အုဝ် ဒဲမ် ဒီ ဘေ ပေါ အူ မျုဝ်။ အုဝ် ဆီ တဲး ဘေ ဘီနွင် ဘျုဝ် ဒါခိုယ် ကူပ် ညှိုမ် ဘေ ဒီ ဇဝ် ယေဆူ။ ဂြုဝ်း နီ န့ မုး ဂြုဝ်း ဘြိမ် ပီ ဝီ ဒဲမ် တိုယ် အုဝ် ဒီ ဘေ။ ပီ ဘော ဝီ ကာလာင် ဒီ ဘေ ပေါ အူ ဇေန့် မိူဝ်၊ န့ ယီ တူ ဘဲန် ဒုက် ဒီ နဝ်း အုဝ် ကူပ် ဟဲ့ နပ် အုဝ်၊ န့ ဒီ ဘဲန် အာဂျိုဝ် ဒီ ဘေ။

2 တဲး ဘေ ဆာဒိက် ဂေ အီ တူ ညှိုမ် ဇဝ်ဖြာ ဂေ အီ ပီ မာဆုဝ်။ တဲး ဘေ ဆာဒိက် ဂေ အီ ဘူင် နာ တူ ဘွတ် နာ တူ မွှိုမ်၊ ဂေ အီ ဆွာ့ ဝဲန် ဟုန် လခါနာ အီမာယ် ဒွန် အီ။ 3 အီ မုး အေ၊ အေ ဟဲ့ ဘူင် အီ မှာန် အာခါခ်ု ပီ ဆီ တဲး ဇဝ်ဖြာ အေ ဘူင် ဒေါ ဟဲ့ စ်ု အန် အေ ဆွာ့ ဝဲန် ဟုန် လခါနာ အီမာယ်။ အေ ဟဲ့ တဲး နဝ်း ဖွိုမ် ဇဝ်ဖြာ လိုပ် ခဲင် နဝ်း အေ၊ တဲး အေ ပွိုန် ဒီ ကြိုပ် ဇဝ်ဖြာ။ အေ မိူဝ် အိူပ် မျုက် မီ ဇဝ် ယေဆူ။ အေ မိူဝ် တူ ဘိုင် ဒုဝ် ဘြိမ် အေ၊ တူ ဒူပ် ပီ ဘူင် အီ ဟဝ် မီ ဒီ ဒုဝ် ဂေ။ 4 ဆေ ဟီ တဝ်း ဒီ ဘိုင် ဟိတ် ဘြိမ်၊ ဟဲ့ မုး အုဝ် နီ အီ ဟဲ့ ဒွိုမ် ဘိုင်။

ဆေ ဂေ အီ ဟဝ် တဝ်း၊ ဂေ ဟဲ့ ပွိုန် ဘိုင် ဒုဝ် ဘြိမ် ဂေ၊ အုဝ် ဟဲ့ ပွိုန် ဒီ ဘိုင် လွှိုမ် ဂေ။ 5 အုဝ် ဟဲ့ ခမ် ဒီ ဆွာ့ ဝဲန် ဟုန် လခါနာ ဆိန့် ဒေါ နုဝ့် အာဆာက် အုဝ် ဒါ ဆီငဲ။ အုဝ် ဟဲ့ မုး ဒူအီ အီဆာရေလ ခဲင် ခြိုဝ် အာဘေန်ယာမ်။ အုဝ် ဟဲ့ မုး ဒူအီ ဟဲဘြဲ၊ ဟဲ့ ဂွိုတ် ဒီ ဒူအီ ဟဲဘြဲ။ လွင် ဒူပ် ဒါရာ မိူဝ်၊ အုဝ် ဟဲ့ ဒူပ် ပီ ဒူအီ ဖိုင် ဖာရီဆဲ။ 6 လွင် ဂျုဝ်ဂျာ ဒီ ဘူင် ပီ အိုင် ဇဝ်ဖြာ မိူဝ်၊ ဟဲ့ မုး အုဝ် အီ ဘူင် နာ စီစိဝ် ဒီ ဂေ ဒူအီ ခဲင် ဖိုင် ဇဝ် ယေဆူ။ လွင် ဘူင် နာ မုး နာ မှာန် အီ ဒူပ် ဒါရာ မိူဝ်၊ ဟဲ့ မုး အုဝ် အီ ဘူင် တူတ့်၊ တူ တဲး န့ လုတ့် ဒါရာ။

7 အာဂျိုဝ် ပဲ့ ဟဲ့ ဘူင် အုဝ် ဇိုဝ် တီ၊ အာဝ် ဟူ ဘဲန် အာဂျိုဝ် မာဆေ ဒီ အုဝ် ဒေါ တီ နီ။ ခုဝ်၊ အုဝ် ဟဲ့ ဝီ ညှိုမ် ဇဝ် ယေဆူ။ 8 ဒဲင် တီ၊ အာဂျိုဝ် ဇိုဝ် တီ ဒွန် မျုဝ်၊ အုဝ် ဟဲ့ မာတ် န့ ဟဲ့ စှိုမ် တူတ့်။ ခုဝ်၊ ဇဝ်ဖြာ ဟဲ့ တဲး အုဝ် ဝီ နပ် ဇဝ် ယေဆူ အီ ဟဲ့ မွှိုမ် လွှိုမ် တူတ့် ဒွန် မျုဝ်။ ကူပ် ဟဲ့ ဒွါ အန် ဇဝ် အာဂျိုဝ် ဇိုဝ် တီ၊ အုဝ် ဝဲန် တူတ့် အီ ဒူပ် ဒုဝ် ဘြိမ် အုဝ်။ အုဝ် ဟဲ့ မာတ် ဇိုဝ် တီ ဘဲန် အီ မွှိုမ် ကာအိး မွှိုမ် ကာဒါတ့် ကူပ် ဝီ ဆီ ပွိုန် အုဝ် အာဂျိုဝ် ပီ ဒွါ ဇဝ် ယေဆူ။ 9 အီ တဲး အုဝ် ပွိုန် ဒီ ကွယ် ကာဒိုက် ကာဒဝ့် ဒီ အန်၊ အာဝ် မုး ကူပ် ဒူပ် အုဝ် ဒါရာ အီ တဲး အုဝ် မိုဝ်း နဝ်း ဆိူဝ် နဝ်း မှာန်။ န့ မုး ကူပ် ညှိုမ် အုဝ် ဇဝ် ယေဆူ။ ဇဝ်ဖြာ မိူဝ် ဟဲ့ ဒွါ နဝ်း ဆိူဝ် နဝ်း မှာန် ဒီ အုဝ် ကူပ် ညှိုမ် အုဝ် ဒီ အန်။ 10 အုဝ် မိူဝ် ဆီ နပ် ဇဝ် ယေဆူ ဘော ပွုန် ဇဝ်ဖြာ အီ တဲး ဇဝ် ယေဆူ ဝီ ယိတ့် ဝီ အိမ်။ အုဝ် မိူဝ် ဆီ ခမ် ဒုက် ခမ် ညှာပ် ဒူပ် အန်။ အုဝ် မိူဝ် ဆီ ခမ် ဒီ ယမ် ပီ အန် ဇဝ် ဟဲ့ ခမ် ဒီ ယမ်။ 11 ဝါယ် အန် တီ အုဝ် မိူဝ် ဆီ ဝီ ယိတ့် ဝီ အိမ် ပီ အန်။

12 အုဝ် တူ တဝ်း၊ န့ ဟဲ့ ဘဲန် တူတ့် ဒီ အုဝ် ဒွန် မျုဝ်။ ပီ ဘူင် ဇဝ်ဖြာ ခဲင် နဝ်း အုဝ် န့ ညှမ် ဇေ့ဇုင် တူတ့် ဒွန် မျုဝ်။ အုဝ် ယီ ဂျုဝ်ဂျာ ဒီ ဘူင် ဟာဝ်၊ တဲး အုဝ် ပွိုန် ဒီ ဘဲန် ပီ ဆီ တဲး ဇဝ် ယေဆူ အုဝ် ဘဲန် ဒေါ ဟဲ့ ရဝ်း အန် ဒီ အုဝ်။ 13 အိုယ် ဘေ ဘီနွင်၊ အုဝ် တူ ထာင် ဟဲ့ ဟွတ့် တူတ့် ခဲ့ ပီ လုဝ် ဘူင် အုဝ်။ န့ ယီ မိုဝ်း အူ မျုဝ် ပီ ဘူင် အုဝ်။ အုဝ် တူ လှုဝ်း၊ တူ ဇေန့်ဇာ အီ ဟဲ့ ပွုန် နာ ပန်။ အုဝ် ဝီ ဇေန့်ဇာ ယွတ် မီ အီ ကွယ် နာ အာတ့်။ 14 ပါယ် တီ၊ န့ ပီ အုဝ် ကာဘ့လဲပ် ဟာဝ် ဆိူဝ် ဆိူဝ် ဒူင် ကွယ် ရွင့် လွှက့်၊ တဲး အုဝ် ပွိုန် ရုး ပီ ဒီ ဒွါ ဇဝ်ဖြာ ဒီ အုဝ်။ အန် ဟဲ့ ဒဲ့ အုဝ်၊ တဲး အုဝ် ဟုဝ့် ဂါင်ဟြာဝ်။ ခုဝ်၊ ဇဝ် ယေဆူ ဟဲ့ ခမ် ဒီ ယမ် ကာဒါင် အုဝ်။

15 ခုဝ် အန် တီ အေ အီ ဟဲ့ ညှိုမ် ဆီချာ အီ ပီ ဒူအီ တာင်၊ အေ လုဝ် ခတ် နဝ်း ဒီ ဘူင် ပါယ် တီ။ ဆေ ဘေ ဝီ ကာဖာ ပေါ အူ မျုဝ်၊ ဇဝ်ဖြာ မိူဝ် ဒီ ဘျ တဲး န့ လိုဝ်း ဆီချာ ဒီ ဘေ လွင် အန် တီ။ 16 အူ မျုဝ် ယီ ဟဲ့ အာရေ တာင်။ အေ လုဝ် ဘူင် ဒူပ် ခဲ့ ပီ ဟဲ့ နပ် အေ။

17 အိုယ် ဘေ ဘီနွင်၊ တဲး ဘေ ကာဖြူမ် ဒီ ညိုင် အုဝ်။ တဲး ဘေ ယွတ် ဘော ဂေ အီ ဟဲ့ ညိုင် ပီ ဘျ ယေ ဒီ ဂေ။ 18 ခုဝ်၊ ဟဲ့ မိုဝ်း ဘဲန် ဝီ ဘဲန် ဝီ၊ ပီ ဘူင် ဂေ ဟဲ့ ပီ ဂေ ဘဲန် ရန်ဆူ ဇဝ် ယေဆူ။ ဂေ တူ အိုင် ဒီ ဒူပ် အန် ကူပ် ခမ် အန် ဒီ ယမ် ဒဲင် ရွင့် ကာဝဲ့။ လွင် အန် တီ၊ အုဝ် ဟဲ့ ကာလာင် ဆေဆေ၊ ဟဲ့ ကာလာင် ဘဲန် ဇေန့် ဘဲန် ဇေန့် ဒီ ဘေ။ အုဝ် ဝီ ကာလာင် ဒီ ဘေ ဒေါ တီ နီ။ န့ ဘော တဲး ဘော အိုမ် ငါယ် အုဝ် စုဝ်း။ 19 ဂေ ဟီ ဇမ် ဒီ ကာဒဲ့ န့တေန့် ပီ ဒူပ် ဂေ၊ ဂေ ဒီ လိုဝ် စှိုမ် တူတ့်။ ဂေ ဘော တဲး ဝတ့် ဂေ ဘဲန် ဇဝ်ဖြာ ဂေ။ ဂေ ဘော ပီဖုင် ဂေ ကူပ် ဘူင် ဂေ အီ မွှိုမ် ဆာယ်။ ဂေ ဘော ကာဒိုက် ကာဒဝ့် မီ ကြုဝ် ဒဲင် ကာဒါယ် နီ။ 20 အီ မုး အေ၊ အေ ယီ မုး ဒူအီ အီ ပွိုန် ကွယ် ခဲင် မိူင် ဂါင်ဟြာဝ်။ ပီ နှဝ့် န့ဒဝ့် ပီ လှုဝ်း အေ ဆေဆေ၊ ဘော မုး ပန် ဒီ ဝီ တး လူင် ဇဝ် ယေဆူ အီ မုး အန် ဇဝ် အီ ချွတ် အေ။ 21 အန် ဇဝ် တီ၊ အန် ဟဲ့ မိုဝ်း ပွုန် အီ တဲး အန် အိုပ် တူတ့် ဒွန် မျုဝ်။ အန် ဒီ ဘော ကာပ့လု ဒုဝ် ဘူင့် အေ အီ ဒီလှး န့စမ်။ အန် ဒီ တဲး ဒုဝ် ဘူင့် အေ တီ ဝီ ပီ ဒုဝ် ဘူင့် အန် အီ ဟဲ့ မိုဝ်း ဆာရေ၊ မိုဝ်း ဘော အာဖုင် ဒင်ခုဝ်။