ခုဝ် အန် တီ အုဝ် မိူဝ် ဟဲ့ ဟွတ့် ဆုင်ဖျာတ် တဝ်း၊ အုဝ် အာဝ် ဟူ ဘဲန် တး စ်ု ဘေ၊ ကွဲ့ တဲး န့ ဘဲန် နဝ်း က့လိုဝ် ဒီ ဘေ။ 2 ဆေ န့ ဘဲန် နဝ်း က့လိုဝ် ဒီ ဘေ၊ ဘော နဝ်း အုဝ် ဒီ က့လိုဝ်။ ခုဝ်၊ ဆေ အုဝ် ဟဲ့ တဲး နဝ်း ဘေ က့လိုဝ်၊ အာဝ် မိုဝ်း အာဆေ အီ ဒီ ဝီ တဲး နဝ်း အုဝ် ဒါခိုယ် ဒဲင် ဘေ။ 3 ခုဝ်၊ အုဝ် ဒဲမ် ပဲ့ ဒီ ဘေ။ အုဝ် တူ ဆီ တဲး ဘေ ဘူင် တဲး န့ ဝီ ဘဲန် ဒုက် ဒီ နဝ်း အုဝ်။ ဘေ မုး ဒူအီ အီ ကာအာပ် ဘူင် တဲး နဝ်း အုဝ် ဒါခိုယ်။ အုဝ် ယီ နပ် ဆီချာ၊ ဆေ ဘေ ဘူင် မျုဝ် အီ တဲး နဝ်း ဘေ ဒါခိုယ် ဘော နဝ်း အုဝ် ဒီ ဝီ ဒါခိုယ်။ 4 ဒေါ ဒဲမ် အုဝ် ပဲ့ တီ၊ န့ ဟဲ့ ဒုက် ကာဆဝ် ဒီ နဝ်း အုဝ်။ အုဝ် ဘော ယာမ် ကိူန် လွင် အန် တီ။ အုဝ် ယီ တူ တဲး န့ ဘဲန် နဝ်း က့လိုဝ် ဒီ ဘေ။ အုဝ် ဒဲမ် တဲး ဘေ နပ် ခဲ့ ရွက့် ကာဆဝ် အုဝ် ဒီ ဘေ။

5 ဒူအီ အီ ဟဲ့ ဘူင် တဲး န့ ဆဝ် ဒီ နဝ်း အီ၊ အာဝ် မုး အန် ဘူင် တဲး န့ ဆဝ် မီ ဒီ နဝ်း အုဝ်။ အန် ဟဲ့ ဘူင် တဲး န့ ဆဝ် ဘော ဒီ နဝ်း ဒူအီ ကိူန်။ အုဝ် ယီ တူ ဆီ တဝ်း၊ အန် ဘူင် တဲး ဒွန် အီ ဘဲန် နဝ်း က့လိုဝ်။ ခုဝ်၊ အုဝ် တူ ဆီ ဖုက်ဖာမ် အာရေ တီ။ 6 ကာတဲ ဘေ ဟဲ့ မိုဝ်း ဒူအီ ကိူန် အီ ဟဲ့ ဒမ် မှာပ် ဒီ အန်။ ခုဝ်၊ တဲး ဘေ စူ ခဲ့ တီ။ 7 ဒေါ တီ နီ၊ တဲး ဘေ ဂဝ်း ဝဲန် မှာပ် အန်၊ ဝီ လှဝ် နဝ်း အန်၊ တဲး န့ ဝီ ဘဲန် ပ့လူမ် ဘဲန် ဟဲန့် ဒီ နဝ်း အန်၊ ကွဲ့ ဟူ တဲး န့ ဘော ဆဝ် ကာဆဝ် ဒီ နဝ်း အန်၊ ကွဲ့ တဲး န့ ဘဲန် က့လိုဝ် ဘဲန် ငှဝ် ဒီ အန်။ 8 တဲး အန် နပ် ဘေ ဟဲ့ ရွက့် အန် ခါခ်ု။ တဲး ဘေ ဘျ နဝ်း ကာဝေ ဘေ ဒီ အန်။ အာတီ ပီ ဆီ တဲး အုဝ် ဘေ ဘူင်။ 9 အုဝ် ဒဲမ် ပဲ့ တိုယ် ဒီ ဘေ ကူပ် ဆီ ထေဝ် အုဝ် နဝ်း ဘေ၊ တဲး အုဝ် နပ်၊ ယုဝ် ဘေ ဒီ ထူမ် အုဝ် ဒွန် မျုဝ်။ 10 ဆေ ဘေ ဟဲ့ ဘ့လွာ့ ဝဲန် မှာပ် အီ ဟဝ်၊ အုဝ် မိူဝ် ဒီ ဘ့လွာ့ ဝဲန် မှာပ် ဒူအီ ဝီ တီ။ ဘော ဇဝ် ယေဆူ ဟဲ့ နပ်၊ ဆေ အုဝ် ဘော လုဝ် ဘ့လွာ့ ဝဲန် မှာပ် အီ၊ အုဝ် ဟဲ့ ဘ့လွာ့ ဝဲန် ကူပ် ကာဝေ အုဝ် ဒီ ဘေ။ 11 အေ လုဝ် လာယ် ဘ့လွာ့ ဝဲန် မှာပ်၊ ကွဲ့ တဲး ဘုဝ် ကာနမ် ပွိုန် ဒီ ဇုဝ် နဝ်း အေ။ ခုဝ်၊ အေ ဟဲ့ နပ် ပီ ခြာမ် အန် ဒီ ဘူင်။

12 ဒေါ တး ဇမ် အုဝ် ဒီ မိူင် ထာရုဝ်၊ အုဝ် ဟဲ့ ပွိုန် ဒီ ကာလာင် လွင် ဇဝ် ယေဆူ။ အုဝ် ဟဲ့ နပ်၊ န့ မုး ဇဝ်ဖြာ အီ ဟဲ့ တဲး အုဝ် ပွိုန် ဒီ ကာလာင် ပါယ် တီ။ 13 မာလဲ၊ ကူပ် တူ ယိုဝ် အုဝ် ဝါ အုဝ် အီ စိူဝ် အာထီထူ၊ နဝ်း အုဝ် မိူဝ် အာဝ် ဟူ ဒါခိုယ်။ အုဝ် ဘော ကာလာင် ဒီ ဘီနွင် ဒီ တီ၊ တဲး ဂေ ခ့ဝါင် အုဝ် ဟာဝ် ဒီ အိူင် မာခေဒူန်။

14 အုဝ် ယီ ဒါင် ဂုင် ဂေဇူ ဒီ ဇဝ်ဖြာ။ ခုဝ်၊ အန် ဇဝ် ဟဲ့ တဲး အုဝ် အွင် ဆေဆေ ကူပ် ဒူပ် အုဝ် ဇဝ် ယေဆူ။ ဒဲင် တီ၊ အန် ဇဝ် ဟဲ့ ဝီ စ်ု အုဝ် ကာလာင် ဘော လွင် ဇဝ် ယေဆူ ဒီ ဒူအီ ဒွန် အီ။ န့ ပီ အုး ငှုန် အီ ဟဲ့ ကာလတ့် ဒွန် နာ ဒွန် ပ့လုဝ့်။ 15 ခုဝ်၊ အေ ဟဲ့ ပီ ဆီနမ် အုး ငှုန် ပီ လှူ ဇဝ် ယေဆူ ဒီ ဇဝ်ဖြာ။ အုး ငှုန် တီ၊ န့ ဟဲ့ ကာလတ့် ကာတဲ ဂေ ဒူအီ ပီ ဒီ ချွတ် ဇဝ်ဖြာ၊ ဘော ကာတဲ ဂေ အီ ဒီ စှိုမ် အာဆာက်။ 16 အာဒါ ဂေ အီ ဒီ စှိုမ် အာဆာက်၊ အုး တီ ဘော အုး အမ် အီ ဒီ တဲး ဂေ ယမ်။ အာဒါ ဂေ ဒူအီ ပီ ဒီ ချွတ် ဇဝ်ဖြာ၊ န့ ဘော အုး ငှုန် ဒီ တဲး အာဆာက် ဒီ ဂေ။ ဆေ ဟီ ပါယ် တီ၊ အာဝ် မိုဝ်း အာဆေ အီ ဒီ ပွိုန် ဘူင် ဂါန် ဇိုဝ် တီ၊ တဲး န့ ကော ဇေ့ဇုင်။

17 ယေ ယီ တူ ပီ ဒူအီ ဟဝ် အီ ဟဲ့ ကိူန် ကာဆဝ်၊ အီ ဟဲ့ ကာလာင် ဂြုဝ်း ဇဝ်ဖြာ တဲး ဂေ ပွိုန် ရွိုန်။ ဇဝ်ဖြာ စ်ု ယေ၊ တဲး ယေ မိုဝ်း နဝ်း ဆိူဝ် နဝ်း မှာန်၊ ကာလာင် ခဲ့ ပီ တဲး ဇဝ်ဖြာ ယေ ကာလာင် ကူပ် ညှိုမ် ယေ ဇဝ် ယေဆူ။ ယေ ဘော နပ်၊ ဘော ဇဝ်ဖြာ ထူမ် ဂြုဝ်း ပီ ကာလာင် ယေ ဆေဆေ။