အုဝ် ယီ တဝ်း၊ ဆေ န့ မိုဝ်း အီ ဒီ ပ့လု ခါဂုန် ဂုန့် အန်၊ ဒေါ ဆီ မုး အန် ဂွန်၊ အန် ပီ ဘော ဟဲ့ ပွိုန် တူတ့် ခါဂုန် ဒွန် မျုဝ် မိူဝ်၊ အန် ယီ ဆီ လုဝ် ခမ် ပီ မှာယ်။ 2 န့ ဒီ မိုဝ်း ဒူအီ အီ အိုပ် အန် ဘော ဒူအီ အီ ယွတ် မဲန် ကြုဝ်ကြာမ် အန် တီ ဒွန် မျုဝ်၊ တဲး န့ ကော ဇမ် အာခြာဝ် ပီ ဒွိုမ် ကာလာင် ဂုန့် အန်။ 3 အေ ဒေါ တီ နီ၊ အေ ဘော ပီ ပါယ် တီ။ ဒေါ ဆီ မုး အေ ဂွန်၊ ဂေ ကာနမ် အီ အိုပ် ဒွန် မျုဝ် ဒဲင် ကာဒါယ် ဘော ခဲင် ဘ့လေန့်၊ ဂေ ဟဲ့ ဒွိုမ် အိုပ် အေ၊ တဲး န့ ပီ အေ ဘဲန် မှာယ် ဂေ။ 4 မာလဲ၊ ဒေါ ဟဲ့ နုဝ့် ဟဲ့ ဇမ် အာခြာဝ် အန်၊ ဇဝ်ဖြာ ဟဲ့ တိုယ် ဂွန် အန် တဲး အန် ဂွိုတ် ဘဲန် ဒူအီ။ တဲး ဘော အန် လုဝ် ဒူပ် ဒါရာ။ 5 ပါယ် တီ၊ ဇဝ်ဖြာ ဆီ တဲး အန် ပွိုန် ဒီ ထုတ် လေး ဂေ ဒူအီ ပီ အိုပ် ဒါရာ၊ တဲး အေ ဘောကာဂ့လျီတ် ပွိုန် ဒီ ဘဲန် ဂွန် ဇဝ်ဖြာ။ 6 ကူပ် ဟဲ့ ဘဲန် ဘေ ဂွန် အန် ဇဝ် တီ၊ ဇဝ်ဖြာ ဟဲ့ တဲး နဝ်း ဖွိုမ် အန် အီ ကွယ် ခဲင် နဝ်း ဂွန် အန် ဝီ လိုပ် ကွယ် ခဲင် နဝ်း ဘေ။ နဝ်း ဖွိုမ် အန် တီ၊ အန် တဲး အေ တဝ်း၊ “ဂုန့်” ဒီ ဇဝ်ဖြာ။

7 ကူပ် န့ ပါယ် တီ၊ ဘေ အာဝ် ဟူ ဘဲန် မှာယ် အာဆေ။ ဘေ ဟဲ့ ဟွတ့် ဘဲန် ဂွန် ဇဝ်ဖြာ။ ကူပ် ဟဲ့ ဘဲန် ဘေ ဂွန် ဇဝ်ဖြာ၊ ဘေ မိူဝ် ပွိုန် ဒီ အိုပ် ခါဂုန် ပီ ဒွါ ဇဝ်ဖြာ။ 8 အာတ့် နီ၊ အာတ့် နပ် ဆီချာ ဘေ ဇဝ်ဖြာ၊ ဂေ ကာနမ် ဟဲ့ အိုပ် ဘေ။ ဂေ ယီ တူ မုး ဇဝ်ဖြာ အီ ဘွတ် အီ မျာတ်။ 9 ဒေါ တီ နီ၊ ဘေ ဟဲ့ ဟွတ့် နပ် ဆီချာ ဇဝ်ဖြာ။ ဇဝ်ဖြာ မိူဝ် ဟဲ့ ဟွတ့် နပ် ဆီချာ ဘေ။ မှဝ် န့ ပါယ် ပီ ဝီ ဆီ ဘိုင် ဘေ ကာနမ် အီ အိုပ် ကာဒါယ်၊ ယီ တူ မိုဝ်း ပ့လူမ်၊ တူ မိုဝ်း ဟဲန့်။း မှဝ် န့ ပါယ် ပီ ဝီ ဆီ ဘဲန် ဘေ မှာယ် ဂေ ကာနမ် ပေါ အူ ဇေန့်။း 10 ဘေ ဘော ဝီ ရဝ်း ဆီနမ်၊ ရဝ်း မာဂျီန်၊ ရဝ်း ဆီငဲ၊ ရဝ်း ယာမ်။ 11 န့ ဘော ဘဲန် နဝ်း မှဲ ဒီ အုဝ် ကူပ် ဘေ။ အုဝ် ဘော ယုဝ် ဂါန် ပဲ့ ဟဲ့ ဂျုဝ်ဂျာ အုဝ် ဒီ ဘူင် ဒါင် ဘေ၊ န့ ဒီ စှိုမ် ဒီလူယ် ဒီလာယ်။

12 အိုယ် ဘေ ဘီနွင်၊ အုဝ် ဆီ တဲး ကာဆဝ် ဘေ ဘဲန် ပီ အုဝ်။ ခုဝ်၊ အုဝ် မိူဝ် ဟဲ့ ဘဲန် ပီ ဘေ။ ဘေ မိူဝ် တူ ဒွိုမ် ဘူင် လုတ့် မာဆေ ဒီ အုဝ်။ 13 ယုဝ် ဘေ ဆီ နုဝ်၊ ဒေါ ဂုဝ် ဒီ ကာစုး အုဝ် ဒီ ကာလာင် ဂြုဝ်း ဇဝ်ဖြာ အီ တဲး နဝ်း ဘေ ဒါခိုယ်၊ န့ မုး ကူပ် ဟဲ့ ဆဝ်ဖိုဝ် အုဝ်။ 14 ဒေါ အန် တီ အုဝ် ပီ ဆ ကွယ် ဒါခိုယ် မိူဝ်၊ န့ ဘဲန် ညှာပ် ဒီ နဝ်း ဘေ။ ဘေ ယီ တူ မိုဝ်း နဝ်း အီ တူ ရုဝ်ဆေ အုဝ်၊ အီ တူ ရွုး အုဝ်။ မာလဲ၊ ဘေ ဟဲ့ ရွုး အုဝ်၊ တဲး န့ ပီ ဘေ ရွုး အာမူ အာမာတ် ဇဝ်ဖြာ ဘော ဇဝ် ယေဆူ။ 15 ယုဝ် မိူဝ် ဘေ ဟဲ့ ပိဝ် ဒေါ ဒါခိုယ် ဒေါ ကျဝ် ဒီ နဝ်း ဘေ တီ။း ဒေါ အန် တီ ဆေ န့ ဇာင် ပွိုန်၊ ဘေ ကော ဆီ ဂွဲ့ လေး ဘော ငါယ် ဘေ ဒွါ ဒီ အုဝ်။ အုဝ် ဟဲ့ နပ် ဆီချာ လွင် အန် တီ။ 16 မာလဲ၊ ဒေါ တီ နီ၊ ကူပ် ကာလာင် အုဝ် ဂြုဝ်း ဇဝ်ဖြာ နာ မုး နာ မှာန်၊ ကွဲ့ တဲး ဘေ ထာင်၊ အုဝ် ဟဲ့ ဝီ ဘဲန် ရန်ဆူ ဘေ။

17 ဒူအီ ဂေ တွိုန်၊ ဂေ ပီ ဘော ဟဲ့ ဂျုဝ်ဂျာ ဒီ တဲး ဘေ ဒူပ် ဂေ မိူဝ်၊ ပီ ဆီ ဘူင် ဂေ ယီ တူ မွှိုမ်။ ဂေ ဆီ ဘူင် တဲး ဘေ လာယ် ကာဂဝ်း ဒီ အုဝ်၊ တဲး ဘေ ဝီ ဂျုဝ်ဂျာ ဒီ ဘူင် ပီ အိုင် ဂေ။ 18 ဘေ ယီ မိုဝ်း နဝ်း အီ ဂျုဝ်ဂျာ ဒီ ဘူင် ဘဲန် မျုဝ် ဘဲန် မျုဝ်။ ဆေ န့ မုး နာ ဘွတ် နာ မွှိုမ် ပီ ဆီ ဘူင် ဘေ၊ ဟဲ့ ကာအာပ် မိုဝ်း နဝ်း ဇိုဝ် တီ ဆေဆေ။ ကွဲ့ တဲး ဘေ မိုဝ်း နဝ်း ဇိုဝ် တီ မီ ဒေါ ကွယ် ရိုမ် အုဝ် ဒူပ် ဘေ။ 19 အိုယ် ဘေ ဂွန် ပီ ရွက့် အုဝ်၊ န့ ဟဲ့ ဆဝ် ကာဆဝ် ဒီ နဝ်း အုဝ်၊ ဟဲ့ ပီ အီဘိုန့် ဆဝ် ဒီ မိုဝ်း ဂွန်။ ခုဝ်၊ အုဝ် ဆီ တဲး နဝ်း ဘေ ပီ နဝ်း ဇဝ် ယေဆူ။ 20 ဒေါ တီ နီ၊ နဝ်း အုဝ် ဟဲ့ ဘ့လိူင် ကူပ် ဘေ။ အုဝ် ယီ ဟဲ့ ကာပြာ ကာဆဝ် ဒီ ကွယ် ရိုမ် ဒူပ် ဘေ၊ တဲး အုဝ် ပွိုန် ဒီ ကာပ့လု နဝ်း အုဝ်၊ ဝီ ကာလာင် ဂြုဝ်း ဒါခိုယ် ဒီ ဘေ။

21 အုဝ် ဆီ ကာလာင် ဒီ ဘေ ဝီ အီ ဆီ ဒူပ် ဒါရာ။ ဘေ တူ လှုဝ်း ပီ မာနုဝ် ဒါရာ တီ။ 22 န့ ဟဲ့ ဒဲမ် အုန် ခဲင် ဘပ် ဇဝ်ဖြာ တဝ်း၊ အာဘြာဟမ် တွိုန်၊ အန် မိုဝ်း ဂွန် အာ ဝီ။ အူ ဝီ အန် ဂွိုတ် ဒီ အီဘိုန့် အီ မုး ဒဲစေန့်။ ပေါ အူ ဝီ အန် ဂွိုတ် ဒီ အီဘိုန့် အီ ကွယ် ထင်ဟာင်။ 23 ဝီ အီ ဂွိုတ် ဒီ ဒဲစေန့် တွိုန်၊ အန် မုး ဂွန် ဒူအီ အီ ပီ ဒူအီ ဒွန် အီ။ ဝီ အီ ဂွိုတ် ဒီ အီဘိုန့် အီ ဟဲ့ ကွယ် ထင်ဟာင် တွိုန်၊ အန် ဘဲန် ဂွန် အာဘြာဟမ် ကူပ် ဟဲ့ ဒွါ ဇဝ်ဖြာ ကာဒိက် ဆတ်ဇာ ဒီ အာဘြာဟမ်။

24 လွင် အန် တီ၊ န့ ဟဲ့ ဘဲန် အူဖာမာ။ အီဘိုန့် အာ ဝီ တီ၊ ဂါယ် ပီ ပီ လာယ် ကာဆဲန့် ဇဝ်ဖြာ အာ မျုဝ်။ အူ မျုဝ် န့ မုး ပီ လာယ် ကာဆဲန့် ဇဝ်ဖြာ ဒီ အာမုဝ်ဆဲ ဒီ နွန် ဆီနာယ် တွိုန်။ ပီ လာယ် ကာဆဲန့် ဇိုဝ် တီ၊ န့ ပီ နာင် ဟာဂါ တွိုန်။ ဂွန် ပဲ့ ဟဲ့ ပွိုန် အန်၊ ဂေ ဟဲ့ ဘဲန် မှာယ် အီ ဆိန့် ဒေါ ဂွိုတ် ဂေ။ 25 နာင် ဟာဂါ တီ ဘော ဂွန် အီမာယ် အန်၊ ဂေ ကွယ် ခဲင် အိူင် အာရာပ်။ အိူင် တီ၊ န့ ပီ မိူင် ယေရူဆာလဲမ် အီ ကွယ် ဒေါ တီ နီ။ ဘော မိူင် တီ ဘော ဒူအီ အီ ကွယ် ခဲင် မိူင် တီ ဒွန် အီ၊ ဂေ ဘဲန် တူတ့် မှာယ် အီ ဟဝ်၊ တူ ပွိုန် ကွယ် ထင်ဟာင်။ 26 မာလဲ၊ န့ မိုဝ်း မိူင် ယေရူဆာလဲမ် ပေါ အူ မိူင် အီ ကွယ် နာ ဒဲင်။ န့ ပီ အီဘိုန့် အီ ကွယ် ထင်ဟာင် တွိုန်။ အန် ဘော ဘဲန် မာ ဒင် အေ ဘောကာဂ့လျီတ်၊ အီ ညှိုမ် ဇဝ် ယေဆူ။ 27 ခဲင် ဘပ် ဇဝ်ဖြာ ဟဲ့ ဒဲမ် တဝ်း၊ “အိုယ် မဲ အီဘိုန့် အီ မှန်၊ အီ တူ ဒွိုမ် မိုဝ်း ဂွန်၊ တဲး မဲ ခူယ် ဒါခိုယ်။ အိုယ် မဲ အီဘိုန့် အီ တူ ဒွိုမ် မိုဝ်း ဝတ့် ဆဝ် ဒီ ဂွန်၊ တဲး မဲ ဘျုဝ် ဒါခိုယ် ဘော ကာလာင် ဂြုဝ်း တာင်။ ခုဝ်၊ အီဘိုန့် ပီ ဝဲန် အီမာယ် အန်၊ အန် ဝီ မိုဝ်း ဂွန် ကိူန် လွှိုမ် အီဘိုန့် အီ ဟဲ့ မိုဝ်း အီမာယ်။”

28 အိုယ် ဘေ ဘီနွင် အုဝ်၊ ဒေါ တီ နီ အေ ဟဲ့ ဘဲန် ဂွန် ဇဝ်ဖြာ ကူပ် ဟဲ့ ဒွါ ဇဝ်ဖြာ ကာဒိက် ဆတ်ဇာ။ ပါယ် တီ၊ အေ ပီ အာဆဲက် တွိုန်။ 29 ဒေါ ကွယ် အာဆဲက် တီ၊ ဂွန် အီ ပီ ဒူအီ ဒွန် အီ ဟဲ့ ခါနှာပ် ဂွန် အီ ဂွိုတ် ကူပ် ပဲ့ ဟဲ့ ဘူင် နဝ်း ဖွိုမ် ဇဝ်ဖြာ။ ဘော ဒေါ တီ နီ၊ န့ ဘော ပါယ် တီ။ 30 မာလဲ၊ န့ ဟဲ့ ဒဲမ် အုန် ခဲင် ဘပ် ဇဝ်ဖြာ တဝ်း၊ “ဆုတ့် တဝ် အီဘိုန့် အီ မုး မှာယ် တီ ဂါယ် ဂွန် အန်။ ဂွန် မှာယ် တီ၊ အန် တူ ပွိုန် ခါဂုန် ပီ ဂွန် အီ ကွယ် ထင်ဟာင်။” 31 ပါယ် တီ၊ တဲး ဘေ ဘီနွင် နပ်၊ အေ တူ မုး ဂွန် မှာယ်။ အေ မုး ဂွန် အီ ဟဲ့ ကွယ် ထင်ဟာင်။