လွင် ရွိုန် ပီ ဂဲပ် ဘေ အာဒါ ဒူအီ အီ ညှိုမ် ဇဝ်ဖြာ အီ ကွယ် ခဲင် အိူင် ယူဒါ တွိုန်၊ ဘေ လုဝ် ဘူင် တဲး န့ ပီ ပီ ကာလာင် အုန် အုဝ် ဒီ ဂေ ဒူအီ ခဲင် ဖိုင် ဇဝ် ယေဆူ အီ ကွယ် ခဲင် အိူင် ဂါလာထီ တွိုန်။ 2 ဆီငဲ ဒီလှဝ် ဒွန် ဆီငဲ၊ တဲး ဘေ ဒွန် အီ လှူ ခဲ့ ပီ ပွိုန် ဘေ လှူ။ တဲး ဘေ ဂဲပ် ကာဇု အုန် ရွိုန် ပီ လှူ ဘေ တီ။ ပန် ဒီ တး အုဝ် ဒူင် ကွယ် ဘေ၊ ဘေ အာဝ် ဟူ လုဝ် ဂဲပ် ပေါ န့ ပွါ။ 3 ပန် ဒီ တး ဇမ် အုဝ် ဒူင် ကွယ် ဘေ၊ အုဝ် ဒီ ဒွါ ပဲ့ ဒီ ဒူအီ ပီ ရဝ်း ပီ တိုယ် ဘေ၊ တဲး ဂေ ဂူင့် ဘော ပဲ့ ဘော ရွိုန် ပီ လှူ ဘေ တီ၊ ဟာဝ် တိုယ် ဒီ မိူင် ယေရူဆာလဲမ်။ 4 ဆေ န့ ဘော ဆင်ဒုဝ်၊ ဘော အုဝ် ဒီ ဟာဝ် ဒူပ်၊ တဲး ဂေ တီ မိူဝ် ဟာဝ် ရိုမ် ဒူပ် အုဝ်။

5 ကူပ် လုဝ် ဟာဝ် အုဝ် ဒီ အိူင် မာခေဒူန်၊ အုဝ် ဒီ တး ဒူင် ကွယ် ဘေ ဝါယ် ဟဲ့ ဟွတ့် ဟာဝ် အုဝ် ဒီ အိူင် မာခေဒူန်။ ခုဝ်၊ အုဝ် တဝ်း ဒီ ကာလုဝ်း အိူင် မာခေဒူန် တီ။ 6 အုဝ် ဟဲ့ ခြာမ် ဒီ ကွယ် ရာမ် လှေန့် ဒူင် ကွယ် ဘေ၊ တဲး န့ ကော ပွုန် အာခြာဝ် ဂတ်။ ဘေ မိူဝ် ဒီ ပွိုန် စွယ် ခြာဝ် န့တေန့် အုဝ်၊ တဲး အုဝ် ပွိုန် ဒီ ဟာဝ် ဒူင် ဒီ ဟာဝ် အုဝ် ပေါ န့ ပွါ။ 7 အုဝ် တူ ဆီ တး စ်ု ဘေ အူ ကာစန် ပီ ဝီ ကာလုဝ်း ဟာဝ်။ ဆေ ဘော မုး ပီ အိုင် ဇဝ်ဖြာ၊ အုဝ် ဒီ ကွယ် ရာမ် လှေန့်။ 8 အုဝ် ပီ ဘော ဟဲ့ တဝ်း ပါယ် တီ မိူဝ်၊ အုဝ် ဒီ ကွယ် ခဲင် မိူင် အဲဖဲ၊ တဲး န့ ကော ဇမ် ဘ့လွယ် ဖေန်ထေခူတ်။ 9 ဒီ နီ န့ ပီ ဘော ဟဲ့ မိုဝ်း ကိူန် အီ ကာဘး ဒီ အုဝ်၊ အုဝ် ယီ ပွိုန် ဒီ ကာလာင် ဆီချာ လွင် ဇဝ်ဖြာ ဒီ ဒူအီ ကိူန်။

10 ပန် ဒီ တး ဇမ် အာထီမုဝ်ထေ ဒူင် ကွယ် ဘေ၊ တဲး ဘေ ယွတ် လိုမ်လာ ဆီချာ အန်။ ကွဲ့ တဲး အန် မိုဝ်း ပီ ဒီ လုဝ် ယုဝ်။ အန် ဘော မုး အီ ဘူင် ဂါန် ဇဝ်ဖြာ ပီ အုဝ်။ 11 ခုဝ်၊ ကွဲ့ တဲး အာဆေ လုက်တာယ် အန်။ တဲး ဘေ စွယ် အန်၊ တဲး အန် ပွိုန် ဒီ ဟာဝ် ဒါခိုယ်၊ ဝီ စေဝ် တး ဇမ် ဒူင် ကွယ် အုဝ်။ ဘော အုဝ် ဘော ဘီနွင် အီ ကွယ် ရိုမ် ဒူပ် အုဝ်၊ ယေ ဘော နှဝ့် န့ဒဝ့် အန် ဒီ ဝီ တး။

12 အီ မုး ဘီနွင် အေ အာဖောလူန်၊ အုဝ် ဟဲ့ အွန် ဒီ ကာလာင် ဒီ အန်၊ တဲး ဘော အန် ဘော ဘီနွင် မင် အီ ဟာဝ် လဲ ဟာဝ် စ်ု ဘေ။ မာလဲ၊ အန် တူ ဆီ ဟာဝ် ဒေါ တီ နီ။ အန် ယီ တဝ်း ဒီ ဟာဝ် ဇမ် ဒူင် ကွယ် ဘေ ဆေ အန် ဟီ ဒန်။

13 တဲး ဘေ ဆာဒိက်။ တဲး နဝ်း ဘေ ညှိုမ် ဆီချာ။ တဲး ဘေ မိုဝ်း နဝ်း ယ ဘော မိုဝ်း ပ့လူမ် မိုဝ်း ဟဲန့် ခဲင် နဝ်း ဘေ။ 14 ဂါန် ပီ လုဝ် ဘူင် ဘေ ဒွန် မျုဝ်၊ တဲး ဘေ ဘူင် ဒူပ် နဝ်း ရွက့် နဝ်း ကာဝေ။

15 အိုယ် ဘေ ဘီနွင်၊ ဘေ ဟဲ့ နပ် လွင် အာဆာဖာန် ဘော ဒူအီ ခဲင် န့ဟူမ် အန်၊ ဂေ ဟဲ့ မုး ဒူအီ အီ ညှိုမ် ဇဝ် ယေဆူ ဒီ အာတ့် အီ ဟဝ် အီ ကွယ် ခဲင် အိူင် အာခါယာ။ ဂေ ဟဲ့ ခမ် ဒီ ဘူင်၊ တဲး ဂေ စွယ် ဒွန် အီ အီ ညှိုမ် ဇဝ်ဖြာ။ 16 အုဝ် ဆီ ကာဆုး ဘေ ဘီနွင်၊ တဲး ဘေ ထူမ် ဂြုဝ်း ဒူအီ အီ ယဲတ့် ဘေ ပီ ဂေ တီ၊ တဲး ဘေ ထူမ် ဘော ဂေ အီ ဘူင် ရိုမ် ဂါန် ဇဝ်ဖြာ ဒူပ် ဂေ တီ။ 17 ဒေါ ဟဲ့ တး စ်ု အာဆာဖာန် ဘော အာဖုဝ်ထူနိတ် ဘော အာခါခူ ဒီ အုဝ်၊ အုဝ် ဟဲ့ ခူယ် ကာဆဝ်။ ခုဝ်၊ ပီ တူ ပွိုန် ဘူင် ဘေ ဒီ အုဝ်၊ ဂေ ဟဲ့ ဘူင် တဲး န့ ဟွတ့် တူတ့် ဒွန် မျုဝ်။ 18 ဂေ ဟဲ့ ဘူင် တဲး နဝ်း အုဝ် ဝီ ဒါခိုယ်။ ဂေ မိူဝ် ဟဲ့ ဘူင် တဲး ဘော နဝ်း ဘေ ဒါခိုယ်။ န့ ဟဲ့ ကာအာပ် အေ ရုဝ်ဆေ ဒူအီ ဇိုဝ် တီ။

19 ဂေ ဒူအီ ခဲင် ဖိုင် ဇဝ် ယေဆူ အီ ကွယ် ခဲင် အိူင် အာဆီယာ ဟဲ့ နမ်လှုဝ်း ဘေ။ ဘော အာခီလာ ဂါယ် အီဘိုန့် အန် အီ စိူဝ် ဖီခီလာ ဘော ဖိုင် အီ ညှိုမ် ဇဝ် ယေဆူ အီ ကွယ် ခဲင် ကာင် ဂါယ် တီ၊ ဂေ ဟဲ့ နမ်လှုဝ်း ဘေ ကူပ် ညှိုမ် ဘေ ဇဝ် ယေဆူ။ 20 ဂေ ဘီနွင် ဒွန် အီ ဘော နမ်လှုဝ်း ဘေ။ တဲး ဘေ ဘော လာယ် ရွုး လာယ် အုး ပီ အူ ဘီနွင် ဟဲ့ လာယ် ရွက့်။

21 ဒေါ တီ နီ၊ အုဝ် အာပေါလူ ဝီ ဒဲမ် ဂြုဝ်း နမ်လှုဝ်း တိုယ် ဒီ ဘေ။

22 အာဆေ ယီ တူ ရွက့် ဇဝ်ဖြာ၊ တဲး အန် ခမ် ကာဆမ် ဒိူင်။ အိုယ် မဲ ဇဝ်ဖြာ၊ တဲး မဲ တး။

23 တဲး ဇဝ် ယေဆူ ဂေဇူ ဘေ ဆေဆေ။

24 ကူပ် ညှိုမ် ဘေ ဇဝ် ယေဆူ အုဝ် မိူဝ် ရွက့် ဘေ ဒွန် အီ။ ဆာတူ။