ဆေ ယေ ကာလာင် ဂြုဝ်း ဇိုဝ် တီ၊ ဘေ နပ် ဒီ တဝ်း၊ ယေ အိူပ် ဒုဝ် ဘြိမ် ယေ။ အာဝ် မုး ပါယ် တီ။ ယေ မိူဝ် တူ လုဝ် အီ ဟဝ် ဒဲမ် ပဲ့ လွင် ယေ၊ ဝီ တိုယ် ဒီ ဘေ၊ တဲး ဘေ ထူမ် ဂြုဝ်း ယေ။ န့ ပီ ဘော မိုဝ်း မင် အီ အီ တဲး ဒူအီ ဟဝ် ဒဲမ် ပဲ့ ဇိုဝ် တီ မိူဝ်၊ ယေ ယီ တူ လုဝ် ပဲ့ ဇိုဝ် တီ။ ဘော ဘေ တူ လုဝ် ဒဲမ် ပဲ့ လွင် ယေ၊ ဝီ တိုယ် ဒီ အီ ဟဝ်။ 2 န့ မုး ဘေ၊ ဘေ ဟဲ့ ပီ ပဲ့ ပီ ဂူင့် ယေ တဲး အီ ဟဝ် ယိုဝ်။ န့ ပီ ပဲ့ တီ ဟဲ့ ဒဲမ် ဟဲ့ ကွယ် ခဲင် နဝ်း ယေ၊ တဲး ဒွန် အီ ပွိုန် ဒီ တိး၊ ပွိုန် ဒီ ယိုဝ်။ 3 န့ ဟဲ့ လိုဝ်း ဆီချာ၊ ဘေ ပီ ပဲ့ ပီ ဒဲမ် ဇဝ် ယေဆူ ကူပ် ဘူင် ယေ ဂါန် အန်။ အန် ဇဝ် မိူဝ် တူ တာ အိုမ် မိုက် ဒဲမ်။ အန် တာ နဝ်း ဖွိုမ် ဇဝ်ဖြာ ဒဲမ်။ န့ မုး ဇဝ်ဖြာ အီ အိမ် ဆေဆေ၊ အန် ဇဝ် မိူဝ် တူ ဒဲမ် ဒိုက် ဒီ မာဝ်၊ အန် ဟဲ့ ဒဲမ် ဒိုက် ဒီ နဝ်း ဘေ။

4 ယေ ယ ကာလာင် ပါယ် တီ။ ခုဝ်၊ ဇဝ်ဖြာ ဟဲ့ တဲး ယေ ဘူင် ဂါန် အန် ကူပ် ညှိုမ် ယေ ဇဝ် ယေဆူ။ 5 အာဝ် မုး ယေ ဟဲ့ ကျ ဘော ဒိုဝ်း အာငျာန် ပီ နပ် ယေ၊ ဘူင် ဂါန် ဇိုဝ် တီ။ ယေ ဘိုင် အာငျာန် ဇဝ်ဖြာ၊ တဲး ယေ ပွိုန် ဒီ ဘူင်။ 6 အန် ဇဝ် အီ တဲး ယေ ဘူင် ဆီချာ ဂါန် အန်၊ အန် တဲး ယေ ဘဲန် ဒါ ဆာရာ အီ မာနုဝ် လွင် ကာဒိက် ဆတ်ဇာ ကာမာယ် ပီ ဒွါ ဇဝ်ဖြာ ဒီ အီ။ ကာဒိက် ဆတ်ဇာ ကာမာယ် တီ တူ ဒူပ် ဒါရာ ပီ ဒွါ ဇဝ်ဖြာ အာတ့် နီ။ န့ ဒူပ် နဝ်း ဖွိုမ် ဇဝ်ဖြာ။ ခုဝ်၊ ဒါရာ ပီ ဒွါ ဇဝ်ဖြာ တီ၊ န့ ဒမ် မှာပ် ဒီ အီ၊ တဲး အီ ယမ်။ နဝ်း ဖွိုမ် ဇဝ်ဖြာ၊ အန် ယီ တဲး အီ အိမ်။

7 ဒါရာ ဘြိမ် အီ တဲး အီ ယမ်၊ ဇဝ်ဖြာ ဟဲ့ ဒဲမ် ဒိုက် ဒီ ဒီဖ့လာင် မာဝ်။ ဒေါ ဒွါ ဇဝ်ဖြာ ဒါရာ တီ ဒီ အာမုဝ်ဆဲ၊ န့ ဘော လိုဝ်း ဆီချာ လွင် အာဖုင် ဒင်ခုဝ် အန် ဇဝ်။ အာရူင် အီ ဘ့လာင် ရာဝ် ပီ ပွိုန် ယိုဝ် အီ ဒီ နာ အာမုဝ်ဆဲ၊ န့ ပီ ဘော နပ် ဒီ ဟြာယ် မိူဝ်၊ န့ ယီ ဘ့လာင် ကာဆဝ် ဒီ ဂေ ဒူအီ အီဆာရေလ။ ဂေ ကော ဟူ ပွိုန် ယွတ်။ 8 ဆေ ဒါရာ အီ တဲး အီ ယမ် ဟဲ့ မိုဝ်း အာဖုင် ဒင်ခုဝ် ခဲ့ တီ၊ ဒါရာ ပီ ဒွါ နဝ်း ဖွိုမ် ဇဝ်ဖြာ၊ န့ ဟဲ့ ဝဲ မိုဝ်း အာဖုင် ဒင်ခုဝ် လွှိုမ် တီ။ န့ ဘော ပါယ် တီ။ 9 ဆေ ဂါန် အီ တဲး န့ ဒမ် မှာပ် ဒီ အီ ဟဲ့ မိုဝ်း အာဖုင် ဒင်ခုဝ် အန်၊ ဘော ဂါန် အီ တဲး ဒူအီ မိုဝ်း နဝ်း ဆိူဝ် နဝ်း မှာန်၊ န့ ဟဲ့ ဝဲ မိုဝ်း အာဖုင် ဒင်ခုဝ် လွှိုမ် တီ။ 10 ဘူင့် မှာန် အန်၊ အာဖုင် ဒင်ခုဝ် အီ ကာမာယ် တီ၊ ဟဲ့ ဟွတ့် ဆီဘ့လိုက် တူတ့်။ အီ ဘြိမ် ဒေါ မွိုန် တီ၊ အာဝ် ဟူ လိုဝ်း။ 11 ဆေ အာမျုဝ် အီ နပ် ဒီ ဟြာယ် ယီ မိုဝ်း အာဖုင် ဒင်ခုဝ် ခဲ့ တီ၊ အာမျုဝ် အီ ဒီ ကွယ် ဆေဆေ ဟဲ့ ဝဲ မိုဝ်း အာဖုင် ဒင်ခုဝ် လွှိုမ် တီ။

12 ကူပ် ညှိုမ် ယေ ပါယ် တီ၊ ယေ ဘော မိုဝ်း နဝ်း ယ ဒီ ကာလာင်။ 13 ယေ တူ ဘူင် ပီ အာမုဝ်ဆဲ။ အန် ဟဲ့ ဒိုဝ်း ဘိက်၊ ကာမှုဝ့် ဂိန့် အန်၊ ကွဲ့ တဲး ဂေ ဒူအီ အီဆာရေလ ယိုဝ် ဘ့လာင် အီ ကြဲ ဒီ ဟြာယ် တီ။ 14 ကော ဇမ် အာတိုဝ် နီ၊ ဒေါ တိး ဂေ ဘပ် ဒါရာ ဘြိမ် တီ၊ နဝ်း ဂေ ဒိူဝ် ကာဆဝ်။ န့ ပီ ဘိက် အီ တူ တဲး ဂေ ယိုဝ် အာဖုင် ဒင်ခုဝ် ဇဝ်ဖြာ ဆီ ကွယ်၊ ညှမ် န့ဝိုဝ်း လေး ဒီ ငါယ် ဂေ။ ခုဝ်၊ ဘိက် တီ ဝီ န့ဝိုဝ်း မီ ဒေါ ညှိုမ် ဂေ ဇဝ် ယေဆူ။ 15 ဟဲ့ မှာန်၊ ဒေါ တိး ဂေ ဘပ် ဒါရာ အာမုဝ်ဆဲ၊ ဘိက် တီ ယီ ဆီ ကာဘိတ် နဝ်း ဂေ၊ ကော ဇမ် ဒေါ တီ နီ။ 16 မာလဲ၊ ဆေ ဒူအီ အူ ဝီ ဝီ ကာပ့လု နဝ်း၊ ဝီ ဘိုင် ဇဝ် ယေဆူ၊ န့ ပီ ဘိက် တီ ဟဲ့ န့ဝိုဝ်း။ နဝ်း ဒိူဝ် တီ ဒီ ဟြာယ် အူ ဇေန့်။ 17 ခုဝ်၊ ဇဝ်ဖြာ ဘော မုး နဝ်း ဖွိုမ်။ ဒူင် ဒီ မိုဝ်း နဝ်း ဖွိုမ် ဇဝ်ဖြာ တီ၊ န့ ဘော ဒါခိုယ် ထင်ဟာင် ဂတ် ယေန် ဂျာမ်ဆာ။ 18 န့ ယီ မုး အေ ဒွန် အီ၊ အေ အာဝ် မိုဝ်း ဘိက် အီ ကာမှုဝ့် နာ အေ။ အေ ဟဲ့ ပွိုန် ယိုဝ် အာဖုင် ဒင်ခုဝ် ဇဝ်ဖြာ ဘော ဝီ ဘျ ဒီ အီ ဟဝ်။ ဇဝ်ဖြာ အီ မုး နဝ်း ဖွိုမ်၊ အန် ဟဲ့ တဲး အေ ကြဲ ဒီ ကာပ့လု ကာဘုတ့် အာရိုပ် အေ၊ တဲး အေ ကြဲ ဒီ ပီ အန် ဇဝ်၊ တဲး အာဖုင် ဆာရေ ကြဲ ဒီ ကိူန်။