အုဝ် ဒီ ကာလာင် ဂြုဝ်း ပီ ဒူအီ ရိုဝ်။ အုဝ် မှာန့်၊ တဲး ဘေ အူတ် ယိူန် အီ စဲက် ထူမ်။ 2 ဇဝ်ဖြာ ဟဲ့ တဲး အုဝ် ခြဲ ဘေ၊ ကွဲ့ တဲး ဘေ ဘူင် နာ တူ မွှိုမ်။ ခုဝ်၊ န့ ပီ အုဝ် ဒီ အာပ် တဲး ဘေ ခတ် ဒိုဝ်း အီမာယ် အူ ဝီ အီ မုး ဇဝ် ယေဆူ။ အုဝ် မိူဝ် ဂျုဝ်ဂျာ ဒီ ခြဲ ဘေ၊ တဲး ဘေ ပီ ဒီဘျာ ဇဲတ် ဒေါ အန် တီ။ 3 အုဝ် ယီ ယုဝ် ဘုဝ် ကာနမ် ဝီ တး ကာလုဝ် ဘေ ပီ ပီ ဒွိုမ် ကာလုဝ် အန် ဒီ နာင် အေဝါ တွိုန်။ အုဝ် ယုဝ် အန် တဲး နဝ်း ဘေ ဘျွင်၊ တူ တဲး ဘေ ညှိုမ် ဘိုင် မီ ဇဝ် ယေဆူ ပီ ပဲ့ ဟဲ့ ညှိုမ် ဘေ အာတ့် နီ။ 4 ခုဝ်၊ ဆေ ဒူအီ အူ ဝီ ဝီ တး ကာလာင် လွင် ဇဝ် ယေဆူ အီ တူ မုး အန် ဇဝ် ပီ ကာလာင် အုဝ် ဒီ ဘေ၊ ဆေ ဘေ ဝီ ပွိုန် နဝ်း ဖွိုမ် ပေါ အူ မျုဝ် အီ တူ မုး နဝ်း ဖွိုမ် ဇဝ်ဖြာ ပဲ့ ဟဲ့ ဟွတ့် ပွိုန် ဘေ၊ ဆေ ဘေ ဝီ ထူမ် လွင် ပေါ အူ မျုဝ် အီ တဲး နဝ်း ဒူအီ ဒါခိုယ်၊ ယီ တူ မုး မျုဝ် ပီ ဒွိုမ် ညှိုမ် ဘေ၊ ဘေ နပ် ဒီ ထူမ်၊ နပ် ဒီ ညှိုမ် ငှိုယ် ငှိုယ်။ 5 အုဝ် ယီ တူ ထာင်၊ အုဝ် ဟဲ့ ချဝ့် လွှိုမ် ဂေ ဒူအီ အီ ညိုင်ရာင် အိုပ် ဒူအီ ပီ ရဝ်း ပီ တိုယ် ဇဝ် ယေဆူ။ 6 အုဝ် ပီ ဆ နပ် ဒီ ကာလာင် အီ မွှိုမ် ထူမ် မိူဝ်၊ ပဲ့ ဟဲ့ နပ် အုဝ်၊ န့ တူ ချဝ့်။ လွင် အန် တီ ဒွန် မျုဝ် န့ ဟဲ့ လိုဝ်း ဆီချာ ဒီ ဘေ။

7 ဒေါ ကာလာင် အုဝ် ဒီ ဘေ လွင် ဇဝ်ဖြာ အီ တဲး နဝ်း ဒူအီ ဒါခိုယ်၊ အုဝ် မိူဝ် တူ မှာန့် ငဝ်း အန် ဒီ ဘေ ခေါ အူ ဇေန့်။ အုဝ် ဟဲ့ ခမ် ဒီ ပီတျီမ် ဒုဝ် အုဝ်၊ တဲး အုဝ် ဝီ ပွိုန် ဒီ အိူပ် မျုက် ဘေ။ ပီ ဘူင် အုဝ် တီ၊ ဘေ ထာင် န့ လုတ့်။း 8 န့ ပီ၊ အုဝ် ဟဲ့ ဇူန် ဂေ ဖိုင် ဇဝ် ယေဆူ ပေါ ပ့လုဝ့်၊ ဒိုဝ်း ရွိုန် ပီ စွယ် ဂေ၊ တဲး အုဝ် ဝီ တး ဘူင် ဂါန် ကာတဲ ဘေ။ 9 ဒဲင် တီ၊ ဒေါ ကွယ် ရိုမ် အုဝ် ဒူပ် ဘေ၊ ခဲ့ ပီ လုဝ် အုဝ်၊ အုဝ် တူ ဒွိုမ် မှာန့် ဒီ ဘေ ခေါ အူ ဇေန့်။ ဂေ ဘီနွင် အီ ကွယ် ခဲင် အိူင် မာခေဒူန်၊ ဂေ ဟဲ့ တိုယ် ဟဲ့ ဒွါ ခဲ့ ပီ လုဝ် အုဝ်။ နာ ပန် အီ ဟဲ့ ပွုန် တး၊ န့ ပါယ် တီ။ ဘော နာ အာတ့် နီ ဟာဝ် အုဝ် တူ မှာန့် ဒီ ဘေ ဒေါ မှဝ်။ 10 ကူပ် ညှိုမ် အုဝ် ဇဝ် ယေဆူ၊ အုဝ် ကာလာင် ဂြုဝ်း မှာန်။ လွင် ပီ ပီဖုင် အုဝ် နီ၊ အာဝ် မိုဝ်း အာဆေ ပွိုန် ခြဲ အုဝ် ခဲင် အိူင် အာခါယာ။ 11 မှဝ် န့ ပါယ် ပီ ဘူင် အုဝ် ပါယ် တီ။း ဘေ ထာင် အုဝ် တူ ရွက့် ဘေ။း ဇဝ်ဖြာ ဟဲ့ နပ် အုဝ် ရွက့် ဘေ။ 12 ခဲ့ ပီ ဘူင် အုဝ် တီ၊ အုဝ် ဒီ ဘော ဘူင် ဟာဝ်၊ ကွဲ့ တဲး ဂေ ဒူအီ ဟဝ် ပွိုန် ဒီ ပီဖုင် ဂေ တဝ်း၊ ဂေ ဘူင် တူတ့် ဒွန် မျုဝ် ပီ ပီ ဘူင် ယေ။

13 ဒူအီ ဂေ တီ၊ ဂေ တူ မုး ဒူအီ ပီ ရဝ်း ပီ တိုယ် ဇဝ် ယေဆူ။ ဂေ ဘော ကာလုဝ် ဒီ ဘူင် ဂါန် ဇဝ်ဖြာ၊ ညိုင်ရာင် ဒီ ဘဲန် ဒူအီ ပီ ရဝ်း ပီ တိုယ် ဇဝ် ယေဆူ။ 14 လွင် အန် တီ၊ အာဝ် မွှိုမ် အာမ်။ ခုဝ်၊ ဘုဝ် ကာနမ် မိူဝ် နပ် ဒီ ညိုင်ရာင် တဲး အန် ပီ အာမူ အာမာတ် ဇဝ်ဖြာ အီ ဘ့လာင် အီ ရာဝ်။ 15 ခုဝ်၊ ဆေ မှာယ် ဘုဝ် ကာနမ် မိူဝ် နပ် ဒီ ညိုင်ရာင် ဒီ ဘူင် ဒူအီ အီ မိုဝ်း နဝ်း ဆိူဝ် နဝ်း မှာန်၊ အာဝ် မွှိုမ် အာမ် မာဆေ။ ဒီ ကာဒဲ့ အန်၊ ဂေ ဒီ ဝီ ခမ် တဲး န့ ကာဒါန် ခဲ့ ပီ ဘူင် ပီ ပါယ် ဂေ တီ။

16 အုဝ် ဒီ ဝီ ကာလာင် ပေါ အူ ဇေန့်၊ ကွဲ့ တဲး အာဆေ ထာင် အုဝ် မုး ဒူအီ ရိုဝ်။ ဆေ ဘေ ဘော ဟဲ့ မာတ် အုဝ် ပီ ဒူအီ ရိုဝ်၊ အုဝ် မှာန့်၊ တဲး ဘေ ခမ် ဒီ အူတ် ဒီ ယိူန် ဒီ ဒူအီ ရိုဝ် တီ၊ တဲး အုဝ် ပွိုန် ဒီ ပီဖုင် အုဝ် အီ စဲက်။ 17 လွင် ပီ ကာလာင် အုဝ် ဒေါ တီ နီ၊ အာဝ် ဒူပ် ပီ ကာလာင် ဇဝ်ဖြာ။ အုဝ် ကာလာင် တဲး န့ ပီ ပီ ကာလာင် ဒူအီ ရိုဝ်။ 18 ဒူအီ ကိူန် ဟဲ့ ပီဖုင် ဂေ ဒူပ် ပီ ဘူင် ဒွန် အီ ဒဲင် ကာဒါယ် နီ။ ခုဝ်၊ ဘော အုဝ် ဒီ ပီဖုင် အုဝ် ပါယ် တီ။ 19 ကူပ် မုး ဘေ ဒူအီ အီ မိုဝ်း အာငျာန် ဘွတ်၊ ဘေ ဟဲ့ နပ် ဒီ ခမ် ဒီ ထူမ် ဂြုဝ်း ဂေ ဒူအီ ရိုဝ်။ 20 ဘေ ဟဲ့ ခမ် တဲး အီ ဟဝ် ဒိုဝ်း ဟာဝ် ဘေ ဘဲန် မှာယ် ဂေ။ ဘေ တဲး အီ ဟဝ် ယွင့် ဒီ ဟူမ် ဘေ၊ တဲး အီ အိုပ် ဘေ ဘော ပီလွှက့် ဒီ ဘေ ဘော ကာထ ကာလာ ဘေ။ 21 ကူပ် တူ ပွိုန် အုဝ် ဘူင် ပါယ် တီ၊ အုဝ် ဘော ဆာယ် ကာဆဝ်။

မာလဲ၊ န့ ဟဲ့ မိုဝ်း ပီ ဒီ ကာလာင် ပီဖုင်။ ခုဝ်၊ အုဝ် မိူဝ် ဒီ ကာလာင် ပီဖုင် အုဝ် ပီ ဒူအီ ရိုဝ်။ 22 ဂေ ဘော နပ် ဒီ တဝ်း ဂေ မုး ဒူအီ ဟဲဘြဲ။ ဘော အုဝ် ဟဲ့ မုး ဒူအီ ဟဲဘြဲ။ ဂေ တဝ်း ဂေ မုး ဒူအီ အီဆာရေလ။ အုဝ် မိူဝ် ဟဲ့ မုး ဒူအီ အီဆာရေလ။ ဂေ တဝ်း ဂေ မုး ခြိုဝ် ဒါ အာဘြာဟမ်။ ဘော အုဝ် ဟဲ့ မုး ခြိုဝ် တီ။ 23 ဂေ တဝ်း ဂေ မုး ဒူအီ အီ ဘူင် ဂါန် ဇဝ် ယေဆူ။ ဘော အုဝ် ဟဲ့ ဘူင် ဂါန် ဇဝ် ယေဆူ၊ ယီ ဘူင် အီ မွှိုမ် လွှိုမ် ဂေ။ (ဂြုဝ်း နီ န့ ပီ ဂြုဝ်း ဒူအီ ရိုဝ်။) အုဝ် ဟဲ့ ဂျုဝ်ဂျာ ဒီ ဘူင် ဂါန် ကိူန် လွှိုမ် ဂေ။ အုဝ် ဟဲ့ ခမ် ဒီ စုဝ်း ခဲင် ကာပိုမ်၊ ဟဲ့ ခမ် အီ ဟဝ် မး အုဝ်၊ ဟဲ့ ရိန် ဒီ ယမ် ဘဲန် ဇေန့် ဘဲန် ဇေန့်၊ တဲး န့ လွှိုမ် ပီ ခမ် ဂေ ဒွန် မျုဝ်။ 24 ဖန် ဇေန့် ဂေ ဒါ တာင် ယူဒါ ဟဲ့ ဆီဘျြီ့ အုဝ် တာ ဝန်။ ဒွန် ဇေန့် ဂေ ပီ ဝီ ဆီဘျြီ့ အူယ် ဂိုဝ် ဒီ ဒိမ် ဇေန့်။ 25 အူယ် ဇေန့် ဂေ ဟဲ့ မး အုဝ် တာ မ့ဖျီ့။ အုဝ် ပီ ဝီ ခမ် အီ ဟဝ် ဒိုဝ်း မာဝ် ဝိုန့် အုဝ် အူ ဇေန့်။ အုဝ် ဟဲ့ ခမ် ဒုက် ဒီ ရိုဝ် ဆင်ဖုဝ် စေတ့် ခဲင် အိုမ် အူယ် ဇေန့်။ အူ ဇေန့် အုဝ် ဟဲ့ ကာဒုး ဒီ ကွယ် ခဲင် အိုမ် နမ်မုက်ဆာရာ အူ မှိုဝ် ဒီ အူ ဆီငဲ။ 26 အုဝ် မိူဝ် ဟာဝ် ဆေဆေ ဘော ဟာဝ် ဒွန် ပ့လုဝ့် ဒွန် နာ ဘော ကာဒုး ဒုက် ကိူန် ကာဆဝ်။ အိုမ် ဟဲ့ မ့ပုန် အုဝ်။ အုဝ် ဟဲ့ ကာဒုး ဒုက် ဒီ ဒါ ဇူန်။ ဒူအီ အာယူဒါ ဟဲ့ နင်ဂန် ဒီ ဟြေတ့် ဒီ ပျာတ့် အုဝ်။ ဘော ဒူအီ အာမျုဝ် ဟဝ် ဟဲ့ ဘူင် နာ စာဝ် ဒီ အုဝ်။ အုဝ် ဟဲ့ ခမ် ဒုက် ခဲင် မိူင် တာင် ဘော ခဲင် ပြဲ ဘော ခဲင် အိုမ်၊ ဟဲ့ ခမ် ဒုက် ဘော ဒီ ဂိုက် အီ တူ မိုဝ်း နဝ်း ဆိူဝ်။ အုဝ် ဟဲ့ ဟွတ့် ခမ် တူတ့် ဇိုဝ် တီ ဒွန် မျုဝ်။ 27 အုဝ် ဟဲ့ ဂျုဝ်ဂျာ ဒီ ဘူင် ဂါန် ကော မာဘ့လူမ် ဘော ဒုဝ်၊ ကော ဟူ ပွိုန် ဒီ အိတ်။ ဟဲ့ ခမ် ဒီ အေတ့် ဘူမ် အေတ့် အိုမ်၊ ယိူန် ပီ ဒီ ဟူမ် ဘဲန် ဇေန့် ဘဲန် ဇေန့်။ မင် ဇေန့် ဟဲ့ ခမ် ဂတ်၊ ခမ် ဂျီတ် ဘော တူ မိုဝ်း ဒီ တာ ခြိုင်။ 28 ဒဲင် ဟဲ့ ပါယ် တီ၊ ဒွင် ခိူန် ဒွင် ဝန် အုဝ် ပီ ဝီ မိုဝ်း နဝ်း မှဲ ဒါင် ဂေ ဒူအီ ခဲင် ဖိုင် ဇဝ် ယေဆူ ဒွန် ပ့လုဝ့်။ 29 ဒေါ ဟဲ့ ဒီလှး မင် အီ တူ မိုဝ်း ပ့လူမ် ဂေ ဟဲန့်၊ ဘော အုဝ် ဒီလှး ဒူပ် ဂေ။ ဒေါ ဟဲ့ ကာလိုပ် မင် အီ ဒီ ဘူင် မှာပ်၊ န့ ဘော ဘဲန် က့လိုဝ် ဘော ဒီ အုဝ်။

30 ဆေ န့ မိုဝ်း ပီ ဒီ ပါယ် အုဝ် ဒီ ပီဖုင် အုဝ်၊ အုဝ် ဒီ ပီဖုင် အုဝ် ကူပ် တူ မိုဝ်း အုဝ် ပ့လူမ် ဂေ ဟဲန့်။ 31 ဇဝ်ဖြာ အီ မုး ဂုန့် ဇဝ် ယေဆူ အီ မုး အန် ဇဝ် ပီ အိူပ် အေ ဆေဆေ၊ အန် ဟဲ့ နပ်၊ အုဝ် တူ ကာလုဝ်။ 32 ဒေါ ကွယ် အုဝ် ခဲင် မိူင် ဒါမာခူ တွိုန်၊ ဒါ ကာညာ ပီ ဒါင် ခုန်ဒီခမ် အာရေဒါ တွိုန်၊ ဟဲ့ တဲး ဒါ ဆိုက် အန် ဘ်ု ဒီ မှေတ့် အုဝ် ဒီ ဘာင် မာလုဝ်း မိူင်။ 33 မာလဲ၊ အီ ဟဝ် ဟဲ့ ဝီ ဒိုဝ်း အုဝ် ဟပ် ခဲင် ကြိုက်၊ ဘျွာ လူင် အုဝ် ခဲင် ကာဒဝ် ဒီ ရဲင် မိူင်၊ တဲး အုဝ် လွတ် ဒီ ဒါ ကာညာ တီ။