အိုယ် ဘေ ဘီနွင်၊ ဘေ မုး ဒူအီ ပီ ရွက့် အုဝ်၊ ပီ ဒီကေန် ကာဆဝ် အုဝ်။ ဘေ ဘော မုး အီ တဲး နဝ်း အုဝ် ဒါခိုယ်၊ ဟဲ့ ဘဲန် ရုး ဂါန် ပီ ဘူင် အုဝ်။ ခုဝ်၊ တဲး ဘေ ဘီနွင် ပီ ရွက့် အုဝ် ညှိုမ် ဘိုင် ဆီချာ ဇဝ်ဖြာ၊ တဲး န့ ပီ ပီ ကာလာင် အုဝ် တီ။

2 အုဝ် ယီ ကာဆုး နာင် အေဝုဝ်ဒီ ဘော နာင် ဆုန်ဒူက်၊ တဲး ဂါယ် ဝီ လာယ် ဖြူမ် ရိုမ် ကူပ် ညှိုမ် ဂါယ် ဒီ ဇဝ် ယေဆူ။ 3 ဘော မဲ အီ ဘူင် ခါခ်ု ဂါန် ရိုမ် ဒူပ် အုဝ်၊ အီ မုး ဘော ဂိုက် အုဝ်၊ အုဝ် မှာန့်၊ တဲး မဲ စွယ် အီဘိုန့် ဂါယ် အာ ဝီ တီ။ ခုဝ်၊ ဂါယ် ဟဲ့ ဘူင် ရိုမ် ဂါန် ဒူပ် အုဝ်၊ ကာလာင် လွင် ဇဝ်ဖြာ အီ တဲး နဝ်း ဒူအီ ဒါခိုယ်။ ဂါယ် ဟဲ့ ဘူင် ရိုမ် ဂါန် ဘော ဒူပ် အာကာလေမိန် ဘော ဂေ အီ ဟဝ် အီ ဟဲ့ ကွယ် ရိုမ် ဒူပ် အုဝ်။ စိူဝ် ဂေ ဒွန် အီ ဟဲ့ ဟွတ့် ဒဲမ် အုန် ခဲင် ဘပ် ဇာရာင် ဂေ ဒူအီ အီ ပွိုန် အာဆာက် ကာမာယ်။

4 တဲး ဘေ ခူယ် ဒါခိုယ် ကူပ် ညှိုမ် ဘေ ဒီ ဇဝ် ယေဆူ။ ပေါ အူ ဇေန့် အုဝ် တဝ်း၊ တဲး ဘေ ခူယ် ဒါခိုယ်။ 5 တဲး ဒူအီ ဒွန် အီ ကော ယိုဝ်၊ ဘေ ဟဲ့ မိုဝ်း နဝ်း န့စု န့စမ်။ ဇဝ်ဖြာ ဟဲ့ ကွယ် ကာတတ် ဘေ။

6 ကွဲ့ တဲး ဘေ မိုဝ်း နဝ်း ကာဟွာ့ ခေါ အူ မျုဝ်။ တဲး ဘေ ယီ မှာန့် ဒီ ဇဝ်ဖြာ ခဲ့ ပီ လုဝ် ဘေ။ ဒေါ ဆာခိုဝ် မှာန့် ဘေ ဒွန် မျုဝ်၊ တဲး ဘေ ယီ ကာလာင် ဘော ဂုင် ဂေဇူ ဒီ အန် ဇဝ်။ 7 ဆေ ဘေ ဘူင် ပါယ် တီ၊ နဝ်း ဂျီတ် ပီ ဒွါ ဇဝ်ဖြာ ပီ တူ ပွိုန် ဇေန့်ဇာ အာငျာန် ဒူအီ၊ န့ ဒီ ဘ်ု နဝ်း ဖွိုမ် ဘေ၊ တဲး န့ ကာဒိုက် ကာဒဝ့် ဒီ ဇဝ် ယေဆူ။

8 အိုယ် ဘေ ဘီနွင်၊ အုဝ် ဆီ ကာလာင် ပေါ အူ မျုဝ် ဒီ ဘေ။ ခဲ့ မိုဝ်း အီ မုး အီ မှာန် အာခါခ်ု၊ ခဲ့ မိုဝ်း အီ မွှိုမ်၊ ဘော အီ ဆိူဝ် ဆိူဝ် မှာန် မှာန်၊ ခဲ့ မိုဝ်း အီ ဆီငါ ဘွတ် ဘော အီ မွှိုမ် ရွက့်၊ အီ ကာအာပ် ရုဝ်ဆေ၊ ခဲ့ မိုဝ်း အီ ဘွတ် အီ မွှိုမ်၊ အီ ဟဲ့ ကာအာပ် အိူပ် မျုက်၊ တဲး ဘေ ကာဒွါ့ ကာဖာ လွင် အန် တီ ခဲင် နဝ်း ဘေ။ 9 တဲး ဘေ ဘူင် ဒူပ် ပဲ့ ဟဲ့ ဒွိုမ် ဟေန် ဘေ ဒီ အုဝ်။ န့ ဘော မုး ဂြုဝ်း ပီ ကာလာင် အုဝ် ဒီ ဘေ၊ ဘော မုး ပီ ယိုဝ် ဘေ အုဝ် ဘူင်၊ တဲး ဘေ ဘူင် ဒူပ် ဇိုဝ် တီ ဒွန် မျုဝ်။ ပါယ် တီ၊ ဇဝ်ဖြာ အီ နပ် ဒီ ဒွါ နဝ်း ဂျီတ်၊ အန် ဒီ ကွယ် ရိုမ် ဒူပ် ဘေ။

10 ဒေါ တီ နီ၊ ဇဝ်ဖြာ ဟဲ့ ဝီ တဲး နဝ်း အုဝ် ခူယ် ကာဆဝ်။ ခုဝ်၊ ဘေ ဟဲ့ ဝီ မိုဝ်း နဝ်း ဆီ နမ်လှုဝ်း အုဝ်။ အာတ့် နီ၊ အာဝ် မုး ဘေ တူ နမ်လှုဝ်း အုဝ်၊ ဘေ ယီ တူ ပွိုန် စွယ် မာဆေ ဒီ အုဝ်။

11 အုဝ် ကာလာင် ပါယ် တီ၊ အာဝ် မုး ကူပ် ဟဲ့ ဇုတ် လုတ် အုဝ်၊ တူ မိုဝ်း မာဆေ။ အုဝ် ဟဲ့ ဟွတ့် ဒွိုမ် ခြူ တး၊ အုဝ် မိုဝ်း ခဲ့ မှဝ်၊ နဝ်း အုဝ် ဒါခိုယ် ခဲ့ တီ။ 12 အုဝ် ဟဲ့ ဒွိုမ် ခမ် ဘဲန် မျုဝ် ဘဲန် မျုဝ်။ အုဝ် ဟဲ့ ဒွိုမ် ကာဒုး တူ မိုဝ်း မာဆေ ခေါ အူ မျုဝ်၊ ပီ ဝီ မိုဝ်း ဇေ့ဇုင် တူတ့် ဒွန် မျုဝ်။ အုဝ် ဟဲ့ ဒွိုမ် အေတ့် ပီ ဒီ ဟူမ်၊ ပီ ဝီ မိုဝ်း ဒီ ဟူမ် ကော ဖဲ။ အုဝ် ဟဲ့ ဒွိုမ် မိုဝ်း ကြုဝ်ကြာမ် ကိူန်၊ ပီ ဝီ ဘဲန် ဒူအီ ဂိန် ကာဆဝ်။ န့ ဘော ဘဲန် ဇိုဝ် မှဝ် ဒီ အုဝ် မိူဝ်၊ န့ ဟဲ့ မာနုဝ် အုဝ်၊ တဲး နဝ်း အုဝ် ဒါခိုယ် ပါယ် တီ။ 13 အုဝ် ပွိုန် ဘူင် တူတ့် ဒွန် မျုဝ်။ ခုဝ်၊ ဇဝ် ယေဆူ တဲး ဟဲန့် ဒီ အုဝ်။

14 မာလဲ၊ ပဲ့ ဟဲ့ စွယ် ဘေ ဒီ အုဝ် ဒေါ ဟဲ့ ဒုက် ဟဲ့ ညှာပ် အုဝ်၊ ဟဲ့ မုး အီ ဘွတ် အီ မွှိုမ်။ 15 ဘေ ဒူအီ အီ ကွယ် ခဲင် မိူင် ဖီလီဖီ၊ ဘေ မိူဝ် ဟဲ့ ဟွတ့် နပ်၊ ဆိန့် ဒေါ ဂုဝ် ဒေါ ကာစုး အုဝ် ဒီ ကာလာင် လွင် ဇဝ်ဖြာ အီ တဲး နဝ်း ဒူအီ ဒါခိုယ် ဒေါ လေး တး အုဝ် ခဲင် အိူင် မာခေဒူန် တွိုန်၊ အာဝ် မိုဝ်း ဖိုင် ဇဝ် ယေဆူ ဒီ မှဝ် အီ ခမ် ဒီ လှူ ဒီ စွယ် အုဝ်၊ န့ မိုဝ်း မီ ဖိုင် ဘေ အူ ဖိုင် အီ စွယ် အုဝ် ပါယ် တီ။ 16 ဒေါ ကွယ် အုဝ် ခဲင် မိူင် ထေဆာလူန် တွိုန်၊ ဒေါ မိုဝ်း အုဝ် ပီ ဒီ လုဝ် ဘဲန် မျုဝ် ဘဲန် မျုဝ်၊ ဘေ မိူဝ် ဟဲ့ ဒွိုမ် တိုယ် တး ရွိုန် ဒီ အုဝ် ဘဲန် ဇေန့် ဘဲန် ဇေန့်။ 17 အုဝ် တူ ကာလာင် ပါယ် တီ ကူပ် ဆီ ပွိုန် အုဝ် ရွိုန် ပီ လှူ ဘေ။ အုဝ် ယီ ဆီ တဲး ဘေ ပွိုန် အာဂျိုဝ် ပေါ န့ ပွါ။ 18 ဒေါ တီ နီ အုဝ် ဟဲ့ ပွိုန် ဒီ ဒိုဝ်း တူတ့် ခဲ့ ပီ တိုယ် တး ဘေ ဒီ အုဝ်။ န့ ကော ဟဲ့ ဝီ ကာလွှိုမ် ခဲ့ ပီ လုဝ် အုဝ်။ အာအေပါဖော ဟဲ့ ဒိုဝ်း တး ဒွါ တူတ့် ဒီ အုဝ် ခဲ့ ပီ လှူ ဘေ။ န့ ဟဲ့ ဂြုဝ် ခဲ့ ပီ လုဝ် အုဝ်။ ပီ လှူ ဘေ တီ၊ န့ ဟဲ့ ဘဲန် ပီ လှူ အီ အုး ငှုန် ဒီ ဇဝ်ဖြာ။ န့ ဟဲ့ လဝ့် ကာဆဝ် နဝ်း အန်။

19 ကူပ် ညှိုမ် ဘေ ဇဝ် ယေဆူ၊ ဇဝ်ဖြာ ပီ ကြိုပ် အုဝ်၊ အန် ဒီ ဒွါ တူတ့် ဒွန် မျုဝ် ခဲ့ ပီ လုဝ် ဘေ။ အန် မုး ဇဝ်ဖြာ အီ မိုဝ်း အာဖုင် ဒင်ခုဝ် ဘော မိုဝ်း ဒီ ဒွါ ဒီ အီ ဆေဆေ။

20 အေ အိူပ် ဇဝ်ဖြာ အီ မုး ဂုန့် အေ၊ အီ မိုဝ်း အာဖုင် ဒင်ခုဝ် တာင် ဘော ကွယ် ဆေဆေ ဒွန် စုဝ် ဒွန် ဘာန်။ ဆာတူ။

21 အုဝ် နမ်လှုဝ်း ဘေ ဒူအီ အီ ဆီငါ ဘွတ် အီ ညှိုမ် ဇဝ် ယေဆူ ဒွန် အီ။ ဘော ဂေ ဘီနွင် အီ ကွယ် ရိုမ် ဒူပ် အုဝ် ဒီ နီ၊ ဘော ဂေ ဟဲ့ နမ်လှုဝ်း ဘေ။ 22 ဘော ဂေ ဒူအီ အီ ဆီငါ ဘွတ် ဘောကာဂ့လျီတ် ဟဲ့ နမ်လှုဝ်း ဘေ။ န့ ယီ မုး ဂေ အီ ဘူင် ဂါန် ခဲင် ဟုဝ် ခုန်ဒီခမ် အာကဲဆာ တွိုန်၊ ဂေ ဟဲ့ နမ်လှုဝ်း ကာဆဝ် ဘေ။

23 တဲး ဇဝ်ဖြာ ဘော ဇဝ် ယေဆူ ဂေဇူ ဘော နဝ်း ဘော ဖွိုမ် ဘေ ဒွန် အီ။ ဆာတူ။