အိုယ် ဘေ ဘီနွင် ပီ ရွက့် အုဝ်၊ ဂြုဝ်း တီ မုး ဂြုဝ်း ကာဒိက် ဆတ်ဇာ ပီ ဒွါ ဇဝ်ဖြာ ဒီ အေ။ ခုဝ်၊ တဲး အေ ဘူင် ပီ အေ ဆုတ် ဘာယ် နဝ်း၊ တဲး အေ ဝဲန် ဒွန် မျုဝ် အီ နပ် ဒီ ကာဒါတ့် ဒီ ဒုဝ် ဘူင့် ဘော ဒီ နဝ်း ဖွိုမ် အေ။ တဲး အေ ယုဝ် ဇဝ်ဖြာ ဘော မိုဝ်း နဝ်း လုယ်၊ နဝ်း ဆီငါ ဘွတ်။

2 တဲး ဘေ ဘျ နဝ်း ဘေ၊ တဲး အေ လာယ် ကာလဝ့်။ ယေ တူ မိုဝ်း ဒီ လုတ့် အာဆေ၊ တူ မိုဝ်း ဒီ ပျာတ့် အာဆေ။ ဒဲင် တီ၊ ယေ မိူဝ် တူ ဒွိုမ် မှာပ် မှ်ု အာဆေ။ 3 လွင် ဂြုဝ်း ပီ ကာလာင် အုဝ် ဇိုဝ် တီ၊ အာဝ် မုး အုဝ် ဒမ် မှာပ် ဒီ ဘေ။ ယေ ဟဲ့ ဒွိုမ် ကာလာင် ဒီ ဘေ၊ လွင် ဟဲ့ ရွက့် ကာဆဝ် ယေ ဒီ ဘေ ဘော လွင် နဝ်း ဆီ ကွယ် ရိုမ် ယေ ဒူပ် ဘေ။ န့ ပီ ဘော မုး လွင် လုဝ် ယမ်၊ ယေ ခမ် ဒီ ယမ် ရိုမ် ဒူပ် ဘေ။ ဒေါ ဆီ အိမ် ယေ၊ ယေ ဆီ ကွယ် ရိုမ် ဒူပ် ဘေ ဆေဆေ။ 4 ကူပ် ညှိုမ် အုဝ် နဝ်း ဘေ၊ နဝ်း အုဝ် ဟဲ့ ကြွိုမ် ကာဆဝ် ကူပ် ဘေ။ အုဝ် ပီ ဘော ကာဒုး ဒုက် ခဲ့ မှဝ်၊ အုဝ် မိူဝ် နဲ့ ခူယ်။

5 ဝါယ် ဟဲ့ တး ယေ ဒီ အိူင် မာခေဒူန် တွိုန်၊ ယေ မိူဝ် တူ ပွိုန် ဒီ ဒီလှဝ်။ ယေ ဟဲ့ ကာဒုး ဒုက် ဒွန် မျုဝ်။ ယေ ဘော ကာဒုး ဒီ ကာထဲန့် ဒီ အီ ဟဝ် ဘော ဘဲန် နဝ်း ယုဝ် ဘဲန် မျုဝ် ဘဲန် မျုဝ်။ 6 မာလဲ၊ ဇဝ်ဖြာ အီ နပ် ဒီ စွယ် နဝ်း ဒူအီ အီ ဒီလှး၊ အန် ဘော စွယ် ယေ၊ ဝီ တိုယ် အာထီထူ တး၊ တဲး အန် တဲး ပ့လူမ် တဲး ဟဲန့် ဒီ နဝ်း ယေ။ 7 အာဝ် ဝန် မီ ကူပ် တး အန် တီ ဟဲ့ ဘဲန် နဝ်း ပ့လူမ် ဒီ ယေ။ နဝ်း ယေ ဟဲ့ ဒါခိုယ် ဘော ကူပ် ဟဲ့ ကာလာင် အန် လွင် ဘေ ဟဲ့ တဲး ပ့လူမ်၊ တဲး ဟဲန့် ဒီ နဝ်း အန်။ အန် ဟဲ့ ကာလာင် ဒီ ယေ လွင် ဟဲ့ ဒီကေန် ဘေ ဒီ အုဝ်။ အန် ဟဲ့ ကာလာင် ဘော လွင် နဝ်း က့လိုဝ် ဘေ၊ ဘော လွင် နဝ်း မှဲ ဘေ ဒါင် အုဝ်။ လွင် ဇိုဝ် တီ ဒွန် မျုဝ် ဟဲ့ တဲး နဝ်း အုဝ် ဝဲ ဒါခိုယ်။

8 ပဲ့ ပီ တိုယ် အုဝ် ဒီ ဘေ တွိုန်၊ န့ ပီ ဘော ဟဲ့ ဘဲန် နဝ်း က့လိုဝ် ဒီ ဘေ မိူဝ်၊ အုဝ် တူ က့လိုဝ်။ ခါ အာတ့် အုဝ် ဟဲ့ ရာမ် က့လိုဝ်။ ခုဝ်၊ ပဲ့ တီ ဟဲ့ တဲး န့ ဆဝ် ဒီ နဝ်း ဘေ၊ ယီ တူ လှေန့်။ ခုဝ်၊ အုဝ် မိူဝ် အာဝ် ဟူ ဝီ က့လိုဝ်။ 9 မာလဲ၊ ဒေါ တီ နီ၊ နဝ်း အုဝ် ဟဲ့ ဒါခိုယ် ကာဆဝ်။ အာဝ် မုး နဝ်း အုဝ် ဒါခိုယ် ကူပ် က့လိုဝ် နဝ်း ဘေ။ နဝ်း က့လိုဝ် ဘေ တီ ဟဲ့ တဲး ဘေ ဝီ လှုဝ်း မှာပ် ဘေ။ ခုဝ် အန် တီ နဝ်း အုဝ် ဝီ ဒါခိုယ်။ နဝ်း က့လိုဝ် ဘေ တီ၊ ဟဲ့ ဒူပ် ပီ အိုင် ဇဝ်ဖြာ။ ဒုဝ် ဘေ တူ စှိုမ် မာဆေ ကူပ် ဒဲမ် ယေ ပဲ့ တီ ဒီ ဘေ။ 10 ဆေ ဒူအီ မိုဝ်း နဝ်း က့လိုဝ် အီ ဒူပ် ပီ အိုင် ဇဝ်ဖြာ၊ န့ တဲး အေ ဒူအီ လှုဝ်း မှာပ် အေ၊ တဲး ဇဝ်ဖြာ ပွိုန် ဒီ ချွတ် အေ။ အေ မိူဝ် တူ လုဝ် လှယ့် မာဆေ။ မာလဲ၊ ဆေ အေ မိုဝ်း နဝ်း က့လိုဝ် ပီ ဂေ ဒူအီ အီ တူ ညှိုမ် ဇဝ်ဖြာ၊ န့ ဒီ တဲး အေ ယမ်။ 11 တဲး ဘေ ဝီ ဇေန့်ဇာ လွင် ပဲ့ ဟဲ့ ဘူင် ဇဝ်ဖြာ ကူပ် မိုဝ်း ဘေ နဝ်း က့လိုဝ် တီ။ န့ ဟဲ့ တဲး ဘေ ခတ် နဝ်း၊ တဲး ဘေ ဂျုဝ်ဂျာ ဒီ ဝဲန် မှာပ်။ န့ ဟဲ့ တဲး ဘေ ယုဝ်၊ တဲး ဘေ ကာအိး မှာပ်။ န့ ဟဲ့ တဲး ဘေ ဒီကေန် အုဝ်၊ ဟဲ့ တဲး ဘေ ဂျုဝ်ဂျာ ဒီ ဘူင် နာ မှာန်၊ ဟဲ့ တဲး ဘေ ဆုင်ဖျာတ် ဒူပ် နာ မှာန်။ ပဲ့ ဟဲ့ ဘူင် ဘေ ဇိုဝ် တီ ဒွန် မျုဝ်၊ ဟဲ့ ဘျ၊ ဘေ အာဝ် ဟူ ဘာ့ ခဲင် မှာပ် ပဲ့ ဟဲ့ ဘူင် ဒူအီ တွိုန်။ 12 အုဝ် ပီ ဘော ဟဲ့ ဒဲမ် ပဲ့ တီ မိူဝ်၊ အုဝ် တူ ဒဲမ် ကူပ် လှုဝ်း အုဝ် ဝီ အီ ကာလိုပ်၊ ဘော ဝီ အီ ခမ် ပီ ဘူင် ကာလိုပ် အီ ဒီ အန် တီ။ အုဝ် ဟဲ့ ဒဲမ် တဲး န့ လိုဝ်း ဒီ ဘေ လွင် ပီ အိုင် ဇဝ်ဖြာ ဘော တဲး န့ လိုဝ်း ဒီ ဘေ လွင် ဟဲ့ ကာဒိုက် ကာဒဝ့် ဘေ ဒီ ယေ။ 13 လွင် အန် တီ ဒွန် မျုဝ်၊ ယေ ဟဲ့ ဒါခိုယ် ခါခ်ု။ အာဝ် ဝန် မီ ယေ ဟဲ့ ဒါခိုယ်။

ယေ ဟဲ့ ခူယ် ဘော ကူပ် ဟဲ့ ဘူင် ဘေ ဒွန် အီ တဲး ဘော နဝ်း အာထီထူ ဘျုဝ် ဒါခိုယ်။ 14 အုဝ် ဟဲ့ ဒွိုမ် မျုက် ဘေ၊ ဟဲ့ ဒွိုမ် ကာမွုန် ဒီ အန် လွင် ဘေ။ န့ မိူဝ် တူ တဲး အုဝ် မွှိုမ် ဆာယ်။ ပီ ဒွိုမ် ကာလာင် အုဝ် ဒီ ဘေ ဟဲ့ မှာန် ဆေဆေ။ ပါယ် တီ ဘော လွင် ပဲ့ ဟဲ့ ဒွိုမ် ခဲ အုဝ် လွင် ဘေ ဒီ အာထီထူ ဟဲ့ မုး ဟဲ့ မှာန်။ 15 ခုဝ်၊ အာထီထူ ဘော ဝဲ ရွက့် ဘေ ကူပ် ဟဲ့ လှုဝ်း အန်၊ ဘေ ဟဲ့ ထူမ် ဂြုဝ်း အန် ဘော ရွုး အန်။ 16 အုဝ် ဟဲ့ ခူယ် ကာဆဝ် ကူပ် ဟဲ့ ပွိုန် ညှိုမ် တူတ့် အုဝ် နဝ်း ဘေ ဒွန် မျုဝ်။