အုဝ် ဆီ တဲး ဘေ နပ် ခဲ့ ဟဲ့ ဂျုဝ်ဂျာ အုဝ် ဒီ ဘူင် ဂါန် အာဒါ ဘေ၊ ဘော အာဒါ ဂေ ဘီနွင် အီ ကွယ် ခဲင် မိူင် လောဒီကီ၊ ဘော အာဒါ ဂေ ဘီနွင် အီ ညှမ် ဒွိုမ် ယိုဝ် အုဝ် ခေါ အူ ဇေန့်။ 2 အုဝ် ဂျုဝ်ဂျာ ပါယ် တီ၊ တဲး ဂေ မိုဝ်း နဝ်း ပ့လူမ်၊ တဲး ဂေ လာယ် ဖြူမ် ရိုမ်၊ ဘဲန် အူ နဝ်း ကူပ် လာယ် ရွက့် ဂေ။ ဂေ ဒီ ဘော ပွိုန် အာငျာန် အီ ဘွတ်၊ အီ ဇေ့ဇုင်၊ တဲး ဂေ ဘော နပ် ပီ တူ ဒွိုမ် ကာလာင် ဇဝ်ဖြာ ဒီ အီ။ ပီ တူ ဒွိုမ် ကာလာင် ဇဝ်ဖြာ တီ၊ မုး လွင် ဇဝ် ယေဆူ။ 3 န့ မုး ဇဝ် ယေဆူ တီ၊ အီ ဟဲ့ နပ် တူတ့် ဒွန် မျုဝ် လွင် အာငျာန် ဇဝ်ဖြာ ဘော လွင် ပီ ပါယ် ဘဲန် မျုဝ် ဘဲန် မျုဝ်။ 4 အုဝ် ကာလာင် တဲး ဘေ နပ် လွင် အန် တီ။ ကွဲ့ တဲး န့ မိုဝ်း အာဆေ ပွိုန် ဒီ ကဝ်၊ ပွိုန် ဒီ ကာလုဝ် ဘေ။ 5 အုဝ် ပီ ဘော ဟဲ့ ကွယ် တူင့် ဘေ မိူဝ်၊ နဝ်း ဖွိုမ် အုဝ် ယီ ကွယ် ရိုမ် ဒူပ် ဘေ။ အုဝ် ဟဲ့ ခူယ် ကာဆဝ် ကူပ် ဟဲ့ ယိုဝ် အုဝ် လွင် ဟဲ့ နပ် ဘေ ဒီ ဘူင် တူတ့် ဒွန် မျုဝ် တဲး န့ မွှိုမ်၊ တဲး န့ ဆီချာ။ အုဝ် မိူဝ် ဟဲ့ ဒါခိုယ် ကူပ် ယိုဝ် အုဝ် လွင် နဝ်း ညှိုမ် ဘေ ဒီ ဇဝ် ယေဆူ၊ န့ ဟဲ့ မန် ဆီချာ။

6 ခုဝ် အန် တီ တဲး ဘေ ဘော ဘူင် ဟာဝ် ပါယ် တီ။ ဘေ မိူဝ် ဟဲ့ ဟွတ့် ဘာင် ဇဝ် ယေဆူ အိုပ် နဝ်း ဘေ။ ပါယ် တီ၊ ဘေ ဘော လုဝ် ဘူင် ဒူပ် ပီ တဝ်း အန် ဆေဆေ။ 7 တဲး ဘေ ညှိုမ် ဆီချာ ဇဝ် ယေဆူ၊ တဲး န့ ပီ ရျီး ဟေ အီ ကွယ် ခဲင် ကာဒါယ်၊ အီ တဲး ဟေ ကြဲ ဒီ တာင်။ တဲး နဝ်း ညှိုမ် ဘေ မန် ဆီချာ၊ တဲး န့ ဒူပ် ပီ မာနုဝ် ယေ ဒီ ဘေ။ တဲး ဘေ ဘော အိူပ် ဘော ဒါင် ဂုင် ဂေဇူ ဒီ ဇဝ်ဖြာ ဆေဆေ။

8 တဲး ဘေ ဆာဒိက်၊ ကွဲ့ တဲး န့ မိုဝ်း အာဆေ အီ ပဲ ဒီ ကာလာင် တဲး ပီ မာနုဝ် ဒူအီ ဝီ အိုပ် ဘေ။ ပီ မာနုဝ် ဇိုဝ် တီ၊ န့ တူ မုး ပီ မာနုဝ် ဇဝ် ယေဆူ။ န့ တူ မှာန်။ န့ မိူဝ် တူ မိုဝ်း ဒီခုဝ်။ န့ ဒူပ် ဟိတ် ဂေ ဒူအီ ဘော ပီ မာနုဝ် ကာနမ် အီ အိုပ် ကာဒါယ် နီ။

9 ခုဝ်၊ ခဲ့ ဘော မိုဝ်း အီ ကွယ် ဒီ ဇဝ်ဖြာ ဒွန် မျုဝ်၊ န့ ဟဲ့ ကွယ် တူတ့် ဒူပ် ဇဝ် ယေဆူ ဒေါ ကွယ် အန် ဒဲင် ကာဒါယ် နီ။ 10 ဘော ဘေ ဟဲ့ ပွိုန် တူတ့် ဇိုဝ် တီ ဒွန် မျုဝ် ဒေါ ကွယ် ရိုမ် ဘေ ဒူပ် ဇဝ် ယေဆူ။ အန် ဟဲ့ အိုပ် တူတ့် ဒွန် မျုဝ် ခဲ့ ကွယ် အာမျုဝ် အီ မိုဝ်း ပွုန် အီ ပွိုန် ဒီ အိုပ် ဒူအီ။ 11 ကူပ် ညှိုမ် ဘေ ဒီ ဇဝ် ယေဆူ တီ၊ ဘေ အာဝ် ဟူ လုဝ် တဲး ဒူအီ ဆွာ့ ဝဲန် ဟုန် လခါနာ ဘေ။ ဘေ ဟဲ့ ဟွတ့် ဝဲန် ဒုဝ် ဘြိမ် ဘေ၊ ဒူပ် ဇဝ် ယေဆူ။ န့ ပီ ဇဝ် ယေဆူ ဟဲ့ ဆွာ့ ဝဲန် နဝ်း ဘြိမ် အီ နပ် ဒီ ဘူင် မှာပ် ဆေဆေ။

12 ဒေါ စိုပ် ဘေ ခဲင် အိုမ်၊ န့ ပီ ဘေ ဟဲ့ ခမ် ဒီ ယမ် ဒူပ် ဇဝ် ယေဆူ။ ဒေါ အန် တီ န့ ဘော ပီ ဘေ ဟဲ့ ဝီ ယိတ့် ဝီ အိမ် ဒူပ် ဇဝ် ယေဆူ။ ကူပ် ညှိုမ် ဘေ အာဖုင် ဒင်ခုဝ် ဇဝ်ဖြာ အီ ဟဲ့ တဲး ဇဝ် ယေဆူ ဝီ ယိတ့် ဝီ အိမ်၊ ဘော ဘေ ဟဲ့ ပွိုန် အာဆာက် ကာမာယ်။ 13 အာတ့် နီ ဘေ ဟဲ့ ပီ ဒူအီ ယမ် ကူပ် မှာပ် ပဲ့ ဟဲ့ ဘူင် ဘေ။ ဘေ မိူဝ် ညှမ် ဝဲန် ဒုဝ် ဘြိမ် ဘေ။ ခုဝ်၊ န့ ပီ ဘေ တူ ခမ် ဒီ ဆွာ့ ဝဲန် ဟုန် လခါနာ ဘေ။ ဒေါ တီ နီ ဇဝ်ဖြာ ယီ ဟဲ့ ဟွတ့် ဝီ ဒွါ အာဆာက် ကာမာယ် ဒီ ဘေ၊ တဲး ဘေ ကွယ် ရိုမ် ဒူပ် ဇဝ် ယေဆူ။ အန် ဟဲ့ ဂဝ်း ဝဲန် မှာပ် အေ ဘောကာဂ့လျီတ်။ 14 အန် ဟဲ့ ဟွတ့် ဘျတ် ဝဲန် ဇာရာင် မှာပ် အေ၊ အီ ဒဲမ် ခဲ့ တူ ဒူပ် အေ ဒါရာ။ န့ ပီ အန် ဟဲ့ ဝီ ဒိုဝ်း ဇာရာင် တီ၊ ဝီ ဒွက် ဒီ ရွင့် ကာဝဲ့။ 15 ဒေါ ခမ် အန် ဒီ ယမ် ဒဲင် ရွင့် ကာဝဲ့ တီ၊ ဇဝ် ယေဆူ ဟဲ့ အွင် တူတ့် ကာနမ် အီ မိုဝ်း ပွုန်၊ အီ ပွိုန် ဒီ အိုပ် ဒူအီ။ အန် ဟဲ့ ပက် ဂေ၊ ဝီ ဘျ တဲး ဒွန် အီ ပွိုန် ဒီ ယိုဝ် လွင် ဇဝ် ယေဆူ ဟဲ့ ပဲ ဂေ။

16 ကူပ် န့ ပါယ် တီ၊ ကွဲ့ တဲး ဘေ ညှိုမ် အာဆေ အီ တဝ်း ဘေ မိုဝ်း မှာပ် ကူပ် ပီ ဒီ ဟူမ် ဘေ။ ကွဲ့ တဲး အာဆေ စ်ု ဘေ ကမ် ဆီငဲ ကဲမ် ဆိန့်၊ ဆီငဲ ဆာဒါင်၊ ဆီငဲ လိူန်လပ်၊ လိူန်မူန်။ 17 လွင် ဇိုဝ် တီ၊ န့ ဘဲန် မီ အူဖာမာ အီ ဒီ ဘဲန် နာ အာတ့် နီ ဟာဝ်။ အီ ဇဲတ်၊ အီ မှာန် အာခါခ်ု ယီ ကွယ် ဒီ ဇဝ် ယေဆူ။ 18 ကွဲ့ တဲး န့ မိုဝ်း ခေါ အူ ဝီ အီ ပဲ ဒီ ဖာတ် ဒိုဝ်း အာဂျိုဝ် ပီ ဒီ ပွိုန် ဘေ။ ဒူအီ ဇိုဝ် တီ၊ အန် နပ် ဒီ ညိုင်ရာင် မိုဝ်း နဝ်း ဂူမ် ဘော အိုင် ဒီ ကြိုပ် အာမူ အာမာတ် ဇဝ်ဖြာ။ အန် ဘော နပ် ဒီ ခဲ ဘဲန် မျုဝ် ဘဲန် မျုဝ် လွင် လက်ဆာနာ အီ ဘွတ် ပဲ့ ဟဲ့ ယိုဝ် အန်။ အန် ဘော ပီခိုက် နဝ်း အန်၊ ယီ တူ နပ် မာဆေ လွင် နဝ်း ဖွိုမ် ဇဝ်ဖြာ။ အန် ဘော ဒူပ် ပီ ကာဖာ ဒူအီ၊ အီ တူ မိုဝ်း ဒီခုဝ်။ 19 ဒူအီ တီ၊ အန် အာဝ် ဟူ ဘိုင် ဇဝ် ယေဆူ အီ ပီ ဂိန့် အေ။ ဂိန့် တီ ဘော တဲး ဒုဝ် ဘူင့် ဘော ဒုဝ် ဟြေး တာင်။ ကူပ် မိုဝ်း ဒူင် ကာဒုတ့် ကာဆွင့် ကာအာင် ဒွန် ပ့လုဝ့်၊ ကူပ် မိုဝ်း ဆီန အီ တဲး န့ လာယ် ကာဒိုက်၊ ဒုဝ် တီ မိုဝ်း ပ့လူမ်။ ဇဝ်ဖြာ ဘော ဘူင် တဲး ဒုဝ် တီ ကြဲ ဒီ ဟြေး၊ ကြဲ ဒီ တာင်။

20 န့ ပီ ဘေ ဟဲ့ ဟွတ့် ယမ် ဒူပ် ဇဝ် ယေဆူ။ ခုဝ်၊ ကာနမ် အီ အိုပ် ကာဒါယ် မိူဝ် ဟူ ပွိုန် ဒီ အိုပ် ဘေ။ ဆေ န့ ပါယ် တီ၊ မှဝ် န့ ပါယ် ပီ ဝီ ဘူင် ဘေ ခဲ့ ပီ ဒွိုမ် ဘူင် ဘေ အာတ့် နီ။း မှဝ် န့ ပါယ် ပီ ဝီ ထူမ် ဘေ ဒါရာ အီ တဝ်း၊ 21 “ကွဲ့ ပါ၊ ကွဲ့ ဟူမ်၊ ကွဲ့ ဒိုဝ်၊ ကွဲ့ ပြ်ု။” 22 ကြုဝ် ဇိုဝ် တီ၊ န့ ဘော မုး ကြုဝ် အီ နပ် ဒီ လိုဝ်၊ နပ် ဒီ ကာပျာတ့် ဒေါ ဟဲ့ တာ အေ။ ခုဝ်၊ ဒါရာ ဇိုဝ် တီ၊ န့ ဘော မုး ပီ ဘူင် ဒူအီ။

23 ဆေ အေ ယိုဝ် ဒါရာ ဇိုဝ် တီ၊ အေ ဘော ထာင် န့ မုး အာငျာန် ဘွတ်။ ခုဝ်၊ လုဝ် ကြိုပ် အာမူ အာမာတ် ဇဝ်ဖြာ ဂေ ကာနမ်။ န့ ဘော တဲး အီ ပီတျီမ် နဝ်း၊ ဘော ခါနှာပ် ဒုဝ် ဘြိမ် ဂေ။ ဂေ ယီ တူ ပဲ ဒီ အိုပ် ပီ အိုင် ဒုဝ် ဘြိမ် ဂေ။ ခုဝ်၊ န့ တူ မိုဝ်း ဒီခုဝ် မာဆေ။