ဘေ ဘီနွင် အီ ညှိုမ် ဇဝ် ယေဆူ ပီ အုဝ်၊ ဘေ ဘော နပ်၊ ဒေါ တး ယေ ခါ အာတ့် ယေ တူ တး ပီယေန့်။ န့ ဟဲ့ မိုဝ်း ဒီခုဝ်။ 2 အာတ့် တး ဇမ် ယေ ဒူင် ကွယ် ဘေ၊ ဂေ ဒူအီ အီ ကွယ် ခဲင် မိူင် ဖီလီဖီ၊ ဂေ ဟဲ့ ဘူင် နာ စာဝ် ဒီ ယေ၊ တဲး ယေ ခမ် ဒုက် ဒွန် မျုဝ်။ ဇဝ်ဖြာ ယီ စွယ် ယေ၊ ကွဲ့ တဲး ယေ ယုဝ် ဂေ ဒူအီ ကိူန် အီ တူ အိုင် ယေ။ အန် တဲး ယေ ယ ကာလာင် ဂြုဝ်း ဇဝ်ဖြာ ဒီ ဘေ။ န့ မုး ဂြုဝ်း အီ တဲး နဝ်း ဘေ ဒါခိုယ်။ 3 ခဲ့ ပီ မာနုဝ် ယေ ဒီ ဘေ၊ ခဲ့ ပီ တဝ်း ယေ တဲး ဘေ ညှိုမ်၊ န့ မုး ဂြုဝ်း မှာန် တူ ကာလုဝ်။ ယေ ဘော မိုဝ်း နဝ်း ဆိူဝ် ဒီ ကာလာင် ဒီ ဘေ။ ယေ မိူဝ် တူ မိုဝ်း နဝ်း ဆီ ပီလွှက့် ယေ ဒဲင် ဘေ။ 4 ဂြုဝ်း ပီ ကာလာင် ယေ ဒီ ဘေ၊ န့ ပါယ် နီ။ ဇဝ်ဖြာ ဟဲ့ အာပ် ဂြုဝ်း အန် ဒီ ယေ။ န့ မုး ဂြုဝ်း အီ တဲး နဝ်း ဒူအီ ဒါခိုယ်။ ယေ ဝီ လုဝ် ကာလာင် ဂြုဝ်း တီ ဒီ အီ ဟဝ်။ ခုဝ်၊ ယေ တူ ကာလာင် မာဆေ၊ တဲး န့ လဝ့် နဝ်း ဒူအီ။ ယေ ကာလာင် ဂြုဝ်း၊ တဲး န့ လဝ့် နဝ်း ဇဝ်ဖြာ။ န့ မုး ဇဝ်ဖြာ အီ ယွတ် နဝ်း ယေ၊ ယုဝ် န့ ဟဲ့ မှာန် တူ မှာန်။ 5 ဘေ မိူဝ် နပ် ဆီချာ၊ ဒေါ ကွယ် ယေ ဒူပ် ဘေ၊ ယေ တူ ကာလာင် ဂြုဝ်း ငါမ်၊ တဲး ဘေ အိုင်။ ယေ မိူဝ် တူ မာနုဝ် ဘေ ကူပ် ဆီ ပွိုန် ယေ ရွိုန် ဘေ။ ဘော ဇဝ်ဖြာ ဟဲ့ ယိုဝ် နဝ်း ယေ၊ ဟဲ့ ဘဲန် ဆက်ဆေ လွင် အန် တီ။ 6 ခဲ့ ပီ ဘူင် ယေ၊ ယေ တူ ဘူင် တဲး ဘေ အိူပ် ယေ။ ဘော ဘေ ဘော အီ ဟဝ်၊ ယေ တူ ဆီ တဲး အာဆေ အိူပ် ယေ။

န့ ယီ မှာန်၊ ယေ မုး ဒူအီ ပီ ရဝ်း ပီ တိုယ် ဇဝ် ယေဆူ။ ခုဝ်၊ ယေ ပွိုန် စ်ု ဘေ၊ တဲး ဘေ လိုမ်လာ ယေ။ ယေ ယီ တူ ဘူင် ဇိုဝ် တီ။ 7 ဒေါ ကွယ် ရိုမ် ယေ ဒူပ် ဘေ၊ ယေ မိုဝ်း နဝ်း ကာဝေ ဘေ။ ပီ ဘူင် ယေ ဒီ ဘေ၊ န့ ပီ မာ လိုမ်လာ ဂွန် အန်။ 8 ပါယ် တီ ယေ ဟဲ့ ရွက့် ဘေ။ နဝ်း ယေ ဟဲ့ ဒါခိုယ် ကာဆဝ် ကူပ် ပွိုန် ယေ ကာလာင် ဒီ ဘေ လွင် ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ်။ အာဝ် ဝန် မီ ခဲ့ တီ။ ယေ ဟဲ့ ဒါခိုယ် ကာဆဝ် ဒီ ခမ် ဒီ စုန် ဘော အာဆာက် ယေ ဒါင် ဘေ။ ခဲ့ တီ ယေ ဟဲ့ ရွက့် ဘေ။ 9 ဘေ ဘီနွင်၊ ဘေ ဒီ ဘော လှုဝ်း ခဲ့ ကိူန် ဂါန် ယေ။ ဒွင် ဝန် ဒွင် ခိူန် ယေ ဟဲ့ ရန့် ဂါန် ကွဲ့ တဲး န့ ညှာပ် ဒီ ဘေ ဒေါ ကွယ် ရိုမ် ယေ ဒူပ် ဘေ၊ ကာလာင် ဒီ ဘေ လွင် ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ်။

10 ဘော ဘေ ဘော ဇဝ်ဖြာ နပ် ဒီ ကာလာင် လွင် အန် တီ။ ဒေါ ကွယ် ရိုမ် ယေ ဒူပ် ဘေ ဒူအီ အီ ညှိုမ် ဇဝ် ယေဆူ၊ ယေ တူ ဘူင် နာ တူ မွှိုမ်။ ယေ ဘူင် နာ ဘွတ်။ အာဝ် မိုဝ်း အာဆေ နပ် ဒီ ကာလာင် နာ တူ မွှိုမ် လွင် ယေ။ 11 ဘေ ဘော နပ်၊ ယေ ဟဲ့ ကာလာင် ဂြုဝ်း ဒီ ဘေ ဒွန် အီ၊ တဲး န့ ပီ ဂုန့် ကာလာင် ဒီ ဂွန် အန်။ 12 ပါယ် တီ၊ ယေ ဟဲ့ မာနုဝ် ဘေ၊ တဲး ဘေ မိုဝ်း နဝ်း ပ့လူမ်။ ယေ မိူဝ် ဟဲ့ ကာလာင် တဲး နဝ်း ဘေ ဂတ် ဂျီတ်။ ယေ မိူဝ် မာနုဝ် ဘေ၊ တဲး ဘေ နပ် ဒီ ဘူင် ပီ အိုင် ဇဝ်ဖြာ။ ဇဝ်ဖြာ မိူဝ် ဟဲ့ ဒဲ့ ဘေ၊ တဲး ဘေ တး ကွယ် ခဲင် မိူင် ပီ အိုပ် အန်၊ တဲး ဘော ဘေ ပွိုန် အာဖုင် ဒင်ခုဝ် အန်။

13 န့ မိုဝ်း ပေါ အူ မျုဝ် အီ တဲး ယေ ဒါင် ဂုင် ဂေဇူ ဒီ ဇဝ်ဖြာ ဆေဆေ။ ဒေါ ထူမ် ဘေ ဂြုဝ်း ဇဝ်ဖြာ ပီ ကာလာင် ယေ ဒီ ဘေ၊ ဘေ တူ တဝ်း၊ န့ မုး ဂြုဝ်း ဒူအီ။ ဘေ ဟဲ့ နပ် အူ ဇေန့်၊ န့ မုး ဂြုဝ်း ဇဝ်ဖြာ။ ဟဲ့ ဟွတ့်၊ ဘေ ဟဲ့ တဲး ဂြုဝ်း ဇဝ်ဖြာ လိုပ် ခဲင် နဝ်း ဘေ၊ တဲး ဘေ ညှိုမ်၊ တဲး န့ ဘဲန် အာဂျိုဝ် ဒီ ဘေ။ 14 ဘေ ဘီနွင်၊ ဘေ ဟဲ့ ဘူင် ပီ ဂေ ဒူအီ ခဲင် ဖိုင် ဇဝ် ယေဆူ အီ ကွယ် ခဲင် အိူင် ယူဒါ။ ဂေ ဒူအီ အာယူဒါ ဟဲ့ ရူ ကာဆဝ် ဒီ ဂေ ဒူအီ ခဲင် ဖိုင် ဇဝ် ယေဆူ တီ၊ တဲး ဂေ ကာဒုး ဒုက် တာင်။ ပါယ် တီ ဘော ဘေ ဟဲ့ ဝီ ကာဒုး ဒုက် ဒီ ဒူအီ အာမျုဝ် ဘေ။ 15 ခါ အာတ့် ဂေ ဒူအီ အာယူဒါ ဟဲ့ ငဝ်း ယမ် ဂေ ဒူအီ အီ ဘျာန် ဂြုဝ်း ဇဝ်ဖြာ။ ဟဲ့ ဟွတ့် ဂေ ဝီ ငဝ်း ဘော ဇဝ် ယေဆူ။ ပန် တီ ဂေ မိူဝ် ဟဲ့ ဆုတ့် ယေ လေး ဒူင် ကွယ် ဂေ။ ဂေ ဘူင် ပီ တူ အိုင် ဇဝ်ဖြာ။ ဂေ ဘော ဘဲန် ရန်ဆူ ဒူအီ ဒွန် အီ။ 16 ဂေ ဟဲ့ ထေဝ် ဒီ ခြဲ ယေ၊ ကွဲ့ တဲး ယေ ကာလာင် ဂြုဝ်း ဒီ ဒူအီ အာမျုဝ် ဟဝ်၊ ကွဲ့ တဲး ဂေ ပွိုန် ဒီ လွတ်။ ကူပ် ဘူင် ဂေ ပါယ် တီ၊ မှာပ် ဂေ ဒွန် မျုဝ် ဟဲ့ ကိူန် ကာဆဝ်။ ဒေါ တီ နီ၊ ဇဝ်ဖြာ ဝီ ရူ ကာဆဝ် ဒီ ဂေ၊ တဲး ဂေ ခမ် တူတ့် မှာပ် ဂေ ဒွန် မျုဝ်။

17 အိုယ် ဘေ ဘီနွင်၊ ဒေါ တီ နီ ယေ တူ ပွိုန် ကွယ် ရိုမ် ဒူပ် ဘေ။ ဒုဝ် ဘူင့် ယေ လုဝ် ကွယ် ကာယဝ်း ဒီ ဘေ အာဒါ အူ ကာစန်။ နဝ်း ယေ ယီ လှုဝ်း ဘေ ဆေဆေ။ ယေ ဒီကေန် ကာဆဝ် ဘေ။ ခုဝ်၊ ယေ ထေဝ် ဒီ ဝီ ဟာဝ် ဇမ် ဒူင် ကွယ် ဘေ တဲး အေ ဝီ လာယ် ယိုဝ်။ 18 ဘဲန် ဇေန့် ဘဲန် ဇေန့် ယေ ဟဲ့ တဝ်း ဒီ ဟာဝ် ဒူင် ကွယ် ဘေ။ ဘော အုဝ် အာပေါလူ ဟဲ့ ဆီ ဟာဝ်။ ဘုဝ် ကာနမ် အီ စိူဝ် ဆာတာန်၊ အန် ယဲ့ ဟဲ့ ခြဲ ယေ၊ ကွဲ့ တဲး ယေ ဇမ်။ 19 ပန် ဒီ ဝီ တး ဇဝ် ယေဆူ ဘော ပန် ဒီ ကွယ် ယေ ဒီ အာတ့် အန်၊ န့ မုး မီ အူ မျုဝ်၊ အီ တဲး နဝ်း ယေ ခူယ် ဒါခိုယ်။ ယေ နှဝ့် န့ဒဝ့် မီ ဒီ ပွိုန် ဒီ ဘျ ဘေ ဒီ အာတ့် ဇဝ်ဖြာ။ 20 ဆေ ဘေ ကွယ် ရိုမ် ဒူပ် ယေ ဒီ အာတ့် ဇဝ်ဖြာ၊ နဝ်း ယေ ဒါခိုယ်။ ဘေ ဒီ တဲး ယေ မိုဝ်း ဘော အာဖုင် ဒင်ခုဝ် ဒီ အာတ့် ဇဝ် ယေဆူ။