ကူပ် မုး ဘေ ဂွန် ပီ ရွက့် ဇဝ်ဖြာ၊ တဲး ဘေ ဘူင် ပီ ပီ ဘူင် ဇဝ်ဖြာ။ 2 ဘေ လုဝ် ရွက့် ဇဝ်ဖြာ၊ တဲး န့ ပီ ဇဝ် ယေဆူ ရွက့် အေ ဒေါ ခမ် အန် ဒီ ယမ် ကာဒါင် အေ။ ဇဝ် ယေဆူ ဟဲ့ ခမ် ဒီ ယမ်၊ တဲး အန် ပီ ဒုဝ် ဆတ်ဒါဝါ ပီ လှူ ဒူအီ၊ တဲး ဇဝ်ဖြာ အိုင် ဘော ဂဝ်း ဝဲန် မှာပ် ဂေ။ ဇဝ် ယေဆူ ဟဲ့ ခမ် ဒီ ယမ်၊ တဲး န့ ပီ ပီ လှူ ဒူအီ၊ တဲး န့ အုး ငှုန် ဒီ အာတ့် ဇဝ်ဖြာ။

3 ဘေ မုး ဒူအီ အီ ညှိုမ် ဇဝ်ဖြာ။ ခုဝ်၊ န့ တူ ကာအာပ် ဘေ လုတ့် အီဘိုန့်၊ ဘူင် နာ မွှိုမ် ကာအိး ဘဲန် မျုဝ် ဘဲန် မျုဝ်။ ဘော လွင် ပီ ဆီ ပွိုန် ဘဲန် မျုဝ် ဘဲန် မျုဝ်၊ အာဝ် ကာအာပ် ဘေ လာယ် ကာမွုန်။ 4 ဘော ဂြုဝ်း မွှိုမ် ကာအိး ဘော ဂြုဝ်း ပီယေန့်၊ ဂြုဝ်း တူ ဘွတ်၊ ဂြုဝ်း အီ တူ ကာအာပ် တဝ်း၊ ကွဲ့ တဲး ဘေ ကာလာင် ဇိုဝ် တီ ဒွန် မျုဝ်။ တဲး ဘေ ယီ ကာလာင် ဂြုဝ်း အီ ဒါင် ဂုင် ဂေဇူ ဒီ ဇဝ်ဖြာ။ 5 ဘေ ယီ နပ် ဆီချာ၊ ဆေ န့ မုး ဒူအီ လုတ့် အီဘိုန့်၊ ဘူင် နာ မွှိုမ် ကာအိး ဘဲန် မျုဝ် ဘဲန် မျုဝ်၊ အာဆေ ဘော မိုဝ်း နဝ်း ဆီ ပွိုန် ဘဲန် မျုဝ် ဘဲန် မျုဝ်၊ ဒူအီ ဇိုဝ် တီ ပီ ဒူအီ အီ ကြိုပ် အာရိုပ်။ အာဆေ ဘူင် ဇိုဝ် တီ၊ အန် တူ ပွိုန် ခါဂုန် မာဆေ ခဲင် မိူင် ပီ အိုပ် ဇဝ်ဖြာ ဘော ဇဝ် ယေဆူ။ 6 ဆေ ဒူအီ အူ ဝီ တး ကာလာင် ဂြုဝ်း အီ တူ မိုဝ်း ဒီခုဝ် ဒီ ဘေ၊ ကွဲ့ တဲး ဘေ ညှိုမ် ဂြုဝ်း ပီ ကာလုဝ် အန်။ ကူပ် ဘူင် ဂေ နာ တူ မွှိုမ် ဇိုဝ် တီ ဘဲန် မျုဝ် ဘဲန် မျုဝ်၊ ကူပ် မုး ဂေ ဒူအီ အီ ဝဲန် ဂြုဝ်း ဇဝ်ဖြာ၊ တူ ထူမ် ဂြုဝ်း ဇဝ်ဖြာ၊ ဇဝ်ဖြာ ဒီ ရူ ဒီ ဂေ။ 7 ခုဝ် အန် တီ အုဝ် တဝ်း၊ ကွဲ့ တဲး ဘေ ကွယ် ရိုမ် ဒူပ် ဂေ ဒူအီ ဇိုဝ် တီ၊ ကွဲ့ တဲး ဘေ ဘူင် ပီ ဘူင် ဂေ။

8 အာတ့် နီ ဘေ ဟဲ့ ဒွိုမ် ကွယ် ခဲင် အပ် ဝွင့်၊ တူ နပ် မာဆေ လွင် ဇဝ်ဖြာ။ ဒေါ တီ နီ ဘေ ယဲ့ ဟဲ့ ကွယ် ခဲင် ဘ့လာင် ပီ ဒွါ ဇဝ်ဖြာ၊ တဲး ဘေ နပ် ပီ အိုင် ဇဝ်ဖြာ။ ခုဝ်၊ တဲး ဘေ ဘူင် ပီ အိုင် ဇဝ်ဖြာ၊ တဲး န့ ပီ ဘေ ကွယ် ခဲင် ဘ့လာင်။ 9 အာဆေ ကွယ် ခဲင် ဘ့လာင် တီ၊ အန် ဒီ ဘူင် နာ မွှိုမ်၊ နာ မှာန် ဘော တူ ကာလုဝ် ဒေါ မှဝ်။ 10 တဲး ဘေ ဘော ဂျုဝ်ဂျာ ဒီ နပ် ဆေဆေ အီ လဝ့် နဝ်း ဇဝ်ဖြာ။ 11 ကွဲ့ တဲး ဘေ ဘူင် နာ တူ မွှိုမ် အီ တူ မိုဝ်း ဒီခုဝ်။ ဇိုဝ် တီ မုး ပီ ဘူင် ဂေ ဒူအီ အီ ကွယ် ခဲင် အပ် ဝွင့်။ ပီ ဘူင် ဒူအီ ခဲင် အပ် ဝွင့် ဘေ ယီ လုဝ် ကာလာင်၊ တဲး အီ နပ် ခဲ့ တူ မွှိုမ် ပီ ဘူင် ဂေ တီ။ 12 ခုဝ်၊ ပီ ဘူင် ဂေ ဒူအီ ကွဲ့ တဲး အီ ယိုဝ်၊ ကွဲ့ တဲး အီ နပ်၊ န့ မွှိုမ် ဆာယ်။ ဆေ ဂေ လုဝ် ကာလာင် လွင် အန် တီ၊ ဂေ ဒီ ဘော ဆာယ်၊ အာဝ် ပွိုန် ကာလာင်။ 13 ခုဝ်၊ န့ မုး ဘ့လာင် အီ တဲး န့ လိုဝ်း ခဲ့ တူ မွှိုမ် ပီ ဘူင် ဂေ။ 14 ဆေ န့ ယီ လိုဝ်း ဆီချာ ခဲ့ တူ မွှိုမ် ပီ ဘူင် အီ၊ ဟဲ့ ပီ ဟဲ့ ကွယ် ခဲင် ဘ့လာင်။ ခုဝ် အန် တီ ဒူအီ မင် အီ ဘော ပါက် မှုဝ် တဝ်း၊

“အိုယ် မဲ အီ အိတ်၊ တဲး မဲ ယိတ့်။ ဒူင် ကွယ် မဲ ဟဲ့ မုး ဒူင် ကွယ် ဒူအီ ယမ်။ ဆေ မဲ ယိတ့်၊ ဇဝ် ယေဆူ ဒီ တဲး မဲ ကွယ် ခဲင် ဘ့လာင် ပီ ဒွါ အန်။”

15 ခုဝ် အန် တီ ဘေ ဒွန် အီ လုဝ် ဆာဒိက်၊ ကွဲ့ တဲး ဘေ ဘူင် ပီ ပီ ဘူင် ဂေ ဒူအီ အီ တူ မိုဝ်း အာငျာန်၊ တဲး ဘေ ဘူင် ပီ ပီ ဘူင် ဂေ ဒူအီ အီ မိုဝ်း အာငျာန် ဘွတ်။ 16 တဲး ဘေ ဒီငန့် ဒီ ဘူင် နာ မွှိုမ်၊ ကွဲ့ တဲး ဘေ ဒီလှး။ ခုဝ်၊ အာခြာဝ် နီ တူ မွှိုမ်။ 17 ခုဝ် အန် တီ ကွဲ့ တဲး ဘေ ရိုဝ်၊ တဲး ဘေ မိုဝ်း အာငျာန် ဘွတ်၊ တဲး ဘေ နပ် မာဆေ ပီ အိုင် ဇဝ်ဖြာ။ 18 ကွဲ့ တဲး ဘေ ယိုတ့် ပဝ်း။ ဆေ ဘေ ဒျီင် ပဝ်း၊ န့ တဲး ဘေ စှိုမ်။ ဘေ ယီ လုဝ် တဲး နဝ်း ဖွိုမ် ဇဝ်ဖြာ ကွယ် ခဲင် နဝ်း ဘေ၊ တဲး န့ ကော နုဝ့်။ 19 ဘေ လုဝ် တဝ်း မှုဝ် ဒါခိုယ်၊ မှုဝ် အီ အိူပ် ဇဝ်ဖြာ။ ဘေ လုဝ် တဝ်း ပီ မှုဝ် ထမ်။ ပါယ် တီ တဲး ဘေ အိူပ် ဇဝ်ဖြာ ခဲင် နဝ်း ဘေ။ 20 ဘေ ဘော ကာဒုး မာဆေ၊ ဘေ လုဝ် ဒါင် ဂုင် ဂေဇူ ဒီ ဇဝ်ဖြာ ဆေဆေ။ ကူပ် ညှိုမ် အေ ဇဝ် ယေဆူ အေ လုဝ် ဒါင် ဂုင် ဂေဇူ ဒီ ဇဝ်ဖြာ၊ အီ မုး ဂုန့် အေ။

21 တဲး ဘေ လာယ် ဂူမ် ကူပ် ရုဝ်ဆေ ဘေ ဇဝ် ယေဆူ။ 22 ဘေ အီဘိုန့်၊ တဲး ဘေ ထူမ် ဂြုဝ်း အီမာယ် ဘေ၊ တဲး န့ ပီ ဘေ ထူမ် ဂြုဝ်း ဇဝ်ဖြာ။ 23 ခုဝ်၊ အီမာယ် ပီ ဂိန့် အီဘိုန့်။ ဇဝ် ယေဆူ ပီ ဂိန့် ဂေ ဒူအီ ခဲင် ဖိုင် အန်။ န့ ယီ မုး ဇဝ် ယေဆူ၊ အန် ဟဲ့ ချွတ် ဂေ ဒူအီ ခဲင် ဖိုင် တီ၊ ဂေ အီ ပီ ဒုဝ် ဘူင့် အန်။ 24 ဂေ ဒူအီ ခဲင် ဖိုင် ဇဝ် ယေဆူ၊ ဂေ ယီ ဂူမ် ဇဝ် ယေဆူ။ ပါယ် တီ ဘော အီဘိုန့် လုဝ် ဂူမ် အီမာယ် အန်၊ ဘူင် ပီ အိုင် အန် ဒွန် မျုဝ်။

25 ဘေ အီမာယ်၊ တဲး ဘေ ရွက့် အီဘိုန့် ဘေ၊ တဲး ဘေ ရွက့် ပီ ဇဝ် ယေဆူ ရွက့် ဂေ ဒူအီ ခဲင် ဖိုင် အန်။ ဇဝ် ယေဆူ ဟဲ့ ခမ် ဒီ ယမ် ကာဒါင် ဂေ။ 26 အန် ဟဲ့ ဟွတ့် ဘ့လွာ့ ဝဲန် မှာပ် ဂေ၊ တဲး န့ ပီ ဂေ ဘာယ် ဒုဝ် ဂေ ခဲင် အိုမ်။ အန် ဘော ဘူင် တဲး ဂေ ဘဲန် ဒူအီ အီ ဆီငါ ဘွတ် ဒေါ ထူမ် ဂေ ဂြုဝ်း ဇဝ်ဖြာ။ ခုဝ်၊ အန် ဟဲ့ ခမ် ဒီ ယမ်၊ တဲး အန် ပွိုန် ဒီ ဘူင် ဇိုဝ် တီ ဒီ ဒွန် အီ ခဲင် ဖိုင် အန်။ 27 အန် ဆီ တဲး ဒူအီ ခဲင် ဖိုင် အန် ဒွန် အီ ဘဲန် တူတ့် ဒူအီ ပီ အိုပ် အန်၊ တဲး ဂေ မိုဝ်း အာဖုင် ဒင်ခုဝ်၊ ကွဲ့ တဲး ဂေ မိုဝ်း နာ တူ စှိတ်၊ နာ တူ မွှိုမ် မာဆေ၊ တဲး ဒွန် အီ လဝ့် နဝ်း အန်။ 28 ပါယ် တီ အီမာယ် မိူဝ် လုဝ် ရွက့် အီဘိုန့် ဂေ၊ တဲး န့ ပီ ဂေ ရွက့် ဒုဝ် ဘြိမ် ဂေ။ အာဆေ ရွက့် အီဘိုန့် အန်၊ အန် ရွက့် ဒုဝ် ဘြိမ် အန်။ 29 ခုဝ်၊ န့ တူ မိုဝ်း အာဆေ အီ ဝီ ဆီ ဘူင် နာ စာဝ် ဒီ ဒုဝ် ဘြိမ် အန်။ ဒွန် အီ နပ် ဒီ ယွတ် လိုမ်လာ ဆီချာ ဒုဝ် ဘူင့် အန်။ ပါယ် တီ ဇဝ် ယေဆူ မိူဝ် ယွတ် လိုမ်လာ ဆီချာ ဒွန် အီ ခဲင် ဖိုင် အီ ညှိုမ် အန်။ 30 အေ မိူဝ် မုး ဒူအီ ခဲင် ဖိုင် ဇဝ် ယေဆူ တီ။ 31 ခုဝ် အန် တီ အီမာယ် လုဝ် လေး ခဲင် ကာင် ဂုန့် မာ အန်၊ ဝီ ဟာဝ် ကွယ် ရိုမ် ဒူပ် အီဘိုန့် အန် ဆေဆေ။ ပါယ် တီ ဂါယ် အာ ဝီ ဘဲန် ပီ ဒုဝ် အူ ဘူင့်။ 32 ဒူအီ တူ ဒွိုမ် နပ် ဆီချာ လွင် ဒါင် အန် တီ။ အာဝ် ငှိုယ် ကာလှုး ဒီ နဝ်း။ အုဝ် ယီ ကာလာင် လွင် ဇဝ် ယေဆူ ဘော ဖိုင် ဂေ ဒူအီ အီ ညှိုမ် အန်။ 33 ပီ တဝ်း အုဝ် ယီ ပါယ် နီ။ အီမာယ် ဒွန် အီ လုဝ် ရွက့် အီဘိုန့် အန်၊ တဲး န့ ပီ အန် ရွက့် ဒုဝ် ဘြိမ် အန်။ ဘော အီဘိုန့် လုဝ် ရုဝ်ဆေ အီမာယ် အန်။