ဇဝ် ယေဆူ ဟဲ့ တဲး အေ လွတ်၊ တဲး အေ ကွယ် ထင်ဟာင်။ အာဝ် လုဝ် ဝီ ဘဲန် မှာယ် ပေါ အူ ဇေန့်။ တဲး ဘေ ညှိုမ် ဆီချာ၊ ကွဲ့ တဲး ဘေ ဝီ ခမ် ဒုက် ပီ ပီ လုဝ် ခမ် မှာယ်။

2 တဲး ဘေ ထူမ် ဂြုဝ်း ပီ ကာလာင် အုဝ် အာပေါလူ နီ။ ဆေ ဘေ ခမ် ဒီ ဆွာ့ ဝဲန် ဟုန် လခါနာ အီမာယ်၊ န့ ပီ ဇဝ် ယေဆူ အာဝ် မိုဝ်း အာဂျိုဝ် မာဆေ ဒီ ဘေ။ 3 အုဝ် ကာလာင် ပေါ အူ ဇေန့် ဒီ ဂေ ဒူအီ အီ ခမ် ဒီ ဆွာ့ ဝဲန် ဟုန် လခါနာ တီ ဒွန် အီ၊ ဂေ ဒီ လုဝ် ဘူင် ဒူပ် ဒါရာ ဒွန် ညွင့်။ 4 ဘေ ဒွန် အီ အီ ဘူင် ဒူပ် ဒါရာ၊ တဲး ဘေ ပွိုန် နဝ်း ဆိူဝ် နဝ်း မှာန် ပီ ဒွါ ဇဝ်ဖြာ ဒီ ဘေ၊ ဘေ ဟဲ့ လာယ် ကာဂဝ်း ဒီ ဇဝ် ယေဆူ။ ဘေ ဟဲ့ ဝဲန် ပီ ဂေဇူ ဇဝ်ဖြာ ဒီ ဘေ။ 5 အီ မုး ယေ၊ နဝ်း ဖွိုမ် ဇဝ်ဖြာ ဟဲ့ တဲး ယေ နပ် ဆီချာ၊ ယေ ဒီ ပွိုန် နဝ်း ဆိူဝ် နဝ်း မှာန် ကူပ် ညှိုမ် ဘိုင် ယေ ဇဝ် ယေဆူ။ 6 ဆေ အေ ညှိုမ် ဘိုင် ဇဝ် ယေဆူ၊ ပီ ဘော ခမ် ဒီ ဆွာ့ ဝဲန် ဟုန် လခါနာ၊ ပီ ဆ ခမ် မိူဝ်၊ န့ တူ မိုဝ်း ဒီခုဝ် မာဆေ။ အေ လုဝ် ညှိုမ် ဘိုင် ဇဝ် ယေဆူ ဘော ရွက့် အီ ဟဝ်။ အာတီ ဟဲ့ အာရေ တာင်။

7 အာတ့် နီ ဘေ ဟဲ့ ညှိုမ် ဆီချာ။ န့ ပီ ဘေ ဟဲ့ လာယ် ကာခဲန့် ကာဘ့လဲပ် ဆီချာ ဆီချာ။ အာဆေ ဟဲ့ တး ခြဲ ဘေ၊ တဲး ဘေ စူ၊ ကွဲ့ ဟူ တဲး ဘေ ဒူပ် နာ မုး နာ မှာန်။ 8 န့ တူ မုး အန် ဇဝ် အီ ဟဲ့ ဒဲ့ ဘေ ဒူပ် အန် တွိုန်၊ အီ ဟဲ့ ကာဆုး နဝ်း ဘေ ပါယ် တီ။ 9 ဆီနမ် ဘြး ခါမုန် အီ စဲက်၊ န့ ပဲ ပီဘြး ခါမုန် ဘော ဒီက့လွုန်။ ပါယ် တီ၊ ပီ မာနုဝ် ကာလိုပ် အီ စဲက်၊ န့ ဘော နပ် ဒီ တဲး ဘေ ဘော ဖိုင် ကာလိုပ်။ 10 ပီ ဘော တဝ်း ပါယ် တီ မိူဝ်၊ အုဝ် ယီ ညှိုမ်၊ အန် ဇဝ် တူ တဲး ဘေ ညှိုမ် ကာလိုပ်။ ဒူအီ အီ ဆီ ဝ်ု နဝ်း ဘေ တီ၊ အန် ဘော မုး အာဆေ၊ အန် ယီ လုဝ် ခမ် မှာပ် အန်။ 11 အိုယ် ဘေ ဘီနွင်၊ ဆေ န့ ယီ မုး အုဝ် အီ တဝ်း၊ တဲး ဘေ ဆွာ့ ဝဲန် ဟုန် လခါနာ အီမာယ်၊ ဒုက် ပဲ့ ဟဲ့ ခမ် အုဝ် ဒီ ဒူအီ အာယူဒါ အာဝ် မိုဝ်း ဒီခုဝ်။ ဆေ အုဝ် ကာလာင် လွင် လုဝ် ဒူပ် ဒါရာ၊ ဘော ပီ ပီရူ ဂေ ဒူအီ အာယူဒါ ဒီ ဇဝ် ယေဆူ အီ ဟဲ့ ခမ် ဒီ ယမ် ဒဲင် ရွင့် ကာဝဲ့၊ န့ တူ မိုဝ်း ဒီခုဝ်။ 12 အီ မုး ဂေ ဒူအီ အီ မာနုဝ် ကာလိုပ် ဒီ ဘေ၊ အုဝ် ဆီ တဲး ဂေ ဘူင် တူတ့် ပီ မာနုဝ် ဂေ၊ တဲး ဂေ ဝီ ဆး ဒုဝ် ဘြိမ် ဂေ။

13 ဘေ ဘီနွင်၊ ဇဝ်ဖြာ ဟဲ့ ဆီ တဲး ဘေ ကွယ် ထင်ဟာင်။ ကူပ် ဟဲ့ ကွယ် ထင်ဟာင် ဘေ ပါယ် တီ၊ ဘေ ကွဲ့ တဲး ဘေ ဝီ ဘူင် ခဲ့ ပီ အိုင် ဒုဝ် ဘြိမ် ဘေ။ တဲး ဘေ ယီ လာယ် စွယ်၊ လာယ် ရွက့် ကာဝေ။ 14 ခုဝ်၊ ခဲ့ မိုဝ်း ဒါရာ ဒွန် ညွင့်၊ ဆီဖဝ် အန် ဟဲ့ ပွိုန် ဟပ် ခဲင် ဒါရာ အူ ညွင့် အီ တဝ်း၊ “တဲး မဲ ရွက့် အီ ဟဝ်၊ တဲး န့ ပီ မဲ ရွက့် ဒုဝ် မဲ။” 15 တဲး ဘေ ဆာဒိက်၊ ဆေ ဘေ ဘူင် ပီ ဒုဝ် ဆတ် အီ လာယ် ကာကဝ့် လာယ် ကာကာပ်၊ ဘေ ဒီ ဘော လိုဝ် စှိုမ် တူတ့် ဒွန် အီ။

16 ခုဝ်၊ အုဝ် တဝ်း ဒီ ဘေ၊ တဲး ဘေ ဘူင် ဒူပ် ပီ ဘျ နဝ်း ဖွိုမ် ဇဝ်ဖြာ ဒီ ဘေ။ ဆေ ဘေ ဘူင် ပါယ် တီ၊ ဘေ တူ ဘူင် ဒူပ် ပီ အိုင် နဝ်း ဘြိမ် ဘေ အီ အွန် ဒီ ဘူင် မှာပ် ဆေဆေ။ 17 ခုဝ်၊ ပီ အိုင် နဝ်း ဘြိမ် အေ တီ၊ န့ လာယ် ကာဘး ဒီ ပီ အိုင် နဝ်း ဖွိုမ် ဇဝ်ဖြာ။ ဘော ပီ အိုင် နဝ်း ဖွိုမ် ဇဝ်ဖြာ၊ န့ ဘော လာယ် ကာဘး ဒီ ပီ အိုင် နဝ်း ဘြိမ် အေ တီ။ နဝ်း အာ မျုဝ် တီ၊ ဘော လာယ် ကာဂုဝ်း ခဲင် နဝ်း ဘေ၊ ကွဲ့ တဲး ဘေ ဘူင် ပီ ဆီ ဘူင် ဘေ။ 18 ဆေ ဘေ ယီ ဘူင် ဒူပ် နဝ်း ဖွိုမ် ဇဝ်ဖြာ၊ ဒါရာ အာဝ် ဟူ ပွိုန် အိုပ် ဘေ။

19 ပီ အိုင် နဝ်း ဘြိမ် အေ ဒူအီ၊ န့ ဟဲ့ လိုဝ်း ဆီချာ။ န့ ဘော မုး နဝ်း ဆီ လာယ် လုတ့် လာယ် လာယ်၊ ဘော နဝ်း ကာဝါတ့်၊ နဝ်း ဆီ ဘူင် အီ မွှိုမ် ကာအိး မွှိုမ် ကာဒါတ့်။ 20 ဘော နဝ်း ဆီ ကြိုပ် အာရိုပ် ရာင်၊ ဂါဝ် ပွုန် ကာနမ်၊ ဘော နဝ်း အီ ဇွင့် အီ ဟဝ်၊ တူ လာယ် ဆီဖဝ် ဒီ အီ၊ ဘော လှယ့် အီ ဟဝ်၊ ဘော နဝ်း ရူ စာဝ် ဒီ အီ၊ လာယ် ကာခဲတ့် လာယ် ကာခဲန့်၊ လာယ် ကာဂဝ်း လာယ် ကာယာန်၊ ဘော နဝ်း လာယ် ကာယဝ်း ကာရေး။ 21 န့ ဘော မုး နဝ်း ဆီ လာယ် ဆီဂဲ့၊ ဘော ဒျီင် ပဝ်း တဲး ကော ယိုတ့်၊ ဘော လိုပ် ဘ့လွယ် ဘူင် ဆီနန် ဆီနိူင်။ လွင် ဇိုဝ် တီ၊ ဒွန် မျုဝ် အုဝ် ဟဲ့ ဟွတ့် ဒွိုမ် ဒမ် ဆာဒိက် ဒီ ဘေ။ ဒေါ တီ နီ၊ အုဝ် ပီ ဝီ ကာလာင် ဒီ ဘေ ပေါ အူ ဇေန့် တဝ်း၊ ဒူအီ အီ ဘူင် ပါယ် တီ၊ ဂေ တူ ပွိုန် ဒီ လိုပ် ခဲင် မိူင် ပီ အိုပ် ဇဝ်ဖြာ။

22 အီ မုး အာဂျိုဝ် ပီ ဒွါ နဝ်း ဖွိုမ် ဇဝ်ဖြာ ဒီ အေ၊ န့ ဘော တဲး အေ နပ် ဒီ လာယ် ရွက့်၊ တဲး အေ မိုဝ်း နဝ်း ဒါခိုယ်၊ နဝ်း ယေန်၊ နဝ်း ခမ် ဒီ ယိူန်၊ နဝ်း ဆီ ဂေဇူ အီ၊ ဘူင် နာ မွှိုမ် ဒီ အီ၊ ဘူင် နာ မှာန် ဆေဆေ၊ 23 ဘော နဝ်း န့စု န့စမ်၊ နဝ်း အီ ပဲ ဒီ အိုပ် ဒုဝ် ဘြိမ် အေ။ ဆေ အေ မိုဝ်း နဝ်း ဇိုဝ် တီ ဒွန် မျုဝ်၊ န့ တူ ကာဘး ဒီ ဒါရာ ဇဝ်ဖြာ ခေါ အူ ညွင့်။ 24 ဒူအီ အီ ဟဲ့ တဲး ဇဝ် ယေဆူ ဘဲန် ဒါ ကာညာ အီ အိုပ် ဂေ၊ ဂေ ဟဲ့ တဲး နဝ်း ဘြိမ် ဂေ ယမ် ဒဲင် ရွင့် ကာဝဲ့။ ဘော နဝ်း ကာဝါတ့် ဂေ ဘော ပီ အိုင် နဝ်း ဘြိမ် တီ ဒွန် မျုဝ် ဟဲ့ ဟွတ့် ယမ် ဒူပ် ဇဝ် ယေဆူ။ 25 ကူပ် ဟဲ့ ဒွါ နဝ်း ဖွိုမ် ဇဝ်ဖြာ အာဆာက် ကာမာယ် ဒီ အေ၊ တဲး အေ ဘူင် ဒူပ် ပီ အိုင် နဝ်း ဖွိုမ် ဇဝ်ဖြာ။ 26 တဲး အေ ဝဲန် နဝ်း ပီခိုက် ပီစာ၊ နဝ်း အီ လာယ် ပျာတ့် တဲး န့ ဘဲန် ဒေါဆ၊ ဘော နဝ်း လာယ် ဆီဂဲ့ လာယ် လှယ့်။