အိုယ် ဘေ ဒူအီ အီ ကွယ် ခဲင် အိူင် ဂါလာထီ၊ ဘေ ဟဲ့ ရိုဝ်။ အာဆေ ဟဲ့ စ်ု ကာနမ် ဇုဝ် နဝ်း ဘေ။း ဘေ ဟဲ့ ဒွိုမ် ထူမ် ဆီချာ လွင် ဇဝ် ယေဆူ ဟဲ့ ခမ် ဒီ ယမ် ဒဲင် ရွင့် ကာဝဲ့၊ တဲး န့ ပီ ဘေ ဟဲ့ ယိုဝ် ဒီ ငါယ် ဘေ လွင် အန် တီ။ 2 အုဝ် ဆီ ဒီမွှတ် ဘေ အာဒါ အူ မျုဝ်။ နဝ်း ဖွိုမ် ဇဝ်ဖြာ အီ ဟဲ့ လိုပ် ခဲင် နဝ်း ဘေ၊ န့ လိုပ် ကူပ် ဘူင် ဒူပ် ဘေ ဒါရာ။း ဆေ အာဝ် ပါယ် တီ၊ န့ လိုပ် ကူပ် ဟဲ့ ထူမ် ဟဲ့ ညှိုမ် ဘေ ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ်။း 3 ဘေ ဘော ရိုဝ် ကာဆဝ် ဒိုဝ့်။ ဒေါ ဂုဝ် အန်၊ ဘေ ဟဲ့ ညှိုမ် ဘိုင် နဝ်း ဖွိုမ် ဇဝ်ဖြာ။ ဒေါ တီ နီ၊ န့ ပီ ဘေ ဟဲ့ ဘျွင် နဝ်း၊ တဲး ဘေ ဝီ ဘိုင် ဟာဝ် မီ ဒုဝ် ဘြိမ် ဘေ။ 4 ပဲ့ ဟဲ့ ဒွိုမ် ခမ် ဘေ ဒုက် ဘဲန် မျုဝ် ဘဲန် မျုဝ် တွိုန်၊ ဘေ ဒီ တဲး န့ စှိုမ် ဒီလူယ် ဒီလာယ်။း တဲး ဘေ လှုဝ်း၊ အာဂျိုဝ် အန် ဟဲ့ ကိူန် အာခါခ်ု မှာန်။ 5 အန် ဇဝ် ဟဲ့ ဒွါ နဝ်း ဖွိုမ် ဇဝ်ဖြာ ဒီ ဘေ။ အန် ဟဲ့ ဘူင် ဘော အီ မွှိုမ် အာမ် ဘဲန် မျုဝ် ဘဲန် မျုဝ် ဒီ ဘေ။ ဘေ ထာင် န့ မုး ကူပ် ဘူင် ဒူပ် ဘေ ဒါရာ။း အာဝ် မုး ပါယ် တီ၊ န့ မုး ကူပ် ဟဲ့ ညှိုမ် ဟဲ့ ပွိုန် ဘေ ဒီ ထူမ် ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ်။

6 အီ မုး အာဘြာဟမ် တွိုန်၊ ခဲင် ဘပ် ဇဝ်ဖြာ န့ ဟဲ့ ဒဲမ် အုန် လွင် အန် တဝ်း၊ “အန် ညှိုမ် ဘိုင် ဇဝ်ဖြာ။ ကူပ် ညှိုမ် ဘိုင် အန် ပါယ် တီ၊ ဇဝ်ဖြာ တဲး အန် မိုဝ်း နဝ်း လုယ်။” 7 ခုဝ် အန် တီ တဲး ဘေ နပ်၊ န့ မုး ဂေ အီ ညှိုမ်၊ ဂေ ဟဲ့ ဘဲန် ဂွန် ဒါ အာဘြာဟမ်။ 8 ခဲင် ဘပ် ဇဝ်ဖြာ န့ ဟဲ့ ဒဲမ် အုန် ပီ ဒီ ပါယ် နာ အာတ့်။ န့ ဟဲ့ ဒဲမ် အုန် လွင် ဇဝ်ဖြာ ဒီ တဲး ဂေ ဒူအီ အာမျုဝ် ဟဝ် ဘဲန် ဒူအီ အီ မိုဝ်း နဝ်း ဆိူဝ် နဝ်း မှာန် ကူပ် ညှိုမ် ဂေ ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ်။ အန် ဇဝ် ဟဲ့ ဟွတ့် ကာလာင် ဂြုဝ်း အီ တဲး နဝ်း ဒူအီ ဒါခိုယ် တီ ဒီ ဒါ အာဘြာဟမ် ဒေါ တဝ်း အန်၊ “ကူပ် မဲ၊ အုဝ် ဒီ ဘော မွင့်ကာရာ တဲး ဘော ဂေ ဒူအီ ဒွန် မျုဝ် အီ ကွယ် ဒဲင် ကာဒါယ်။” 9 ဒါ အာဘြာဟမ် တီ၊ ကူပ် ညှိုမ် ဘိုင် အန် ဇဝ်ဖြာ၊ ဇဝ်ဖြာ မိူဝ် နမ်လှုဝ်း အန်။ ပါယ် တီ၊ ဇဝ်ဖြာ ဒီ မွင့်ကာရာ ဒွါ ဘော ဂေ ဒူအီ အာမျုဝ် ဟဝ် အီ ညှိုမ် ဒွန် အီ။

10 ဂေ ဒူအီ အီ ဒူပ် ဒါရာ၊ ဂေ ဒီ ခမ် မှာပ်၊ ခမ် ကာဆမ် ဒိူင်။ ခုဝ်၊ ခဲင် ဘပ် ဇဝ်ဖြာ ဟဲ့ ဒဲမ် တဝ်း၊ “ဂေ အီ တူ ဘူင် ဒူပ် ဒါရာ ဒွန် ဒဲ၊ ဂေ ဒွန် အီ ဒီ လုဝ် ခမ် မှာပ်၊ ခမ် ပီ ဒိူင် အန် ဇဝ်။” 11 ပါယ် တီ န့ လိုဝ်း ဆီချာ၊ ဇဝ်ဖြာ တူ တဲး အာဆေ မိုဝ်း နဝ်း ဆိူဝ် နဝ်း မှာန် ကူပ် ဘူင် ဒူပ် အန် ဒါရာ။ ခုဝ်၊ န့ ဟဲ့ ဒဲမ် အုန် ခဲင် ဘပ် ဇဝ်ဖြာ တဝ်း၊ “ဂေ ဒူအီ အီ မိုဝ်း နဝ်း ဆိူဝ် နဝ်း မှာန်၊ ဂေ ဒီ ညှိုမ် ဘိုင် ဇဝ်ဖြာ ဆေဆေ ဒေါ ကွယ် ဂေ ဒဲင် ကာဒါယ် နီ။” 12 အာဆေ ဒူပ် ဒါရာ၊ အန် တူ လုဝ် ညှိုမ် ဘိုင် ဇဝ်ဖြာ။ ခုဝ်၊ ခဲင် ဘပ် ဇဝ်ဖြာ န့ ဟဲ့ ဒဲမ် တဝ်း၊ “အာဆေ ဘူင် ဒူပ် ဆီချာ ဒါရာ၊ အာဆာက် အန် ဒီ ဘော ဒါခိုယ် ကူပ် ဒူပ် အန် ဒါရာ တီ။” 13 ဇဝ် ယေဆူ ယီ ဟဲ့ ထုတ် လေး အေ၊ ကွဲ့ တဲး အေ လုဝ် ဒူပ် ဒါရာ၊ ကွဲ့ တဲး အေ ခမ် ကာဆမ် ဒိူင် ဇဝ်ဖြာ။ ဒေါ ခမ် ဇဝ် ယေဆူ ဒီ ယမ် ဒဲင် ရွင့် ကာဝဲ့၊ အန် ဟဲ့ ခမ် တူတ့် ပီ ဒိူင် ဇဝ်ဖြာ ကာဒါင် အေ။ ခုဝ်၊ ခဲင် ဘပ် ဇဝ်ဖြာ န့ ဟဲ့ ဒဲမ် အုန် တဝ်း၊ “ဝီ အီ ခမ် ဒီ ဟွယ် ဒဲင် ရွင့် ကာဝဲ့၊ အန် မုး ဝီ အီ ခမ် မှာပ်၊ ခမ် ဆမ် ဒိူင်။” 14 ဇဝ် ယေဆူ ဟဲ့ ထုတ် လေး အေ ပါယ် တီ၊ တဲး ဘော ဒူအီ အာမျုဝ် ဟဝ် ပွိုန် မွင့်ကာရာ ပီ ဒွိုမ် ဒွါ ဇဝ်ဖြာ ဒီ ဒါ အာဘြာဟမ် တွိုန်။ အီ မုး အေ၊ ကူပ် ညှိုမ် အေ ဂြုဝ်း ပီ ကာဆဲန့် ဇဝ်ဖြာ တီ၊ အေ မိူဝ် ပွိုန် နဝ်း ဖွိုမ် ဇဝ်ဖြာ။

15 အိုယ် ဘေ ဘီနွင် အုဝ်၊ အုဝ် ကာလာင် အူဖာမာ ပီ နပ် ဘေ ဒွန် အီ။ ဆေ ဒူအီ အာ ဝီ ဟဲ့ ဟွတ့် လာယ် ဒွါ ကာဒိက် ဆတ်ဇာ၊ ဆေ ဂါယ် ဟဲ့ ဟွတ့် လာယ် ဖြူမ်၊ ဟဲ့ ဟွတ့် ဒဲမ် အုန်၊ ဟဲ့ ဟွတ့် ပိတ် ကာနူ မာ၊ အာဝ် မိုဝ်း အာဆေ အီ ပွိုန် ပျာတ့် လွင် အန် တီ။ အာဝ် မိုဝ်း အာဆေ ဝီ ပွိုန် ဒဲမ် ဟပ် ပေါ န့ ပွါ။ 16 ပါယ် တီ၊ ဇဝ်ဖြာ ဟဲ့ ဒွါ ကာဒိက် ဆတ်ဇာ ဒီ ဒါ အာဘြာဟမ် ဘော ဒီ လှုက်လှာန် အန်။ ခဲင် ဘပ် ဇဝ်ဖြာ န့ ယီ တူ တဝ်း၊ အန် ဇဝ် ဒွါ ကာဒိက် ဆတ်ဇာ ဒီ လှုက်လှာန် ဒါ အာဘြာဟမ် ဘောကာဂ့လျီတ်။ အန် မိူဝ် တူ ကာလာင် လွင် ဒူအီ ကိူန်။ ကာဒိက် ဆတ်ဇာ တီ ဇဝ်ဖြာ ဒွါ ဒီ လှုက်လှာန် ဒါ အာဘြာဟမ် အာဒါ အူ ဝီ၊ အီ မုး ဇဝ် ယေဆူ။ 17 ပီ ဆီ ကာလာင် အုဝ် ဒီ ဘေ န့ ပါယ် နီ။ ကာဒိက် ဆတ်ဇာ ပီ ဒွါ ဇဝ်ဖြာ ဒီ အာဘြာဟမ် တီ၊ န့ ဒီ ကွယ် ဆေဆေ။ ဝါယ် ဟဲ့ ဒွါ ဇဝ်ဖြာ ကာဒိက် ဆတ်ဇာ တီ၊ ဒေါ ဟဲ့ ဝီ ပွိုန် ဖွုန် မာယဝ်း ဒီ အူယ် ဂိုဝ် ဆီနမ်၊ ဇဝ်ဖြာ ဟဲ့ ဝီ ဒွါ ဒါရာ ဒီ ဒူအီ အီဆာရေလ။ န့ ပီ ဘော ဟဲ့ မိုဝ်း ဒါရာ တီ မိူဝ်၊ န့ ယီ တူ ပွိုန် ပျာတ့်၊ တူ ပွိုန် ဝဲန် ကာဒိက် ဆတ်ဇာ ပီ ဒွိုမ် ဒွါ ဇဝ်ဖြာ ဒီ ဒါ အာဘြာဟမ်။ 18 ခုဝ်၊ ဆေ အေ ပွိုန် ခါဂုန် ပီ ဒွါ ဇဝ်ဖြာ ကူပ် ဘူင် ဒူပ် အေ ဒါရာ၊ အာဝ် ဟူ လုဝ် ကာဒိက် ဆတ်ဇာ ပီ ဒွါ ဇဝ်ဖြာ ဒီ အာဘြာဟမ်။ မာလဲ၊ ဇဝ်ဖြာ အီ နပ် ဒီ ဂေဇူ အီ၊ အန် ယီ ဒွါ ခါဂုန် ဒီ အာဘြာဟမ် ကူပ် ဟဲ့ ဟွတ့် ဒွါ အန် ဇဝ် ကာဒိက် ဆတ်ဇာ ဒီ အာဘြာဟမ်။

19 ဆေ န့ ပါယ် တီ၊ မှဝ် န့ ပါယ် ပီ ဒွါ ဇဝ်ဖြာ ဒါရာ တီ။း အန် ဒွါ ဒါရာ တီ၊ တဲး အေ နပ် ပီ လုတ့် ပီ ကာလိုပ် အေ။ ဇဝ်ဖြာ ဘော တဲး ဒူအီ မိုဝ်း ဒါရာ တီ၊ တဲး န့ ကော ဇမ် ပန် ဒီ တး လှုက်လှာန် အာဘြာဟမ်၊ ဝီ ပီ ဒွါ အန် ဇဝ် ကာဒိက် ဆတ်ဇာ တွိုန်။ အန် ဇဝ် ဟဲ့ တဲး ဂေ အာမူ အာမာတ် ဇဝ်ဖြာ ဒိုဝ်း ဒါရာ တီ၊ ဒွါ ဒီ ဒူအီ အီ ကွယ် ဒီ ကာတဲ၊ အီ မုး အာမုဝ်ဆဲ တွိုန်။ ဒူအီ အီ ကွယ် ဒီ ကာတဲ တီ ဟဲ့ ဝီ ဒွါ ဒါရာ တီ ဒီ ဂေ ဒူအီ ဘောကာဂ့လျီတ်။ 20 ဒူအီ အီ ကွယ် ဒီ ကာတဲ တီ၊ အန် တူ လာယ် ဘာ့ မီ အူ ဘ့လာက်။ အန် လုဝ် ထူမ် ဘော အာ ဘ့လာက်။ ဒေါ ဒွါ ဇဝ်ဖြာ ကာဒိက် ဆတ်ဇာ ဒီ အာဘြာဟမ်၊ အန် ယီ တူ လုဝ် ဒူအီ အီ ကွယ် ဒီ ကာတဲ။ ဟဲ့ မုး မီ အန် အီ ကွယ် အူ ဘ့လာက်၊ အန် ကာလာင် ဆိူဝ် ဒီ ဒါ အာဘြာဟမ်။

21 န့ ပါယ် တီ။ ဆေ ဘေ ထာင်၊ ဒါရာ တီ ဟဲ့ လာယ် ကာဘး ဒီ ကာဒိက် ဆတ်ဇာ ပီ ဒွါ ဇဝ်ဖြာ၊ အာဝ် မုး ပါယ် တီ။ ခုဝ်၊ ဆေ ဇဝ်ဖြာ ဘ့လေး အုန် ဒါရာ တီ ကူပ် ဆီ တဲး အန် အာဆာက် ကာမာယ် ဒီ ဒူအီ၊ ဒူအီ ဒီ ဝီ ပွိုန် နဝ်း ဆိူဝ် နဝ်း မှာန် ကူပ် ဒူပ် ဂေ ဒါရာ။ 22 မာလဲ၊ ခဲင် ဘပ် ဇဝ်ဖြာ န့ ယီ တဝ်း၊ ဒူအီ ဒဲင် ကာဒါယ် နီ၊ ဂေ ဘောကာဂ့လျီတ် ဟဲ့ မိုဝ်း မှာပ်။ ဟဲ့ ပီ ဂေ ကွယ် ခဲင် ကာပိုမ်၊ အာဝ် ပွိုန် လေး။ ဇဝ်ဖြာ ယီ ဒွါ ကာဒိက် ဆတ်ဇာ ဘော အာဆာက် ကာမာယ် ဒီ ဒွန် အီ အီ ညှိုမ် ဘိုင် ဇဝ် ယေဆူ။

23 အာတ့် ညှိုမ် အေ ဒီ ဇဝ် ယေဆူ၊ န့ ပီ အေ ဟဲ့ ကွယ် ခဲင် ကာပိုမ် ကူပ် လုဝ် ဒူပ် အေ ဒါရာ။ အေ ဟဲ့ ကွယ် ပါယ် တီ၊ တဲး န့ ကော ဇမ် ပန် ဒီ ဘျ ဇဝ်ဖြာ ဒီ အေ လွင် ပွိုန် အေ ဒီ ညှိုမ် ဇဝ် ယေဆူ။ 24 ပါယ် တီ၊ န့ ပီ ဒါရာ ဟဲ့ ဘ်ု အေ၊ ဘော ယဲတ့် တဲး အေ ညှိုမ် ဇဝ် ယေဆူ၊ တဲး ဇဝ်ဖြာ ပွိုန် ဒီ ဒွါ နဝ်း ဆိူဝ် နဝ်း မှာန် ဒီ အေ ကူပ် ညှိုမ် အေ ဇဝ် ယေဆူ။ 25 ဒေါ တီ နီ၊ ကူပ် ပွိုန် ညှိုမ် အေ ဇဝ် ယေဆူ၊ အေ မိူဝ် ဟဲ့ ဟွတ့် လွတ်။ အေ အာဝ် ဟူ လုဝ် ဒူပ် ဒါရာ။

26 ပါယ် တီ၊ ကူပ် ညှိုမ် ဘိုင် ဘေ ဇဝ် ယေဆူ၊ ဘေ ဘောကာဂ့လျီတ် ဟဲ့ ဘဲန် ဂွန် ဇဝ်ဖြာ။ 27 ခုဝ်၊ ဘေ အီ ဟဲ့ ခမ် ဒီ စိုပ် ခဲင် အိုမ် ကူပ် ညှိုမ် ဒူပ် ဘေ ဇဝ် ယေဆူ၊ ဘေ ဟဲ့ မိုဝ်း အာဆာက် ကာမာယ် ပီ ဒွါ ဇဝ် ယေဆူ။ န့ ပီ ဘေ ဟဲ့ စှိုပ် ခြိုင် ကာမာယ်။ 28 ခုဝ် အန် တီ အာဝ် ဟူ လုဝ် ကာယဝ်း ဒူအီ။ ဘော မုး ဒူအီ အာယူဒါ ဘော ဒူအီ ဂြိက်၊ ဘော မုး မှာယ် အီ ဘော အီ ဟဲ့ ကွယ် ထင်ဟာင်၊ ဘော မုး အီဘိုန့် အီမာယ်၊ ဘေ ဘောကာဂ့လျီတ် ဟဲ့ မုး တူတ့် အူ မျုဝ် ကူပ် ညှိုမ် ဘေ ဇဝ် ယေဆူ။ 29 ဆေ ဘေ ဟဲ့ ဘဲန် ဒူအီ အီ ညှိုမ် ဘိုင် ဇဝ် ယေဆူ၊ ဘေ ဟဲ့ ဘဲန် ဘော လှုက်လှာန် အာဘြာဟမ်။ ဘေ မိူဝ် ဒီ ပွိုန် ခါဂုန် ပီ ဒွိုမ် ဒွါ ဇဝ်ဖြာ ကာဒိက် ဆတ်ဇာ၊ ပီ တဝ်း အန် ဒီ ဒွါ။