ခုဝ် အန် တီ အုဝ် အာပေါလူ ကွယ် ခဲင် ကာပိုမ်။ အုဝ် ကွယ် ခဲင် ကာပိုမ် တီ ကူပ် ကာလာင် အုဝ် လွင် ဇဝ် ယေဆူ ဒီ ဘေ ဒူအီ အီ တူ မုး အာမျုဝ် ယူဒါ။

2 အုဝ် ထာင်၊ ဘေ ဟဲ့ ဒွိုမ် ယိုဝ် လွင် ဇဝ်ဖြာ ဟဲ့ ဒွါ အုဝ် ဘူင် ဂါန် အန်၊ တဲး ဘေ နပ် လွင် ပီ ဂေဇူ ဇဝ်ဖြာ။ 3 ဇဝ်ဖြာ ဟဲ့ ဘျ ဒီ အုဝ် ပီ တူ ဒွိုမ် ဘျ အန် ဒီ အီ ဟဝ်၊ တဲး အုဝ် နပ် ဆီချာ လွင် အန် တီ။ အုဝ် မိူဝ် ဟဲ့ ဒွိုမ် ဒဲမ် အီ စဲက် လွင် အန် တီ။ 4 ဆေ ဘေ ဝီ တိး ပီ ဒဲမ် အုဝ် တီ၊ ဘေ ဒီ ဘော နပ်၊ န့ မုး အုဝ်၊ အီ ဟဲ့ နပ် ပီ တူ ဒွိုမ် နပ် အီ လွင် အန် ဇဝ် အီ ချွတ် အေ။ 5 ဒေါ မုး စုဝ် အာတ့် နီ၊ ဇဝ်ဖြာ တူ ဒွိုမ် တဲး ဒူအီ နပ် လွင် အန် တီ။ ဒေါ တီ နီ၊ နဝ်း ဖွိုမ် ဇဝ်ဖြာ ယဲ့ ဟဲ့ ဘျ ဒီ ဂေ ဒူအီ အီ ဘျာန် ဂြုဝ်း ဇဝ်ဖြာ ဘော ဒီ ဂေ ဒူအီ ပီ ရဝ်း ပီ တိုယ် ဇဝ် ယေဆူ၊ တဲး ဂေ ဒူအီ ဘွတ် တီ နပ် လွင် အန် တီ။ 6 ပီ ဘျ ဇဝ်ဖြာ ဒီ ဂေ ဒူအီ တီ၊ န့ မုး လွင် ဂေ ဒူအီ အီ တူ မုး အာမျုဝ် ယူဒါ။ ဘော ဂေ ဒူအီ အာမျုဝ် ဟဝ်၊ ဘော ဂေ ဒူအီ အာမျုဝ် ယူဒါ ဒီ ပွိုန် တူတ့် ဒွန် မျုဝ် ပီ ဒွါ ဇဝ်ဖြာ ဒီ အီ။ ဂေ ဒီ ကွယ် ရိုမ် ခဲင် ဖိုင် အူ ဖိုင်။ ကူပ် ညှိုမ် ဂေ ဇဝ် ယေဆူ၊ ဂေ ဒီ ဘော ပွိုန် တူတ့် ပီ ဒွိုမ် တဝ်း ဇဝ်ဖြာ ဒီ ဒွါ။ ဇဝ်ဖြာ ဒီ ဒွါ တူတ့် ဒွန် မျုဝ် ဒီ ဂေ ဒူအီ ဇိုဝ် တီ၊ ဆေ ဂေ ညှိုမ် ဂြုဝ်း ဇဝ်ဖြာ အီ တဲး ဒူအီ ဘဲန် နဝ်း ဒါခိုယ်။ 7 ဇဝ်ဖြာ ဟဲ့ ဝီ ဂေဇူ အုဝ်၊ တဲး အုဝ် ဘဲန် ဒဲစေန့် အန်၊ ကာလာင် ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ်။ န့ ပီ ဇဝ်ဖြာ ဟဲ့ ဒွါ လက်ဆွင် ဒီ အုဝ်၊ တဲး ပွုန် အန် ကွယ် ခဲင် နဝ်း အုဝ် ဒေါ ဘူင် အုဝ် ဂါန် အန်။ 8 ဇဝ်ဖြာ ဟဲ့ ဂေဇူ အုဝ် တဲး အုဝ် ပွိုန် ဒီ ကာလာင် ဒီ ဂေ ဒူအီ အီ တူ မုး အာမျုဝ် ယူဒါ၊ တဲး ဂေ နပ် ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ်။ န့ မုး ဂြုဝ်း လွင် ဇဝ် ယေဆူ အီ နပ် ဒီ မွင့်ကာရာ ဒွါ ဘဲန် မျုဝ် ဘဲန် မျုဝ်။ အာဝ် ပွိုန် ကာလာင် ခဲ့ ကိူန် ပီ ဒီ မွင့်ကာရာ ဒွါ အန်။ န့ ယီ မုး အုဝ်၊ အုဝ် ဟဲ့ ဘဲန် ဒူအီ အီ တျီမ် လွှိုမ် ဒွန် အီ၊ အီ ညှိုမ် ဇဝ် ယေဆူ။ ဇဝ်ဖြာ ဟဲ့ တဲး အုဝ် ကာလာင် လွင် အန် တီ။ 9 ဇဝ်ဖြာ အီ ဟဲ့ ဖာန် ဘ့လေး တူတ့် ဒွန် မျုဝ်၊ အန် တဲး အုဝ် ကာလာင် ဒီ အီ ဒွန် အီ လွင် ပီ ခြာမ် အန် ဇဝ် ဒီ ဘူင်။ အူ ဆိန့် ဒေါ မွိုန်၊ ဇဝ်ဖြာ ဟဲ့ ချြီင် အုန် လွင် အန် တီ ခဲင် နဝ်း အန်၊ တူ ဒွိုမ် တဲး ဒူအီ နပ်။ 10 ဇဝ်ဖြာ ယီ ခြာမ် ဒီ တဲး အီ နပ် လွင် အန် တီ ဒေါ တီ နီ။ အန် ဝီ တဲး ဒွန် အီ ယွတ် ဖိုင် ဇဝ် ယေဆူ၊ တဲး ဂေ ကော နပ် လွင် အာငျာန် အန် အီ နပ် တူတ့် ဒွန် မျုဝ်။ ဘော ဂေ အီ မိုဝ်း ပွုန် ခဲင် ဘ့လေန့် လုဝ် ယွတ် ဖိုင် ဇဝ် ယေဆူ၊ တဲး ဘော ဂေ နပ် ခဲ့ ကိူန် ခဲ့ ဘွတ် အာငျာန် ဇဝ်ဖြာ။ 11 ပါယ် တီ ဇဝ်ဖြာ ဒီ ဘူင် ပီ ဒွိုမ် ခြာမ် အန် ဒီ ဘူင် ဆိန့် ဒေါ ဂုဝ် အန်။ အန် တဲး ဇဝ် ယေဆူ အီ မုး ဒါ ကာညာ အေ ဘူင် ဇိုဝ် တီ ဒွန် မျုဝ်။ 12 ကူပ် ညှိုမ် ဘိုင် အေ ဇဝ် ယေဆူ၊ အေ ပွိုန် ဒီ ဆာခိုဝ် ဒီ ဇဝ်ဖြာ၊ ပွိုန် ဒီ ညှိုမ် ဘိုင် ဘော အန်၊ အာဝ် ဟူ လုဝ် ယုဝ် အန်။ 13 ခုဝ် အန် တီ အုဝ် ဘော စ်ု ဘေ၊ ကွဲ့ တဲး ဘေ မိုဝ်း နဝ်း ဒီတဲတ်။ ဆေ ဘေ ယိုဝ် လွင် ဒုက် ပီ ကာဒုး အုဝ်၊ ကူပ် ကာလာင် အုဝ် ဒီ ဘေ လွင် ဇဝ် ယေဆူ၊ ကွဲ့ တဲး န့ ဘဲန် နဝ်း လိုဝ် ဒီ ဘေ။ ပီ ခမ် အုဝ် တီ၊ န့ ဝီ ဘဲန် အာဖုင် ဒင်ခုဝ် ဘော ဒီ ဘေ။

14 ခုဝ် အန် တီ အုဝ် ဘော ဂိုပ် ခြိုပ်ခြဝ် ဒီ အာတ့် ဇဝ်ဖြာ အီ မုး ဂုန့် အေ။ 15 ဇဝ်ဖြာ တီ ဟဲ့ ဒွါ စိူဝ် ဒီ ဒွန် ဇိုဝ် ဒွန် ခြိုဝ် အီ ကွယ် ဒဲင် ကာဒါယ် ဘော ခဲင် ဂါင်ဟြာဝ်။ 16 အုဝ် ဆာခိုဝ်၊ တဲး အန် ဇဝ် ဒွါ ဒီ ဘေ ခဲ့ ကာဒါန် အာဖုင် ဒင်ခုဝ် တာင် အန်။ တဲး နဝ်း ဖွိုမ် ဇဝ်ဖြာ တဲး ဘော ဘေ မိုဝ်း ပွုန် ဘော တဲး နဝ်း ဘေ ပ့လူမ်။ 17 အုဝ် ဆာခိုဝ်၊ တဲး ဇဝ် ယေဆူ ကွယ် ခဲင် နဝ်း ဘေ ကူပ် ညှိုမ် ဘေ။ အုဝ် မိူဝ် ဆာခိုဝ်၊ တဲး ဘေ ရွက့် ဆီချာ ဘော ဇဝ်ဖြာ ဘော ဒူအီ၊ တဲး န့ ပီ ရျီး ဟေ ဘော စေန့် ရွင့် အီ ကွယ် မန် ဆီချာ ခဲင် ကာဒါယ်။ 18 တဲး ဘော ဘေ ဘော ဂေ ဒူအီ အီ ညှိုမ် ဇဝ် ယေဆူ ဒွန် အီ ကော နပ် ဆီချာ လွင် ဇဝ်ဖြာ ရွက့် ကာဆဝ် အေ ဒူအီ။ တဲး အေ နပ်၊ ခဲ့ ရွက့် ဇဝ်ဖြာ ဒီ အေ၊ န့ ဟဲ့ ကာဝဝ်း ဘော တူင့်၊ ဟဲ့ စာ ဘော လိုက်။ 19 အုဝ် ဆာခိုဝ် တဲး ဘေ နပ် လွင် အန် တီ၊ တဲး ဘေ နပ် ဇဝ် ယေဆူ ရွက့် ကိူန်၊ အာဝ် နပ် ဒီ ကာလာင်။ ပါယ် တီ အုဝ် ဘော ဆာခိုဝ်၊ တဲး ဘော ဇဝ်ဖြာ ဘော ပီ ဒီ ဒွါ အန် ဒွန် မျုဝ် ကွယ် ခဲင် နဝ်း ဘေ၊ တဲး န့ ကော နုဝ့် ခဲင် နဝ်း ဘေ။ 20 ခုဝ် အန် တီ တဲး အေ ဘော အိူပ် ဇဝ်ဖြာ။ ဇဝ်ဖြာ နပ် ဒီ ဘူင် တဲး န့ ဘဲန် ပီ ဆာခိုဝ် အေ၊ တဲး န့ လွှိုမ် ပီ မှာန့် အေ၊ တဲး န့ ကိူန် လွှိုမ် တူတ့် ဒွန် မျုဝ် အီ လေး ခဲင် အာငျာန် အေ။ ဇဝ်ဖြာ ဒီ ဒိုဝ်း ပွုန် အန် ဘူင် ဂါန် အန် ခဲင် နဝ်း အေ။ 21 ခုဝ်၊ န့ ကာအာပ် အေ ဝီ အိူပ် အန် ဇဝ်။ အေ ဒူအီ ခဲင် ဖိုင် ဇဝ် ယေဆူ အီ မုး ဒူအီ အီ ညှိုမ် ဇဝ် ယေဆူ ဒွန် စုဝ် ဒွန် ဘာန်၊ တဲး အေ ဘောကာဂ့လျီတ် အိူပ် ဇဝ်ဖြာ ဆေဆေ။ ဆာတူ။