ခါ အာတ့် န့ ပီ ခဲင် နဝ်း ဖွိုမ် ဘေ အာဝ် မိုဝ်း အာဆာက်။ န့ ပီ ဘေ ဟဲ့ ယမ် ကူပ် ဘူင် ဘေ မှာပ် ကိူန်၊ တူ ထူမ် တူ ဒူပ် ဇဝ်ဖြာ။ 2 ဒေါ အန် တီ ဘေ ဟဲ့ ဒွိုမ် ဘူင် တူတ့် ဒွန် မျုဝ် ပီ ဘူင် ဂေ ဒူအီ အီ မိူက် အီ ကွယ် ဒဲင် ကာဒါယ် နီ။ ဘေ မိူဝ် ဟဲ့ ဒူပ် ဘုဝ် ကာနမ်၊ အီ အိုပ် ဂေ ကာနမ် အီ ကွယ် ခဲင် ဘ့လေန့်။ ကာနမ် တီ ဘော အိုပ် ဒွန် အီ အီ ဟဲ့ ဝဲန် ဂြုဝ်း ဇဝ်ဖြာ၊ အီ တူ ထူမ် တူ ဒူပ် အန်။ 3 ဘော အေ ဒွန် အီ ဟဲ့ ဒွိုမ် ဘူင် ပီ ဘူင် ဂေ ဒူအီ ဇိုဝ် တီ။ အေ မိူဝ် ဟဲ့ ဘူင် ပီ အိုင် အေ၊ ဘူင် ခဲ့ လေး ခဲင် အာငျာန် အေ။ အေ မိူဝ် မုး အာမျုဝ် ဒူအီ ပီ ဂေ အီ ဟဝ် ဒွန် အီ။ အေ မိူဝ် လုဝ် ခမ် ခဲ့ ဒမ် ဇဝ်ဖြာ မှာပ် အေ။ 4-5 ကူပ် မိုဝ်း အေ မှာပ် ကိူန်၊ အေ ပီ ဒူအီ အီ တူ မိုဝ်း အာဆာက်၊ အီ ဟဲ့ ဟွတ့် ယမ်။ န့ ယီ မုး ဇဝ်ဖြာ၊ ကူပ် ဟဲ့ ရွက့် ကာဆဝ် အန် ဒီ အေ၊ န့ ဝီ တဲး အန် ကာဝေ ကာဆဝ် အေ။ ခုဝ်၊ အန် ဟဲ့ ဘူင် တဲး နဝ်း ဖွိုမ် အေ ဝီ ယိတ့် ဝီ အိမ် ဝါယ် ဟဲ့ ဟွတ့် ယမ် အေ၊ တဲး အေ ပီ ဇဝ် ယေဆူ အီ ဟဲ့ ချွတ် အေ၊ အီ ဟဲ့ ဝီ ယိတ့် ဝီ အိမ်။ (န့ မုး နဝ်း ဂေဇူ ဇဝ်ဖြာ အီ ချွတ် ဘေ။ အာဝ် မုး အာဂျိုဝ် ပီ ဘူင် ဘေ။) 6 ကူပ် ညှိုမ် အေ ဇဝ် ယေဆူ၊ ဇဝ်ဖြာ ဟဲ့ တဲး နဝ်း ဖွိုမ် အေ မိုဝ်း အာဆာက်၊ တဲး န့ ပီ ဇဝ် ယေဆူ မိုဝ်း အာဆာက် ဝါယ် ဟဲ့ ဟွတ့် ယမ် အန်။ ဇဝ်ဖြာ မိူဝ် ဝီ တဲး အေ အိုပ် ကာဒါယ် ဘော ကွယ် ရိုမ် ဒူပ် ဇဝ် ယေဆူ ခဲင် ဂါင်ဟြာဝ်။ 7 ဇဝ်ဖြာ ဟဲ့ ဘူင် ပါယ် တီ၊ တဲး အန် ဘျ နဝ်း အန် ဒီ ဂေ ဒွန် အီ အီ ကွယ် နာ အာတ့် ဒွန် ဇာတ် ဒွန် ဘာန်။ အန် ဆီ တဲး ဒွန် အီ နပ် လွင် ဇဝ် ယေဆူ ရွက့် ဂေ၊ တဲး န့ ဝီ လိုဝ်း ခဲ့ ကိူန် ပီ ဂေဇူ ဇဝ်ဖြာ ဒီ ဂေ။ 8 ခုဝ်၊ န့ မုး ပီ ဂေဇူ ဇဝ်ဖြာ အီ ဟဲ့ ချွတ် ဘေ ဒေါ ညှိုမ် ဘေ ဇဝ် ယေဆူ။ အာဝ် မုး အာဂျိုဝ် ပီ ဘူင် ဘေ အီ ဟဲ့ ချွတ် ဘေ။ န့ ပီ ဇဝ်ဖြာ ဟဲ့ ဒွါ လက်ဆွင် ဒီ ဘေ။ 9 ပီ ဘူင် ဘေ ဒွန် မျုဝ် ပီ ထာင် ဘေ ဟဲ့ မိုဝ်း အာဂျိုဝ်၊ န့ တူ ပဲ ဒီ ချွတ် ဘေ။ ခုဝ် အန် တီ အာဝ် မိုဝ်း အာဆေ အီ ပွိုန် ပီခိုက် နဝ်း အန်။ 10 အေ တူ ပွိုန် ပီခိုက် နဝ်း အေ။ ခုဝ်၊ အေ မုး ပီ ဘူင် ဇဝ်ဖြာ။ ဒေါ ညှိုမ် အေ ဇဝ် ယေဆူ၊ ဇဝ်ဖြာ ဟဲ့ ဘူင် တဲး အေ ဘဲန် ဒူအီ အီ နပ် ဒီ ဘူင် နာ မွှိုမ် ဘဲန် မျုဝ် ဘဲန် မျုဝ်။ နာ မွှိုမ် ပီ ဒီ လုဝ် ဘူင် အေ ဒွန် အီ တီ၊ ဇဝ်ဖြာ ဟဲ့ ဟွတ့် မ့ပြာယ် အုန်၊ တဲး အေ ပွိုန် ဒီ ဘူင် ဒူပ် ခဲ့ တီ။

11 ဘေ လုဝ် လှုဝ်း ပီ မုး ဘေ ခါ အာတ့်။ ဆိန့် ဒေါ ဂွိုတ် ဘေ၊ ဘေ မုး ဒူအီ အာမျုဝ် ဟဝ်၊ အီ တူ မုး ဒူအီ အာမျုဝ် ယူဒါ။ ဂေ ဒူအီ အာမျုဝ် ယူဒါ တဝ်း၊ ဘေ တူ ဆွာ့ ဝဲန် ဟုန် လခါနာ အီမာယ် ပီ ဂေ။ ခုဝ်၊ ဘေ တူ ဆီငါ ဘွတ်။ ပီ ဆွာ့ ဂေ ဒီ ဒုဝ် ဘူင့် ဂေ၊ န့ ယီ တူ တဲး နဝ်း ဂေ ဆီငါ ဘွတ်။ 12 ဘေ မိူဝ် လုဝ် လှုဝ်း၊ အာတ့် နီ ဘေ တူ နပ် ဇဝ် ယေဆူ အီ ချွတ် ဒူအီ။ ဘေ တူ မုး အာမျုဝ် ဒူအီ အီဆာရေလ၊ ဒူအီ ပီ ရဝ်း ဇဝ်ဖြာ။ ဘေ မိူဝ် တူ နပ် မာဆေ လွင် ပီ ကာဆဲန့် ဇဝ်ဖြာ ဒီ ဂေ။ ဒဲင် ကာဒါယ် နီ ဘေ တူ ဒူပ် ဇဝ်ဖြာ။ ဘေ တူ မိုဝ်း ပီ ဒီ နှဝ့် န့ဒဝ့် မာဆေ။ 13 ဒေါ တီ နီ န့ ယီ မုး ဇဝ် ယေဆူ၊ အန် ဟဲ့ ခမ် ဒီ ယမ် ကာဒါင် ဘေ။ ခုဝ် အန် တီ ဘေ ဒူအီ အီ ဒွိုမ် ကွယ် ကာတူင့် ဒီ ဇဝ်ဖြာ၊ ဘေ ဟဲ့ ဝီ ပွိုန် ဒီ တး ကွယ် ကာတတ်၊ ကွယ် ရိုမ် ဒူပ် ဇဝ်ဖြာ။

14 န့ မုး ဇဝ် ယေဆူ တီ၊ အန် ဟဲ့ ဘူင် တဲး အေ လာယ် ကာလဝ့်။ အန် ဟဲ့ ဘူင် တဲး ဘော ယေ ဒူအီ အာမျုဝ် အီဆာရေလ ဘော ဘေ ဒူအီ အာမျုဝ် ဟဝ် ဝီ ဘဲန် ဒူအီ အူ မျုဝ်။ ဒေါ ခမ် ဇဝ် ယေဆူ ဒီ ယမ် ကာဒါင် အေ၊ အန် ဟဲ့ ဟွတ့် ဝဲန် တူတ့် ဒွန် မျုဝ် အီ တဲး ဒူအီ လာယ် ကာယဝ်း။ န့ ပီ၊ အန် ဟဲ့ ရိုတ့် ဝဲန် လွှက့် အီ ဘဲန် ကာအုန် ဝဲင်၊ အီ ဟဲ့ ဒွိုမ် တဲး ဒူအီ ကာယဝ်း၊ တဲး ဂေ လာယ် ဇွင့်။ 15 ကူပ် မိုဝ်း ဇဝ် ယေဆူ၊ အေ ဒွန် အီ မိူဝ် အာဝ် ဟူ လုဝ် ဒူပ် ဒါရာ ယူဒါ၊ ဝီ ကဲမ် ဆိန့် ဘဲန် ညွင့် ဘဲန် ညွင့်။ ပါယ် တီ၊ ဇဝ် ယေဆူ ဟဲ့ တဲး ဘော ဒူအီ အာမျုဝ် ယူဒါ ဘော ဒူအီ အာမျုဝ် ဟဝ် ဝီ ဘဲန် ဒူအီ ကာမာယ် အီ မုး ဒူအီ အူ မျုဝ်၊ အီ ကွယ် ရိုမ် ဒူပ် ဇဝ် ယေဆူ။ ပါယ် တီ အေ မိူဝ် ပွိုန် ဒီ ကွယ် ဒါခိုယ်၊ အာဝ် ဟူ လာယ် ဘဲန် ရန်ဆူ။ 16 ဒေါ ခမ် ဇဝ် ယေဆူ ဒီ ယမ် ဒဲင် ရွင့် ကာဝဲ့၊ အန် ဟဲ့ ဝဲန် တူတ့် ဒွန် မျုဝ် အီ တဲး ဂေ ဒူအီ အာယူဒါ ဘော ဂေ ဒူအီ အာမျုဝ် ဟဝ် လာယ် ဇွင့်။ ပါယ် တီ အန် မိူဝ် ဟဲ့ ဘူင် တဲး ဂေ ဒူအီ ဘဲန် မျုဝ် ဘဲန် မျုဝ် ဝီ ဘဲန် အူ ဂိုက်၊ တဲး ဂေ ဘောကာဂ့လျီတ် ဝီ ပွိုန် ဒီ ကွယ် ရိုမ် ဒူပ် ဇဝ်ဖြာ။ 17 ဝါယ် ဟဲ့ တး ဇဝ် ယေဆူ ဒဲင် ကာဒါယ် နီ၊ အန် မိူဝ် ဟဲ့ ကာလာင် ဒီ အီ လွင် ဇဝ်ဖြာ ဂါယ် ဒူအီ ဟဲ့ ဝီ လာယ် ကာလဝ့်။ အန် တဲး ဒွန် အီ နပ် လွင် အန် တီ။ ဘော ဂေ ဒူအီ အီ ကွယ် ကာတူင့် ဇဝ်ဖြာ ဘော ဂေ ဒူအီ အီ ကွယ် ကာတတ် ဇဝ်ဖြာ၊ ဂေ လုဝ် နပ် လွင် အန် တီ။ 18 န့ မုး ဇဝ် ယေဆူ အီ တဲး အေ ဒွန် အီ ပွိုန် ဒီ လိုပ် တး ဒူင် ကွယ် ဇဝ်ဖြာ အီ မုး ဂုန့် အေ။ ဘော ယေ ဒူအီ အာမျုဝ် ယူဒါ ဘော ဘေ ဒူအီ အာမျုဝ် ဟဝ်၊ အေ ဟဲ့ ပွိုန် နဝ်း ဖွိုမ် ဇဝ်ဖြာ အူ မျုဝ် တီ အီ တဲး အေ ကွယ် ရိုမ် ဒူပ် ဇဝ်ဖြာ။

19 ခုဝ် အန် တီ ဘေ အာဝ် ဟူ ပီ ခဲတ့် အီ တး မိူင် ဟဝ်၊ ဝီ တး ကွယ် ခဲင် မိူင် ဇဝ်ဖြာ၊ အီ တူ မိုဝ်း အာခ့ဝါင် မာဆေ။ ဘေ ဟဲ့ ဘဲန် ဒူအီ အီ ပွိုန် ကွယ် ခဲင် မိူင် ဇဝ်ဖြာ၊ ပီ ဂေ ဒူအီ အီ ညှိုမ် ဇဝ် ယေဆူ ဒွန် အီ။ ဘေ မိူဝ် ဟဲ့ လိုပ် ခဲင် န့ဟူမ် ဇဝ်ဖြာ၊ ဘဲန် ဂွန် အန်။ 20 ပါယ် တီ၊ အေ ဒူအီ အီ ညှိုမ် ဇဝ် ယေဆူ၊ အေ ပီ ကာင် အူ ကာတု။ ဂေ ဒူအီ အီ ဘျာန် ဂြုဝ်း ဇဝ်ဖြာ ဘော ဂေ ဒူအီ ပီ ရဝ်း ပီ တိုယ် ဇဝ် ယေဆူ၊ ဂေ ပီ ရွင့် ကာင်။ ပီ မာနုဝ် ဂေ ဒူအီ တီ တဲး အေ ညှိုမ် ဆီချာ။ ဇဝ် ယေဆူ ယီ ပီ စေန့် ရွင့်။ 21 ခဲ့ ပီ တာ အီ ခြိုင် ကာင် ဒွန် မျုဝ် တဲး န့ ပွိုန် ဆမ် ကာင်၊ ဂေ လုဝ် ကာဒုတ့် တူတ့် ဒဲင် စေန့် ရွင့် တီ။ ပါယ် တီ၊ ဘော အေ ဒူအီ ညှိုမ် ဇဝ် ယေဆူ ပွိုန် ကွယ် ရိုမ် ကူပ် မိုဝ်း ဇဝ် ယေဆူ။ ဇဝ် ယေဆူ တဲး အေ ဘဲန် အူ မျုဝ် တဲး န့ ပီ ကာင် ပီ ဆမ် အန် ဝီ ဘဲန် ဟုဝ် ဇဝ်ဖြာ အီ ဘွတ် ကာဆဝ်။ 22 ကူပ် ညှိုမ် အေ ဇဝ် ယေဆူ၊ န့ မုး နဝ်း ဖွိုမ် ဇဝ်ဖြာ အီ တဲး အေ ဘဲန် အူ ဖိုင်၊ တဲး ဇဝ်ဖြာ ကွယ် ကာတဲ အေ။