ခုဝ် အန် တီ အုဝ် အီ ကွယ် ခဲင် ကာပိုမ် ကူပ် ဘူင် အုဝ် ဂါန် ဇဝ်ဖြာ၊ အုဝ် ဝီ စ်ု ဘေ၊ တဲး ဘေ ဘူင် ပီ အိုင် ဇဝ်ဖြာ။ ဇဝ်ဖြာ ဟဲ့ ဒဲ့ ဘေ တဲး ဘေ ဒူပ် အန်။ ခုဝ်၊ ဘေ လုဝ် ဘူင် တဲး န့ ကာဒါန် ဒီ အာဖုင် ဒင်ခုဝ် အန်။ 2 ဘေ လုဝ် မိုဝ်း နဝ်း တျီမ်၊ နဝ်း တူ ခါနှာပ် အီ။ ဘေ ဘော လုဝ် အူတ် နဝ်း၊ တဲး ဘေ ခမ် ပီ ဘူင် အီ ဟဝ်၊ တဲး န့ လိုဝ်း၊ ဘေ လာယ် ရွက့်။ 3 ဘေ လုဝ် ခတ် နဝ်း ဒီ ဒူပ် နဝ်း ဖွိုမ် ဇဝ်ဖြာ အီ တဲး ဘေ ဘဲန် အူ နဝ်း၊ တဲး ဘေ ကွယ် ရိုမ် ဒါခိုယ်၊ တူ လာယ် ရူ။ 4 န့ မိုဝ်း မီ ဖိုင် ဇဝ် ယေဆူ အူ ဖိုင်၊ အီ ပီ ဒုဝ် ဘူင့် အူ ဒုဝ်။ န့ ဘော မိုဝ်း မီ နဝ်း ဖွိုမ် ဇဝ်ဖြာ အူ ကာဒင်။ ပါယ် တီ ဘော ဘေ ပွိုန် ဒီ နှဝ့် န့ဒဝ့် မီ အူ မျုဝ်။ အာတီ မုး ပီ ဒွါ ဇဝ်ဖြာ ဒီ ဘေ ဒေါ ဒဲ့ ဇဝ်ဖြာ ဒီ ဘေ၊ တဲး ဘေ ဒူပ် အန်။ 5 န့ ဘော မိုဝ်း မီ အန် ဇဝ် အူ ကာဒင် အီ အိုပ် အေ။ ဘော ပီ လုဝ် ညှိုမ် အေ န့ မုး မီ အူ မျုဝ်။ ဘော ပီ ခမ် အေ ဒီ စိုပ် ခဲင် အိုမ်၊ န့ မိုဝ်း လွင် ဒါင် အန် မီ အူ မျုဝ်။ 6 န့ ဘော မိုဝ်း မီ ဇဝ်ဖြာ အူ ကာဒင်။ အန် မုး ဂုန့် ဒူအီ ဒွန် ဇိုဝ် ဒွန် ခြိုဝ်။ ဇဝ်ဖြာ တီ၊ အန် မုး ဒါ ကာညာ အီ အိုပ် တူတ့်။ အန် ဘူင် ဂါန် အန် ခဲင် နဝ်း ဒွန် အီ ဘော ကွယ် ခဲင် နဝ်း ဘေ ဒွန် အီ။

7 ဒေါ တီ နီ၊ အေ ဒွန် အီ ဟဲ့ ပွိုန် ဂေဇူ ပီ ဒွါ ဇဝ် ယေဆူ ဒီ အေ။ 8 န့ ပီ ပီ ဒဲမ် အုန် ခဲင် ဘပ် ဇဝ်ဖြာ လွင် ဇဝ် ယေဆူ တဝ်း၊

“ဒေါ ဟုဝ့် အန် နာ ဒဲင်၊ အန် ဟဲ့ တဲး ဒူအီ ကိူန် ဟုဝ့် ဒူပ် အန်။ ဟဲ့ ဟွတ့်၊ အန် ဝီ တဲး ဂေ နပ် ဒီ ဘူင် ဘဲန် မျုဝ် ဘဲန် မျုဝ်။”

9 ဆေ န့ တဝ်း၊ “အန် ဟုဝ့် နာ ဒဲင်၊” လွင် ဒါင် အန် တီ န့ ပီ၊ အာတ့် ပွိုန် ဇဝ် ယေဆူ ဒီ ဟုဝ့် နာ ဒဲင်၊ အန် ဟဲ့ ဟွတ့် လူင် ဒဲင် ကာဒါယ်၊ ဇမ် ဒူင် လိုက် အီ ကွယ် နာ ခြိုမ် ဆိူတ်။ 10 ပါယ် တီ၊ ဒူအီ အီ ဒွိုမ် လူင်၊ အန် ပီ ဝီ ဟုဝ့် ကွယ် နာ ဒဲင် ခဲင် ဂါင်ဟြာဝ်၊ ဝီ တဲး အန် ပွိုန် ဒီ ဘူင် တဲး န့ ဇေ့ဇုင် တူတ့် ဒွန် မျုဝ်။ 11 န့ မုး ဇဝ် ယေဆူ၊ အန် ဟဲ့ ဒွါ ဒူအီ နပ် ဒီ ဘူင် ဘဲန် မျုဝ် ဘဲန် မျုဝ်။ အန် ဟဲ့ တဲး မင် အီ ဘူင် ဂါန် ဂေ ဒူအီ ပီ ရဝ်း ပီ တိုယ် ဇဝ် ယေဆူ။ အန် ဟဲ့ တဲး မင် အီ ဘဲန် ဒူအီ အီ ဘျာန် ဂြုဝ်း ဇဝ်ဖြာ၊ မင် အီ နပ် ဒီ ကာလာင် ဒီ အီ လွင် ဇဝ်ဖြာ တဲး နဝ်း ဒူအီ ဒါခိုယ်။ မင် အီ လုဝ် လိုမ်လာ ယွတ် ဒူအီ ခဲင် ဖိုင် ဇဝ် ယေဆူ၊ ပီ ဒူအီ ဟျီင် မာဘူ။ ဘော မင် အီ လုဝ် မာနုဝ် ဒူအီ လွင် ဘပ် ဇဝ်ဖြာ။ 12 ဂေ ဒူအီ ဇိုဝ် တီ လုဝ် ဘူင် ဂါန် ဂေ၊ တဲး ဂေ စွယ် ဂေ ဒူအီ အီ ညှိုမ် ဇဝ် ယေဆူ၊ တဲး ဒွန် အီ ဝီ ဘဲန် ဒဲစေန့် ဇဝ်ဖြာ၊ တဲး ဂေ ဘောကာဂ့လျီတ် ညှိုမ် ဆီချာ၊ တဲး န့ ပီ ဒုဝ် ဘူင့် ဇဝ် ယေဆူ ကြဲ ဒီ တာင်။ 13 ပါယ် တီ အေ ဒွန် အီ ဒီ ဘဲန် အူ နဝ်း ကူပ် ညှိုမ် အေ ဇဝ် ယေဆူ။ အေ ဒီ ဘော နပ် ဆီချာ ဂွန် ဇဝ်ဖြာ။ အေ ဒီ ဘော ဘဲန် ပီ ဒူအီ တာင် အီ ဟူ မိုဝ်း နဝ်း ဂွန်၊ တဲး ပီ ညှိုမ် အေ ဇေ့ဇုင် ပီ ဇဝ် ယေဆူ ဟဲ့ ဇေ့ဇုင်။

14 ဇဝ်ဖြာ ဟူ ဆီ တဲး အေ ဘဲန် ပီ ဂွန်၊ အီ မိုဝ်း နဝ်း ကာလိင် ကာလဲ ပီ မာ အိုမ် အီ ဟာဝ် ကာဘ့လျီ့ ကာဘ့လ။ ဇဝ်ဖြာ တူ လုဝ် အေ ဘဲန် နဝ်း ကာဝှ်ု ကာဝျှီန် ဆေ ဒူအီ မိုဝ်း လွှက့်၊ တး မာနုဝ် ဘဲန် မျုဝ် ဘဲန် မျုဝ်။ ပီ မာနုဝ် ဇိုဝ် တီ န့ ပီ ခုန် တး ဘုတ် ရိုဝ်။ ဘော ဂေ ဒူအီ အီ မာနုဝ် ဇိုဝ် တီ၊ ဂေ ဆီမာ ကာလုဝ်။ ဂေ မုး ဒူအီ ညိုင်ရာင် ဒီ မာနုဝ် နာ မှာန်။ ဂေ ယီ ဘူင် တဲး ဒူအီ ကာလိုပ် ဒီ ဒူပ် ပီ ကာလုဝ် ဂေ။ 15 အေ ယီ လုဝ် ကာလာင် နာ မှာန် ဘော လုဝ် ရွက့် ဒူအီ၊ တဲး အေ ကြဲ ဒီ ဘဲန် ပီ ဇဝ် ယေဆူ၊ တဲး ဘော အေ ဘော အန် ဇဝ် ကွယ် ရိုမ် ဆေဆေ။ ဇဝ် ယေဆူ ပီ ဂိန့် အီ ကွယ် ဒဲင် ဒုဝ် ဘူင့်။ အန် အိုပ် ဂေ ဒွန် အီ အီ ညှိုမ် အန်။ 16 ဂိန့် တီ တဲး ကာဆွင့် ဒုဝ် ဘူင့် လာယ် ကာဒုတ့် တူတ့်၊ တဲး ဘော ဆီန ဘူင် တဲး ဘော ဒုဝ် လာယ် ကာဒိုက်၊ မိုဝ်း ပ့လူမ်။ ခုဝ်၊ ဆေ ဒွန် မျုဝ် အီ ကွယ် ခဲင် ဒုဝ် ဘူင့် ဘူင် ဂါန် အာဆေ ဂါန် အန်၊ န့ တဲး ဒုဝ် ဘော ဒုဝ် ပွိုန် ဒီ ကွယ် ဒါခိုယ်။ ပါယ် တီ၊ ဘော ဒုဝ် နပ် ဒီ ကြဲ ဒီ တာင်။ န့ ပီ အေ အီ ကွယ် ခဲင် ဖိုင် ဇဝ် ယေဆူ၊ အေ ကြဲ ဒီ လာယ် ရွက့် ကိူန်။

17 ခုဝ် အန် တီ ပီ ဒီ ကာလာင် အုဝ် ဒေါ တီ နီ၊ အုဝ် စ်ု ဘေ ဘူင် ကူပ် စ်ု ဇဝ် ယေဆူ ဘေ ပါယ် တီ။ ဘေ အာဝ် ဟူ လုဝ် ဘူင် ပီ ဘူင် ဂေ ဒူအီ အာမျုဝ် ဟဝ်။ ဂေ ဒူပ် အာငျာန် ဂေ၊ အီ တူ မုး အာငျာန် ဘွတ်။ 18 ပီ ခြာမ် ဂေ န့ ဒူပ် နာ အပ် ဝွင့်၊ ကူပ် ဟဲ့ ဝဲန် ဂေ အာဆာက် ပီ ဒွါ ဇဝ်ဖြာ ဒီ ဂေ။ ဂေ ဟဲ့ ဝဲန် အာတီ ခုဝ်၊ ဂေ တူ မိုဝ်း အာငျာန်။ နဝ်း ဂေ ဟဲ့ ဒိူဝ်။ 19 ဂေ ဒူအီ ဇိုဝ် တီ၊ ဂေ အာဝ် ဟူ ဆာယ်။ ဂေ ဒူပ် နဝ်း ဂေ၊ ဘူင် ပီ တူ ကာအာပ် ဘူင်၊ ဘူင် အီ မွှိုမ် ကာအိး ဒွန် မျုဝ် ဘော မိုဝ်း နဝ်း ဆီ ပွိုန် ကာပွါ ဆေဆေ။

20 ဒါ ဆာရာ ဘေ ယီ တူ မာနုဝ် ဘေ ပါယ် တီ ဒေါ မာနုဝ် ဂေ လွင် ဇဝ် ယေဆူ။ 21 ဘေ ဟဲ့ ဟွတ့် ထူမ် လွင် ဇဝ် ယေဆူ။ ပန် တီ ဂေ ဒါ ဆာရာ ဟဲ့ ဝီ မာနုဝ် ဘေ အီ မုး အီ မှာန် လွင် ဇဝ် ယေဆူ။ 22 ခုဝ်၊ ဘေ လုဝ် ဝဲန် ပဲ့ ဟဲ့ ဒွိုမ် ဘူင် ဘေ။ ဘေ လုဝ် ဝဲန် အီ ဘြိမ် အီ တူ မွှိုမ် ကူပ် ဒူပ် အန် နဝ်း ဘြိမ်၊ အီ မုး နဝ်း ကာလုဝ်၊ နဝ်း ဆီ ပွိုန် ဆေဆေ။ 23 ဟဲ့ ဟွတ့် ဝဲန် အီ ဘြိမ် တီ၊ နဝ်း ဖွိုမ် ဇဝ်ဖြာ လုဝ် ဝီ ဒွါ ဘော နဝ်း ဘော အာငျာန် ကာမာယ် ဒီ ဘေ။ 24 ဘေ ဘော လုဝ် ဒိုဝ်း နဝ်း ကာမာယ် တီ၊ တဲး န့ ပီ ဘေ စှိုပ် ခြိုင် ကာမာယ်။ န့ မုး နဝ်း ကာမာယ် ပီ ဖာန် ဘ့လေး ဇဝ်ဖြာ၊ တဲး န့ ပီ အန် ဇဝ်။ နဝ်း ကာမာယ် တီ တဲး ဘေ ပွိုန် ဒီ ဘူင် နာ မွှိုမ် နာ ဘွတ်။ န့ တဲး ဘေ ဒူပ် နာ မှာန် ဆေဆေ။

25 ခုဝ် အန် တီ ဘေ အာဝ် ဟူ ပွိုန် ကာလုဝ်။ ဘေ ဒွန် အီ လုဝ် ကာလာင် နာ မှာန် ဒီ အီ ဟဝ်၊ ကူပ် ဟဲ့ ကွယ် အေ ခဲင် ဖိုင် ဇဝ် ယေဆူ။ 26 ဆေ ဘေ လာယ် ရူ၊ ကွဲ့ တဲး ဘေ ဘူင် မှာပ်။ တဲး ဘေ ဝဲန် နဝ်း ရူ အာတ့် အပ် ပြဲ။ 27 ကွဲ့ တဲး ဘုဝ် ကာနမ် ပွိုန် ဒီ ဝီ ကာဆုး ဘေ ဘူင် မှာပ်။ 28 ဆေ န့ မုး ဒူအီ အီ ဆီမာ ပြာ၊ ကွဲ့ ဟူ တဲး အန် ပြာ။ တဲး အန် ဘူင် ဂါန်၊ တဲး ဒဲ အန် ဝီ ဘူင် နာ မွှိုမ်၊ တဲး အန် ဝီ မိုဝ်း ကြုဝ် ပီ ဒီ ပွိုန် ဒွါ ဒီ အီ ဟဝ် အီ တူ မိုဝ်း။

29 ဆေ ဘေ ကာလာင် ဂြုဝ်း၊ ကွဲ့ တဲး ဂြုဝ်း တူ မွှိုမ် လေး ခဲင် မူတ့် ဘေ။ ဆေ ဘေ လုဝ် ကာလာင်၊ တဲး ဘေ ကာလာင် ဂြုဝ်း မွှိုမ်၊ ဂြုဝ်း စွယ် အီ၊ တဲး ဂြုဝ်း ဘေ ဘဲန် ဂေဇူ ဒီ ဂေ အီ ထူမ်။ 30 ကွဲ့ ဘူင် တဲး နဝ်း ဖွိုမ် ဇဝ်ဖြာ က့လိုဝ်။ ဇဝ်ဖြာ ဟဲ့ ဒွါ နဝ်း ဖွိုမ် အန် ဒီ ဘေ၊ တဲး န့ ပီ အန် ဟဲ့ ဒွက် ဇိုမ် အန် ဒီ နဝ်း ဘေ၊ တဲး ဘေ ကွယ် ဆီချာ၊ တဲး န့ ကော ဇမ် ဆီငဲ ဒီ ထုတ် လေး ဇဝ်ဖြာ ဒီ ဘေ ခဲင် အီ တူ မွှိုမ် ဒွန် မျုဝ်၊ တဲး ဘေ ကွယ် ရိုမ် ဒူပ် အန်။ 31 တဲး ဘေ ဝဲန် ပီ အုန် ဘေ ခဲင် နဝ်း။ ဝဲန် နဝ်း ရူ၊ နဝ်း တူ အိုင်၊ နဝ်း ဆီမာ အေး၊ နဝ်း ကာလာင် နာ တူ မွှိုမ် လွင် အီ၊ ဘော နဝ်း ဟာယ် ဘဲန် မျုဝ် ဘဲန် မျုဝ်၊ ကွဲ့ တဲး န့ ကွယ် ခဲင် နဝ်း ဘေ။ 32 တဲး ဘေ ယီ မိုဝ်း နဝ်း မွှိုမ်၊ လာယ် ကာဝေ၊ လာယ် ဘ့လွာ့ ဝဲန် မှာပ်၊ တဲး န့ ပီ ဇဝ်ဖြာ ဟဲ့ ဂဝ်း ဝဲန် မှာပ် ဘေ ဒေါ ညှိုမ် ဘေ ဇဝ် ယေဆူ။