၊ ဘော ဂေ အီ ညှိုမ် အန် ဒွန် အီ၊ ဂေ ဒီ ဝီ ယိတ့် ဝီ အိမ်။ 24 ဝါယ် အန် တီ ဇာတ် နီ မိူဝ် ဒီ တူတ့်။ ဒေါ အန် တီ ဇဝ် ယေဆူ ဒီ ဝီ အာပ် မိူင် ပီ အိုပ် အန် ဒီ ဇဝ်ဖြာ အီ မုး ဂုန့် အန်။ အန် ဒီ ဘူင် ပါယ် တီ ဝါယ် ဟဲ့ ဝဲန် အန် ဒွန် မျုဝ် အီ မိုဝ်း ပွုန် ဒီ အိုပ် အီ။ 25 ခုဝ်၊ ဇဝ် ယေဆူ ဒီ အိုပ် ကော ဇမ် ပန် ဒီ ပဲ အန် ရန်ဆူ အန် ဒွန် မျုဝ်၊ တဲး အန် ညဲတ့် ဂေ၊ တဲး ဂေ ကွယ် တူတ့် ခြိုမ် ပ့လဝ် အန်။ 26 ရန်ဆူ အီ ဒီ ကွယ် ကော ဇမ် ပန် ဒီ ကာဒဲ့ ဆိူတ်၊ န့ ဘော မုး ဇဝ် မာရာန။ 27 ခုဝ်၊ ခဲင် ဘပ် ဇဝ်ဖြာ ဟဲ့ ဒဲမ် အုန် တဝ်း၊ “ခဲ့ မိုဝ်း ဒွန် မျုဝ်၊ ဇဝ်ဖြာ ဒီ ညဲတ့် တူတ့် ဒွန် မျုဝ်။” အေ ယီ ဟဲ့ နပ် ဆီချာ ဂြုဝ်း အီ တဝ်း၊ “ဒွန် မျုဝ်၊” အာဝ် ဘာ့ ဇဝ်ဖြာ အီ တဲး ဇဝ် ယေဆူ ညဲတ့် ဒွန် မျုဝ် တွိုန်။ 28 ဇဝ် ယေဆူ ဟီ ညဲတ့် တူတ့် ဒွန် မျုဝ် ခြိုမ် ပ့လဝ် အန်၊ အန် အီ မုး ဂွန် ဇဝ်ဖြာ တီ၊ အန် မိူဝ် ဒီ တဲး ပွုန် ဇဝ်ဖြာ အိုပ် ဘော အန်၊ တဲး ဇဝ်ဖြာ အိုပ် တူတ့် ဒွန် မျုဝ် အီ ဇေ့ဇုင် တူတ့် ဒွန် မျုဝ်။

29 ပေါ အူ မျုဝ် လုဝ် ဇေန့်ဇာ။ န့ မိုဝ်း ဂေ အီ ဟဲ့ စိုပ် ခဲင် အိုမ် ဒါင် ဂေ ဒူအီ အီ ဟဲ့ ဟွတ့် ယမ်။ န့ ပီ ဂေ ဟဲ့ ဘူင် အီ တူ မိုဝ်း ဒီခုဝ် မာဆေ။ ဆေ ဒူအီ ယမ် တူ နပ် ဒီ ဝီ ယိတ့် ဝီ အိမ်၊ ဆေ န့ ပီ ပီ တဝ်း ဂေ ဒူအီ မင် အီ၊ အာဝ် မိုဝ်း ဒီခုဝ် စိုပ် ဂေ ခဲင် အိုမ် ဒါင် ဂေ အီ ဟဲ့ ဟွတ့် ယမ် တီ။ 30 အီ မုး ယေ၊ ယေ မိူဝ် ဟဲ့ ခမ် ဒုက်၊ ခမ် အာဖေ အာရေ ဒီလူယ် ဒီလာယ်။ 31 အိုယ် ဘေ ဘီနွင်၊ အုဝ် ဟဲ့ ခမ် ဒုက် ကော ရိန် ဒီ ယမ် ဒွန် ဆီငဲ။ ဇဝ် ယေဆူ ယီ ဝီ တဲး အုဝ် ခူယ် ကာဆဝ် လွင် အန် တီ၊ တဲး န့ ပီ အုဝ် ဟဲ့ ခူယ် ကာဆဝ် ကူပ် ဟဲ့ ညှိုမ် ဘေ ဇဝ် ယေဆူ။ 32 ပဲ့ ဟဲ့ ဘူင် အုဝ် ခဲင် မိူင် အဲဖဲ တွိုန်၊ န့ ပီ အုဝ် ဟဲ့ ကာဂုဝ်း ဒီ မာဒုဝ် ပြဲ တာင်။ ဆေ န့ ဒူပ် ပီ ကာဖာ ဒူအီ ဒဲင် ကာဒါယ် နီ၊ ဆေ ဒူအီ ယမ် တူ နပ် ဒီ ဝီ ယိတ့် ဝီ အိမ်၊ န့ တူ ဘဲန် အာဂျိုဝ် မာဆေ ဒီ အုဝ်။ ဆေ န့ ပါယ် တီ၊ တဲး အေ ဘူင် ဒူပ် ဂြုဝ်း ထုင် ပီ တဝ်း အီ၊ “တဲး အေ ဟူမ်၊ တဲး အေ ဒျီင်၊ တဲး အေ ဘူင် ဘျုဝ် ဘျုဝ်၊ ကျဝ် ကျဝ်။ အေ တူ နပ် ယုဝ် အေ ပီ ဒီ ယမ် ခဲညှာ။”

33 ကွဲ့ တဲး ဘေ ထူမ် ကာလိုပ် ဂြုဝ်း ထုင် ပီ တဝ်း အီ၊ “ဆေ အေ ဂိုက် ဒူအီ ဟာယ်၊ န့ ဒီ တဲး အာဂျာင် အေ လိုဝ်။” အာတီ ဟဲ့ မှာန်။ 34 တဲး ဘေ ဝီ ဘူင် နာ မုး နာ မှာန်။ တဲး ဘေ စူ ဘူင် မှာပ်။ ခုဝ်၊ ကာတဲ ဘေ တီ၊ န့ ဆီ မိုဝ်း မင် အီ အီ ညှမ် နပ် ဇဝ်ဖြာ။ အုဝ် ကာလာင် ပါယ် တီ၊ တဲး န့ မွှိုမ် ဆာယ် ဒီ ဘေ။

35 န့ ယီ မိုဝ်း ဒူအီ မင် အီ ဒီမွှတ် တဝ်း၊ “ဂေ အီ ဟဲ့ ဟွတ့် ယမ်၊ မှဝ် ဂေ ဒီ ပါယ် ဒီ ဝီ ယိတ့် ဝီ အိမ်။း ဆေ ဂေ ဟီ ဝီ ယိတ့် ဝီ အိမ်၊ ဒုဝ် ဘူင့် ဂေ ဒီ ပါယ် မှဝ်။း” 36 အိုယ် ဘေ ဒူအီ ရိုဝ်၊ ဒေါ ဆမ် ဘေ ကာအာင် ဆီမာ ငှုဝ် ခဲင် ကာဒါယ်၊ ဆေ ဆီမာ တီ တူ ယမ်၊ န့ တူ ပွိုန် ဝီ လတ့်။ 37 ပီ ဆမ် ဘေ ခဲင် ကာဒါယ် တီ၊ ဘော မုး ငှုဝ်၊ ဘော မုး ခဝ်ချုင်၊ ဘေ တူ ဆမ် ဒင် အန် အီ ဟဲ့ လေး။ ဘေ ဆမ် မီ ကာအာင် အန်။ 38 ဇဝ်ဖြာ မိူဝ် ဟဲ့ ဘူင် တဲး န့ ဒူပ် ပီ အိုင် အန်၊ တဲး ဆီမာ မျုဝ် မှဝ် မျုဝ် အန် ဝီ လတ့် ဘဲန် ဒင် ကာမာယ် မျုဝ် မှဝ် မျုဝ် အန်။ 39 ခုဝ်၊ ခဲ့ ကွယ် မျုဝ် အီ မိုဝ်း အာဆာက်၊ ဒုဝ် ဘူင့် ဂေ ဘော လာယ် ဘ့လိူင်၊ မိုဝ်း မျုဝ် မှဝ် မျုဝ် အန်။ ဒုဝ် ဘူင့် ဒူအီ ဘော မုး အူ မျုဝ်၊ ဒုဝ် ဆတ်ဒါဝါ အီ ကွယ် ဒဲင် ကာဒါယ် ဘော မုး ဒုဝ် ဘူင့် အူ မျုဝ်။ ဒုဝ် ဘူင့် မာဆိမ် ဘော မုး အူ မျုဝ်၊ ဒုဝ် ဘူင့် မာဂါ ဘော မုး အူ မျုဝ်။ ဒွန် မျုဝ် ဘော မိုဝ်း ဒုဝ် ဘူင့် မျုဝ် မှဝ် မျုဝ် အန်။ 40 ပါယ် တီ၊ န့ ဘော မိုဝ်း ဒုဝ် ဘူင့် အီ ကွယ် ခဲင် ဂါင်ဟြာဝ် ဘော ဒုဝ် ဘူင့် အီ ကွယ် ဒဲင် ကာဒါယ် အီ တူ မုး အူ မျုဝ်။ မာလဲ၊ အာဖုင် ဒင်ခုဝ် ဒုဝ် အီ ကွယ် ခဲင် ဂါင်ဟြာဝ် တူ ပီ အာဖုင် ဒင်ခုဝ် ဒုဝ် အီ ကွယ် ဒဲင် ကာဒါယ် နီ။

41 ဆီငဲ ဘော မိုဝ်း ဆာရေ အူ မျုဝ်။ မာဂျီန် ဘော မိုဝ်း ဆာရေ ပေါ အူ မျုဝ်။ ဆီမန့် ဘော မိုဝ်း ဆာရေ ပေါ အူ မျုဝ်။ ဆီမန့် အူ ဘူင့် တူ ပီ ဆီမန့် ပေါ အူ ဘူင့်။ ဂေ ဘော လာယ် ဘ့လိူင်။

42 လွင် ဝီ ယိတ့် ဝီ အိမ် ဒူအီ ဝါယ် ဟဲ့ ဟွတ့် ယမ် ဂေ၊ န့ ဘော ပါယ် တီ။ ဒုဝ် ဘူင့် ပဲ့ ဟဲ့ ဟွတ့် ဒိပ် တွိုန်၊ အန် ဒီ အမ် လာတ့် တူတ့်။ န့ ယီ မုး ဒုဝ် ဘူင့် အီ ဝီ ယိတ့် ဝီ အိမ်၊ အန် ဟူ နပ် ဒီ အမ်၊ ဟူ နပ် ဒီ လာတ့် ဒေါ မှဝ်။ 43 ဒုဝ် ဘူင့် ပီ ဒီ ဒိပ် ဝဲန် အေ၊ အာဝ် မိုဝ်း ဆာရေ၊ အာဝ် မွှိုမ် ယွတ်။ ဒုဝ် ဘူင့် အီ ဒီ ဝီ ယိတ့် ဝီ အိမ်၊ အန် ဒီ ဘော မိုဝ်း အာဖုင် ဒင်ခုဝ်။ ဒုဝ် ဘူင့် ပီ ဒိပ် ဝဲန် အေ၊ အာဝ် မိုဝ်း ဟဲန့်။ ဒုဝ် ဘူင့် အီ ဒီ ဝီ ယိတ့် ဝီ အိမ် ယီ မိုဝ်း ပွုန် တာင်။ 44 ဒုဝ် ဘူင့် ပီ ဒီ ဒိပ် တီ မုး အာမျုဝ် ယင် ဂေ နှာမ် အီ ကွယ် ဒဲင် ကာဒါယ် နီ။ ဒုဝ် ဘူင့် အီ ဒီ ဝီ ယိတ့် ဝီ အိမ်၊ အန် မုး အာမျုဝ် နဝ်း ဖွိုမ် ဇဝ်ဖြာ အီ ပွိုန် ကွယ် ခဲင် ဂါင်ဟြာဝ်။ ဆေ န့ ယီ မိုဝ်း ဒုဝ် ဘူင့် အီ ပွိုန် ကွယ် ဒဲင် ကာဒါယ်၊ န့ ဒီ မိုဝ်း ဘော ဒုဝ် ဘူင့် အီ ပွိုန် ကွယ် ခဲင် ဂါင်ဟြာဝ်။ 45 ခုဝ်၊ ခဲင် ဘပ် ဇဝ်ဖြာ ဟဲ့ ဒဲမ် တဝ်း၊ “ဒါ အာဒါမ် အီ မုး ဒူအီ ဒေါ ဂုဝ် တွိုန်၊ အန် ဘော မုး ဒူအီ အီ မိုဝ်း အာဆာက် အီ မိုဝ်း ဘော နဝ်း ဖွိုမ်။ ဇဝ် ယေဆူ အီ ပီ အာဒါမ် ပေါ အူ ဝီ၊ အန် ယီ မိုဝ်း နဝ်း ဖွိုမ် ဇဝ်ဖြာ အီ နပ် ဒီ တဲး အာဆာက် ဒီ အီ။” 46 အာဝ် မုး ဒုဝ် အီ မိုဝ်း နဝ်း ဖွိုမ် အီ တး ဒီ အာတ့်။ ဒုဝ် ဘူင့် ဂေ ဒူအီ အီ ကွယ် ဒဲင် ကာဒါယ် နီ ဟဲ့ တး ဒီ အာတ့်။ ဟဲ့ ဟွတ့်၊ ဒုဝ် ဘူင့် အီ မိုဝ်း နဝ်း ဖွိုမ် ကော ဝီ တး။ 47 ဆေ န့ မုး အာဒါမ် အီ ကွယ် ဒေါ ဂုဝ် တွိုန်၊ ဇဝ်ဖြာ ဟဲ့ ဒိုဝ်း ကာဒါယ် ဘူင် ဘဲန် အန်။ ဇဝ် ယေဆူ အီ တး ဒီ ပန်၊ အန် ယီ တး ခဲင် ဂါင်ဟြာဝ် လူင်။ 48 ဂေ အီ ကာဒိုက် ကာဒဝ့် ဒဲင် ကာဒါယ်၊ ဂေ ပီ ဒူအီ အီ တး ဒီ ကာဒါယ်။ ဂေ အီ ကာဒိုက် ကာဒဝ့် ဒီ ဝီ အီ ကွယ် ခဲင် ဂါင်ဟြာဝ်၊ ဂေ ပီ ဒူအီ အီ တး ခဲင် ဂါင်ဟြာဝ်။ 49 အေ ဟဲ့ ပီ ဒူအီ အီ ကွယ် ဒဲင် ကာဒါယ်။ ပါယ် တီ၊ အေ ဒီ ဘော ပီ ဘော ဒူအီ အီ တး ခဲင် ဂါင်ဟြာဝ်။

50 အိုယ် ဘေ ဘီနွင်၊ အုဝ် ကာလာင် ဒီ ဘေ၊ ဒူအီ အီ ကွယ် ဒဲင် ကာဒါယ်၊ အန် တူ ပွိုန် ဒီ လိုပ် ခဲင် မိူင် ပီ အိုပ် ဇဝ်ဖြာ။ ပါယ် တီ၊ မျုဝ် အီ နပ် ဒီ အမ် နပ် ဒီ လာတ့်၊ အန် တူ ပွိုန် ဒိုဝ်း မျုဝ် အီ တူ နပ် ဒီ အမ် တူ နပ် ဒီ လာတ့်။ 51 တဲး ဘေ ထူမ်၊ အုဝ် ဒီ ကာလာင် ဒီ ဘေ ပီ တူ ဒွိုမ် နပ် အီ။ အာဝ် မုး အေ ဒွန် အီ ဒီ လုဝ် ယမ်။ 52 မာလဲ၊ အေ ဒွန် အီ ဒီ ကာပ့လု ဘဲန် တူတ့် ဒုဝ် ဘူင့် အီ ကာမာယ်။ ပန် ဒီ မိုဝ်း ဟမ် ဝဝ် ဒီ ကာဒဲ့ ဆိူတ် အူ ကာအျီပ် ငါယ် န့ ဒီ ဘဲန် ပါယ် တီ။ ခုဝ်၊ ဒေါ မိုဝ်း ဟမ် ဝဝ် တီ၊ ဂေ အီ ဟဲ့ ယမ် ဒီ ဝီ ယိတ့် ဝီ အိမ်၊ ဝီ လေး၊ အာဝ် ဟူ မိုဝ်း ဒုဝ် အီ နပ် ဒီ အမ် ဒီ လာတ့်။ အေ ဘော ဒွန် အီ ဒီ ကာပ့လု အူ ဇေန့်။ 53 ခုဝ်၊ အီ နပ် ဒီ အမ် နပ် ဒီ လာတ့် တွိုန်၊ ဒီ ဝီ ကာပ့လု ဘဲန် အီ တူ နပ် ဒီ အမ် တူ နပ် ဒီ လာတ့်။ ဒူအီ အီ နပ် ဒီ ယမ်၊ ဂေ ဒီ ဝီ ကာပ့လု ဘဲန် ဒူအီ အီ တူ နပ် ဒီ ယမ်။ 54 ဆေ ဟီ ဟွတ့် ကာပ့လု အီ နပ် ဒီ အမ် နပ် ဒီ လာတ့်၊ ဝီ ဘဲန် အီ တူ နပ် ဒီ အမ် တူ နပ် ဒီ လာတ့်၊ ဘော ဒူအီ အီ နပ် ဒီ ယမ် ဟဲ့ ဝီ ကာပ့လု ဘဲန် ဒူအီ အီ တူ နပ် ဒီ ယမ်။ န့ ဒီ ဘော မှာန် ပီ ဒဲမ် အုန် ခဲင် ဘပ် ဇဝ်ဖြာ တဝ်း၊ “ဇဝ်ဖြာ ဟဲ့ အွင်၊ ဟဲ့ ပဲ ဇဝ် မာရာန။”

55 န့ ဘော ဟဲ့ ဒဲမ် ပေါ မ့ပွါ တဝ်း၊ “အိုယ် ဇဝ် မာရာန ပဲ့ ဟဲ့ အွင် ဟဲ့ ပဲ မဲ တွိုန် အာဝ် ဟူ မိုဝ်း။ ပွုန် မဲ အီ တဲး အီ ယမ် ဟဲ့ ဟွတ့် ဟြာယ်။”

56 ပွုန် ဇဝ် မာရာန တီ၊ န့ မုး မှာပ်။ ပွုန် အီ ဒမ် မှာပ် ဒီ အီ၊ န့ မုး ဒါရာ။ 57 မာလဲ၊ အေ ဒါင် ဂုင် ဂေဇူ ဒီ ဇဝ်ဖြာ။ အန် ဟဲ့ တဲး အေ အွင် တဲး အေ ပဲ ကူပ် ညှိုမ် ဘိုင် အေ အန် ဇဝ် ယေဆူ။

58 အိုယ် ဘေ ဘီနွင် ပီ ရွက့် အုဝ်၊ ကူပ် န့ ပါယ် တီ၊ တဲး ဘေ အုန် နဝ်း ဘေ၊ တဲး န့ မန် ဆီချာ။ ကွဲ့ တဲး န့ ကျီင်။ တဲး ဘေ ဂျုဝ်ဂျာ ဒီ ဘူင် ဂါန် ဇဝ်ဖြာ ဆေဆေ။ ဘေ ဘော ဟဲ့ နပ် ဂါန် ပီ ဘူင် ဘေ ကူပ် ဟဲ့ စ်ု ဇဝ်ဖြာ ဘေ ဘူင်၊ န့ တူ စှိုမ် ဒေါ မှဝ်။ န့ ဒီ မိုဝ်း အာဂျိုဝ် အန်။