ဝါယ် အန် တီ ဂိုဝ် ဒီ ဖွုန် ဆီနမ်၊ ဘော အုဝ် ဘော အာဘာနာဘ၊ ယာယ် ဝီ ဒဲ့ အာထီထူ၊ တဲး ယေ ဝီ ဟာဝ် မိူင် ယေရူဆာလဲမ်။ 2 အုဝ် ဟဲ့ ဟာဝ် ဒူပ် ပဲ့ ဟဲ့ ဘျ အန် ဇဝ် ဒီ အုဝ်။ အန် ဇဝ် ဟဲ့ ဆီ တဲး အုဝ် ကာလာင် ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ် ဒီ ဂေ။ န့ ဘော မုး ဂြုဝ်း ပဲ့ ဟဲ့ ကာလာင် အုဝ် ဒီ ဂေ ဒူအီ အာမျုဝ် ဟဝ်။ မာလဲ၊ အုဝ် ဟဲ့ ဝီ ကာမွုန် မီ ဒီ ဂေ ဒူအီ အီ နှဲန် ဒီ မုး ဒါ တာင် ခဲင် ဖိုင် ဇဝ် ယေဆူ၊ ကွဲ့ တဲး ဒူအီ ကိူန် ထူမ်။ ခုဝ်၊ အုဝ် တူ ဆီ တဲး ဒူအီ ဟဝ် ပွိုန် ဒီ ပျာတ့် ဂါန် ပဲ့ ဟဲ့ ဟွတ့် အုဝ် ဘူင် ဘော ဂါန် ပီ ဘူင် အုဝ် ဒေါ တီ နီ။ 3 န့ ယီ မုး အာထီထူ၊ အန် ပီ ဘော ဟဲ့ မုး ဒူအီ ဂြိက် မိူဝ်၊ ဂေ ယီ တူ ခါနှာပ် တဲး အန် ဆွာ့ ဝဲန် ဟုန် လခါနာ အီမာယ်။ 4 န့ မိုဝ်း မီ မင် အီ အီ ညိုင်ရာင် ဒီ ဘဲန် ဘီနွင် ယေ၊ ဂေ ဘော ပြာ ဒီ ချွင် ဒီ ယွတ် ပီ ပါယ် ယေ ဒီ ဘူင်။ ဂေ တူ အိုင် ယေ ကွယ် ထင်ဟာင် ကူပ် ညှိုမ် ယေ ဇဝ် ယေဆူ။ ဂေ ဆီ တဲး ယေ ဝီ ဒူပ် ဒါရာ ယူဒါ၊ ဝီ ဘဲန် မှာယ် ဒါရာ တီ။ 5 ယေ ယီ တူ ဖြူမ် တူ ယူမ် ဂေ ခေါ အီ စဲက်။ ခုဝ်၊ န့ မုး ဂြုဝ်း ဇဝ်ဖြာ အီ မုး အီ မှာန် အီ တဲး နဝ်း ဘေ ဒါခိုယ် တွိုန်၊ ယေ ဆီ တဲး န့ ကွယ် ရိုမ် ဒူပ် ဘေ ဆေဆေ၊ ကွဲ့ တဲး အီ ဟဝ် ဒိုဝ်း ဝဲန်။

6 ဂေ အီ နှဲန် ဒီ မုး ဒါ တာင် တီ၊ ဂေ ပီ ဘော မုး ဒူအီ ပါယ် မှဝ် မိူဝ်၊ အုဝ် တူ ဇေန့်ဇာ လွင် အန် တီ။ ဘော ဇဝ်ဖြာ တူ ယွတ် ဒီ အာရိုပ် ဒူအီ။ ဒါ ဒါင် ဂေ တီ မိူဝ်၊ တူ မိုဝ်း ဒီ ဒွါ အာကျာမ် အာငျာန် မာဆေ ဒီ အုဝ်၊ တူ တဲး အုဝ် ဘျွင် ဂြုဝ်း ဇဝ်ဖြာ ပီ ကာလာင် အုဝ် ဒီ ဂေ။ 7 ဒဲင် တီ၊ ဂေ ဟဲ့ နပ်၊ ဇဝ်ဖြာ ဟဲ့ တဲး အုဝ် ကာလာင် ဂြုဝ်း အီ တဲး နဝ်း ဒူအီ ဒါခိုယ်၊ တဲး ဘော ဂေ ဒူအီ အာမျုဝ် ဟဝ် ပွိုန် ဒီ ထူမ်။ ဂေ နပ်၊ ဇဝ်ဖြာ ဟဲ့ ဒွိုမ် တဲး ဒါ ဆာရာ အာပေတာရူ ကာလာင် ဂြုဝ်း တီ ဒီ ဂေ ဒူအီ အာယူဒါ။ 8 ခုဝ်၊ ဇဝ်ဖြာ အီ တဲး အာပေတာရူ ဘဲန် ဒူအီ ပီ ရဝ်း ပီ တိုယ် ဇဝ် ယေဆူ၊ တဲး အန် ကာလာင် ဂြုဝ်း ဇဝ်ဖြာ တီ ဒီ ဂေ ဒူအီ အာယူဒါ၊ အန် ဇဝ် တီ ဟဲ့ ဝီ တဲး အုဝ် ဘဲန် ဒူအီ ပီ ရဝ်း ပီ တိုယ် ဇဝ် ယေဆူ၊ တဲး အုဝ် ကာလာင် ဒီ ဂေ ဒူအီ အာမျုဝ် ဟဝ်။ 9 ပါယ် တီ၊ ဒေါ ဟဲ့ ဝီ နပ် ဂေ လွင် ဟဲ့ ဂေဇူ ဇဝ်ဖြာ ဒီ အုဝ်၊ န့ မုး အာယာကူပ်၊ ဘော အာပေတာရူ၊ ဘော အာယောဟာန်၊ ဂေ အီ မုး ဒါ တာင် ပီ ရုဝ်ဆေ ဒွန် အီ၊ အီ ဟဲ့ ပီ ရွင့် ခဲင် ဖိုင် ဇဝ် ယေဆူ၊ ဂေ ဘော ဝီ ရပ် ယာယ် အာဘာနာဘ၊ တဲး ယာယ် ကွယ် ရိုမ် ဒူပ် ဂေ၊ ဘဲန် အူ နဝ်း။ ဂေ ဒွန် အီ ဟဲ့ လာယ် ဖြူမ် ဒီ တဲး ယာယ် အာဘာနာဘ ကာလာင် လွင် ဇဝ်ဖြာ ဒီ ဂေ ဒူအီ အာမျုဝ် ဟဝ်။ အီ မုး ဂေ၊ ဂေ ယီ ကာလာင် ဒီ ဂေ ဒူအီ အာယူဒါ။ 10 ဂေ ယီ မှာန့် အူ မျုဝ်၊ တဲး ယာယ် ဘူင်။ ဂေ မှာန့်၊ တဲး ယာယ် စွယ် ဟာဝ် ဂေ ဒူအီ ဂိန်၊ ဒူအီ အေတ့် အီ ကွယ် ခဲင် မိူင် ဂေ။ လွင် အန် တီ ဟဲ့ မုး ပီ အွန် အုဝ် ဒီ ဘူင်။

11 ဝါယ် အန် တီ အာပေတာရူ ဘော ဝီ တး ဇမ် ဒီ မိူင် အန်ထီအုဝ့်။ အုဝ် ဟဲ့ ကာဒုး ဒီ ကာထဲန့် ဒီ ဒုဝ် အန်။ ခုဝ်၊ အန် ဟဲ့ လုတ့် ခါခ်ု မှာန်။ 12 အာတ့် တး ဇမ် ဂေ ဒူအီ အီ ဒူပ် အာယာကူပ် တွိုန်၊ အန် ဟဲ့ ကွယ် ရိုမ် ဟူမ် ရိုမ် ဒူပ် ဂေ ဒူအီ အာမျုဝ် ဟဝ်။ ဒေါ ဝီ တး ဒူအီ ဂေ တီ၊ အန် ဘော ဝီ ကာယဝ်း ကွယ် မီ အန် ပေါ ပ့လုဝ့်။ အန် အာဝ် ဟူ ဝီ ယ ဟူမ် ရိုမ် ကွယ် ရိုမ် ဒူပ် ဂေ ဒူအီ အာမျုဝ် ဟဝ် ကူပ် ယုဝ် အန် ဂေ ဒူအီ အီ တဝ်း၊ ဒွန် အီ လုဝ် ဆွာ့ ဝဲန် ဟုန် လခါနာ။ 13 ဘော ဂေ ဒူအီ အာယူဒါ မင် အီ၊ ဂေ ဘော ဒူပ် ပီ ညိုင်ရာင် အန် တီ။ ဘော အာဘာနာဘ ဟဲ့ ဝီ ကာလိုပ် ကူပ် ပီ ညိုင်ရာင် ဂေ။

14 ဒေါ ယိုဝ် အုဝ် လွင် တူ ဒူပ် ဂေ ဂြုဝ်း ဇဝ်ဖြာ အီ မုး အီ မှာန်၊ အီ တဲး နဝ်း ဒူအီ ဒါခိုယ် တီ၊ အုဝ် ဘော ဝီ ကာလာင် ဒီ အာပေတာရူ တဲး ဂေ ဒူအီ ကိူန် ထူမ်။ အုဝ် ဟဲ့ တဝ်း၊ “မဲ ဟဲ့ မုး ဒူအီ အာယူဒါ။ မဲ ယီ တူ ဘူင် ဒူပ် ဟိတ် ဒူအီ အာယူဒါ ဆေဆေ။ မဲ ဟဲ့ ဒူပ် ဟိတ် ဒူအီ အာမျုဝ် ဟဝ်။ မှဝ် န့ ပါယ် ပီ ဝီ ခါနှာပ် မဲ ဂေ ဒူအီ အာမျုဝ် ဟဝ်၊ တဲး ဂေ ဒူပ် ဟိတ် ဒူအီ အာယူဒါ။း”

15 ယေ နီ၊ ယေ မုး ဒူအီ အာယူဒါ ကူပ် ဟဲ့ မုး ဂုန့် မာ ယေ ဒူအီ အာယူဒါ။ ယေ တူ မုး ဒူအီ အာမျုဝ် ဟဝ် ပီ တဝ်း ဂေ ဒူအီ အာယူဒါ၊ ဂေ မုး ဒူအီ အီ ဘူင် မှာပ် ဆေဆေ။ 16 ယေ ဟဲ့ နပ်၊ ဇဝ်ဖြာ တဲး ဒူအီ မိုဝ်း နဝ်း ဆိူဝ် နဝ်း မှာန် ကူပ် ညှိုမ် ဘိုင် ဂေ ဒီ ဇဝ် ယေဆူ။ အာဝ် မုး ကူပ် ဘူင် ဒူပ် ဂေ ဒါရာ။ ယေ မိူဝ် ဟဲ့ ညှိုမ် ဘိုင် ဇဝ် ယေဆူ၊ တဲး ယေ ပွိုန် နဝ်း ဆိူဝ် နဝ်း မှာန် ပီ ဒွါ ဇဝ် ယေဆူ။ အာဝ် မုး ကူပ် ဘူင် ဒူပ် ယေ ဒါရာ။ ခုဝ်၊ အာဝ် မိုဝ်း ဒူအီ ခေါ အူ ဝီ အီ ဒီ ပွိုန် နဝ်း ဆိူဝ် နဝ်း မှာန် ကူပ် ဘူင် ဒူပ် အန် ဒါရာ။

17 မာလဲ၊ ဆေ အေ ဆီ တဲး ဇဝ် ယေဆူ ဒွါ နဝ်း ဆိူဝ် နဝ်း မှာန် ဒီ အေ၊ န့ ဒီ လိုဝ်း ဆီချာ လွင် မိုဝ်း အေ မှာပ်။ န့ ယီ တူ မှာန် ဆေ ဒူအီ ထာင် ဇဝ် ယေဆူ အိုင် ဆေ မှာပ် အေ ဟဲ့ ကိူန်။ 18 ဖာမာ အန်၊ ဆေ အုဝ် ဝီ မ့ပြာယ် ပဲ့ ဟဲ့ ကာပျာတ့် အုဝ် အာတ့် နီ၊ န့ ဟဲ့ ဘျ၊ န့ မုး မှာပ် အုဝ်။ အုဝ် ဟဲ့ လုတ့် ဒါရာ။ 19 ခုဝ်၊ ကူပ် မိုဝ်း ဒါရာ တီ၊ န့ တဲး အုဝ် ပီ ဒူအီ ယမ်၊ အီ ဟဲ့ ကာဂဝ်း ဒီ ဒါရာ။ ဟဲ့ ဟွတ့်၊ အုဝ် ဝီ ပွိုန် အာဆာက် ကာမာယ် အီ နပ် ဒီ ဘူင် ပီ အိုင် ဇဝ်ဖြာ။ 20 န့ ပီ အုဝ် ဟဲ့ ဟွတ့် ယမ် ရိုမ် ဒူပ် ဇဝ် ယေဆူ ဒဲင် ရွင့် ကာဝဲ့။ အုဝ် အာဝ် ဟူ မိုဝ်း အာဆာက် ပီ ဘြိမ်။ ဒေါ တီ နီ၊ ဇဝ် ယေဆူ ကွယ် ခဲင် နဝ်း အုဝ်။ ဒေါ ကွယ် အုဝ် ဒဲင် ကာဒါယ် နီ၊ အာဆာက် ကာမာယ် ပီ ဒွါ ဇဝ်ဖြာ ဒီ အုဝ်၊ န့ တဲး အုဝ် ညှိုမ် ဘိုင် ဆေဆေ ဇဝ် ယေဆူ အီ မုး ဂွန် ဇဝ်ဖြာ။ အန် ဟဲ့ ရွက့် အုဝ် ဘော ခမ် ဒီ ယမ် ကာဒါင် အုဝ်။ 21 အုဝ် မိူဝ် ဒိူန် တူ ဝဲန် ပီ ဂေဇူ ဇဝ်ဖြာ ဒီ အုဝ်။ ဆေ အေ ပွိုန် ဒီ ဘဲန် ဒူအီ အီ မိုဝ်း နဝ်း ဆိူဝ် နဝ်း မှာန် ကူပ် ဘူင် ဒူပ် အေ ဒါရာ၊ န့ ပီ ဇဝ် ယေဆူ ယမ် ဒီလူယ် ဒီလာယ်၊ အာဝ် မိုဝ်း ဒီခုဝ် မာဆေ။