အေ အီ ဟဲ့ ညှိုမ် ဆီချာ လွင် တူ လုဝ် ဒူပ် ဒါရာ ဂေ ဒူအီ အီဆာရေလ၊ အေ လုဝ် ခမ် ဒီ ယိူန် ဒီ ဂေ အီ မိုဝ်း နဝ်း ကာလိင် ကာလဲ လွင် အန် တီ။ အေ တူ လုဝ် ဒူပ် မီ ပီ အိုင် အေ။ 2 အေ လုဝ် ဘူင် တဲး န့ ဘဲန် အာဂျိုဝ် ဒီ ဘီနွင် အေ၊ တဲး ဂေ ဝီ နပ် ဒီ ညှိုမ် ဆီချာ။ 3 ဇဝ် ယေဆူ မိူဝ် တူ ဘူင် ပီ အိုင် အန်။ ခဲင် ဘပ် ဇဝ်ဖြာ န့ ဘော ဟဲ့ ဒဲမ် တဝ်း၊ “ပီ ဟဲ့ နဲန အီ ဟဝ် ဒီ မဲ ဇဝ်၊ န့ ပီ အုဝ် ဟဲ့ ခမ် တူတ့်။” 4 ဂြုဝ်း ပီ ဒွိုမ် ဒဲမ် အုန် ခဲင် ဘပ် ဇဝ်ဖြာ ဘောကာဂ့လျီတ်၊ န့ ဘော မာနုဝ် အေ၊ တဲး အေ ခမ် ဒီ ယိူန် လှေန့်၊ ဘော မိုဝ်း ပ့လူမ် မိုဝ်း ဟဲန့် ဒီ ဒူပ် ဂြုဝ်း ပဲ့ ဟဲ့ ဒဲမ် အုန် ခဲင် ဘပ် ဇဝ်ဖြာ။ န့ ဘော တဲး အေ မိုဝ်း ပီ ဒီ နှဝ့် န့ဒဝ့်။

5 ဇဝ်ဖြာ နပ် ဒီ ဒွါ နဝ်း ခမ် ဒီ ယိူန် ဘော နပ် ဒီ ဒွါ ဘော ပ့လူမ် ဂေ ဟဲန့် ဒီ နဝ်း အေ။ အုဝ် မှာန့်၊ တဲး ဇဝ်ဖြာ စွယ် ဘေ တဲး ဘေ ညိုင် ဇဝ် ယေဆူ၊ တဲး ဘေ လာယ် ဖြူမ် ရိုမ် ဘဲန် အူ နဝ်း။ 6 တဲး ဘေ ဘောကာဂ့လျီတ် ဘော ဖြူမ် ဒီ အိူပ် ဇဝ်ဖြာ အီ မုး ဂုန့် ဇဝ် ယေဆူ။ ဇဝ် ယေဆူ ဘော မုး ဒါ ကာညာ အီ အိုပ် အေ။

7 တဲး ဘေ ကွယ် ရိုမ်၊ ကွယ် ကာဒူပ်၊ တဲး န့ ပီ ဇဝ် ယေဆူ ဟဲ့ တဲး ဘေ ကွယ် ရိုမ် ဒူပ် အန်၊ တဲး အီ အိူပ် ဇဝ်ဖြာ၊ တဲး အာဖုင် ဒင်ခုဝ် ဇဝ်ဖြာ ဝဲ တာင်။ 8 အုဝ် ယီ ကာလာင် ဒီ ဘေ လွင် ဇဝ် ယေဆူ။ ဇဝ် ယေဆူ တီ၊ အန် ဟဲ့ ဘူင် တဲး န့ ဘဲန် အာဂျိုဝ် ဒီ ဒူအီ အာယူဒါ၊ တဲး န့ လိုဝ်း ဆီချာ လွင် ဂြုဝ်း ဇဝ်ဖြာ ဟဲ့ မုး ဟဲ့ မှာန်။ ဘော ကာဒိက် ဆတ်ဇာ ပီ ဒွိုမ် ဒွါ ဇဝ်ဖြာ ဒီ ဂုန့် ဒင် ဂေ ဒေါ မွိုန်၊ ဇဝ် ယေဆူ ဟဲ့ ဘူင် တဲး န့ ဇေ့ဇုင်။ 9 ပီ ဘူင် အန် တီ၊ န့ မိူဝ် တဲး ဂေ ဒူအီ အာမျုဝ် ဟဝ် အိူပ် မျုက် ဇဝ်ဖြာ ကူပ် ဟဲ့ ကာဝေ အန် ဇဝ် ဒီ ဂေ။ ပါယ် တီ၊ န့ ဟဲ့ ဒဲမ် အုန် ခဲင် ဘပ် ဇဝ်ဖြာ တဝ်း၊ “ကူပ် န့ ပါယ် တီ၊ အုဝ် ဒီ အိူပ် မဲ ဇဝ်ဖြာ တဲး ဂေ ဒူအီ အာမျုဝ် ဟဝ် ထူမ်။ အုဝ် ဒီ ဘော တဝ်း မှုဝ် အီ အိူပ် မဲ ဇဝ်ဖြာ။” 10 န့ ဘော တဝ်း၊ “အိုယ် ဘေ ဒူအီ အာမျုဝ် ဟဝ်၊ တဲး ဘေ ခူယ် ဒါခိုယ် ဒူပ် ဂေ ဒူအီ ပီ အိုပ် ဇဝ်ဖြာ။” 11 ပေါ ပ့လုဝ့် န့ ဟဲ့ ဝီ ဒဲမ် အုန် တဝ်း၊ “အိုယ် ဘေ ဒူအီ အာမျုဝ် ဟဝ်၊ တဲး ဘေ အိူပ် မျုက် ဇဝ်ဖြာ။ ဘေ ဒူအီ ဘောကာဂ့လျီတ်၊ တဲး ဘေ အိူပ် အန် ဇဝ်။” 12 အာအီဆာယ ဟဲ့ ဒွိုမ် တဝ်း၊ “ခဲင် ခြိုဝ် အာယေဆေ၊ န့ ဒီ မိုဝ်း လှုက်လှာန် အန် အူ ဝီ။ ဇဝ်ဖြာ ဒီ မျုက် အန်၊ တဲး အန် အိုပ် ဒူအီ အာမျုဝ် ဟဝ်။ ဂေ ဒူအီ အာမျုဝ် ဟဝ် ဒီ ဘော ဘ်ု ဘော နှဝ့် အန်။”

13 အုဝ် ဆာခိုဝ် ဒီ ဇဝ်ဖြာ အီ မုး ဒါ ကာညာ အီ တဲး ဘေ နှဝ့် န့ဒဝ့် ဒွန် မျုဝ်၊ တဲး အန် ဇဝ် တဲး ဘေ ခူယ် ဒါခိုယ် ဂျာမ်ဆာ ကူပ် ညှိုမ် ဘိုင် ဘေ ဒီ အန်။ ခဲ့ ဘော မိုဝ်း နာ ဒါခိုယ် ဂျာမ်ဆာ၊ တဲး န့ ဇေ့ဇုင် ဒွန် မျုဝ်။ နဝ်း ဖွိုမ် ဇဝ်ဖြာ အီ မိုဝ်း ပွုန် တာင်၊ အန် ဒီ ဘော တဲး ပီ နှဝ့် န့ဒဝ့် ဘေ ကော နုဝ့် လုတ့် ခဲင် နဝ်း ဘေ။

14 အုဝ် နပ် ဆီချာ ဘေ ဘီနွင် ဟဲ့ မိုဝ်း နဝ်း ဘွတ် နဝ်း မွှိုမ်၊ ဘော နပ် ပီ ပါယ် ဘဲန် မျုဝ် ဘဲန် မျုဝ်။ ဘေ မိူဝ် ဟဲ့ နပ် ဒီ လာယ် မာနုဝ်။ 15 မာလဲ၊ ခဲင် ပဲ့ ပီ ဒဲမ် အုဝ် နီ၊ အုဝ် ဟဲ့ ယ ဒဲမ် ဘဲန် မျုဝ် ဘဲန် မျုဝ်၊ တဲး ဘေ လှုဝ်း လွင် အန် တီ။ ခုဝ်၊ ဇဝ်ဖြာ ဟဲ့ ဂေဇူ အုဝ် ပါယ် တီ။ 16 အန် ဟဲ့ တဲး အုဝ် ဘဲန် ဒဲစေန့် ဇဝ် ယေဆူ၊ တဲး အုဝ် ကာလာင် လွင် အန် ဒီ ဂေ ဒူအီ အာမျုဝ် ဟဝ်။ အုဝ် ဟဲ့ ပီ ဒူအီ အီ လှူ ဒီ ဇဝ်ဖြာ ဒေါ ကာလာင် အုဝ် ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ်။ အုဝ် ဆီ တဲး ဂေ ဒူအီ အာမျုဝ် ဟဝ် ပီ ပီ ဒီ လှူ ဒီ ဇဝ်ဖြာ အီ လဝ့် နဝ်း အန်။ နဝ်း ဖွိုမ် ဇဝ်ဖြာ ဘော ဘူင် တဲး ဂေ ဆီငါ ဘွတ်၊ တဲး န့ လဝ့် နဝ်း ဇဝ်ဖြာ။

17 ပါယ် တီ၊ ကူပ် ညှိုမ် ဘိုင် အုဝ် ဇဝ် ယေဆူ၊ အုဝ် ဟဲ့ နဝ်း တာင် ဘော ခူယ် ကူပ် ဟဲ့ ပွိုန် အုဝ် ဒီ ဘူင် ဂါန် ဇဝ်ဖြာ။ 18 အုဝ် တူ ဆီ ကာလာင် ဘဲန် မျုဝ် ဘဲန် မျုဝ် လွင် ပဲ့ ဟဲ့ ဘူင် အုဝ်။ အုဝ် ဆီ ကာလာင် မီ ခဲ့ ပီ တဲး ဇဝ် ယေဆူ အုဝ် ဘူင်၊ တဲး ဂေ ဒူအီ အာမျုဝ် ဟဝ် ဘော ထူမ် ဘော ဒူပ် ဂြုဝ်း ဇဝ်ဖြာ။ 19 အန် ဇဝ် ဟဲ့ တဲး အုဝ် ဘူင် အီ မွှိုမ် အာမ် ကာဆဝ် ဘဲန် မျုဝ် ဘဲန် မျုဝ် ကူပ် ပွုန် ပီ ဘျ နဝ်း ဖွိုမ် ဇဝ်ဖြာ။ ခုဝ်၊ စုး ဒီ မိူင် ယေရူဆာလဲမ် ကော ဇမ် ဒီ မိူင် အီလီရဂမ် အုဝ် ဟဲ့ ကာလာင် တူတ့် ဒွန် မျုဝ် လွင် ဇဝ် ယေဆူ အီ တဲး နဝ်း ဒူအီ ဒါခိုယ်။ 20 ဆေဆေ အုဝ် ဟဲ့ မိုဝ်း နဝ်း ဆီ ကာလာင် ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ်။ အုဝ် ယီ ဆီ ကာလာင် မီ ဒီ ဂေ အီ ညှမ် ဒွိုမ် ယိုဝ် လွင် ဇဝ် ယေဆူ။ ဂါန် အုဝ် တီ၊ န့ ပီ အုဝ် ဆမ် ကာင်။ အုဝ် တူ ဆီ ဝီ ဂုဝ် ဟုဝ့် နာ ဒဲင် စေန့် ရွင့် ပဲ့ ဟဲ့ ဆမ် အုန် အီ ဟဝ်။ 21 အုဝ် ဆီ ဘူင် ဒူပ် ပဲ့ ဟဲ့ ဒဲမ် အုန် ခဲင် ဘပ် ဇဝ်ဖြာ တဝ်း၊ “ဂေ အီ ညှမ် ဒွိုမ် ယိုဝ် အီ ကာလာင် အီ ခဲ လွင် အန် ဇဝ်၊ ဂေ ဒီ ဝီ ပွိုန် ဒီ ယိုဝ်။ ဂေ အီ ညှမ် ဒွိုမ် ပွိုန် ဒီ ထူမ် လွင် အန် ဇဝ်၊ ဂေ ဒီ ဝီ ပွိုန် ဒီ ထူမ်၊ တဲး န့ ကာလှုး ဆီချာ ဒီ နဝ်း ဂေ။” 22 ခုဝ် အန် တီ အုဝ် မိူဝ် တူ ဘဲန် တး စ်ု ဘေ။

23 ဒေါ တီ နီ၊ ဂါန် ပီ လုဝ် ဘူင် အုဝ် ခဲင် မိူင် နီ၊ အုဝ် ဟဲ့ ဟွတ့် ဘူင် ဟွတ့် တူတ့်။ ဟဲ့ လှေန့် ဘဲန် ဆီနမ် ဘဲန် ဆီနမ်၊ အုဝ် ဟဲ့ ဆီ တး ဒူင် ကွယ် ဘေ၊ 24 ဒေါ တီ နီ၊ အုဝ် ထာင် ဟဲ့ ပွိုန် တး။ အုဝ် ဟဲ့ ခြာမ် ဒီ တး ဝဝ့် ဒူင် ကွယ် ဘေ ပန် ဒီ ဟာဝ် အုဝ် ဒီ မိူင် ဆာဘေန်။ ဆေ အုဝ် ဟဲ့ ဟွတ့် ကွယ် ဘျုဝ် ဘျုဝ် ကျဝ် ကျဝ် ဒူပ် ဘေ လှေန့် ဒင်ဒါန် အန်၊ အုဝ် တဝ်း ဒီ ဝီ မှာန့်၊ တဲး ဘေ စွယ် ခြာဝ် န့တေန့် အုဝ်၊ တဲး အုဝ် ဇမ် ခဲင် မိူင် ဆာဘေန် တီ။ 25 မာလဲ၊ ဒေါ တီ နီ၊ အုဝ် လုဝ် ဟာဝ် ခဲင် မိူင် ယေရူဆာလဲမ်၊ တဲး အုဝ် ပွိုန် ဒီ စွယ် ဂေ ဒူအီ အီ ညှိုမ် ဇဝ်ဖြာ ခဲင် မိူင် တီ။ 26 ခုဝ်၊ ဒူအီ ခဲင် ဖိုင် ဇဝ် ယေဆူ အီ ကွယ် ခဲင် အိူင် မာခေဒူန် ဘော ခဲင် အိူင် အာခါယာ၊ ဂေ ဟဲ့ လှူ ရွိုန်၊ တဲး န့ ပွိုန် ဒီ စွယ် ဂေ ဒူအီ အီ ညှိုမ် ဇဝ်ဖြာ အီ အေတ့် အီ ဂိန်၊ အီ ကွယ် ခဲင် မိူင် ယေရူဆာလဲမ် တီ။ 27 ဂေ ဟဲ့ မိုဝ်း နဝ်း ဆီ လှူ ရာင် ဂေ။ မာလဲ၊ ဘူင့် မှာန် အန်၊ ဂေ ဒိူန် ဒီ လုဝ် စွယ် ဒူအီ ဂိန် ဒူအီ အေတ့် ဂေ တီ။ ခုဝ်၊ ဂေ ဒူအီ အာယူဒါ ဟဲ့ ကာဆာင် ဟဲ့ ဒွါ ပီ ဂေဇူ ဇဝ်ဖြာ အီ ဘွတ် အီ မွှိုမ် ဒီ ဒူအီ အာမျုဝ် ဟဝ်၊ တဲး န့ ဘဲန် အာဂျိုဝ် ဒီ နဝ်း ဖွိုမ် ဂေ။ ဒေါ တီ နီ၊ ဂေ ဒူအီ အာမျုဝ် ဟဝ် မိူဝ်၊ ဂေ ဟဲ့ ဝီ လုဝ် ဂေဇူ ဒူအီ အာယူဒါ၊ ဒွါ ရွိုန် ဂေ ခြိဝ်၊ တဲး န့ ဘဲန် အာဂျိုဝ် ဒီ ဒုဝ် ဘူင့် ဂေ။ 28 ဝါယ် ဟဲ့ ဟွတ့် အုဝ် ဒိုဝ်း ရွိုန် ပီ လှူ ဂေ တီ၊ အာပ် ဒွါ ဒီ ဂေ ဒူအီ ခဲင် မိူင် ယေရူဆာလဲမ်၊ အုဝ် ဒီ ဝီ လေး ဟာဝ် ဒီ မိူင် ဆာဘေန်။ ပန် ဒီ ဟာဝ် အုဝ် တီ၊ အုဝ် ဒီ တး ဝဝ့် ဒူင် ကွယ် ဘေ။ 29 အုဝ် ဟဲ့ နပ်၊ ပန် ဒီ တး အုဝ် ဒူင် ကွယ် ဘေ တီ၊ ဇဝ် ယေဆူ ဒီ မွင့်ကာရာ ဒွါ နာ မွှိုမ် ဒွန် မျုဝ် ဒီ ဘေ။

30 အိုယ် ဘေ ဘီနွင်၊ အေ ညှိုမ် ဘိုင် ဇဝ် ယေဆူ အီ မုး ဒါ ကာညာ အေ၊ နဝ်း ဖွိုမ် ဇဝ်ဖြာ မိူဝ် တဲး အေ လာယ် ရွက့်။ ခုဝ်၊ အုဝ် မှာန့်၊ တဲး ဘေ ဆာခိုဝ် ဒီ ဇဝ်ဖြာ ဒါင် အုဝ်၊ တဲး ဇဝ်ဖြာ စွယ် ဂါန် ပီ ဘူင် အုဝ်။ 31 အုဝ် မှာန့် ဘေ ဆာခိုဝ်၊ တဲး အုဝ် လွတ် အာဖေ အာရေ ဒီ ဂေ ဒူအီ အီ တူ ညှိုမ်၊ အီ ကွယ် ခဲင် အိူင် ယူဒါ။ ဘော ဂါန် ပီ ခြာမ် အုဝ် ဒီ ဘူင် ခဲင် မိူင် ယေရူဆာလဲမ်၊ တဲး ဘေ ဆာခိုဝ်၊ တဲး န့ ဘဲန် အာဂျိုဝ် ဒီ ဂေ ဒူအီ အီ ညှိုမ် ဇဝ်ဖြာ။ 32 ဆေ န့ ပါယ် တီ၊ အုဝ် ဒီ ဘော ပွိုန် ဒီ တး ဇမ် ဒါခိုယ် ဒူင် ကွယ် ဘေ။ ဒေါ ကွယ် အုဝ် ဒူပ် ဘေ တီ၊ န့ ဒီ ဘော ဘဲန် ပ့လူမ် ဘဲန် ဟဲန့် ဒီ နဝ်း ဘေ ဘော ဒီ နဝ်း အုဝ်။ 33 ဇဝ်ဖြာ အီ နပ် ဒီ ဒွါ နဝ်း ဂျီတ် ဒီ ဘေ၊ တဲး အန် ကွယ် ရိုမ် ဒူပ် ဘေ ဒွန် အီ။ ဆာတူ။