ဘေ အီ မုး ဒါ ကာညာ အီ၊ ဘော ဘေ လုဝ် ဘူင် နာ မုး နာ မှာန်၊ တဲး န့ ကာရမ် ဒီ မှာယ် ဘေ။ တဲး ဘေ လှုဝ်း ဆေဆေ၊ ဘော ဘေ ဆီ မိုဝ်း ဒါ ကာညာ အီ ကွယ် ခဲင် မိူင် ဂါင်ဟြာဝ်။

2 တဲး ဘေ ဘော ဆာခိုဝ် ဆေဆေ။ တဲး ဘေ ဒါင် ဂုင် ဂေဇူ ဘော ဆာဒိက် ဘ်ု ဆေဆေ။ 3 ဒေါ ဆာခိုဝ် ဘေ၊ တဲး ဘေ ဆာခိုဝ် ဘော ဒါင် ယေ၊ တဲး ဇဝ်ဖြာ တဲး ယေ ပွိုန် ဒီ ကာလာင် လွင် ဇဝ် ယေဆူ ပီ တူ ဒွိုမ် ယိုဝ် အီ၊ တဲး ဒူအီ ကိူန် ပွိုန် ဒီ ထူမ်။ ကူပ် ဂြုဝ်း ဇဝ်ဖြာ တီ၊ အုဝ် မိူဝ် ကော စုဝ်း ကာပိုမ်။ 4 ဆာခိုဝ်၊ တဲး အုဝ် ဘော ပွိုန် ဒီ ကာလာင် လွင် အန် တီ ပီ ကာအာပ် ကာလာင်၊ တဲး န့ လိုဝ်း ဆီချာ။ 5 ပီ ဘူင် ဘေ ဒွန် မျုဝ် ဒီ ဂေ ဒူအီ အီ တူ ညှိုမ်၊ တဲး န့ ဒူပ် အာငျာန် ဘွတ်။ ဒေါ ဆီ ပွိုန် ဘေ ဒီ ဘူင်၊ တဲး ဘေ ဂျုဝ်ဂျာ ဒီ ဘူင်၊ တဲး န့ ဘဲန် အာဂျိုဝ် ဒီ ဒူအီ ကိူန်။ 6 တဲး ဘေ ကာလာင် ဂြုဝ်း ဒါခိုယ်၊ ဂြုဝ်း မွှိုမ် ထူမ်၊ တဲး န့ ပီ ဟာပ် အီ ဟဲ့ ဟပ် ဆယ့်။ တဲး ဘေ ဘော နပ် ပီ ဒီ ပါယ် ဒီ ဝီ ဝျီ့ ဂြုဝ်း ဒီ ဒူအီ ဒွန် အီ။

7-8 ဒေါ တီ နီ၊ အုဝ် ဟဲ့ စ်ု အာထူခိတ် ဟာဝ် ဇမ် ဒူင် ကွယ် ဘေ၊ တဲး အန် ကာလာင် ဒီ ဘေ လွင် အုဝ် ဒွန် မျုဝ်၊ တဲး န့ ဘဲန် ပ့လူမ် ဘဲန် ဟဲန့် ဒီ နဝ်း ဘေ။ အာထူခိတ် တီ မုး ဝါ ပီ ရွက့် အုဝ်၊ အန် ဘော မုး ဒါ ဆာရာ အီ ဘူင် ဆီချာ ဂါန် ဇဝ်ဖြာ။ ယာယ် ဘော မုး အူ ဂိုက် ဘူင် ရိုမ် ဂါန်။ 9 အုဝ် ဟဲ့ စ်ု ဘော အာအောနေဆိမ် ဒူပ် အာထူခိတ်။ ဘော အန် မုး ဝါ ပီ ရွက့် အုဝ် အီ မိုဝ်း နဝ်း ဆိူဝ် နဝ်း မှာန်။ အန် မုး ဒူအီ အီ ဘာ့ ခဲင် ဖိုင် ဘေ။ ဂါယ် ဒီ ဘော ကာလာင် ဒီ ဘေ လွင် ပီ ပါယ် ခဲင် မိူင် နီ။

10 အာရီထာခူ အီ ဟဲ့ စုဝ်း ကာပိုမ် ဒူပ် အုဝ် ဘော အာမာကူ အီ မုး ဝေါဝဲ အာဘာနာဘ ဘော အာယူထူ အီ စိူဝ် ဘော အာယေဆူ။ ဂေ ဒွန် အီ ဟဲ့ နမ်လှုဝ်း ဘေ။ အီ မုး အာမာကူ၊ အုဝ် ဟဲ့ ဒွိုမ် ကာလာင် ဒီ ဘေ လွင် အန်။ ဆေ အန် ဘော တး ဒူင် ကွယ် ဘေ၊ တဲး ဘေ ရွုး ဆီချာ အန်။ 11 အီ မုး ဒူအီ အာယူဒါ အီ ညှိုမ် ဇဝ် ယေဆူ၊ န့ ဘော မိုဝ်း မီ ဂေ အူယ် ဝီ နီ၊ အီ ဘူင် ရိုမ် ဂါန် ဒူပ် အုဝ်။ ယေ ဘူင် ရိုမ် ဂါန်၊ တဲး မိူင် ပီ အိုပ် ဇဝ်ဖြာ စေဝ် တး။ ဂေ မိူဝ် တဲး နဝ်း အုဝ် ဂျာမ်ဆာ။ 12 ဘော အာအေပါဖ အီ မုး ဒဲစေန့် ဇဝ် ယေဆူ ဟဲ့ နမ်လှုဝ်း ဘေ။ အန် ဘော ဘာ့ ခဲင် ဖိုင် ဘေ။ အန် ဘော ဆာခိုဝ် ဒါင် ဘေ ဆေဆေ၊ တဲး ဘေ ညှိုမ် ဆီချာ၊ မိုဝ်း နဝ်း မန် ပီ ဒူအီ တာင်၊ ဘော ဘူင် ဒူပ် ပီ အိုင် ဇဝ်ဖြာ ဆေဆေ၊ ကွဲ့ တဲး န့ ဆီ မိုဝ်း အီ ကာဝှ်ု ကာဝျှီန် ခဲင် နဝ်း ဘေ။ 13 အုဝ် ဟဲ့ နပ် ခဲ့ ဂျုဝ်ဂျာ ဒီငန့် အန် ဒီ ဘူင် တဲး အန် စွယ် ဘေ ဘော ဂေ ဒူအီ အီ ကွယ် ခဲင် မိူင် လောဒီကီ ဘော ဒူအီ အီ ကွယ် ခဲင် မိူင် ဟေရာပေါလီ။ 14 ဘော အာလူကာ အီ မုး ဆာရာဝူန် ပီ ရွက့် ယေ၊ ဘော အာဒေမာတ် ဟဲ့ နမ်လှုဝ်း ဘေ။ 15 ယေ ဟဲ့ ဆီ တဲး ဘေ ကာလာင် ဘော ဒီ ဂေ ဘီနွင် အီ ကွယ် ခဲင် မိူင် လောဒီကီ လွင် ပီ နမ်လှုဝ်း ယေ ဒီ ဂေ။ တဲး ဘေ ကာလာင် လွင် အန် တီ ဘော ဒီ နာင် နုမ်ဖာ ဘော ဒီ ဂေ ခဲင် ဖိုင် ဇဝ် ယေဆူ အီ ကွယ် ခဲင် ကာင် အန်။

16 ဝါယ် ဟဲ့ ဟွတ့် တိး ဘေ ပဲ့ နီ၊ တဲး ဘေ ဝီ တိုယ် ဟာဝ် ဒီ ဂေ ခဲင် ဖိုင် ဇဝ် ယေဆူ အီ ကွယ် ခဲင် မိူင် လောဒီကီ၊ တဲး ဘော ဂေ ဝီ တိး။ ဘေ မိူဝ်၊ တဲး ဘေ ပီ ဝီ တိး ပဲ့ ဟဲ့ ဒဲမ် တိုယ် အုဝ် ဒီ ဂေ အီ ကွယ် ခဲင် မိူင် လောဒီကီ တီ။

17 တဲး ဘေ ဘော ကာလာင် ဒီ အာခဲပူ တဝ်း၊ “ဂါန် ပဲ့ ဟဲ့ စ်ု ဇဝ်ဖြာ မဲ ဘူင်၊ တဲး မဲ ဂျုဝ်ဂျာ ဒီ ဘူင် တဲး န့ ကော ဟွတ့်။”

18 ဒေါ တီ နီ၊ အုဝ် အာပေါလူ ဝီ ဒဲမ် ရာင် အုဝ် လွင် ပီ နမ်လှုဝ်း အုဝ် ဒီ ဘေ။ ကွဲ့ တဲး ဘေ ပိဝ် လွင် ဝန် ဟိန် ပဲ့ ဟဲ့ ပက် ဂေ ဒီ အုဝ်။ တဲး ဇဝ် ယေဆူ ဂေဇူ ဘေ ဒွန် အီ။