ဘေ ဂွန်၊ ကူပ် ညှိုမ် ဘေ အန် ဇဝ်၊ ဘေ လုဝ် ထူမ် ဒူပ် ဂြုဝ်း ပီ ကာလာင် ဂုန့် မာ ဘေ။ ခုဝ်၊ ဟဲ့ ကာအာပ် ဘေ ဘူင် ပါယ် တီ။ 2 ဇဝ်ဖြာ ဟဲ့ တဝ်း၊ “တဲး ဘေ ရုဝ်ဆေ ဂုန့် မာ ဘေ။” ဒေါ ဒွါ ဇဝ်ဖြာ ဒါရာ ဘဲန် ညွင့် ဘဲန် ညွင့်၊ န့ မုး ညွင့် တီ ပီ ဒွါ ဒူပ် အန် ကာဒိက် ဆတ်ဇာ။ 3 ကာဒိက် ဆတ်ဇာ တီ တဝ်း၊ “တဲး ဘေ ပွိုန် ဒီ ကွယ် ဆီချာ ဘော ကွယ် လှေန့် ခဲင် မိူင် ပီ ဒွါ ဇဝ်ဖြာ ဒီ ဘေ။”

4 အီ မုး ဘေ ဂုန့်၊ ကွဲ့ ဘူင် တဲး န့ ဘဲန် နဝ်း လိုဝ် ဒီ ဂွန် ဘေ။ တဲး ဘေ ယီ လိုမ်လာ ယွတ် ဂွန် ဘေ၊ တဲး ဘေ ဘော မာနုဝ် ဘော ကာဆုး ဂေ ဘူင် နာ ဘွတ်၊ တဲး န့ ပီ ပီ အိုင် အန် ဇဝ်။

5 အာဆေ ဟဲ့ ဘဲန် မှာယ် အီ၊ အန် လုဝ် ထူမ် ဂြုဝ်း ဒါ ကာညာ အန်။ ဘေ လုဝ် မိုဝ်း နဝ်း ဆိူဝ် ဘော ရုဝ်ဆေ ဒါ ကာညာ ဘေ၊ တဲး န့ ပီ ဘေ ထူမ် ဂြုဝ်း ဇဝ် ယေဆူ။ 6 ကွဲ့ တဲး ဘေ ညိုင်ရာင် ဒီ ဘူင် နာ မွှိုမ် ဒေါ ယိုဝ် ဒါ ကာညာ ပီ ဘူင် ဘေ။ တဲး နဝ်း ဘေ ဆိူဝ် ဒီ ဘူင် ပီ အိုင် ဇဝ်ဖြာ။ တဲး န့ ပီ ဘေ မုး မှာယ် ဇဝ် ယေဆူ။ 7 တဲး ဘေ ဇွန်ဇူမ် ဒီ ဘူင် ဂါန် ဘေ။ ကွဲ့ မာတ် န့ မုး ဂါန် ဒူအီ၊ တဲး ဘေ မာတ် န့ မုး ဂါန် ဇဝ်ဖြာ။ 8 ပါယ် တီ ဘေ ဘော လုဝ် လှုဝ်း ဆေဆေ၊ ခဲ့ ပီ ဘူင် ဘေ နာ မွှိုမ်၊ အန် ဇဝ် ဒီ ဝီ ဒွါ ဒီ ဘေ နာ မွှိုမ် ခဲ့ တီ။ ဘော ဒူအီ အီ ဘဲန် မှာယ် အီ၊ ဘော ဒူအီ အီ ကွယ် ထင်ဟာင်၊ ဂေ ဒွန် အီ ဒီ ပွိုန် ခဲ့ တီ။

9 ဘေ အီ မုး ဒါ ကာညာ အီ၊ ဘေ ဘော လုဝ် ဘူင် နာ မွှိုမ် ဒီ ဂေ ဒူအီ ပီ အိုပ် ဘေ၊ ကွဲ့ တဲး ဘေ ခါနှာပ် ဂေ။ ဘေ လုဝ် လှုဝ်း၊ ဒါ ကာညာ ဘေ ဘော ဒါ ကာညာ ဂေ မုး အူ ကာဒင် အီ ကွယ် ခဲင် ဂါင်ဟြာဝ်။ ဆေ အန် ဒီ ဒမ် မှာပ် ဒီ အီ၊ အန် တူ တဝ်း ဒူအီ အူ ဝီ ဟဲ့ ဘွတ် လွှိုမ် ဒူအီ ပေါ အူ ဝီ။

10 ဟဲ့ ဟွတ့် ပန် တီ တဲး နဝ်း ဘေ မိုဝ်း ပ့လူမ် ဆေဆေ ကူပ် ညှိုမ် ဘေ ဇဝ်ဖြာ။ ဇဝ်ဖြာ ဒီ ဒွါ ပွုန် အန် ဒီ ဘေ၊ တဲး န့ ဘဲန် ပ့လူမ် ဒီ နဝ်း ဘေ။ 11 ဇဝ်ဖြာ ဟဲ့ ဒွါ ဒီ ဘေ ဘဲန် မျုဝ် ဘဲန် မျုဝ် အီ ပီ ခြိုင် တာ ဒါ ဆိုက်။ ခြိုင် တီ ဘေ လုဝ် စှိုပ်၊ တဲး န့ ဇေ့ဇုင်၊ ကွဲ့ တဲး န့ ဇုတ် မာဆေ။ ပါယ် တီ၊ ဘေ ပွိုန် ဒီ ရဲ နာ တူ မွှိုမ် ပီ ဆီ ဘူင် ဘုဝ် ကာနမ် ဒီ ဘေ။ 12 ခုဝ်၊ အာဝ် မုး အေ လုဝ် ကာဂုဝ်း ဒီ ဒူအီ၊ အေ လုဝ် ကာဂုဝ်း ဒီ ဘုဝ် ကာနမ် ဘော ကာနမ် အီ အိုပ် ကာဒါယ် အီ ဟာယ် ကာဆဝ်၊ အီ ကွယ် ခဲင် အပ် ဝွင့် ခဲင် ဘ့လေန့်။ 13 ခုဝ် အန် တီ ဘေ လုဝ် ဒိုဝ်း တူတ့် ဒွန် မျုဝ် ပီ ဒွါ ဇဝ်ဖြာ ဒီ အေ၊ အီ ပီ ခြိုင် တာ ဒါ ဆိုက်။ ဆေ ဘေ ဒိုဝ်း တာ တူတ့် ဇိုဝ် တီ၊ ဘေ ဒီ ဘော ပဲ တူတ့် ဒွန် မျုဝ်။ ဆေ ဟီ ဇမ် ဆီငဲ တူ မွှိုမ်၊ ဘေ ဒီ ဘော ပွိုန် ဒီ ရဲ ရန်ဆူ ဘေ။ ဘေ ဒီ ဘော ပဲ အန်၊ ကွဲ့ တဲး အန် ပဲ ဘေ။ 14 ခုဝ် အန် တီ ဘေ လုဝ် လှုဝ်း ဆေဆေ နာ မှာန် လွင် ဇဝ်ဖြာ၊ တဲး န့ ပီ ဒါ ဆိုက် စှိုပ် ဆဲ့ ဒီ ညွယ် အန်။ ခဲ့ ပီ ဘူင် ဘေ လုဝ် လေး နဝ်း ဆိူဝ်၊ တဲး န့ ဂွင့် ဘာင် နဝ်း ဘေ ပီ ဆီတုဝ် ဟိန် ပီ စှိုပ် ဒါ ဆိုက် ပဲ ဒီ ဂွင့် ဒုဝ် အန်။ 15 ဘေ ဘော လုဝ် မ့ပြာယ် အုန် နဝ်း ဘေ၊ တဲး ဘေ ဖြူမ် ဆေဆေ၊ တဲး ဘေ ပွိုန် ဒီ ကာလာင် လွင် ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ်၊ အာဝ် ဟူ ဘဲန် ရန်ဆူ ဇဝ်ဖြာ။ ဆေ ဘေ ဘူင် ပါယ် တီ၊ န့ ပီ ဒါ ဆိုက် ဟဲ့ စှိုပ် ခူဒိန့် အန်။ 16 ဘေ ဘော လုဝ် ညှိုမ် ဆီချာ ဇဝ်ဖြာ၊ တဲး န့ ပီ ဒါ ဆိုက် ဂူင့် မင် ဂွင့်။ ဆေ ရန်ဆူ ဘန့် ဘ့လာ အီ မိုဝ်း ငဝ်၊ မင် ဂွင့် တီ နပ် ဒီ ဘျတ် နပ် ဒီ ရဲ ဘ့လာ ငဝ် တီ။ 17 ဘေ ဘော လုဝ် နပ် ဆီချာ လွင် ဇဝ်ဖြာ ဟဲ့ ချွတ် ဘေ။ န့ ပီ ဒါ ဆိုက် ဟဲ့ စှိုပ် မာဂိန့် ဟိန် အန်။ ဘေ ဘော လုဝ် နပ် ဆီချာ ဂြုဝ်း ဇဝ်ဖြာ အီ ပီ မာပွါ့ လာင် ပီ တာ ဒါ ဆိုက်။ န့ ယီ မုး နဝ်း ဖွိုမ် ဇဝ်ဖြာ အီ တဲး ဘေ နပ် ဆီချာ ဂြုဝ်း ဇဝ်ဖြာ။ 18 ဒွန် ဇေန့် ဆေ ဘေ ဆာခိုဝ် ဒီ ဇဝ်ဖြာ ဘော မှာန့် မာဆေ ဒီ အန်၊ ဘေ လုဝ် တာ တူတ့် ဇိုဝ် တီ ဒွန် မျုဝ်။ န့ မုး နဝ်း ဖွိုမ် ဇဝ်ဖြာ အီ တဲး ဘေ ဆာခိုဝ် ပါယ် တီ။ ဘေ ဘော လုဝ် ဆာဒိက်၊ ဘ်ု ဆေဆေ၊ ဆာခိုဝ် ဒါင် ဒွန် အီ၊ အီ ညှိုမ် ဇဝ် ယေဆူ။

19 တဲး ဘေ ဆာခိုဝ် ဘော ဒါင် အုဝ်။ ဆာခိုဝ်၊ တဲး အုဝ် ပွိုန် ဒီ ကာလာင် ဆိူဝ် ဂြုဝ်း ဇဝ်ဖြာ ဒီ အီ၊ ကွဲ့ တဲး အုဝ် ယုဝ်၊ တဲး အုဝ် ပွိုန် ဒီ ကာလာင် ဒီ ဒူအီ ပီ ညှမ် နပ် ဂေ လွင် ဂြုဝ်း ဇဝ်ဖြာ အီ တဲး ဒူအီ ဘဲန် နဝ်း ဒါခိုယ်။ 20 ကူပ် ကာလာင် အုဝ် ဂြုဝ်း ဇဝ်ဖြာ၊ အုဝ် ကွယ် ခဲင် ကာပိုမ်။ တဲး ဘေ ဆာခိုဝ် ဒါင် အုဝ်၊ တဲး အုဝ် ယ ဒီ ကာလာင် ဒီ အီ ပီ ကာအာပ် အုဝ် ကာလာင်။

21 န့ ယီ မုး အာထူခိတ်၊ အန် မုး ဝါ ပီ ရွက့် အုဝ် ကူပ် ညှိုမ် အန် ဇဝ် ယေဆူ။ အန် ဘော စွယ် အုဝ် ဆေဆေ။ အန် ဒီ ဝီ ကာလာင် တူတ့် ဒွန် မျုဝ် ဒီ ဘေ လွင် အုဝ်။ အန် ဒီ တဲး ဘေ နပ် ပီ ပါယ် အုဝ် ဒီ ကွယ် ဒေါ တီ နီ။ 22 အုဝ် ဟဲ့ တိုယ် အန်၊ တဲး အန် ဟာဝ် ဇမ် ဒူင် ကွယ် ဘေ၊ တဲး အန် ခဲ ဒီ ဘေ လွင် အုဝ်၊ တဲး ဘေ နပ် တူတ့် ဒွန် မျုဝ်၊ တဲး န့ ဘဲန် နဝ်း ပ့လူမ် ဒီ ဘေ။

23 တဲး ဇဝ်ဖြာ ဒွါ နဝ်း ဂတ် ဂျီတ် ဒီ ဘေ အီ မုး ဘီနွင် ယေ။ တဲး ဘေ ဘော လာယ် ရွက့် ကူပ် ညှိုမ် ဘေ ဇဝ်ဖြာ အီ မုး ဂုန့် အေ။ တဲး ဘေ လာယ် ရွက့် ကူပ် ညှိုမ် ဘေ ဘော ဇဝ် ယေဆူ အီ မုး ဒါ ကာညာ အေ။ 24 တဲး ဇဝ်ဖြာ ဂေဇူ ဘေ ဒွန် အီ၊ အီ ရွက့် ဇဝ် ယေဆူ၊ အီ မိုဝ်း နဝ်း ဆိူဝ်၊ နဝ်း မှာန်။ ဆာတူ။

ခဲ့ တီ အုဝ် အာပေါလူ ဟဲ့ ဒဲမ် ဒီ ဘေ။