ပေါ အူ မျုဝ် ယေ ဟဲ့ ဒွိုမ် ကာလာင် ဒီ ဘေ ဘီနွင်။ ယေ ဟဲ့ ဒွိုမ် ကာလာင် ဒီ ဘေ မာဆေ ပီ လုဝ် ဘူင် ဘေ၊ တဲး န့ လဝ့် နဝ်း ဇဝ်ဖြာ။ ဒေါ တီ နီ ဘေ မိူဝ် ဒူပ် ပီ မာနုဝ် ယေ ဒီ ဘေ လွင် အန် တီ။ ကူပ် ရွက့် ယေ ဇဝ် ယေဆူ ယေ ဝီ ကာဆုး ဘေ၊ တဲး ဘေ အွန် ဒီ ဘူင် နာ မွှိုမ် လွှိုမ် ပီ ဒွိုမ် ဘူင် ဘေ။ 2 ဘေ မိူဝ် ဟဲ့ ဟွတ့် နပ် ပီ စ်ု ယေ ဘေ ဘူင်။ န့ မုး ပွုန် ပီ ဒွါ ဇဝ် ယေဆူ ဒီ ယေ အီ တဲး ယေ စ်ု ဘေ ဘူင် ပါယ် တီ။

3 ဇဝ်ဖြာ ယီ ဆီ တဲး ဘေ ဘဲန် ဒူအီ အီ ဆီငါ ဘွတ်၊ ကွဲ့ တဲး အီဘိုန့် အီမာယ် လာယ် လုတ့်။ 4 ဘေ ဒွန် အီ လုဝ် ပဲ ဒီ အိုပ် ဒုဝ် ဘြိမ် ဘေ၊ တဲး န့ ဘွတ်၊ တဲး ဒူအီ ဟဝ် ပွိုန် ဒီ ရုဝ်ဆေ ဘေ ဒွန် အီ။ 5 ကွဲ့ တဲး ဘေ ဒူပ် နဝ်း ကာဝါတ့် ဘေ၊ ကွဲ့ တဲး ဘေ ဘူင် ပီ ဂေ ဒူအီ အီ တူ နပ် ဇဝ်ဖြာ။ 6 ဇိုဝ် တီ၊ ကွဲ့ တဲး ဘေ ဘူင် မာဆေ အီ တူ မှာန် အီ တူ မွှိုမ် ဒီ ဘီနွင် ဘေ။ ယေ ဟဲ့ ဟွတ့် ကာလာင် ဒီ ဘေ လွင် အန် တီ။ ဇဝ်ဖြာ ဒီ ဒမ် မှာပ် ဒီ ဒွန် အီ၊ အီ ဘူင် ဇိုဝ် တီ။ 7 ဇဝ်ဖြာ တူ အိုင် အေ ဘူင် အီ မွှိုမ် ကာအိး။ အန် ဆီ တဲး အေ ဘူင် နာ ဘွတ် ဒွန် မျုဝ်။ 8 အာဆေ ဝဲန် ဂြုဝ်း တီ၊ အာဝ် မုး အန် ဝဲန် ဂြုဝ်း ဒူအီ။ အန် ဝဲန် ဂြုဝ်း ဇဝ်ဖြာ။ ဇဝ်ဖြာ ယီ ဟဲ့ ဟွတ့် ဒွါ နဝ်း ဖွိုမ် အန်၊ ဟပ် ခဲင် နဝ်း အေ၊ တဲး န့ ဘွတ်။

9 လွင် ပီ ဒီ လုဝ် လာယ် ရွက့်၊ ယေ အာဝ် ဟူ ဒဲမ် ဒီ ဘေ။ ဇဝ်ဖြာ ဟဲ့ ဟွတ့် မာနုဝ် ဘေ၊ တဲး ဘေ လာယ် ရွက့်။ 10 ဘေ မိူဝ် ရွက့် ဂေ ဘီနွင် အီ ကွယ် ခဲင် အိူင် မာခေဒူန် ဘော အိူင်။ ယေ ယီ စ်ု ဘေ၊ တဲး ဘေ လာယ် ရွက့် ပေါ န့ ပွါ၊ တဲး ဘေ လာယ် ရွက့် လွှိုမ် လာယ် ရွက့် ဘေ ဒေါ တီ နီ။

11 တဲး ဘေ ကွယ် နှိမ် ကွယ် ယေန်၊ ကွဲ့ တဲး ဘေ ပျာတ့် အီ ဟဝ်။ တဲး ဒွန် အီ ဘူင် ဂါန် ပီ လုဝ် ဘူင် အန်။ တဲး ဘေ ဘူင် ပီ ဒွိုမ် ကာလာင် ယေ ဒီ ဘေ။ 12 ဆေ ဘေ ဘူင် ပါယ် တီ၊ ဂေ ဒူအီ ဟဝ် ဒီ ရုဝ်ဆေ ဘေ။ ဘော ဘေ ဒီ မိုဝ်း ခဲ့ ပီ လုဝ် ဘေ၊ အာဝ် လုဝ် မှာန့် ဒီ အီ ဟဝ်။

13 ဘေ ဘီနွင်၊ ယေ ဘော ဆီ တဲး ဘေ နပ် လွင် ဂေ ဒူအီ အီ ဟဲ့ ဟွတ့် ယမ်၊ ကွဲ့ တဲး ဘေ မိုဝ်း နဝ်း က့လိုဝ်၊ ကွဲ့ တဲး ဘေ ပီ ဂေ ဒူအီ အီ တူ နှဝ့် န့ ဒဝ့် ဇဝ်ဖြာ။ 14 အေ ညှိုမ်၊ ဇဝ် ယေဆူ ဟဲ့ ယမ်။ ဝါယ် အန် တီ အန် ဟဲ့ ဝီ ယိတ့် ဝီ အိမ်။ ပါယ် တီ၊ ယေ မိူဝ် ညှိုမ် လွင် ဂေ ဒူအီ အီ ဟဲ့ ညှိုမ် ဇဝ် ယေဆူ အာတ့် ယမ် ဂေ၊ ဇဝ်ဖြာ ဒီ တဲး ဘော ဂေ ဝီ ယိတ့် ဝီ အိမ်၊ တဲး ဂေ ကွယ် ရိုမ် ဒူပ် ဇဝ် ယေဆူ။ 15 လွင် အန် တီ ဇဝ် ယေဆူ ဟဲ့ ဒွိုမ် ကာလာင် ဒီ ယေ။ ယေ ဝီ ခဲ ဒီ ဘေ။ အေ ဒူအီ အီ ဆီ အိမ် ပန် ဒီ ဝီ တး လူင် ဇဝ် ယေဆူ ခဲင် ဂါင်ဟြာဝ်၊ အေ တူ ယဲတ့် ဒီ အာတ့် ဂေ ဒူအီ အီ ဟဲ့ ဟွတ့် ယမ်။ 16 အန် ဇဝ် ဒီ တး လူင် ခဲင် ဂါင်ဟြာဝ်၊ ဘ့လေး အာမိင် ဘော ကာလာင် ဂြုဝ်း တာင်။ ဒွန် အီ ဘော ပွိုန် ယိုဝ် ဂြုဝ်း ဒါ ကာညာ အီ အိုပ် ဂေ အာမူ အာမာတ် ဇဝ်ဖြာ၊ ဂေ ဘော ပွိုန် ဒီ ယိုဝ် ဘော ဟမ် ဝဝ် ဇဝ်ဖြာ။ ဒေါ အန် တီ ဂေ ဒူအီ အီ ညှိုမ် ဇဝ် ယေဆူ အီ ဟဲ့ ဟွတ့် ယမ် ဒီ ယိတ့် ဒီ အာတ့်။ 17 ဟဲ့ ဟွတ့်၊ ဘော အေ အီ အိမ် အီ ကွယ် ဒီ ပန်၊ အေ ဒီ ဝီ ဒူပ် ဂေ ဒူအီ အီ ဟဲ့ ဝီ ယိတ့် တီ။ အေ ဒီ ဟုဝ့် ရိုမ် ခဲင် န့အု၊ တဲး အေ ဘောကာဂ့လျီတ် ကာတုန့် အန် ဇဝ် ခဲင် ဘ့လေန့်။ ပန် တီ အေ ဒီ ကွယ် ရိုမ် ဒူပ် အန် ဇဝ် ဆေဆေ။ 18 ဂြုဝ်း တီ ဘေ လုဝ် ဝီ လာယ် ကာလာင် ကာတဲ ဘေ၊ တဲး န့ ဘဲန် နဝ်း ကြွိုမ် နဝ်း တာင် ဒီ ဘေ။