န့ ယီ မုး အုဝ် အာပေါလူ၊ အုဝ် ကာလာင် ဒီ ဘေ ကူပ် မိုဝ်း ဇဝ် ယေဆူ နဝ်း နှိမ် ဘော နဝ်း န့စု န့စမ်။ ဘေ ယီ နပ် ဒီ တဝ်း၊ အုဝ် မိုဝ်း နဝ်း ဂူမ် နဝ်း တျီမ် ဒေါ ကွယ် အုဝ် ဒီ အာတ့် ဘေ၊ ပီ ဝီ မိုဝ်း နဝ်း ယ ဒေါ ကွယ် ကာတူင့် အုဝ် ဒီ ဘေ။ 2 ကွဲ့ တဲး ဘေ ဘူင် တဲး အုဝ် ဘျ နဝ်း ယ အုဝ် ဒေါ တး အုဝ် ဒူင် ကွယ် ဘေ။ ခုဝ်၊ အုဝ် ဒီ မိုဝ်း နဝ်း ယ ဒီ ဂေ မင် အီ အီ ထာင် ယေ ဘူင် ဒူပ် ပီ အိုင် ဂေ ဒူအီ အီ ကွယ် ဒဲင် ကာဒါယ် နီ။ 3 ယေ ပီ ဘော ဆီ ကွယ် ဒဲင် ကာဒါယ် နီ မိူဝ်၊ အာဝ် မုး ယေ ကာဂုဝ်း ဒူပ် ဂေ အီ ကွယ် ဒဲင် ကာဒါယ် နီ ဒွန် အီ။ 4 ခြိုင် ကာဂုဝ်း ပီ တာ ယေ ကာဂုဝ်း ဒီ ရန်ဆူ၊ အာဝ် မုး ခြိုင် ကာဂုဝ်း ပီ တာ ဂေ ဒဲင် ကာဒါယ် နီ။ ခြိုင် ကာဂုဝ်း ပီ တာ ယေ မိုဝ်း ပွုန် ဇဝ်ဖြာ အီ နပ် ဒီ ပျာတ့် ဒူင် ချြီင် ရန်ဆူ။ 5 ယေ နပ် ဒီ ပီယေန် ဂြုဝ်း အီ လာယ် ကာထဲန့် လွင် ဇဝ်ဖြာ။ ဘော မုး အီ ပီခိုက်၊ အီ တူ တဲး အီ နပ် လွင် ဇဝ်ဖြာ၊ ဘော အာကျာမ် အာငျာန် ဇိုဝ် တီ ဒွန် မျုဝ်၊ ယေ တူ တဲး န့ လိုပ် ခဲင် နဝ်း အီ၊ ယီ တဲး ဂေ ပွိုန် ဒီ ထူမ် ဒူပ် ဇဝ် ယေဆူ။ 6 ဆေ ဘေ ဟဲ့ ခတ် နဝ်း ဒီ ထူမ် ဆီချာ ဇဝ် ယေဆူ၊ ယေ မိူဝ် ဟဲ့ ဖြူမ် ဒီ ဒမ် မှာပ် ဒီ ဂေ ဒွန် အီ အီ တူ ထူမ် အီ တူ ဒူပ် ဆီချာ။

7 ဘေ ယွတ် မီ ခဲ့ ပီ ယိုဝ် ဒီ ငါယ်။ ဆေ န့ မိုဝ်း ဒူအီ အူ ဝီ အီ တဝ်း၊ အန် ဟဲ့ မုး ဒူအီ အီ ညှိုမ် ဇဝ် ယေဆူ၊ တဲး အန် ဝီ လှုဝ်း၊ ဘော ယေ ဟဲ့ မုး ဒူအီ အီ ညှိုမ် ဇဝ် ယေဆူ ပီ အန်။ 8 ဇဝ်ဖြာ ဟဲ့ ဒွါ ပွုန် အန် ဒီ ယေ၊ တဲး ယေ စွယ် ဘေ၊ တဲး ဘေ ညှိုမ် ဆီချာ၊ အာဝ် မုး တဲး ယေ ပျာတ့် ဘေ။ အုဝ် ပီ ဘော ဟဲ့ ပီဖုင် အုဝ် ကူပ် ပွုန် ဇဝ်ဖြာ တီ မိူဝ်၊ အုဝ် တူ လုဝ် ဆာယ် အာဆေ လွင် အန် တီ။ 9 အုဝ် တူ ဆီ တဲး ဘေ ထာင်၊ အုဝ် ဒဲမ် ပဲ့ ဒီ ဘေ၊ တဲး အုဝ် ကာစွှာ့ ဘေ၊ တဲး ဘေ ယုဝ်။ 10 ခုဝ်၊ ဒူအီ မင် အီ နပ် တဝ်း၊ “ဒါ ဆာရာ အာပေါလူ၊ ဒေါ ကွယ် ရိုမ် အန် ဒူပ် ယေ၊ အန် ပီ ဒူအီ ဒီလှး တူ မိုဝ်း ပ့လူမ်။ ဂြုဝ်း ပီ ကာလာင် အန် မိူဝ်၊ အာဝ် မွှိုမ် ထူမ်။ မာလဲ၊ ပဲ့ ပီ ဒဲမ် အန် ဟဲ့ မွှိုမ် ယုဝ်၊ ဟဲ့ မိုဝ်း ပွုန်။” 11 တဲး ဂေ ဒူအီ အီ ကာလာင် ပါယ် တီ နပ်၊ ဒေါ ကွယ် တူင့် ယေ ဒဲမ် ပဲ့ ဒီ ဂေ၊ ယေ ဘော ခြာမ် ဒီ ဘူင် ဒူပ် ပီ ဒဲမ် ယေ တီ ပန် ဒီ တး ဇမ် ယေ ဒူင် ကွယ် ဘေ။

12 ယေ တူ ဆီ ပီ ဂေ ဒူအီ အီ စုဝ့် ဒုဝ် ဘြိမ် ဂေ။ ယေ တူ ဆီ ကာဂဝ် ပီ ဘူင် ယေ ဒီ ဂေ။ ဒူအီ ဂေ တီ၊ ဂေ ဒူပ် အာငျာန် ဂေ၊ ဝီ လာယ် ကာဂဝ် ဘဲန် ဝီ ဘဲန် ဝီ၊ ယီ တူ မိုဝ်း အာငျာန် ဘွတ်။ 13 အီ မုး ယေ၊ ယေ တူ ပီဖုင် ဒုဝ် ဘြိမ် ယေ တဲး န့ ကော ပွုန် ကော လွှိုမ်။ ယေ ပီဖုင် ယေ တဲး န့ ကာဒါန် မီ ခဲ့ ပီ အာပ် ဇဝ်ဖြာ ဒီ ယေ။ ဇဝ်ဖြာ ယီ ဟဲ့ အာပ် ဘော ဘေ ဒီ ယေ။ 14 ဆေ ယေ တူ ဒွိုမ် တး ဒူင် ကွယ် ဘေ၊ ပီ ကာလာင် ယေ န့ ဒီ လွှိုမ် ပီ ကာအာပ် ကာလာင်။ န့ ယီ တူ မုး ပါယ် တီ။ ယေ ဟဲ့ တး ဇမ် ဒူင် ကွယ် ဘေ ဒီ အာတ့် အီ ဟဝ်၊ ယေ ဟဲ့ ဟွတ့် ကာလာင် ဒီ ဘေ လွင် ဇဝ် ယေဆူ အီ တဲး နဝ်း ဒူအီ ဒါခိုယ်။ 15 ယေ မိူဝ် တူ ကာလာင် လွှိုမ် ပီ ကာအာပ် ယေ ကာလာင်။ ယေ တူ တဝ်း ဂါန် ပဲ့ ဟဲ့ ဘူင် အီ ဟဝ် မုး ဂါန် ယေ။ ယေ ယီ နှဝ့် န့ ဒဝ့် ဘော ညှိုမ်၊ ဘေ ဒီ ဝဲ ညှိုမ် ဆီချာ။ ပါယ် တီ၊ ယေ မိူဝ် ဒီ ဝဲ ပွိုန် ဒီ ဘူင် ဂါန် ကိူန် ကာတဲ ဘေ၊ တဲး န့ ကာဒါန် ခဲ့ ပီ အာပ် ဇဝ်ဖြာ ဒီ ယေ။ 16 ဆေ န့ ပါယ် တီ၊ ယေ ဒီ ပွိုန် ဒီ ကာလာင် လွင် ဇဝ်ဖြာ အီ တဲး နဝ်း ဒူအီ ဒါခိုယ်၊ တဲး ဘော ဒူအီ အီ ကွယ် ခဲင် မိူင် ဟဝ် ပွိုန် ဒီ ထူမ်။ ခုဝ်၊ ယေ တူ ဆီ ပီဖုင် ယေ ကူပ် ဂါန် ပီ ဘူင် အီ ဟဝ်၊ တဝ်း န့ မုး ဂါန် ယေ။ 17 မာလဲ၊ ခဲင် ဘပ် ဇဝ်ဖြာ ဟဲ့ ဒဲမ် အုန် တဝ်း၊ “အာဆေ ဆီ ပီဖုင် အန်၊ တဲး အန် ပီဖုင် မီ ကူပ် ပဲ့ ဟဲ့ ဘူင် ဇဝ်ဖြာ။” 18 ခုဝ်၊ အာဆေ ဝီ အိူပ် ဒုဝ် ဘြိမ် အန်၊ အန် တူ မုး ဒူအီ ပီ အိုင် ဇဝ်ဖြာ။ ဇဝ်ဖြာ အိုင် မီ ဒူအီ ပီ အိူပ် ပီ မျုက် အန် ဇဝ်။