အေ ဟဲ့ နပ်၊ ဒုဝ် ဘူင့် အေ အီ ပီ ထိုပ် အီ ကွယ် ဒဲင် ကာဒါယ် အာဒါ အူ ကာစန် နီ၊ အန် ဒီ လိုဝ်။ ဆေ န့ ပါယ် တီ၊ အေ ဒီ ဝီ ပွိုန် ဒုဝ် ကာမာယ် အီ ပီ ကာင် အီ ပွိုန် ကွယ် ခဲင် ဂါင်ဟြာဝ် ဆေဆေ။ ကာင် တီ တူ မုး ပီ ဘူင် ဒူအီ၊ န့ မုး ပီ ဘူင် ဇဝ်ဖြာ။ 2 ဒေါ ဆီ ကွယ် အေ ဒဲင် ကာဒါယ် နီ၊ အေ ဘော ငှုန် ကူပ် ဆီ ပွိုန် ကာဆဝ် အေ ဒုဝ် ကာမာယ် အီ ပီ ကာင် ခဲင် ဂါင်ဟြာဝ်။ 3 ခုဝ်၊ ဆေ အေ ဟီ ပွိုန် ဒုဝ် ကာမာယ် တီ၊ အာဝ် မုး အေ ဒီ ကွယ် ဒုဝ် ဂ့လ။ 4 ဒေါ ကွယ် အေ ဒဲင် ကာဒါယ် နီ၊ န့ ပီ အေ ကွယ် ခဲင် ထိုပ်။ အေ ဟဲ့ ခမ် ဒုက် ကာဆဝ် ဘော က့လိုဝ် ဘော ငှုန် ကူပ် တူ ဆီ ဝဲန် အေ ဒုဝ် ဘြိမ် အေ။ အေ ငှုန် ကူပ် ဆီ ပွိုန် အေ ဒုဝ် ကာမာယ်။ အေ ဆီ တဲး ဒုဝ် အီ နပ် ဒီ ယမ် ဟြာယ် ဒေါ ပွိုန် အေ အာဆာက် ကာမာယ် အီ ကွယ် ဆေဆေ တီ။ 5 န့ မုး ဇဝ်ဖြာ အီ ဘူင် တဲး အေ နပ် ဒီ ကာပ့လု။ အန် ဇဝ် ဟဲ့ တဲး နဝ်း ဖွိုမ် အန် ကွယ် ခဲင် နဝ်း အေ၊ တဲး န့ ဘဲန် ဒုဝ် မှာန် ပီ ဒွါ အန်၊ တဲး အေ နပ် ဆီချာ အန် ဇဝ် ဒီ ဒွါ အီ ကာမာယ် အာခ်ု မှာန် ဒီ အေ။

6 ကူပ် န့ ပါယ် တီ၊ အေ မိုဝ်း နဝ်း ညှိုမ် ဆေဆေ ဒေါ ကွယ် အေ ခဲင် ဒုဝ် ဘြိမ် ဒေါ ညှမ် ကွယ် ရိုမ် အေ ဒူပ် ဇဝ်ဖြာ။ 7 အေ တူ ဘူင် ဒူပ် ပီ ယိုဝ် ဒီ ငါယ်။ အေ ဘူင် ဒူပ် ပီ ညှိုမ် အေ။ 8 အေ ဘော ကာပြာ ကာဆဝ် ဒီ လေး တ ဒုဝ် ဘြိမ် နီ၊ ဝီ ဟာဝ် ကွယ် ရိုမ် ဒူပ် ဇဝ်ဖြာ။ အာတီ အေ ထာင်၊ ဟဲ့ မွှိုမ် လွှိုမ် ကွယ် အေ ဒဲင် ကာဒါယ် နီ။ 9 အေ ပီ ဘော ကွယ် ဒီ မှဝ် အာဝ် တဝ်း၊ ဘော မုး ခဲင် ဒုဝ် ဘြိမ်၊ ဘော မုး ခဲင် ဒုဝ် ကာမာယ်၊ အေ ဂျုဝ်ဂျာ ဒီ ဘူင် ပီ အိုင် အန် ဇဝ် ဆေဆေ။ 10 ခုဝ်၊ အေ ဘောကာဂ့လျီတ် ဒီ လုဝ် တး ဇမ် တူတ့် ဒီ အာတ့် ဇဝ် ယေဆူ ပန် ဒီ ဆုင်ဖျာတ် အန် အာမူ အေ။ အေ ဒွန် အီ ဒီ ယိုဝ် အာဂျိုဝ် ပီ ဘူင် အေ ဒေါ ကွယ် အေ ဒဲင် ကာဒါယ် နီ။ အေ ဘူင် နာ မိူက်၊ အေ ဘော ဘူင် နာ မွှိုမ်၊ အေ ဒီ လုဝ် ဝီ ခမ် တဲး န့ ကာဒါန် ဒီ ပီ ဘူင် အေ တီ။

11 ယေ ဟဲ့ နပ် ခဲ့ မွှိုမ် ယုဝ် ဇဝ်ဖြာ။ ခုဝ်၊ ယေ ဆီ ကာဆုး ဒူအီ ဘောကာဂ့လျီတ်၊ တဲး ဂေ ထူမ် ဂြုဝ်း ဇဝ်ဖြာ။ ဇဝ်ဖြာ မိူဝ် ဟဲ့ နပ် ဆီချာ နဝ်း ယေ။ အုဝ် မိူဝ် ညှိုမ်၊ ဘော ဘေ ဟဲ့ နပ် ယေ ခဲင် နဝ်း ဘေ။ 12 အာဝ် မုး ယေ ပီဖုင် ဒုဝ် ဘြိမ် ယေ ဒီ အာတ့် ဘေ။ ယေ ကာလာင် ပီ ပါယ် လွင် ဒါင် အန် ဒီ ဘေ၊ တဲး ဘေ ပွိုန် ဒီ ပီဖုင် ဘေ ကူပ် ယေ၊ တဲး ဘေ နပ် ဒီ ဝီ ဝျီ့ ဂြုဝ်း ဂေ အီ ပီဖုင် ဂေ ကူပ် ပီ ယိုဝ် ဒီ ငါယ်၊ တူ ယွတ် နဝ်း ဒူအီ။ 13 ဆေ ဘေ ယီ ထာင် ယေ ဟဲ့ ဝှိုန့်၊ ယေ ဝှိုန့် ကူပ် ရွက့် ယေ ဇဝ်ဖြာ။ ဆေ ယေ ယီ တူ ဝှိုန့်၊ ကာလာင် အီ မိုဝ်း အာငျာန်၊ ယေ ဘူင် တဲး န့ ဘဲန် အာဂျိုဝ် ဒီ ဘေ။ 14 ဇဝ် ယေဆူ ဟဲ့ ရွက့် ကာဝေ ယေ။ ခုဝ်၊ ယေ ဝီ ကာလာင် ဒီ အီ ဟဝ်။ ယေ ဟဲ့ နပ်၊ ဇဝ် ယေဆူ အူ ဝီ ဟဲ့ ယမ် ကာဒါင် ဒူအီ ဘောကာဂ့လျီတ်။ ကူပ် န့ ပါယ် တီ၊ န့ ပီ ဒူအီ ဘောကာဂ့လျီတ် ဟဲ့ ဟွတ့် ယမ်။ 15 အန် ဇဝ် ဟဲ့ ခမ် ဒီ ယမ် ကာဒါင် ဒူအီ ဘောကာဂ့လျီတ်၊ တဲး ဂေ အီ ပွိုန် အာဆာက် ကာမာယ် အာဝ် ဟူ ဘူင် ဒူပ် ပီ အိုင် ဂေ၊ တဲး ဂေ ဝီ ဘူင် ဒူပ် ပီ အိုင် အန် ဇဝ် အီ ဟဲ့ ယမ် ကာဒါင် ဂေ။ ဟဲ့ ဟွတ့်၊ အန် ဝီ ယိတ့် ဝီ အိမ်။

16 ခုဝ်၊ ပုင် အာတိုဝ် နီ ဟာဝ်၊ ဘော မုး အာဆေ အာဝ် တဝ်း၊ ယေ ဟူ မာတ် အာဆေ ပီ ဒူအီ အီ ကွယ် ဒဲင် ကာဒါယ် နီ လာယ် မာတ်။ ဒေါ မွိုန် ယေ ပီ ဘော ဟဲ့ မာတ်၊ ဇဝ် ယေဆူ မုး ဒူအီ အီ ကွယ် ဒဲင် ကာဒါယ် နီ မိူဝ်၊ နာ အာတ့် နီ ဟာဝ်၊ ယေ အာဝ် ဟူ မာတ် ပါယ် တီ။ 17 ခုဝ်၊ ဆေ ဒူအီ အူ ဝီ ဟဲ့ ညှိုမ် ဇဝ် ယေဆူ၊ ဇဝ်ဖြာ ဟဲ့ တဲး ဒူအီ တီ ဘဲန် ဒူအီ ကာမာယ်။ အီ ဘြိမ် ဟဲ့ ဟွတ့် ဟြာယ်၊ ဟဲ့ ဘဲန် တူတ့် အီ ကာမာယ် ဒွန် မျုဝ်။ 18 ဇိုဝ် တီ ဒွန် မျုဝ် ဇဝ်ဖြာ အီ ဘူင်။ အန် တဲး အေ ဝီ ဒါခိုယ် ဒီ ဇဝ်ဖြာ ကူပ် ညှိုမ် အေ ဇဝ် ယေဆူ။ ဒဲင် တီ၊ အန် ဝီ တဲး ယေ ဘူင် ဘော ဂါန် အန်၊ တဲး ယေ စွယ် ဘော အီ ဟဝ် တဲး ဘော ဂေ ဝီ လာယ် ကာလဝ့် ဒီ ဇဝ်ဖြာ။ 19 ဇဝ်ဖြာ ဟဲ့ ဘူင် တဲး ဒူအီ ဒဲင် ကာဒါယ် ဘောကာဂ့လျီတ် ဝီ လာယ် ကာလဝ့် ဒီ အန် ကူပ် ညှိုမ် ဂေ ဇဝ် ယေဆူ။ ဇဝ်ဖြာ မိူဝ် တူ နုဝ် မှာပ် ပဲ့ ဟဲ့ ဘူင် ဂေ။ အန် ဟဲ့ ညှိုမ် နဝ်း ယေ၊ တဲး ယေ ဝီ ကာလာင် ဒီ အီ ဟဝ် လွင် ဇဝ်ဖြာ ဂါယ် ဒူအီ ဟဲ့ ဝီ လာယ် ဒါခိုယ်။ 20 ပါယ် တီ၊ ဇဝ် ယေဆူ ဟဲ့ တဲး ယေ ဘဲန် အာမာတ် အန်။ ဇဝ်ဖြာ မိူဝ် ဟဲ့ စ်ု ယေ ကာလာင် ဂြုဝ်း အန် ဒီ ဒူအီ။ ခုဝ်၊ ယေ ကာဆုး ဘေ တဲး န့ ပီ ဇဝ် ယေဆူ ကာဆုး ဘေ တဝ်း၊ တဲး ဘေ ဝီ ဒါခိုယ် ဒီ ဇဝ်ဖြာ၊ ကွဲ့ ဟူ တဲး ဘေ ကာဘး ဒီ အန်၊ ဘဲန် ရန်ဆူ အန်။ 21 ဇဝ် ယေဆူ တူ ဒွိုမ် ဘူင် မှာပ်။ မာလဲ၊ ဇဝ်ဖြာ ဟဲ့ တဲး အန် ဝီ ဘဲန် အီ ဒိုဝ်း မှာပ် အေ၊ တဲး အန် ခမ် မှာပ် ကာဒါင် အေ။ ဆေ အေ ညှိုမ် ဇဝ် ယေဆူ တီ၊ န့ တဲး အေ ဝီ ဘဲန် ဒူအီ နဝ်း ဆိူဝ် နဝ်း မှာန် ဒူပ် ပီ အိုင် ဇဝ်ဖြာ။