တဲး ဘေ ဖြူမ် ဒီ ကွယ် ရိုမ် ဒူပ် ဂေ ဒူအီ အီ ညှိုမ် ဇဝ် ယေဆူ အီ ယီ ယုဝ် ဒီ ကာလိုပ် ဒီ ဟူမ် ဒီ တာ ဘဲန် မျုဝ် ဘဲန် မျုဝ်။ ဘေ ယီ တူ လုဝ် လာယ် ကာထဲန့် ဒီ ဂေ လွင် ပီ ထာင် ဘေ အီ လာယ် ဘ့လိူင်။ 2 ဒူအီ မင် အီ၊ ဂေ ညှိုမ် ဂေ ဟဲ့ ပွိုန် ဟူမ် တူတ့် ဒွန် မျုဝ်။ မာလဲ၊ ဒူအီ မင် အီ အီ ယုဝ် ဒီ ကာလိုပ်၊ ဂေ ဘော ဟာပ် မီ ဒဝ် ငျီန်။ 3 ဒူအီ အီ တဝ်း၊ အန် ဟဲ့ ပွိုန် ဟူမ် ဒွန် မျုဝ်၊ အန် တူ လုဝ် လုက်တာယ် ဒူအီ အီ တူ ယ ဟူမ် ဒွန် မျုဝ်။ ဒူအီ အီ တူ ယ ဟူမ် ဒွန် မျုဝ် မိူဝ်၊ အန် တူ လုဝ် ဖျာက် ဒူအီ အီ ဟူမ် ဒွန် မျုဝ်။ ခုဝ်၊ ဇဝ်ဖြာ ဟဲ့ ဟွတ့် တဲး ဒူအီ ဝီ တီ ဘဲန် ဂွန် အန်။ 4 မဲ ထာင်၊ မဲ မုး အာဆေ၊ တဲး မဲ ပွိုန် ဒီ ဖျာက် ဒဲစေန့် အီ ဟဝ်။ န့ မိုဝ်း မီ ဒါ ကာညာ အန် အီ ပွိုန် ဒီ ဆုင်ဖျာတ် ဒီ ယွတ် ပီ ဘူင် အန်၊ ယုဝ် ဟဲ့ မှာန် အာဝ် မှာန်။ ခုဝ်၊ ဇဝ်ဖြာ ယီ ဒီ တဲး အန် ဘူင် နာ မှာန်။ န့ မုး ပွုန် ဇဝ်ဖြာ အီ တဲး အန် နပ် ဒီ ဘူင် အီ မှာန် အီ မွှိုမ်။

5 ဒူအီ မင် အီ၊ ဂေ ဘော ထာင်၊ အူ ဆီငဲ ဟဲ့ ဘွတ် လွှိုမ် ပေါ ဆီငဲ။ မင် အီ ဘော ထာင် ဒွန် ဆီငဲ ဟဲ့ ဘွတ်။ တဲး ဒွန် အီ ဆုင်ဖျာတ် ရာင် အာဆေ ရာင် အန်၊ တဲး အန် ညှိုမ် ဆီချာ ခဲင် နဝ်း အန်။ 6 ဂေ အီ ထာင်၊ အူ ဆီငဲ ဟဲ့ ဘွတ် လွှိုမ် ပေါ ဆီငဲ၊ ဂေ ကဲမ် ဆိန့် ဆီငဲ တီ ကူပ် ရုဝ်ဆေ ဂေ ဇဝ်ဖြာ။ ဘော ဝီ အီ ပွိုန် ဟူမ် ဒွန် မျုဝ် တွိုန် မိူဝ်၊ အန် ဟူမ် ကူပ် ရုဝ်ဆေ အန် ဇဝ်ဖြာ။ ခုဝ်၊ အန် ဟဲ့ ဒါင် ဂုင် ဂေဇူ ဒီ ဇဝ်ဖြာ ဒီ အာတ့်။ ဝီ အီ တူ ဟူမ် တွိုန် မိူဝ်၊ အန် တူ ဟူမ် ကူပ် ရုဝ်ဆေ အန် ဇဝ်ဖြာ။ ဘော အန် ဟဲ့ ဒါင် ဂုင် ဂေဇူ ဒီ ဇဝ်ဖြာ။ 7 ကာတဲ အေ နီ၊ ဘော မုး လွင် အိမ် အာဝ် မိုဝ်း အာဆေ အီ ပွိုန် ဘူင် ခဲ့ ပီ အိုင် ဒုဝ် ဘြိမ် အန် အူ ဝီ။ ဘော မုး လွင် ယမ်၊ အာဝ် မိုဝ်း အာဆေ အီ ပွိုန် ဘူင် ဒူပ် ပီ အိုင် ဒုဝ် ဘြိမ် အန် အူ ဝီ။ 8 ဆေ အေ ဆီ အိမ်၊ ပီ ဘူင် အေ ဒွန် မျုဝ် အေ ဘူင် တဲး န့ ဒူပ် ပီ အိုင် ဇဝ်ဖြာ။ ဆေ အေ ဒီ ဘော ယမ်၊ တဲး န့ ဒူပ် ပီ အိုင် ဇဝ်ဖြာ။ ဆေ န့ ပါယ် တီ၊ အေ ပီ ဘော အိမ်၊ အေ ပီ ဘော ယမ်၊ အေ မုး ဒူအီ ပီ အိုပ် ဇဝ်ဖြာ။

9 ခုဝ်၊ ဇဝ် ယေဆူ ဟဲ့ ဟွတ့် ခမ် ဒီ ယမ် ဘော ဟဲ့ ဝီ ယိတ့် ဝီ အိမ်၊ တဲး အန် ဘဲန် ဒါ ကာညာ အီ အိုပ် ဒူအီ အိမ် ဘော ဒူအီ အီ ဟဲ့ ဟွတ့် ယမ်။ 10 ကူပ် န့ ပါယ် တီ၊ အာဝ် ကာအာပ် မဲ ဖျာက် ဘီနွင် မဲ။ အာဝ် ကာအာပ် မဲ လုက်တာယ် ဂေ။ ခုဝ်၊ အေ ဘောကာဂ့လျီတ် ဒီ လုဝ် ကွယ် တူတ့် ဒီ အာတ့် ဇဝ်ဖြာ၊ တဲး အန် ဆုင်ဖျာတ် အာမူ အေ ဒွန် အီ။ 11 ခဲင် ဘပ် ဇဝ်ဖြာ န့ ဟဲ့ ဒဲမ် အုန် တဝ်း၊ “ပီ ကာလာင် အုဝ် ဟဲ့ မှာန် အာခါခ်ု။ ဒူအီ ဒွန် အီ ဒီ လုဝ် တး ခြိုပ်ခြဝ် ဒီ အာတ့် အုဝ်။ ဒူအီ ဒွန် အီ ဒီ ဘော တဝ်း၊ အုဝ် မုး ဇဝ်ဖြာ။” 12 ပါယ် တီ၊ အေ ဒွန် အီ ဒီ လုဝ် ခဲ တူတ့် ပဲ့ ဟဲ့ ဘူင် အေ၊ တဲး ဇဝ်ဖြာ ထူမ်။ အေ လုဝ် ကာလာင် ပါယ် တီ ရာင် အာဆေ ရာင် အန်။

13 ခုဝ်၊ ကွဲ့ တဲး အေ လာယ် ဖျာက်၊ လာယ် ဆုင်ဖျာတ် ပီ ဘူင် အေ၊ ယုဝ် န့ မွှိုမ် တူ မွှိုမ်။ တဲး အေ ယီ ခတ် နဝ်း၊ ကွဲ့ တဲး အေ ဘူင် ခေါ အူ မျုဝ် အီ ဒီ တဲး ဘီနွင် အေ ကာလိုပ်။ 14 ကူပ် ကွယ် ကာဒိုက် ကာဒဝ့် အုဝ် ဒီ ဇဝ် ယေဆူ အီ မုး ဒါ ကာညာ အီ အိုပ် အေ၊ အုဝ် ဟဲ့ နပ် ဆီချာ၊ အာဝ် မိုဝ်း ပီ ဒီ ဟူမ် ခေါ အူ မျုဝ် ပီ တူ တဲး ဇဝ်ဖြာ အေ ဟူမ်။ မာလဲ၊ ဆေ န့ မိုဝ်း ဒူအီ အီ ထာင် အာဝ် ပွိုန် ဟူမ် မင် မျုဝ်၊ ကွဲ့ တဲး အန် ဟူမ်။ 15 ဆေ မဲ ဘူင် တဲး န့ ဆဝ် ဒီ နဝ်း ဘီနွင် မဲ ကူပ် ပီ ဟူမ် မဲ၊ မဲ တူ မိုဝ်း နဝ်း ရွက့်။ မဲ ကွဲ့ ဘူင် မာဆေ တဲး ဘီနွင် မဲ လိုဝ် စှိုမ် ကူပ် ပီ ဟူမ် မဲ။ ခုဝ်၊ ဇဝ် ယေဆူ ဟဲ့ ခမ် ဒီ ယမ် ကာဒါင် အန်။ 16 မဲ ကွဲ့ တဲး အီ ဟဝ် လုက်တာယ် မျုဝ် ပီ ထာင် မဲ ဟဲ့ ဘွတ် ဟဲ့ မွှိုမ်။ 17 ခုဝ်၊ ခဲင် မိူင် ပီ အိုပ် ဇဝ်ဖြာ ပီ ဒီ ဟူမ် အာရေ တူ တာင်။ န့ မုး နဝ်း ဆိူဝ် နဝ်း မှာန် ဘော နဝ်း ဂတ် ဂျီတ် ဘော နဝ်း ဒါခိုယ် ဂျာမ်ဆာ ပီ ဒွါ နဝ်း ဖွိုမ် ဇဝ်ဖြာ။ မျုဝ် တီ ဟဲ့ အာရေ တာင်။ 18 ဒွန် အီ အီ ဘူင် ပီ အိုင် ဇဝ် ယေဆူ ပါယ် တီ၊ အန် ဟဲ့ မုး ဒူအီ အီ လဝ့် နဝ်း ဇဝ်ဖြာ။ ဘော ဂေ ဒူအီ ဒီ အိုင် အန်။

19 ခုဝ် အန် တီ တဲး အေ ဂျုဝ်ဂျာ ဒီ ဘူင် မျုဝ် အီ ဒီ တဲး နဝ်း နှိမ် နဝ်း ဒါခိုယ် ဘော အီ ဒီ ဘဲန် ပ့လူမ် ဘဲန် ဟဲန့် ဒီ နဝ်း အီ ဆေဆေ။ 20 ကွဲ့ ဘူင် တဲး ဂါန် ဇဝ်ဖြာ လိုဝ် စှိုမ် ကူပ် ပီ ဒီ ဟူမ် အေ။ ပီ ဒီ ဟူမ် အေ ဒွန် မျုဝ် ဟဲ့ မွှိုမ် ဟူမ်။ မာလဲ၊ ဆေ အေ ဟူမ် မျုဝ် အီ ဘဲန် ဒုက် ဒီ နဝ်း အီ ဟဝ်၊ ဘော အေ ဟဲ့ ကာလိုပ်။ 21 မျုဝ် အီ ဒီ တဲး န့ ကာလိုပ်၊ ဘဲန် မှာပ် ဒီ ဘီနွင် အေ၊ ကွဲ့ ဟူမ်။ ဘော မုး ယင်၊ ဘော မုး အိုမ် မာငုန် ဘော ဒွန် မျုဝ် ဇိုဝ် တီ၊ ကွဲ့ ဟူမ်။

22 ခဲ့ ပီ ညှိုမ် မဲ လွင် အန် တီ၊ တဲး မီ မဲ ဘော ဇဝ်ဖြာ နပ်။ အာဆေ ဘူင် ဒူပ် ပီ ညှိုမ် အန်၊ တူ မိုဝ်း နဝ်း ကာလိင် ကာလဲ၊ အန် ဒီ ဘျုဝ် ဒါခိုယ်။ 23 မာလဲ၊ ဆေ အန် ယီ တူ နပ် ဆီချာ ခဲင် နဝ်း အန်၊ ယုဝ် အန် ပွိုန် ဟူမ်၊ တူ ပွိုန် ဟူမ်၊ ဆေ အန် ယီ ဟူမ်၊ နဝ်း အန် အီ ဒီ ဝီ ဖျာက် အန် ကူပ် တူ ဘူင် ဒူပ် အန် ပီ ညှိုမ် အန်။ ခဲ့ ပီ ဘူင် အေ ဒွန် မျုဝ်၊ ဆေ န့ တူ ဒူပ် ပီ ညှိုမ် အေ၊ န့ ဘဲန် မှာပ် ဒီ အေ။