ဇဝ်ဖြာ ဟဲ့ ကာဝေ ယေ၊ တဲး ယေ ဘူင် ဂါန် ဇိုဝ် နီ။ ခုဝ်၊ နဝ်း ယေ မိူဝ် တူ ဒီလှး၊ တူ ဒီတဲတ်။ 2 ယေ ဟဲ့ ဝဲန် အာဂျာင် အီ ပြာ ဒီ ဘူင် ဘဲန် မျုဝ် ဘဲန် မျုဝ် ဘော အီ မွှိုမ် ဆာယ်။ ယေ မိူဝ် တူ ကာလာင် ဂြုဝ်း ကာလုဝ်။ ယေ မိူဝ် တူ ကာဘ့လျီ့ တူ ဘျွင် ဂြုဝ်း ဇဝ်ဖြာ။ ယေ ဘော ကာလာင် ဒူပ် ဒါရာ တဲး န့ လိုဝ်း ဆီချာ နာ မုး နာ မှာန်။ ယေ ဘော ဂျုဝ်ဂျာ ဒီ ဘူင် တဲး ဇဝ်ဖြာ ယိုဝ်၊ တဲး ဒူအီ ဒွန် အီ ဝီ နပ် ခဲင် နဝ်း ဒုဝ် ဘြိမ် အန် လွင် ဂြုဝ်း ယေ ဟဲ့ မှာန်။ 3 ဆေ ဂြုဝ်း ပီ ကာလာင် ယေ အီ တဲး နဝ်း ဒူအီ ဒါခိုယ် တူ လိုဝ်း ဆီချာ ဒီ အီ၊ န့ တူ လိုဝ်း မီ ဒီ ဂေ ဒူအီ အီ ဒီ လိုဝ် စှိုမ်၊ အီ တူ တဲး ဇဝ်ဖြာ ချွတ် ဂေ။ 4 အန် ဇဝ် ပီ ကြိုပ် ဒူအီ ဒဲင် ကာဒါယ် နီ၊ အန် ဟဲ့ အိုပ် အာငျာန် ဂေ ဒူအီ ဇိုဝ် တီ၊ တဲး န့ ပီ ငါယ် ဂေ ဟဲ့ အပ် ဝွင့်။ ခုဝ်၊ ဂေ တူ ညှိုမ်။ န့ တူ လိုဝ်း ဒီ ဂေ လွင် ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ်၊ အီ ပီ ဘ့လာင်။ ဂေ မိူဝ် တူ ပွိုန် ယိုဝ် အာဖုင် ဒင်ခုဝ် ဇဝ် ယေဆူ၊ အီ ပီ ဇဝ်ဖြာ အာခ်ု မှာန်။ 5 အာဝ် မုး ယေ ကာလာင် လွင် ဒုဝ် ဘြိမ် ယေ။ ယေ ကာလာင် လွင် ဇဝ် ယေဆူ အီ မုး ဒါ ကာညာ အီ အိုပ် ဘေ။ ယေ ကာလာင် ဘော လွင် ယေ ဟဲ့ ဘဲန် ဒဲစေန့် ဘေ ကူပ် ဒူပ် ဘေ ဇဝ် ယေဆူ။ 6 ဇဝ်ဖြာ အီ ဟဲ့ တဝ်း၊ “တဲး ဘ့လာင် ထွင် ဒူင် အပ် ဝွင့်၊” ဇဝ်ဖြာ တီ တဲး န့ ဘ့လာင် ဘော ခဲင် နဝ်း အေ၊ တဲး အေ ယိုဝ် အာဖုင် ဒင်ခုဝ် ဇဝ်ဖြာ ကူပ် ညှိုမ် အေ ဇဝ် ယေဆူ။

7 ဇဝ်ဖြာ ဟဲ့ ဟပ် အာဖုင် ဒင်ခုဝ် အန် ခဲင် နဝ်း ယေ၊ တဲး န့ ပီ အန် ဟဲ့ ချြီင် အုန် ကြုဝ် အီ ဘွတ် ကာဆဝ် ခဲင် ကာလုဝ့် ကာဒါယ် အီ တူ မိုဝ်း ဒီ ငဝ်း ဒီ ခန်။ ပါယ် တီ၊ န့ ဒီ လိုဝ်း ဆီချာ လွင် ပွုန် အီ ဟဲ့ တာင် လွှိုမ် တူတ့်၊ န့ မုး ပွုန် ဇဝ်ဖြာ။ န့ တူ မုး ပွုန် ယေ။ 8 ယေ ဟဲ့ ခမ် ဒုက် ကာဆဝ် ဘဲန် မျုဝ် ဘဲန် မျုဝ်။ မာလဲ၊ န့ ယီ တူ တဲး ယေ စှိုမ်။ မင် ဇေန့် ယေ ဟဲ့ ဒုက် ညှာပ် ကော ဟူ နပ် ပီ ဘော မုး။ မာလဲ၊ နဝ်း ယေ ယီ တူ လိုဝ် ဒေါ မှဝ်။ 9 အီ ဟဝ် ဘော ဒွါ ဒုက် ဒီ ယေ၊ မာလဲ၊ ယေ တူ ဒွိုမ် မိုဝ်း ဒေါ တူ မိုဝ်း ဂိုက်။ ယေ ဟဲ့ ကာဒုး မး ဘဲန် ဇေန့် ဘဲန် ဇေန့်။ ယီ တူ လိုဝ် စှိုမ် ဒေါ မှဝ်။ 10 ဆေဆေ ယေ ဟဲ့ ဖြူမ် ဒီ ယမ် ပီ ဇဝ် ယေဆူ။ ပါယ် တီ၊ န့ ဒီ ဘော လိုဝ်း လွင် အာဆာက် ကာမာယ် ပီ ဒွါ ဇဝ် ယေဆူ၊ န့ ဟဲ့ ကွယ် ခဲင် ဒုဝ် ဘူင့် ယေ။ 11 စုဝ် ယေ နီ၊ ယေ ဟဲ့ ကာဒုး ဒုက် ကော ရိန် ဒီ ယမ် ဆေဆေ ကူပ် ညှိုမ် ယေ ဇဝ် ယေဆူ။ ပါယ် တီ၊ န့ ဒီ ဘော လိုဝ်း၊ အာဆာက် ကာမာယ် ပီ ဒွါ ဇဝ် ယေဆူ ဟဲ့ ကွယ် ခဲင် ဒုဝ် ဘူင့် ယေ အီ နပ် ဒီ အမ်၊ နပ် ဒီ လာတ့် နီ။ 12 ကူပ် ခမ် ယေ ဒုက် အီ တဲး အီ ယမ် တီ၊ န့ ဝီ တဲး ဘေ ပွိုန် အာဆာက် ကာမာယ်။

13 န့ ဟဲ့ ဒဲမ် အုန် ခဲင် ဘပ် ဇဝ်ဖြာ တဝ်း၊ “အုဝ် ကာလာင် ကူပ် ညှိုမ် အုဝ်။” ယေ မိူဝ် ပါယ် တီ၊ နဝ်း ဖွိုမ် ဇဝ်ဖြာ တဲး ယေ ညှိုမ်။ ကူပ် ညှိုမ် ယေ ပါယ် တီ၊ ဘော ယေ ကာလာင်။ 14 ယေ ဟဲ့ နပ်၊ ဇဝ်ဖြာ ဟဲ့ တဲး ဇဝ် ယေဆူ ဝီ ယိတ့် ဝီ အိမ်၊ တဲး အန် ဝီ မိုဝ်း အာဆာက်။ အန် ဇဝ် တီ ဒီ တဲး ဘော ယေ ဝီ ယိတ့် ဝီ အိမ် ဒူပ် ဇဝ် ယေဆူ။ အန် ဒီ ဒိုဝ်း ဘော ဘေ ဘော ယေ ဟာဝ် ဇမ် ဒူင် ကွယ် အန် ဇဝ်၊ တဲး အေ ကွယ် ဒီ အာတ့် ဇဝ်ဖြာ။ 15 ဒုက် ပီ ခမ် ယေ ဒွန် မျုဝ်၊ န့ ဘဲန် အာဂျိုဝ် ဒီ ဘေ။ ဒူအီ ပီ ဂေဇူ ဇဝ်ဖြာ ဟဲ့ ဝဲ ကိူန် ဝဲ ကိူန်။ ခုဝ်၊ ဂေ ဒူအီ အီ ဒီ ဒါင် ဂုင် ဂေဇူ ဒီ ဇဝ်ဖြာ မိူဝ်၊ ဒီ ဝဲ ကိူန် ဝဲ ကိူန်၊ တဲး အာဖုင် ဒင်ခုဝ် ဇဝ်ဖြာ ဝဲ လိုဝ်း ကာပွါ။

16 ခုဝ် အန် တီ နဝ်း ယေ တူ လိုဝ် ဒေါ မှဝ်။ ဒုဝ် ဘူင့် ယေ ပီ ဘော ဟဲ့ ရိန် ဒီ ယမ် မိူဝ်၊ နဝ်း ဖွိုမ် ယေ ယီ ဝီ မ့ပြာယ် ဒွန် ဆီငဲ၊ တဲး န့ ဘဲန် ပီ အီ ကာမာယ်။ 17 ဒုက် ပီ ကာဒုး ယေ အီ စဲက် အီ စဲက်၊ အူ ကာစန် အူ ကာဘြိုဝ်း၊ န့ ဒီ ဝီ တဲး ယေ မိုဝ်း အာဖုင် ဒင်ခုဝ် အီ ကွယ် ဆေဆေ၊ တူ နပ် ဒီ တူတ့်။ ဒုက် ပဲ့ ဟဲ့ ခမ် ယေ၊ အာဝ် ငှိုယ် ဒီ ကာဒါန် အာဖုင် ဒင်ခုဝ် တီ။ 18 ခုဝ်၊ ယေ တူ ဇေန့်ဇာ လွင် ပီ ယိုဝ် ဒီ ငါယ်။ ယေ ဇေန့်ဇာ လွင် ပီ တူ ယိုဝ် ဒီ ငါယ်။ ခုဝ်၊ မျုဝ် ပီ ယိုဝ် ဒီ ငါယ်၊ အန် ဘော ကွယ် အူ ကာစန်။ မျုဝ် ပီ တူ ယိုဝ် ဒီ ငါယ်၊ အန် ယီ ကွယ် ဆေဆေ။