န့ ပါယ် နီ။ ဘေ ဟဲ့ ပွိုန် အာဆာက် ကာမာယ် ပီ ဇဝ် ယေဆူ ဟဲ့ ပွိုန် အာဆာက် ကာမာယ် ဒေါ ဟဲ့ ဝီ ယိတ့် ဝီ အိမ် အန် ဝါယ် ဟဲ့ ဟွတ့် ယမ် အန်။ ခုဝ် အန် တီ တဲး နဝ်း ဘေ ကာဒိုက် ကာဒဝ့် ဒီ မျုဝ် အီ ကွယ် နာ ဒဲင်။ နာ ဒဲင် တီ မုး ဒူင် ကွယ် ဇဝ်ဖြာ။ ဇဝ် ယေဆူ ဘော ကွယ် ဘ့လာက် အာအး ဇဝ်ဖြာ။ 2 ကွဲ့ တဲး နဝ်း ဘေ ကာဒိုက် ကာဒဝ့် ဘဲန် မျုဝ် ဘဲန် မျုဝ် အီ ကွယ် ဒဲင် ကာဒါယ် နီ။ တဲး ဘေ ကာဒိုက် ကာဒဝ့် မျုဝ် အီ ကွယ် နာ ဒဲင် ခဲင် ဂါင်ဟြာဝ်။ 3 ခုဝ်၊ န့ ပီ ဒုဝ် ဘြိမ် ဘေ ဟဲ့ ဟွတ့် ယမ်။ အာဆာက် ကာမာယ် ပဲ့ ဟဲ့ ပွိုန် ဘေ၊ န့ ကွယ် ရိုမ် ဒူပ် ဇဝ် ယေဆူ အီ ကွယ် ဒူင် ကွယ် ဇဝ်ဖြာ။ လွင် အန် တီ န့ ယီ တူ လိုဝ်း ဒီ အီ ဟဝ်။ 4 ကူပ် ပဲ့ ဟဲ့ ဘူင် ဇဝ် ယေဆူ၊ အေ မိုဝ်း အာဆာက် ကာမာယ် တီ။ ခုဝ်၊ ပန် ဒီ ဝီ တး လူင် ဇဝ် ယေဆူ ဒဲင် ကာဒါယ် နီ၊ အန် ဒီ တဲး ဒွန် အီ ယိုဝ် အာဖုင် ဒင်ခုဝ် အန်။ ဒေါ အန် တီ အန် ဒီ တဲး ဘော အေ ကွယ် ရိုမ် ဒူပ် အန်၊ တဲး ဒွန် အီ ယိုဝ်။ 5 ခုဝ် အန် တီ ဘေ လုဝ် ဝဲန် တူတ့် ဒွန် မျုဝ် အီ ဒူပ် နဝ်း ဘြိမ်၊ အီ ဟဲ့ ဟွတ့် ယမ်။ မျုဝ် တီ၊ န့ ဘော မုး နဝ်း ဆီ လာယ် အီဘိုန့်၊ ဘူင် အီ မွှိုမ် ကာအိး ဘဲန် မျုဝ် ဘဲန် မျုဝ်၊ ဘော နဝ်း ကာဝါတ့်၊ နဝ်း ဆီ ဘူင် မီ အီ တူ မွှိုမ် ဘော နဝ်း လောဖ။ အာဆေ မိုဝ်း နဝ်း လောဖ တီ၊ န့ ပီ အန် ကြိုပ် အာရိုပ်။ 6 ကူပ် န့ ပါယ် တီ၊ ဇဝ်ဖြာ ဒီ ရူ ကာဆဝ် ဒီ ဂေ အီ တူ ထူမ် ဂြုဝ်း အန်။ 7 အာတ့် နီ ဘော ဘေ ဟဲ့ ဒွိုမ် ဘူင် ဒူပ် နဝ်း ဇိုဝ် တီ၊ ဒေါ ဆီ အိုပ် နဝ်း ဘြိမ် တီ ဒီ နဝ်း ဘေ။ 8 မာလဲ၊ ဒေါ တီ နီ၊ ဘေ လုဝ် ဝဲန် နဝ်း ဇိုဝ် တီ ဒွန် မျုဝ်။ န့ ဘော မုး နဝ်း ငှိုယ် ရူ၊ နဝ်း ဒေါဆ၊ နဝ်း စီစိဝ်၊ ခဲ စာဝ် အီ၊ ဘော ကာလာင် ဂြုဝ်း အီ မွှိုမ် ကာအိး။ 9 ကွဲ့ တဲး ဘေ လာယ် ကာလာင် ဂြုဝ်း ကာလုဝ်၊ ဂြုဝ်း တူ မှာန်။ ခုဝ်၊ ဘေ ဟဲ့ ဟွတ့် ဝဲန် နဝ်း ဘြိမ် ဘေ ဘော ပီ ဒွိုမ် ဘူင် နဝ်း ဘြိမ် တီ။ န့ ပီ ဘေ ဟဲ့ ကာပ့လု ခြိုင်၊ ဟဲ့ ဝဲန် ခြိုင် ဘြိမ်။ 10 ဒေါ တီ နီ၊ ဘေ လုဝ် ဒိုဝ်း နဝ်း ကာမာယ် တီ၊ တဲး န့ ပီ ဘေ စှိုပ် ခြိုင် ကာမာယ်။ နဝ်း ကာမာယ် တီ၊ ဇဝ်ဖြာ ဘော မ့ပြာယ် ဆေဆေ၊ တဲး အေ နပ် ဆီချာ အန်၊ တဲး ပီ ဘူင် အေ ပီ ပီ ဘူင် ဇဝ်ဖြာ အီ ဟဲ့ ဖာန် ဘ့လေး နဝ်း ကာမာယ် တီ။ 11 ကူပ် ဟဲ့ တဲး ဇဝ်ဖြာ အေ မိုဝ်း နဝ်း ကာမာယ်၊ အေ အာဝ် လုဝ် ကာယဝ်း ဒူအီ အာမျုဝ် ဟဝ် ဘော ဂေ ဒူအီ အာယူဒါ၊ အေ တူ လုဝ် ကာယဝ်း ဒူအီ အီ ဟဲ့ ဟွတ့် ဆွာ့ ဝဲန် ဟုန် လခါနာ ဘော ဒူအီ အီ တူ ဆွာ့ ဝဲန်။ ယုဝ် ဂေ မုး ဒူအီ အီ ကွယ် ခဲင် မိူင်၊ ဒူအီ အီ ကွယ် ဒီ နွန်၊ ယုဝ် ဂေ မုး မှာယ် အီ၊ တူ မုး မှာယ် အီ၊ အာဝ် ဟူ မိုဝ်း ဒီခုဝ် မာဆေ။ ဇဝ် ယေဆူ ကွယ် ခဲင် နဝ်း အေ ဒွန် အီ အီ မိုဝ်း နဝ်း ကာမာယ်။ န့ ဘော မုး မီ အန် အီ အာရေ တာင်။

12 ဘေ မုး ဒူအီ ပီ ရဝ်း ဇဝ်ဖြာ၊ ဒူအီ ဆီငါ ဘွတ်၊ ဒူအီ ပီ ရွက့် အန်။ ခုဝ် အန် တီ တဲး ဘေ ဒိုဝ်း နဝ်း ကာမာယ်၊ တဲး န့ ပီ ဘေ စှိုပ် ခြိုင် ကာမာယ်။ တဲး ဘေ မိုဝ်း နဝ်း ဒီဟာင်၊ နဝ်း ရွက့် ကာဝေ၊ နဝ်း တျီမ်၊ နဝ်း န့စု န့စမ်၊ နဝ်း ခမ် ဒီ ယိူန် လှေန့်။ 13 တဲး ဘေ ခမ် ပီ ဘူင် အီ ဟဝ်၊ အီ တူ လဝ့် နဝ်း ဘေ။ ဆေ ဒူအီ ဟဲ့ လုတ့် ဘေ၊ တဲး ဘေ ဝီ လာယ် ဂဝ်း ဝဲန် မှာပ်။ တဲး ဘေ ဂဝ်း ဝဲန် မှာပ် ပီ ဇဝ် ယေဆူ ဟဲ့ ဂဝ်း ဝဲန် မှာပ် ဘေ။ 14 ဒဲင် တီ၊ တဲး ဘေ လာယ် ရွက့်။ နဝ်း ရွက့် တီ၊ ဒီ ပါ ကာဇု နဝ်း ဘေ၊ တဲး ဘေ ဘဲန် အူ နဝ်း။

15 တဲး ဘေ ဒိုဝ်း နဝ်း ဂတ် ဂျီတ် ပီ ဒွါ ဇဝ် ယေဆူ၊ တဲး န့ အိုပ် နဝ်း ဘေ။ ဇဝ်ဖြာ ဟဲ့ ဒဲ့ ကာဇု ဘေ၊ တဲး ဘေ ဘဲန် အူ ဖိုင် အီ ပီ ဒုဝ် ဘူင့် အူ ဘူင့်၊ တဲး ဘေ လာယ် ကာလဝ့် ဘဲန် အူ နဝ်း။ ခုဝ် အန် တီ တဲး ဘေ ဒါင် ဂုင် ဂေဇူ ဒီ ဇဝ်ဖြာ။ 16 တဲး ဂြုဝ်း ပီ မာနုဝ် ဇဝ် ယေဆူ လိုပ် ကိူန် ခဲင် နဝ်း ဘေ။ တဲး ဘေ ဒိုဝ်း အာငျာန် ဒွန် မျုဝ်၊ လာယ် မာနုဝ် ဘော လာယ် ဒွါ ဆာဒိက်။ တဲး ဘေ ဘော တဝ်း မှုဝ် ထမ်၊ တဝ်း န့စေန့် လွင် ဇဝ်ဖြာ၊ အီ လေး ခဲင် နဝ်း ဘေ ကူပ် လှုဝ်း ဘေ ဂုင် ဂေဇူ ဇဝ်ဖြာ။ 17 ဘေ ဘော ကာလာင် ဂြုဝ်း၊ ဘေ ဘော ဘူင် မာဆေ၊ တဲး ဘေ ဘူင် တူတ့် ဒွန် မျုဝ် ကူပ် ညှိုမ် ဘေ ဇဝ် ယေဆူ။ တဲး ဘေ ဒါင် ဂုင် ဂေဇူ ဒီ ဇဝ်ဖြာ ကူပ် ပဲ့ ဟဲ့ ဘူင် ဇဝ် ယေဆူ ဒီ ဘေ။

18 ဘေ အီ မုး အီဘိုန့်၊ တဲး ဘေ ခမ် ဒီ ထူမ် ဂြုဝ်း အီမာယ် ဘေ။ ခုဝ်၊ ဆေ အေ ညှိုမ် ဇဝ် ယေဆူ၊ န့ ဟဲ့ ကာအာပ် ဘူင် ပါယ် တီ။

19 ဘေ အီ မုး အီမာယ်၊ တဲး ဘေ ရွက့် အီဘိုန့် ဘေ။ ကွဲ့ ခါနှာပ် ဂေ။

20 ဘေ အီ မုး ဂွန်၊ တဲး ဘေ ထူမ် ဂြုဝ်း ဂုန့် မာ ဘေ ဒွန် မျုဝ်။ ဆေ ဘေ ဘူင် ပါယ် တီ၊ န့ ဟဲ့ လဝ့် နဝ်း ဇဝ်ဖြာ။

21 ဘေ အီ မုး ဂုန့်၊ ကွဲ့ ဘူင် တဲး န့ ဆွင့် ဒီ နဝ်း ဂွန် ဘေ။ ဆေ ဘေ ဘူင် ပါယ် တီ၊ နဝ်း ဂေ ဒီ လိုဝ်။

22 ဘေ အီ မုး မှာယ် အီ၊ တဲး ဘေ ထူမ် ဂြုဝ်း ဒါ ကာညာ အီ အိုပ် ဘေ ဒဲင် ကာဒါယ် နီ။ ကွဲ့ ဘူင် နာ မွှိုမ် မီ ဒေါ ကွယ် ဒါ ကာညာ ဘေ။ ကွဲ့ ဘူင် ကူပ် ဆီ တဲး ဘေ ဒါ ကာညာ အိူပ် ဘေ။ ခဲ့ ပီ ဘူင် ဘေ ဒွန် မျုဝ်၊ တဲး ဘေ ဘူင် ဆိူဝ် ဆိူဝ်၊ တဲး ဘေ ဘူင် ကူပ် ရုဝ်ဆေ ဘေ ဇဝ်ဖြာ။ 23 ဘေ ဘော ဘူင် မျုဝ် မှဝ်၊ တဲး ဘေ ခတ် နဝ်း ဒီ ဘူင်၊ တဲး န့ ပီ ဘေ ဘူင် ဂါန် ဇဝ်ဖြာ၊ ကွဲ့ တဲး န့ ပီ ဘေ ဘူင် ဂါန် ဒူအီ။ 24 ဘေ လုဝ် ဘူင် ပါယ် တီ ကူပ် ဟဲ့ နပ် ဘေ၊ ဘေ ဒီ ပွိုန် ရုး အန် အီ မုး ခါဂုန် ပီ ဒွါ ဇဝ်ဖြာ ကူပ် ဟဲ့ ဘူင် ဘေ ပီ အိုင် ဇဝ် ယေဆူ။ 25 ဂေ အီ ဘူင် မှာပ်၊ ဂေ ယီ လုဝ် ခမ် မှာပ် ပီ ဘူင် ဂေ။ ဇဝ်ဖြာ မိူဝ် တူ မိုဝ်း ဒူင် ရွက့် ဒူင် ဇွင့်။