ဘေ လုဝ် ခမ် တဲး ဂေ ဒါ တာင် အီ အိုပ် မိူင် အိုပ် ဘေ ဒွန် အီ။ ခုဝ်၊ အာဝ် မိုဝ်း ပွုန် ပီ တူ ကာဒုး ဇဝ်ဖြာ ဒီ ဒွါ။ အီ မိုဝ်း ပွုန် ဒွန် မျုဝ်၊ န့ ဘော မုး ဇဝ်ဖြာ အီ ဒွါ ဒီ ဂေ။ 2 ခုဝ်၊ အာဆေ ဘူင် ကာဘး ဒီ ပွုန် ဒါ တာင် တီ၊ အန် ဟဲ့ ဘူင် ကာဘး ဒီ ပဲ့ ဟဲ့ ဘ့လေး အုန် ဇဝ်ဖြာ။ ဒူအီ အီ ဘူင် ကာဘး တီ၊ အန် ဒီ လုဝ် ခမ် မှာပ် အန်။ 3 ဒူအီ အီ ဘူင် နာ ဘွတ် နာ မွှိုမ်၊ ဂေ တူ လုဝ် ယုဝ် ဒါ တာင် အီ အိုပ် မိူင်။ န့ ယီ မုး ဂေ အီ ဘူင် နာ ဟာယ် နာ မိူက် အီ ဒီ လုဝ် ယုဝ်။ ဆေ ဘေ တူ ဆီ ယုဝ် ဒါ တာင် အီ အိုပ် မိူင်၊ တဲး ဘေ ဘူင် နာ ဘွတ် နာ မွှိုမ်။ ဟဲ့ ဟွတ့်၊ ဒါ တာင် တီ ဒီ ဝီ အိူပ် မျုက် ဘေ။ 4 ခုဝ်၊ ဒါ တာင် အီ အိုပ် မိူင်၊ အန် မုး ဒဲစေန့် ဇဝ်ဖြာ၊ တဲး အန် ဘူင် တဲး န့ ဘဲန် အာဂျိုဝ် ဒီ ဘေ။ မာလဲ၊ ဆေ ဘေ ဘူင် နာ ဟာယ် နာ မိူက်၊ ဘေ ဒီ လုဝ် ယုဝ် အန်။ ခုဝ်၊ မာပွါ့ လာင် အန်၊ န့ တူ ကွယ် ဒီလူယ် ဒီလာယ် ပီယေန့်။ အန် ဟဲ့ မုး ဒူအီ ပီ ဆုတ့် ပီ စ်ု ဇဝ်ဖြာ၊ တဲး အန် ဒမ် မှာပ် ဒီ ဂေ ဒူအီ ဟာယ် ဒူအီ မိူက်။ 5 ကူပ် န့ ပါယ် တီ၊ တဲး ဘေ ခမ် ပီ အိုပ် ဒါ တာင် ဒီ ဘေ။ ကွဲ့ တဲး ဘေ ခမ် မီ ကူပ် ယုဝ် ဘေ ဒါ တာင် အီ ဒမ် မှာပ် ဒီ ဘေ။ တဲး ဘေ ခမ် ကူပ် ဟဲ့ ဝီ နပ် ဘေ ခဲင် နဝ်း ဘေ၊ ဟဲ့ ကာအာပ် ခမ် ပါယ် တီ။

6 ခုဝ် အန် တီ ဘေ မိူဝ် လုဝ် ဟပ် စိုင်။ ဂေ ဒါ တာင် ဒွန် အီ၊ ဂေ မုး ဒဲစေန့် ဇဝ်ဖြာ အီ ဘူင် ဂါန် ဇိုဝ် တီ ဆေဆေ။ 7 ပါယ် တီ၊ ခဲ့ ပီ လုဝ် ဘေ ဒွါ တဲး ဘေ ဒွါ။ စိုင် ပီ လုဝ် ဟပ် ဘေ၊ တဲး ဘေ ဟပ်။ ခွန် ပီ လုဝ် ဟပ် လုဝ် ဒွါ ဘေ၊ တဲး ဘေ ဒွါ။ ဝီ အီ ကာအာပ် ရုဝ်ဆေ၊ တဲး ဘေ ရုဝ်ဆေ။ ဝီ အီ ကာအာပ် မိုဝ်း ဆာရေ၊ တဲး ဘေ ဘူင် တဲး အန် မိုဝ်း ဆာရေ။

8 ကွဲ့ တဲး ဘေ မိုဝ်း နီ ဒီ အာဆေ ခေါ အူ မျုဝ်။ န့ ယီ မိုဝ်း မီ နီ အူ မျုဝ် ပီ တူ ပွိုန် ဝျီ့ ဟွတ့် ဘေ။ န့ မုး မီ နီ လုဝ် လာယ် ရွက့် လာယ် ကာဝေ။ အာဆေ ရွက့် အီ ဟဝ်၊ အန် ဟဲ့ ထူမ် ဒူပ် ဒါရာ ဇဝ်ဖြာ။ 9 ဒါရာ တီ၊ န့ ဘော တဝ်း၊ “ကွဲ့ ဝိန် ဒီ လုတ့် အီဘိုန့် အီမာယ် အီ၊ ကွဲ့ ငဝ်း ယမ် အာဆာက် အီ၊ ကွဲ့ ပြာ ကြုဝ်ကြာမ် အီ၊ ကွဲ့ လှယ့် ကြုဝ်ကြာမ် အီ။ ဒါရာ ဂေ တီ ဒွန် မျုဝ်၊ န့ ဘော ဘာ့ ခဲင် ဒါရာ အူ ညွင့် အီ တဝ်း၊ တဲး ဘေ ရွက့် အီ ဟဝ်၊ တဲး န့ ပီ ဘေ ရွက့် ဒုဝ် ဘြိမ် ဘေ။” 10 အာဆေ ရွက့် အီ ဟဝ်၊ အန် တူ ဘူင် နာ စီစိဝ် ဒီ ဂေ။ ခုဝ်၊ အာဆေ ရွက့် အီ ဟဝ် တီ၊ အန် ဘူင် ဒူပ် ဒါရာ ဒွန် မျုဝ်။

11 ဘေ ဟဲ့ ကာအာပ် ဘူင် ပါယ် တီ ကူပ် ဟဲ့ နပ် ဘေ ဒေါ တီ နီ ဟဲ့ ဇမ် အာခြာဝ် မာဆေ။ ဟဲ့ ဇမ် အာခြာဝ် ပီ လုဝ် ဆာဒိက် ဘေ၊ တဲး ဘေ ပီ ဒူအီ ဟဲ့ န့ဆိုဝ်း အိတ်။ ခုဝ်၊ အာခြာဝ် ဒီ ချွတ် ဇဝ်ဖြာ ဒီ အေ၊ န့ ဟဲ့ ကာတတ် ဒီ ဇမ်။ ဒေါ တီ နီ၊ န့ ဟဲ့ ကာတတ် လွှိုမ် ဒေါ ကာစုး အေ ဒီ ညှိုမ်။ 12 န့ ပီ ဆွိုမ် ဟဲ့ ဟွတ့် ကာတဲ လူယ်၊ ပြဲ ဟဲ့ ကာတတ် ဒီ ဝး။ ခုဝ်၊ တဲး အေ ဝဲန် အီ တူ မွှိုမ် ပီ ဘူင် အေ၊ အီ ပီ အေ ကွယ် ခဲင် အပ် ဝွင့်။ ပီ ဘူင် အေ တဲး န့ ပီ ဒါ ဆိုက် အီ ဟဲ့ စှိုပ် ခြိုင် ကာဂုဝ်း ဒေါ ဘ့လာင် ဆီငဲ။ 13-14 တဲး ဘေ ပီ ဒူအီ အီ ဘူင် ဂါန် ခဲင် ဘ့လာင် ဒေါ ကာတဲ ဆီငဲ။ ကွဲ့ တဲး ဘေ လိုပ် ဘ့လွယ်၊ ဒျီင် ပဝ်း၊ ယိုတ့် ပဝ်း။ ကွဲ့ တဲး ဘေ လုတ့် အီဘိုန့် အီ ဟဝ်၊ ဘော လာယ် ကာလုတ့် ကာထဲန့်။ တဲး ဘေ အိုပ် ဒုဝ် ဘြိမ် ဘေ။ တဲး ဘေ ဘူင် ပီ ပီ ဘူင် ဇဝ် ယေဆူ၊ တဲး အီ ဟဝ် ပွိုန် ဒီ ယိုဝ် လွင် ဇဝ် ယေဆူ ဆေ ဂေ ယွတ် ဘေ။ ကွဲ့ တဲး ဘေ ဘူင် ဒူပ် နဝ်း ဘြိမ် ဘေ။