အုဝ် ဆီ တဲး ဘေ နပ် လွင် နာင် ဖေဘီ အီ မုး ဝါ အေ အီ ဘူင် ဂါန် ခဲင် ဖိုင် ဇဝ် ယေဆူ၊ အီ ကွယ် ခဲင် မိူင် ကေန်ဆေ၊ အန် မုး ဒူအီ မွှိုမ်။ 2 ကူပ် မုး အန် ဒူအီ ပီ အိုပ် ဇဝ်ဖြာ၊ တဲး ဘေ ရွုး အန် ဘော ဘူင် ပီ ကာအာပ် ဘူင် ဒူအီ အီ ညှိုမ် ဇဝ်ဖြာ။ ဆေ အန် ဘော လုဝ် မာဆေ၊ တဲး ဘေ စွယ် အန်။ ခုဝ်၊ အန် မိူဝ် ဟဲ့ စွယ် ကိူန် အီ ဟဝ်။ ဘော အုဝ် အန် ဟဲ့ ဒွိုမ် စွယ်။

3 ဘော နာင် ဖီခီလာ ဂါယ် အီမာယ် အန် အီ စိူဝ် အာခီလာ၊ တဲး ဘေ ကာလာင် ဒီ ဂါယ် လွင် ဟဲ့ နမ်လှုဝ်း အုဝ် ဒီ ဂါယ်။ ဂါယ် ဟဲ့ ဘူင် ရိုမ် ဂါန် ဇဝ် ယေဆူ ဒူပ် အုဝ်။ 4 ဂါယ် ဟဲ့ ရိန် ဒီ ယမ် ကူပ် အုဝ်။ အာဝ် ဝန် မီ အုဝ် အီ ဟဲ့ ဒါင် ဂုင် ဂေဇူ ဒီ ဂါယ်။ ဂေ ဒူအီ အာမျုဝ် ဟဝ် အီ ကွယ် ခဲင် ဖိုင် ဇဝ် ယေဆူ အီ ကွယ် ဒွန် နာ ဒွန် ပ့လုဝ့်၊ ဘော ဂေ ဟဲ့ ဒါင် ဂုင် ဂေဇူ ဒီ ဂါယ်။

5 အုဝ် နမ်လှုဝ်း ဘော ဂေ ဒူအီ ခဲင် ဖိုင် ဇဝ် ယေဆူ အီ ကွယ် ရိုမ် ခဲင် ကာင် ဂါယ် တီ။

အုဝ် နမ်လှုဝ်း ဘော အာအေပေနိက် အီ မုး ဂိုက် ပီ ရွက့် အုဝ်။ အန် ဘော မုး အီ ညှိုမ် ဇဝ် ယေဆူ ဒီ အာတ့် အီ ဟဝ် ခဲင် အိူင် အာဆီယာ နီ။

6 အုဝ် နမ်လှုဝ်း ဘော နာင် မာရီ အီ ဟဲ့ ဂျုဝ်ဂျာ ဒီ ဘူင် ဂါန် ကိူန် အာဒါ ဘေ။

7 အုဝ် နမ်လှုဝ်း ဘော အာအန်ဒါနိတ် ဘော အာယူနီအာတ် အီ မုး ဝေါဝဲ အုဝ်။ ဂါယ် ဟဲ့ ခမ် ဒီ စုဝ်း ကာပိုမ် ဒူပ် အုဝ်။ ခဲင် ဂေ ဒူအီ ပီ ရဝ်း ပီ တိုယ် ဇဝ် ယေဆူ၊ ဟဲ့ မုး ဂါယ် တီ၊ ပီ မိုဝ်း အီ ဟဝ် ဒီ ကာလာင် နာ ဘွတ် နာ မွှိုမ် လွင် ဂါယ်။ ဂါယ် မိူဝ် ဟဲ့ ညှိုမ် ဇဝ် ယေဆူ အာတ့် ညှိုမ် အုဝ်။

8 အုဝ် နမ်လှုဝ်း ဘော အာအမ်ဘာလီ အီ မုး ဂိုက် ပီ ရွက့် အုဝ် ကူပ် ညှိုမ် အုဝ် ဇဝ်ဖြာ။

9 အုဝ် နမ်လှုဝ်း ဘော အာအူရာဖန် အီ ဟဲ့ ဘူင် ရိုမ် ဂါန် ဇဝ် ယေဆူ ဒူပ် ယေ၊ ဘော အာဆာတာကူ အီ မုး ဂိုက် ပီ ရွက့် ကာဆဝ် အုဝ်။

10 အုဝ် နမ်လှုဝ်း ဘော အာဘေန်လ၊ အီ မုး ဒူအီ အီ ဟဲ့ ခမ် ဒုက် ကူပ် ညှိုမ် အန် ဇဝ် ယေဆူ။ အန် ယီ တူ ဝဲန် ပီ ညှိုမ် အန်။

အုဝ် နမ်လှုဝ်း ဘော ဒူအီ ခဲင် န့ဟူမ် အာရီတောပူလူ။

11 အုဝ် နမ်လှုဝ်း ဘော အာဟေရုဝ်တာယာန် အီ မုး ဝေါဝဲ အုဝ်။

အုဝ် နမ်လှုဝ်း ဘော ဂေ ဘီနွင် အီ ညှိုမ် ဇဝ် ယေဆူ အီ ကွယ် ခဲင် ကာင် အာနာဆုန်။

12 အုဝ် နမ်လှုဝ်း ဘော နာင် တာရူဖုဝ်နီ ဘော နာင် တာရူဖုဝ်ဆာ အီ ဟဲ့ ဂျုဝ်ဂျာ ဒီ ဘူင် ဂါန် ဇဝ်ဖြာ။

အုဝ် နမ်လှုဝ်း ဘော နာင် ဘေရူဆီ အီ မုး ဂိုက် ပီ ရွက့် အုဝ်။ ဘော အန် ဟဲ့ ဂျုဝ်ဂျာ ဒီ ဘူင် ကိူန် ဂါန် ဇဝ်ဖြာ။

13 အုဝ် နမ်လှုဝ်း ဘော အာရူဖူ အီ မုး ဒူအီ ပီ ရဝ်း ဇဝ်ဖြာ၊ ဘော မာ အန် အီ ဟဲ့ မာတ် အုဝ် ဟဲ့ ပီ ဂွန် အန်။

14 အုဝ် နမ်လှုဝ်း ဘော အာဆူကြိတ်၊ ဘော အာဖာလေကုန်၊ ဘော အာဟေရေမ်၊ ဘော အာဘတ်ရောဘာ၊ ဘော အာဟေရာမက်၊ ဘော ဂေ ဘီနွင် အီ ကွယ် ရိုမ် ဒူပ် ဂေ။

15 အုဝ် နမ်လှုဝ်း ဘော အာဖီလောကုတ် ဘော နာင် ယူလီ ဘော အာနေရူ ဂါယ် ဝါ အန် အီ မုး အီဘိုန့် ဘော အာအုဝ်လိမ်ဘာ ဘော ဂေ ဒူအီ အီ ညှိုမ် ဇဝ်ဖြာ ဒွန် အီ အီ ကွယ် ရိုမ် ဒူပ် ဂေ။

16 တဲး ဘေ လာယ် မွင့်ကာရာ ဒွါ ဒွန် အီ ဘော လာယ် အုး ပီ ဘီနွင် အီ ဟဲ့ လာယ် ရွက့်။ ဂေ ဒူအီ ခဲင် ဖိုင် ဇဝ် ယေဆူ မိူဝ်၊ ဟဲ့ နမ်လှုဝ်း ဘေ ဘော ဒီမွှတ် လွင် ဘေ။

17 အိုယ် ဘေ ဘီနွင်၊ အုဝ် ဒမ် ဘေ၊ တဲး ဘေ ဆာဒိက် ဒီ ဂေ ဒူအီ အီ နပ် ဒီ ဘူင် တဲး ဘေ လာယ် ကာယဝ်း ကာရေး ဘော ဘူင် တဲး န့ ညှာပ် ဒူပ် ဇဝ် ယေဆူ ဘော မာနုဝ် ကာဘး ဒီ ပဲ့ ဟဲ့ ဒွိုမ် ဟေန် ဘေ။ ကွဲ့ တဲး ဘေ ဒူပ် ဒူအီ ဂေ တီ။ 18 ခုဝ်၊ ဒူအီ ဂေ တီ၊ ဂေ ဘူင် လဲ တဲး ဝတ့် ဂေ ဂိုဝ်း။ ဂေ တူ ဘူင် ဂါန် ဇဝ် ယေဆူ အီ မုး ဇဝ်ဖြာ ပီ ကြိုပ် အေ။ ဂေ ဘော နပ် ဒီ ကာလာင် ဂြုဝ်း ဒါခိုယ် ဂြုဝ်း ငါမ်၊ ဘော မှုဝ် ဒီ ကာလုဝ် ဒူအီ အီ တူ ဇေန့်ဇာ၊ အီ ငှိုယ် ညှိုမ်။ 19 ဒူအီ ဘောကာဂ့လျီတ် ဟဲ့ နပ်၊ ဘေ ဟဲ့ ညှိုမ် ဟဲ့ ထူမ် ဂြုဝ်း ဇဝ်ဖြာ။ ခုဝ်၊ အုဝ် မိူဝ် ဟဲ့ ခူယ် ခါခ်ု။ အုဝ် ဘော ဆီ တဲး ဘေ မိုဝ်း အာငျာန် အီ ဘွတ် အီ မွှိုမ်၊ တဲး ဘေ မိုဝ်း ဘော နဝ်း ဆိူဝ် နဝ်း မှာန်၊ ကွဲ့ တဲး ဘေ ဘူင် နာ ဟာယ် နာ မိူက်။

20 အာဝ် ဘော လှေန့် ဇဝ်ဖြာ အီ နပ် ဒီ ဒွါ နဝ်း ဂျီတ် ဒီ ဘေ၊ အန် ဒီ ထိပ် ဘုဝ် ကာနမ် အီ စိူဝ် ဆာတာန်၊ တဲး အန် ကွယ် ခြိုမ် ပ့လဝ် ဘေ။ တဲး ဇဝ် ယေဆူ အီ မုး ဇဝ်ဖြာ ပီ ကြိုပ် အေ ဂေဇူ ဘေ ဆေဆေ။

21 ဘော အာထီမုဝ်ထေ အီ ဘူင် ရိုမ် ဂါန် ဒူပ် အုဝ်၊ ဘော အန် နမ်လှုဝ်း ဘေ။ ဘော အာလူဆီ ဘော အာယာဆူန် ဘော အာဆာဆီဒါ အီ မုး ဝေါဝဲ အုဝ်၊ ဂေ ဟဲ့ နမ်လှုဝ်း ဘေ။

22 အုဝ် အာတေရာတီ အီ မုး ဒါ စာရေ အီ ဒဲမ် ပဲ့ နီ၊ အုဝ် နမ်လှုဝ်း ဘေ ကူပ် ညှိုမ် အေ ဇဝ်ဖြာ။

23 အာဂါယူ အီ မုး ဒါ ကာညာ ကာင် ဒူင် ကွယ် အုဝ် နီ၊ အန် ဟဲ့ တဲး ဂေ ဒူအီ ခဲင် ဖိုင် ဇဝ် ယေဆူ တး ကွယ် ကာဇု ဒီ ကာင် အန်။ ဘော အန် ဟဲ့ နမ်လှုဝ်း ဘေ။

ဘော အာရာထူ အီ မုး ဒါ အီ ပါ ရွိုန် ခဲင် မိူင်၊ ဘော အာကာစူ အီ မုး ဘီနွင် အေ အူ ဝီ၊ ဂါယ် ဟဲ့ နမ်လှုဝ်း ဘေ။

24 တဲး ဇဝ် ယေဆူ ဂေဇူ ဘေ ဒွန် အီ။ ဆာတူ။^a

25 တဲး အေ အိူပ် ဇဝ်ဖြာ အီ မိုဝ်း အာဖုင် ဒင်ခုဝ် တာင်။ အန် ဇဝ် ဘော နပ် ဒီ တဲး ဘေ ညှိုမ် ဆီချာ ကူပ် ညှိုမ် ဘေ ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ်၊ အီ မုး လွင် ဇဝ် ယေဆူ။ န့ မုး ဂြုဝ်း ပဲ့ ဟဲ့ ကာလာင် အီ ဒီ ဘေ။ အူ ဆိန့် ဒေါ မွိုန် ဟဲ့ လှေန့် ကာဆဝ် ဇဝ်ဖြာ တူ ဒွိုမ် တဲး အီ နပ် လွင် အန် တီ။ 26 အန် ဇဝ် အီ ကွယ် ဆေဆေ၊ အန် ဟဲ့ ဒွိုမ် စ်ု ဂေ ဒူအီ အီ ဘျာန် ဂြုဝ်း အန်၊ တဲး ဂေ ဒဲမ် အုန် လွင် အန် တီ။ ဒေါ တီ နီ၊ အန် ယီ ဟဲ့ တဲး န့ လိုဝ်း ဆီချာ လွင် ပီ ဒဲမ် အုန် ဂေ တီ။ အန် ဇဝ် ဟဲ့ ဘူင် ပါယ် တီ၊ တဲး ဂေ ဒူအီ ဒွန် မျုဝ် အီ ကွယ် ဒဲင် ကာဒါယ် ပွိုန် ဒီ ညှိုမ် ဘော ထူမ် ဒူပ် ဂြုဝ်း အန် တီ။ 27 ခုဝ်၊ ကူပ် ညှိုမ် အေ ဇဝ် ယေဆူ၊ တဲး အေ အိူပ် မျုက် ဇဝ်ဖြာ အီ မုး မီ အူ ကာဒင် အီ ဟဲ့ မိုဝ်း အာငျာန် ဘွတ်။ တဲး အေ အိူပ် မျုက် အန် ဇဝ် ဆေဆေ၊ တဲး အာဖုင် ဒင်ခုဝ် အန် ဝဲ ကိူန် ဆေဆေ။ ဆာတူ။