လွင် ပီ ဒီ လှူ ပီ ဒီ စွယ် ဘေ ဒူအီ အီ ဆီငါ ဘွတ် အီ ကွယ် ခဲင် အိူင် ယူဒါ တွိုန်၊ အုဝ် အာဝ် ဟူ လုဝ် ဒဲမ် ပေါ န့ ပွါ ဒီ ဘေ။ 2 ခုဝ်၊ အုဝ် ဟဲ့ နပ် ခဲ့ နဝ်း ဒီဟာင် ဘေ။ အုဝ် ဟဲ့ ကာမွုန် အိူပ် ဘေ နာ အာတ့် ဂေ ဒူအီ မာခေဒူန် တဝ်း၊ “ဂေ ဘီနွင် အီ ကွယ် ခဲင် အိူင် အာခါယာ၊ ဂေ ဟဲ့ ဖြူမ် ဒီ စွယ် အီ ဆိန့် နမ် အာတ့်။” လွင် နဝ်း ဒီဟာင် ဘေ တီ၊ ဟဲ့ တဲး ဘော ဂေ ဒူအီ ကိူန် ဝီ ဘဲန် နဝ်း ဆီ လှူ။ 3 ခုဝ် အန် တီ အုဝ် ဝီ တိုယ် ဝါ ယေ ဟာဝ် ဒူင် ကွယ် ဘေ ဒေါ တီ နီ၊ ကွဲ့ တဲး ဂြုဝ်း ပဲ့ ဟဲ့ အိူပ် အုဝ် ဒီ ဘေ ဘဲန် ဂြုဝ်း ပီယေန့်။ တဲး ဘေ ပွိုန် ဒီ အာပ် ရွိုန် ပဲ့ ဟဲ့ ဟွတ့် လှူ ဘေ တီ ဒီ ဂေ၊ တဲး န့ ပီ ပဲ့ ဟဲ့ ဒွိုမ် ကာလာင် အုဝ် ဒီ ဂေ။ 4 ခုဝ်၊ ဆေ ဂေ ဘီနွင် ခဲင် အိူင် မာခေဒူန် တီ တး ဒူပ် အုဝ် ဟီ ယိုဝ်၊ ဘေ ညှမ် မိုဝ်း ဒီ ဂဲပ် အုန် မာဆေ၊ အာဝ် မုး မီ ဘေ ဒီ မွှိုမ် ဆာယ်။ ဘော ယေ အီ ဟဲ့ အိူပ် ဘေ၊ အီ ဟဲ့ ညှိုမ် နဝ်း ဘေ ဒီ မွှိုမ် ဆာယ်။ 5 ခုဝ်၊ အုဝ် ဝီ စ်ု ဝါ ယေ ဂေ နီ၊ တဲး ဂေ ဟာဝ် ယဲတ့် ဒီ အာတ့် အုဝ်၊ တဲး ဂေ စွယ် ဘေ ဂဲပ် ရွိုန် လှူ ပဲ့ ဟဲ့ ကာဆဲန့် ဘေ တီ။ ဆေ အုဝ် ဟီ ဝီ တး ဇမ်၊ တဲး န့ ဟွတ့် ပဲ့ ဟဲ့ စွယ် ဘေ ဒီ အီ ဟဝ်၊ တဲး န့ လိုဝ်း ဘေ ဟဲ့ ဒွါ ဒူပ် နဝ်း ဒီဟာင် ဘေ၊ အာဝ် မုး ကူပ် စခိူန် ဘေ ဒီ ဒွါ။

6 ခုဝ်၊ အာဆေ ဘြတ် ဆီမာ ငှုဝ် ပြေတ့်၊ အန် မိူဝ် ဒီ ပွိုန် ဒီ ဆုဝ့် ငှုဝ် ပြေတ့်။ အာဆေ ဘြတ် ဆီမာ ငှုဝ် ကိူန်၊ အန် မိူဝ် ဒီ ပွိုန် ဒီ ဆုဝ့် ငှုဝ် ကိူန်။ ပါယ် တီ၊ တဲး ဘေ နုဝ်။ 7 ဇဝ်ဖြာ မိူဝ် အိုင် ဂေ အီ မိုဝ်း နဝ်း ဆီ လှူ။ တဲး ဒွန် အီ လှူ ခဲ့ ဟဲ့ ခြာမ် အန် ဒီ လှူ ခဲင် နဝ်း အန်။ အာဝ် မုး လှူ ပီ ဝီ လှယ့်။ အာဝ် မုး လှူ ပီ ဝီ ဆွင့် ဒီ နဝ်း။ 8 ဇဝ်ဖြာ ယီ နပ် ဒီ ဒွါ ဒွန် မျုဝ် ပီ ဂေဇူ အန် ဒီ ဘေ၊ တဲး န့ လွှိုမ် ခဲ့ ပီ လုဝ် ဘေ၊ တဲး ဘေ မိုဝ်း ဆေဆေ ခဲ့ ပီ လုဝ် ဘေ ဒွန် မျုဝ်၊ တဲး ဘေ ဝီ ပွိုန် ဒီ ဘူင် ကိူန် နာ မွှိုမ် ဒွန် မျုဝ်။ 9 ခဲင် ဘပ် ဇဝ်ဖြာ ဟဲ့ ဒဲမ် အုန် တဝ်း၊ “အန် ဟဲ့ ကာဆာင် ဒွါ ဒီ အီ ဟဝ်။ အန် ဟဲ့ ဒွါ ကိူန် ဒီ ဒူအီ ဂိန်၊ အန် မိူဝ် မိုဝ်း နဝ်း ဆိူဝ် နဝ်း မှာန် ဆေဆေ။”

10 ခုဝ်၊ ဇဝ်ဖြာ မုး ဒါ ကာညာ အီ ဒွါ ဆီမာ ငှုဝ် ဘော ပီ ဒီ ဟူမ် ဒီ ဂေ ဒူအီ အီ ဘြတ် ဆီမာ ငှုဝ်။ အန် ဒီ တဲး ပီ ဆမ် ဘေ ဝဲ ဘ့လေ ကိူန်။ အန် မိူဝ် တဲး နဝ်း ဆိူဝ် နဝ်း မှာန် ဘေ မိုဝ်း အာဂျိုဝ် ကိူန်။ 11 အန် ဒီ တဲး ဘေ မိုဝ်း ဒွန် မျုဝ်၊ တဲး ဘေ ခြမ်၊ တဲး ဘေ မိုဝ်း နဝ်း ဒီဟာင်၊ ပွိုန် ဒီ စွယ် အီ ဆေဆေ။ ဂေ အီ ဟဝ် ဒီ ဘော အိူပ် ဇဝ်ဖြာ ကူပ် မိုဝ်း ဘေ နဝ်း ဒီဟာင် ဘော တဲး ယေ ပွိုန် ဒီ တိုယ် ရွိုန် ပီ လှူ ဘေ ဒီ အီ။

12 အာဝ် မုး ဘေ ဒွါ မီ ခဲ့ ပီ လုဝ် ဒူအီ အီ ညှိုမ် ဇဝ်ဖြာ။ ဒဲင် တီ၊ ဘေ ဟဲ့ ဘူင် တဲး ဘော ဒူအီ ကိူန် ဝီ ဒါင် ဂုင် ဂေဇူ ဒီ ဇဝ်ဖြာ။ 13 ကူပ် ပီ ဘူင် ဘေ တီ၊ ဘေ ဟဲ့ ဘျ နဝ်း ဘေ။ ဒူအီ ကိူန် ဒီ အိူပ် ဇဝ်ဖြာ ကူပ် ယိုဝ် ဂေ လွင် ပီ ကာလာင် ဘေ ဘော လွင် ပီ ဘူင် ဘေ ဟဲ့ ကာရမ်။ ဘေ နပ် ဒီ တဝ်း၊ ဘေ ညှိုမ် ဇဝ် ယေဆူ အီ တဲး ဒူအီ ဘဲန် နဝ်း ဒါခိုယ်။ ဘေ ဘော ဘူင် ပီ အိုင် ဇဝ်ဖြာ ဒေါ ဒွါ ဘေ ဒီ ဒူအီ ဟဝ် ဒွန် မျုဝ် ခဲ့ ပီ လုဝ် ဂေ။ 14 ဂေ အီ ဟဝ် ဒီ ဘော ရွက့် ဘေ ဘော ဆာခိုဝ် ဒါင် ဘေ ကူပ် ဟဲ့ ယိုဝ် ဂေ ပီ ဂေဇူ ဇဝ်ဖြာ ဒီ ဘေ ဟဲ့ ကိူန် လွှိုမ် ပီ ကာလာင် ယေ ဒီ အာတ့်။ 15 ယေ မိူဝ် ဒါင် ဂုင် ဂေဇူ ဒီ ဇဝ်ဖြာ ကူပ် ပီ ဂေဇူ အန် ဒီ အီ ဟဲ့ ကိူန် ကော ဟူ နပ် ဒီ ကာလာင်။