ယေ မိုဝ်း နဝ်း မှဲ ကူပ် ဒီကေန် ကာဆဝ် ယေ ဒီ ဘေ။ ခုဝ်၊ ယေ လာယ် ဖြူမ် တဲး အာထီမုဝ်ထေ ဟာဝ် ဒူင် ကွယ် ဘေ၊ တဲး ဘော အာဆီလာတ် ဘော အုဝ် ကွယ် ဒီ ပန် ခဲင် မိူင် အေထေန်။ 2 ယာယ် ဝီ တိုယ် အာထီမုဝ်ထေ ဟာဝ် ဇမ် ဒူင် ကွယ် ဘေ။ အန် မုး ဝါ ယာယ်။ အန် ဘူင် ဂါန် ဇဝ်ဖြာ ဒူပ် ယာယ်၊ စွယ် ကာလာင် လွင် ဇဝ် ယေဆူ အီ တဲး နဝ်း ဒူအီ ဒါခိုယ်။ အာထီမုဝ်ထေ ဟဲ့ တး ဇမ် ဒူင် ကွယ် ဘေ၊ တဲး အန် စွယ် ဘော ဘေ၊ တဲး နဝ်း ဘေ မန် ဘော ညှိုမ် ဆီချာ၊ ကွဲ့ တဲး နဝ်း ဘေ ယုဝ်။ 3 ယာယ် ဟဲ့ တိုယ် အန်၊ ကွဲ့ တဲး န့ မိုဝ်း အာဆေ ကာတဲ ဘေ အီ တူ ပွိုန် ခမ် ဒုက် ပီ ကာဒုး ဘေ။ ကွဲ့ တဲး န့ မိုဝ်း အာဆေ၊ အီ ဝဲန် နဝ်း ညှိုမ် အန်။ ဘေ ဟဲ့ နပ် ဆီချာ၊ အေ လုဝ် ခမ် ဒုက် ဒွန် မျုဝ်။ 4 ဒေါ ကွယ် ရိုမ် ယေ ဒူပ် ဘေ၊ ယေ ဟဲ့ ဟွတ့် ကာလာင် ဒီ ဘေ လွင် အေ ဒွန် အီ လုဝ် ခမ် ဒုက်။ ဒေါ တီ နီ၊ န့ ဟဲ့ ဘဲန် တူတ့် ဒွန် မျုဝ် ပီ ပီ ဒွိုမ် ကာလာင် ယေ။ ဘေ ယီ ဟဲ့ နပ် ဒီ အာတ့် လွင် အန် တီ။ 5 ခုဝ်၊ အုဝ် ဟဲ့ တိုယ် အာထီမုဝ်ထေ ဒီ ဘေ၊ တဲး အုဝ် နပ် ယုဝ် ဘေ ဆီ ညှိုမ် ဆီချာ။ အုဝ် အာဝ် ဟူ ပဲ ဒီ ကွယ် နှဝ့် ဆေ အုဝ် တူ နပ် လွင် ပီ ပါယ် ဘေ။ အုဝ် ယုဝ် ဘုဝ် ကာနမ် အီ စိူဝ် ဆာတာန် ဟဲ့ ဟွတ့် ကာဆုး ဘေ ဘူင် နာ တူ မွှိုမ် ဘဲန် မျုဝ် ဘဲန် မျုဝ်၊ တဲး ဂါန် ပဲ့ ဟဲ့ ဘူင် ယေ အာဝ် ဟူ မိုဝ်း အာဂျိုဝ်။

6 ဒေါ တီ နီ၊ အာထီမုဝ်ထေ ဟဲ့ ဝီ တး ဇမ် ဒူင် ကွယ် ယာယ်၊ ဝီ ကာလာင် နာ မွှိုမ် လွင် ဘေ။ အန် တဝ်း၊ ဘေ ဟဲ့ ညှိုမ် ဆီချာ ဘော ရွက့် ဇဝ် ယေဆူ။ အန် ဘော တဝ်း လွင် ဘေ တူ ပိဝ် ယေ ဘော ဒီကေန် ယေ၊ ဟဲ့ ပီ ယေ ဒီကေန် ဘေ။ 7 ဒေါ ထူမ် ယေ လွင် ဘေ ဟဲ့ ညှိုမ် ဆီချာ ဇဝ် ယေဆူ၊ န့ တဲး နဝ်း ယေ ဒါခိုယ်။ န့ ဘော စွယ် ယေ၊ ဒေါ ခမ် ယေ ဒုက် ဘဲန် မျုဝ် ဘဲန် မျုဝ်။ 8 ဒေါ တီ နီ ယေ ဟဲ့ ဝီ နပ်၊ ဘေ ဟဲ့ မိုဝ်း နဝ်း မန် နဝ်း ညှိုမ် ဆီချာ။ န့ ဝီ တဲး ဘော အာဆာက် ယေ ဒါခိုယ်။ 9 ခုဝ်၊ ယေ ဒါင် ဂုင် ဂေဇူ ဒီ ဇဝ်ဖြာ။ အန် ဟဲ့ ဝီ တဲး ယေ ဘဲန် နဝ်း ဒါခိုယ် ကာဆဝ် ကူပ် ညှိုမ် ဆီချာ ဘေ။ 10 ဒွန် မှိုဝ် ဒွန် ညှာ ယေ ဝီ မှာန့် ကာဆဝ်၊ တဲး ယေ ပွိုန် ဒီ ဝီ ဟာဝ် ဇမ် ဒူင် ကွယ် ဘေ၊ တဲး ယေ ဝီ မာနုဝ် ဘေ ပေါ မ့ပွါ၊ တဲး ဘေ ဝီ နပ် ကာပွါ လွင် ပီ ဒီ လုဝ် ညှိုမ် ဘေ။

11 ယေ ဆာခိုဝ် ဒီ ဇဝ်ဖြာ အီ မုး ဂုန့် အေ၊ ဘော ဒီ ဇဝ် ယေဆူ အီ မုး ဒါ ကာညာ အိုပ် အေ၊ တဲး ဂါယ် စွယ် ယေ၊ တဲး ယေ ပွိုန် ဒီ ဟာဝ် ဇမ် ဒူင် ကွယ် ဘေ။ 12 ယေ ဘော ဆာခိုဝ်၊ တဲး ဇဝ်ဖြာ စွယ် ဘေ၊ တဲး ဘေ လာယ် ရွက့် လွှိုမ် ခါ အာတ့် တဲး ဘေ ဘော ရွက့် အီ ဟဝ် လွှိုမ် ခါ အာတ့် တဲး ဘေ လာယ် ရွက့် ပီ ယေ ရွက့် ဘေ။ 13 တဲး ဇဝ်ဖြာ တဲး ဘေ ညှိုမ် ဆီချာ၊ တဲး ဘေ မိုဝ်း နဝ်း ဘွတ်၊ ကွဲ့ တဲး အာဆေ ပွိုန် ဒီ ကာလာင် နာ တူ မွှိုမ် လွင် ဘေ။ ပန် ဒီ ဝီ တး ဇဝ် ယေဆူ ရိုမ် ဒူပ် ဂေ ဒူအီ အီ ညှိုမ် အန်၊ တဲး ဘော ဘေ ပွိုန် ဒီ ကွယ် ဒီ အာတ့် ဇဝ်ဖြာ၊ အီ မုး ဂုန့် အေ။