ကူပ် မုး ယေ ဒူအီ အီ ဘူင် ရိုမ် ဂါန် ဒူပ် ဇဝ်ဖြာ၊ ယေ ဘော ကာဆုး ဘေ၊ တဲး ဘေ ဒိုဝ်း ပီ ဂေဇူ ဇဝ်ဖြာ၊ ကွဲ့ တဲး န့ စှိုမ် ပီယေန့်။ 2 တဲး ဘေ ထူမ် ဂြုဝ်း အန် ဇဝ် အီ ဟဲ့ တဝ်း၊ “အာခြာဝ် ဒေါ ဆင်ဒုဝ်၊ အုဝ် ဟဲ့ ထူမ် ဂြုဝ်း မဲ။ ဆီငဲ ဟဲ့ ချွတ် အုဝ် ဒီ အီ၊ အုဝ် ဟဲ့ စွယ် မဲ။” အုဝ် ယီ တဝ်း၊ ဟဲ့ မုး ဒေါ တီ နီ၊ ဟဲ့ ဆင်ဒုဝ်။ ဟဲ့ မုး အာတိုဝ် နီ၊ အန် ဇဝ် ဒီ ချွတ် ဘေ။

3 ယေ မိူဝ် တူ ဘူင် တဲး န့ ရဲ၊ တဲး န့ ဂိတ် အာဆေ၊ ကွဲ့ တဲး အာဆေ ပွိုန် ဒီ နဲ ဂါန် ပီ ဘူင် ယေ။

4 ယေ မုး ဒူအီ အီ ဘူင် ဂါန် ဇဝ်ဖြာ။ ခုဝ်၊ ခဲ့ ပီ ဘူင် ယေ ဒွန် မျုဝ်၊ ယေ ဂျုဝ်ဂျာ ဒီ ဘူင်၊ တဲး န့ မုး တဲး န့ မှာန်။ ယေ မိူဝ် ဟဲ့ ဒွိုမ် ခမ် ဒီ ယိူန် လှေန့် ကာဆဝ်၊ ဘော ခမ် ဒုက် ဘဲန် မျုဝ် ဘဲန် မျုဝ်၊ တူ နပ် မှဝ် ဒီ ပါယ် ဒီ ဘူင်၊ ဘော ကာဒုး ဒုက် အီ ညှာပ် ကာဆဝ် ဘဲန် မျုဝ် ဘဲန် မျုဝ်။ ပီ ဘော ဟဲ့ ပါယ် တီ မိူဝ်၊ ယေ ယီ ဆီ နဲ့ ဘူင် ခဲ့ ပီ ကာအာပ် ဘူင် ဒူအီ အီ ဘူင် ဂါန် ဇဝ်ဖြာ။ 5 ယေ ဟဲ့ ခမ် တဲး အီ မး ယေ၊ တဲး အီ ဟဝ် ခြွင့် ယေ ခဲင် ကာပိုမ်။ ဒူအီ ဘော မာန် ဘော မိူင် ဟဲ့ ဘူင် တဲး န့ ဆီနန် ဆီနိူင်၊ ဘဲန် ဒုက် ဒီ ယေ။ ယေ မိူဝ် ဟဲ့ ဘူင် ဂါန် စန် ကာဆဝ် ကော ဟူ ပွိုန် ဒီ အိတ် ဆီချာ၊ ကော ဟူ ပွိုန် ဒီ ဟူမ် ဒီ ဒျီင် မာဆေ။ 6 ယေ ဟဲ့ မိုဝ်း နဝ်း ဆီငါ၊ ဟဲ့ မိုဝ်း အာငျာန်၊ ဘော ပဲ ဒီ ယိူန်၊ ဘော ဘူင် နာ မွှိုမ် ဒီ အီ ဟဝ်။ ယေ မိူဝ် ဟဲ့ ဘူင် တဲး နဝ်း ဖွိုမ် ဇဝ်ဖြာ ဘျ ပွုန် အန်။ ယေ မိူဝ် ရွက့် ဘေ အာခါခ်ု မှာန်။ 7 ယေ ဟဲ့ ကာလာင် နာ မှာန် ဒီ ဘေ၊ ဟဲ့ ဘျ ဘော ပီ ပါယ် ပွုန် ဇဝ်ဖြာ။ ယေ ဟဲ့ ဘူင် နာ မုး နာ မှာန် ဆေဆေ၊ တဲး န့ ပီ ခြိုင် ကာဂုဝ်း ဟဲ့ ကွယ် ခဲင် ဒဲ ယေ ဘော အာ ဘ့လာက်။ 8 ယေ ဟဲ့ ခမ် တဲး အီ ဟဝ် အိူပ် ယေ ဘော ခမ် တဲး ဆာရေ ယေ ဖျာက်။ အီ ဟဝ် ဟဲ့ ကာလာင် စာဝ် ယေ၊ ဘော ကာလာင် နာ မွှိုမ် ယေ။ အီ ဟဝ် ပီ ဘော ဟဲ့ ထာင် ယေ မုး ဒူအီ အီ ဆီမာ ကာလုဝ်၊ ယေ ယီ ကာလာင် ဂြုဝ်း မုး ဂြုဝ်း မှာန်။ 9 အီ ဟဝ် ပီ ဆ ဆီ နပ် ယေ မိူဝ်၊ ဒူအီ ကိူန် ယီ ဟဲ့ ဝီ နပ်။ အီ ဟဝ် ပီ ဘော ဟဲ့ ထာင် ယေ ဟဲ့ ယမ် မိူဝ်၊ ယေ ယီ ဆီ အိမ်။ ယေ ပီ ဘော ဟဲ့ ကာဒုး ဒုက် မိူဝ်၊ ယေ ယီ ဟဲ့ လွတ် ယမ်။ 10 နဝ်း ယေ ပီ ဘော ဟဲ့ က့လိုဝ် မိူဝ်၊ ယေ ယီ ခူယ် ဒါခိုယ်။ ယေ ပီ ဘော ဟဲ့ ဂိန် မိူဝ်၊ ယေ ယီ ဘူင် တဲး ဒူအီ ကိူန် ဝီ ခြမ်။ ယေ ပီ ဆ မိုဝ်း မာဆေ မိူဝ်၊ ယေ ယီ ဟဲ့ မိုဝ်း ခဲ့ ပီ လုဝ် ယေ ဒွန် မျုဝ်။

11 အိုယ် ဘေ ဘီနွင် အီ ကွယ် ခဲင် မိူင် ခုဝ်ရိန်ထူ၊ ယေ ဟဲ့ ကာလာင် တူတ့် ပီ ပါယ် ခဲင် နဝ်း ယေ၊ တဲး ဘေ နပ် ဆီချာ။ 12 ယေ တူ မုး ဒူအီ နဝ်း ကာချီ့ ကာခန့် တူ ရွက့် ဘေ။ ဘေ ယီ တူ ဘျ နဝ်း ရွက့် ဘေ ဒီ ယေ။ 13 အုဝ် ဟဲ့ မာတ် ဘေ ပီ ဂွန် အုဝ်။ ခုဝ်၊ တဲး ဘော ဘေ ဝီ ကာလာင် ပီ ပါယ် ခဲင် နဝ်း ဘေ ဒီ ယေ။

14 ကွဲ့ တဲး ဘေ ဘူင် ဂါန် မာဆေ အီ တဲး ဘေ ဒူအီ အီ ဟဲ့ ညှိုမ် လုဝ် ဝီ ကာဒူပ် ဒီ ဒူအီ အီ တူ ညှိုမ်။ ကွဲ့ ဘူင် မာဆေ အီ ပီ မာမက် အာ ဒုဝ် ဟဲ့ စှိုပ် အဲ့မဝ် အူ ဘူင့်။ ခုဝ်၊ နာ မှာန် ဂါယ် နာ တူ မှာန် အာဝ် ပွိုန် ကွယ် ရိုမ်။ ဘော ဘ့လာင် ဂါယ် အပ် ဝွင့် အာဝ် ပွိုန် ကွယ် ကာဒူပ်။ 15 ဇဝ် ယေဆူ ဂါယ် ဘုဝ် ကာနမ် တူ ပွိုန် လာယ် ဖြူမ် ရိုမ်။ ဒူအီ အီ ညှိုမ် ဂါယ် ဒူအီ အီ တူ ညှိုမ် တူ ပွိုန် ဘဲန် အူ နဝ်း။ 16 ဘော အာရိုပ် ရာင် အာဝ် ပွိုန် ကွယ် ခဲင် ဟုဝ် ဇဝ်ဖြာ။ ခုဝ်၊ အေ ဟဲ့ ပီ ဟုဝ် ဇဝ်ဖြာ အီ မုး ဇဝ်ဖြာ အိမ်။ ဇဝ်ဖြာ ဟဲ့ ကာလာင် ခဲင် ဘပ် အန် တဝ်း၊ “အုဝ် ဒီ ကွယ် ရိုမ် ဒူပ် ဂေ။ အုဝ် ဒီ ဟာဝ် ဝိဝ် ဟာဝ် ဝေန့် ဒူင် ကွယ် ဂေ။ အုဝ် ဒီ ဘဲန် ဇဝ်ဖြာ ပီ ကြိုပ် ဂေ၊ ဂေ မိူဝ် ဒီ ဘဲန် ဒူအီ ပီ အိုပ် အုဝ်။” 17 ဇဝ်ဖြာ ပီ ဝီ ကာလာင် ပေါ န့ ပွါ တဝ်း၊ “တဲး ဘေ လေး တ ဂေ။ တဲး ဘေ ကွယ် ရာင် ဘေ။ ကွဲ့ တဲး ဘေ ပါ အီ တူ ဆီငါ ခေါ အူ မျုဝ်။ ဆေ ဘေ ဘူင် ပါယ် တီ၊ အုဝ် ဒီ ဘော ရွုး ဘေ။ 18 အုဝ် ဒီ ဘဲန် ဂုန့် ဘေ။ ဘေ ဒီ ဘဲန် ဂွန် အုဝ် ဘော အီဘိုန့် အီမာယ်။ ဇဝ်ဖြာ အီ အိုပ် တူတ့် ဒွန် မျုဝ်၊ အန် ဟဲ့ ကာလာင် အုန် ပါယ် တီ။”