အိုယ် ဘေ ဘီနွင်၊ ယေ ဆီ တဲး ဘေ နပ် လွင် ပီ ဂေဇူ ဇဝ်ဖြာ ဒီ ဂေ ဒူအီ ခဲင် ဖိုင် ဇဝ် ယေဆူ အီ ကွယ် ခဲင် အိူင် မာခေဒူန်။ 2 ဂေ ပီ ဘော ဟဲ့ ခမ် ဒုက် တာင် ကာဆဝ်၊ ဂေ ပီ ဘော ဟဲ့ ဂိန် ကာဆဝ် မိူဝ်၊ ဂေ ယီ မိုဝ်း နဝ်း ဒါခိုယ် ကာဆဝ်၊ ဘော ဝီ ဘဲန် နဝ်း ဒီဟာင်၊ ဝီ ကာဆာင် ဒွါ ကိူန် ဒီ အီ ဟဝ်။ 3 အုဝ် ကာလာင် ခဲ့ ပီ ယိုဝ် အုဝ်။ ဂေ ဟဲ့ လှူ ခဲ့ ပွိုန် ဂေ လှူ။ မင် အီ ဟဲ့ လှူ လွှိုမ် ခဲ့ ပွိုန် ဂေ လှူ ရာင် ဂေ။ အာဝ် မိုဝ်း အီ ပွက့် အီ ခါန် ဒီ ဂေ။ 4 ဂေ ဘော မှာန့် ကာဆဝ် တဲး ယေ ဒိုဝ်း ပီ လှူ ဂေ၊ တဲး ဘော ဂေ ပွိုန် ဒီ စွယ်၊ ပွိုန် ဒီ ကာဆာင် ဒီ ဂေ ဒူအီ အီ ဆီငါ ဘွတ် အီ ကွယ် ခဲင် အိူင် ယူဒါ။ 5 ပီ လှူ ဂေ တီ၊ န့ ဟဲ့ လွှိုမ် ခဲ့ ပီ ထာင် ယေ။ ဂေ ဟဲ့ လှူ ဒုဝ် ဂေ ဒီ ဇဝ်ဖြာ ဒီ အာတ့်။ ဟဲ့ ဟွတ့်၊ ဂေ ဘော ဝီ လှူ ဘော ဒီ ယေ တဲး န့ ဒူပ် ပီ အိုင် ဇဝ်ဖြာ။ 6 ကူပ် န့ ပါယ် တီ၊ ယေ ဝီ ကာဆုး အာထီထူ တဲး အန် စွယ် ဘေ၊ တဲး ဘော ဘေ ကာဝေ ဒူအီ ဂိန် ဂေ တီ။ အန် ဟဲ့ ဒွိုမ် ကာစုး ဒီ ဒိုဝ်း ပီ လှူ ဘေ။ ခုဝ်၊ ယေ ဆီ တဲး အန် ဘူင် တဲး န့ ကော ဟွတ့် ဂါန် ဇိုဝ် တီ။ 7 ပီ ဘူင် ဘေ ဒွန် မျုဝ် ဟဲ့ လွှိုမ် ပီ ဘူင် ဂေ အီ ဟဝ်။ ပီ ညှိုမ် ဘေ၊ ပီ ကာလာင် ဘေ၊ ပီ နပ် ဘေ၊ ပီ ဂျုဝ်ဂျာ ဘေ ဘော ပီ ရွက့် ဘေ ဒီ ယေ၊ ဇိုဝ် တီ ဒွန် မျုဝ် ဟဲ့ ကိူန် လွှိုမ် ပီ ဘူင် ဂေ အီ ဟဝ်။ ခုဝ်၊ အုဝ် ဆီ တဲး ဘေ ပွိုန် ဂေဇူ ပီ ဒွါ ဇဝ်ဖြာ ပေါ အူ မျုဝ်၊ တဲး ဘေ မိူဝ် လှူ လွှိုမ် အီ ဟဝ်။

8 အုဝ် ကာလာင် ပါယ် တီ၊ အာဝ် မုး အုဝ် စ်ု ဘေ ဘူင်။ အုဝ် ခဲ တဲး ဘေ နပ် ပီ ပါယ် အီ ဟဝ် ဒီ လှူ၊ တဲး န့ ဘော လိုဝ်း လွင် နဝ်း ရွက့် ကာဝေ ဘေ ဟဲ့ ကာရမ် အီ ဟဝ်။ 9 ဘေ ဟဲ့ နပ် ခဲ့ တာင် ဂေဇူ ဇဝ် ယေဆူ အီ မုး ဒါ ကာညာ အေ။ အန် ဇဝ် ပီ ဘော ဟဲ့ ခြမ် မိူဝ်၊ အန် ယီ ခမ် ဒီ ဘဲန် ဒူအီ ဂိန် ကူပ် ရွက့် အန် ဒီ ဘေ။ အန် ဟဲ့ တဲး ဘေ ဝီ ခြမ် ကူပ် ဟဲ့ ဘဲန် အန် ဒူအီ ဂိန်။

10 ပီ လုဝ် ဘူင် ဘေ န့ ပါယ် နီ။ နမ် အာတ့် ဘေ ဟဲ့ မိုဝ်း နဝ်း ဆီ စွယ် အီ ဒီ အာတ့် အီ ဟဝ်။ ဘေ ဟဲ့ ကာစုး ဒီ လှူ ရွိုန် ဒီ အာတ့် အီ ဟဝ်။ 11 ဒေါ တီ နီ၊ တဲး ဘေ ဘော ဘူင် တဲး န့ ကော ဟွတ့်၊ တဲး ဘေ ဘူင် ဒူပ် နဝ်း ဘေ။ ခဲ့ ပီ ပွိုန် ဘေ ဘူင်၊ တဲး ဘေ ဘူင်။ 12 ဆေ ဘေ မိုဝ်း နဝ်း ဆီ လှူ၊ ဇဝ်ဖြာ မိူဝ် အိုင် ပီ လှူ ဘေ။ တဲး န့ ယီ ဒူပ် ခဲ့ မိုဝ်း ဘေ။ ဇဝ်ဖြာ မိူဝ် တူ ဆီ ပွိုန် ပီ တူ မိုဝ်း ဘေ။

13 ယေ တူ ဆီ တဲး န့ စိုဝ် ဒီ အီ၊ ဝီ တဲး န့ စန် ဒီ ဘေ။ ယေ ဆီ တဲး န့ ကာရမ် ဘော အာ ဘ့လာက်။ 14 ဒေါ တီ နီ၊ ခဲ့ ပီ မိုဝ်း ဘေ ဟဲ့ ပွိုန် စွယ် ဂေ အီ လုဝ် စွယ်။ ဝါယ် နီ၊ ဂေ ဟီ မိုဝ်း၊ ဂေ ဒီ ဝီ စွယ် ဝိဝ် ဘေ ပန် ဒီ လုဝ် ဘေ အီ စွယ်။ ဆေ ဘေ ဘူင် ပါယ် တီ၊ န့ ဒီ လာယ် ကာရမ်။ 15 ပါယ် တီ၊ ဘေ ဒီ ဒူပ် ပီ ဒဲမ် အုန် ခဲင် ဘပ် ဇဝ်ဖြာ။ န့ ဟဲ့ တဝ်း၊ “အာဆေ ဟဲ့ ဂဲပ် အုန် ကိူန်၊ အန် တူ မိုဝ်း ဒီ ကာလူယ်။ အာဆေ ဟဲ့ ဂဲပ် အုန် အီ စဲက်၊ အန် မိူဝ် တူ လုဝ် ပေါ န့ ပွါ။”

16 အုဝ် ဒါင် ဂုင် ဂေဇူ ဒီ ဇဝ်ဖြာ၊ ကူပ် ဟဲ့ ဘူင် အန် ဇဝ် တဲး အာထီထူ မိုဝ်း နဝ်း ဆီ စွယ် ဘေ ပီ အုဝ်။ 17 အန် ဟဲ့ ထူမ် ဂြုဝ်း ပီ ကာဆုး ယေ ဒီ အန်။ ဒဲင် တီ၊ န့ မုး ဘော နဝ်း အန် ကာပြာ ကာဆဝ် ဒီ ဟာဝ် ဒူင် ကွယ် ဘေ။ 18 ယေ ဒီ တိုယ် ဝါ ယေ၊ ဝီ အီ ဟဲ့ နပ် ဒီ ကာလာင် ဆာဒါင် လွင် ဇဝ် ယေဆူ အီ တဲး နဝ်း ဒူအီ ဒါခိုယ်။ အန် မုး ဝီ ပဲ့ ဟဲ့ မျုက် ဂေ ဒူအီ ဒွန် ဝီ ခဲင် ဖိုင် ဇဝ် ယေဆူ ဒွန် ပ့လုဝ့်။ ယေ ဒီ တဲး အန် ဟာဝ် ဒူပ် အာထီထူ။ 19 ဒဲင် တီ၊ ဒူအီ ခဲင် ဖိုင် ဇဝ် ယေဆူ ဟဲ့ ရဝ်း အန်၊ တဲး အန် ဟာဝ် ဒူပ် ယေ ဒေါ တိုယ် ယေ ရွိုန် ပီ လှူ ဘေ။ ယေ တိုယ် ရွိုန် တီ ကူပ် ရုဝ်ဆေ ယေ ဇဝ်ဖြာ ဘော ဘျ နဝ်း ဒီဟာင် နဝ်း ဆီ စွယ် ယေ ဒီ အီ။ 20 ယေ ဘော ဆာဒိက် ကာဆဝ်၊ ကွဲ့ တဲး အီ ဟဝ် မိုဝ်း ဒီ နဲ လွင် ရွိုန် ပီ ဂူင့် ပီ တိုယ် ယေ တီ။ 21 ခုဝ်၊ ယေ ဂျုဝ်ဂျာ ဒီ ဘူင် ဆိူဝ် ဆိူဝ် မှာန် မှာန်၊ တဲး ဘော ဇဝ်ဖြာ ဘော ဒူအီ ပွိုန် ဒီ ယိုဝ် တူတ့်။

22 ဒဲင် တီ၊ ယေ ပီ ဒီ ဝီ စ်ု ဝါ ယေ တွိုန်။ အန် ဟဲ့ ဘျ ဒီ ယေ ဘဲန် ဇေန့် ဘဲန် ဇေန့် ခဲ့ အွန် အန် ဒီ ဘူင် ဂါန် ဇဝ်ဖြာ။ ဒေါ တီ နီ၊ အန် ဟဲ့ ဝဲ အွန် ကူပ် ညှိုမ် ဆီချာ အန် ဒီ နဝ်း ဘေ။ 23 န့ ယီ မုး အာထီထူ၊ အန် မုး ဂိုက် အုဝ်၊ ဘူင် ဂါန် ရိုမ် ဒူပ် အုဝ်၊ တဲး အန် စွယ် ဘေ။ ဂေ ဘီနွင် အီ ဟာဝ် ဒူပ် အန် တီ၊ ဂေ ဟဲ့ ဟာဝ် ကာဒါင် ဂေ ဒူအီ ခဲင် ဖိုင် ဇဝ် ယေဆူ ဘောကာဂ့လျီတ်။ ဂေ ကာဖြူမ် ဒီ ဘူင် တူတ့် ဒွန် မျုဝ် အီ တဲး ဒူအီ အိူပ် ဇဝ် ယေဆူ။ 24 ခုဝ်၊ တဲး ဘေ ဘျ နဝ်း ရွက့် ဘေ ဒီ ဒူအီ ဂေ တီ၊ တဲး ဂေ ဘော နပ်၊ မှဝ် န့ ပါယ် ပီ မိုဝ်း ယေ နဝ်း ကြွိုမ် ကူပ် ဘေ၊ တဲး ဘော ဂေ ဒူအီ ခဲင် ဖိုင် ဇဝ် ယေဆူ ဘဲန် ပ့လုဝ့် ဘဲန် ပ့လုဝ့် နပ် လွင် အန် တီ။