ဘေ ဘီနွင်၊ ယေ တူ လုဝ် ဒဲမ် ဒီ ဘေ လွင် အာခြာဝ် ပန် ဒီ တး ဇဝ် ယေဆူ။ 2 ဘေ ဟဲ့ နပ် ဆီချာ၊ ဆေ ဇဝ် ယေဆူ ဒီ တး၊ န့ ပီ ဒါ ပြာ အီ တး ခဲင် မှိုဝ်။ 3 ဂေ ဒူအီ ဒီ တဝ်း၊ “အာဝ် မိုဝ်း ပီ ဒီ လုဝ် ယုဝ် မာဆေ၊ န့ ဟဲ့ ယေန် ဒွန် ဘ့လာက်။” ဒေါ အန် တီ အူ ဇေန့် ဂေ ဒီ ကာဒုး ဒုက်။ န့ ပီ အီဘိုန့် အီ ဟဲ့ ကာတတ် ဒီ ဂွန်။ ဝတ့် အန် ဒီ ဆဝ် အူ ဇေန့်။ ပါယ် တီ ဂေ ဒီ ကာဒုး ဒုက်၊ အာဝ် ပွိုန် လွတ်။

4 ဘေ ဘီနွင်၊ ဘေ ယီ တူ ကွယ် ခဲင် အပ် ဝွင့်။ ခုဝ်၊ ဆီငဲ ဒီ တး ဇဝ် ယေဆူ တူ တး ဒီ ဘေ ပီ ဒါ ပြာ။ န့ တူ တဲး ဘေ ကာစွာ။ 5 အေ ဒွန် အီ မုး ဒူအီ ကွယ် ခဲင် ဘ့လာင်၊ ဘူင် ပီ လုဝ် ဘူင် အေ ဒေါ ကာတဲ ဆီငဲ။ ဘေ တူ ကွယ် ခဲင် အပ် ဝွင့်၊ တူ ဘူင် ပီ လုဝ် ဘူင် အေ ခဲင် မှိုဝ်၊ ကွဲ့ တဲး အီ ယိုဝ်။ 6 ခုဝ်၊ ကွဲ့ တဲး အေ ပီ ဒူအီ ဟဝ်၊ ဒူအီ အီ အိတ်။ တဲး အေ ဆာဒိက်၊ ခမ် ဒီ ယိူန်၊ တူ ဒူပ် ပီ အိုင် အေ။ 7 အာဆေ အိတ်၊ အန် အိတ် ခဲင် မှိုဝ်။ အာဆေ ဒျီင် ပဝ်း၊ အန် ဘော ဒျီင် ခဲင် မှိုဝ် ကော ယိုတ့်။ 8 အေ ယီ ကွယ် ခဲင် ဘ့လာင် ဆီငဲ။ ခုဝ်၊ တဲး အေ ယိူန် ဒီ ဘူင် ပီ အိုင် အေ။ အေ လုဝ် ညှိုမ် ဇဝ်ဖြာ ဘော ရွက့် ဇဝ်ဖြာ၊ တဲး န့ ပီ ဒါ ဆိုက် စှိုပ် ဆီတုဝ် ဟိန်။ အေ လုဝ် နှဝ့် န့ဒဝ့် ဇဝ် ယေဆူ ဒီ ချွတ် အေ၊ တဲး န့ ပီ ဒါ ဆိုက် စှိုပ် မာဂိန့် အန်။ 9 အေ လုဝ် ဘူင် ပါယ် တီ၊ ခုဝ်၊ ဇဝ်ဖြာ တူ ဆီ တဲး အေ ခမ် မှာပ် အေ။ အန် ဆီ တဲး ဇဝ် ယေဆူ ချွတ် အေ။ ဇဝ် ယေဆူ မုး ဒါ ကာညာ အီ အိုပ် အေ။ 10 ဇဝ် ယေဆူ ဟဲ့ ဟွတ့် ခမ် ဒီ ယမ် ကာဒါင် အေ၊ တဲး အေ ဘောကာဂ့လျီတ် ပွိုန် ဒီ ကွယ် ရိုမ် ဒူပ် အန်။ ဘော ဒူအီ အီ ဟဲ့ ဟွတ့် ယမ်၊ ဘော ဒူအီ အီ ဆီ အိမ် ဟဲ့ ပွိုန် ကွယ် ရိုမ် ဒူပ် အန် ဆေဆေ။ 11 ခုဝ် အန် တီ ဘေ လုဝ် လာယ် ကာလာင် လွင် အန် တီ၊ တဲး န့ ဘဲန် နဝ်း ဒါခိုယ် ဒီ ဘေ။ တဲး ဘေ လာယ် စွယ်၊ တဲး ဘေ ညှိုမ် ဆီချာ။ ဘေ ယီ ဟဲ့ ဘူင် ဇိုဝ် တီ။ တဲး ဘေ ဘော ဘူင် ဟာဝ်။

12 ပေါ အူ မျုဝ် ယေ ဝီ စ်ု ဘေ။ ဘေ ဘီနွင်၊ တဲး ဘေ ရုဝ်ဆေ ဂေ ဒူအီ အီ ဘူင် ကိူန် ဂါန် ဇဝ်ဖြာ ကာတဲ ဘေ။ ဇဝ်ဖြာ ဟဲ့ ရဝ်း ဒူအီ ဇိုဝ် တီ၊ တဲး ဂေ အိုပ် ဘေ၊ ဘော မာနုဝ် ဘေ။ ဘေ လုဝ် ရွက့် ဂေ ဘော ရုဝ်ဆေ ဂေ ကူပ် ဘူင် ဂေ ဂါန် ဇဝ်ဖြာ။ 13 ဘေ ဘော လုဝ် ကွယ် ရိုမ် တဲး န့ ဒါခိုယ်၊ ကွဲ့ တဲး ဘေ လာယ် ကာလုတ့်။ 14 ယေ ဘော စ်ု ဘေ ဘီနွင်၊ တဲး ဘေ မာနုဝ် ဒူအီ၊ ကွဲ့ တဲး ဂေ ကြာန်။ ဆေ န့ မိုဝ်း ဒူအီ နဝ်း တူ ဒါခိုယ်၊ ကာလာင်၊ တဲး ဂေ ဝီ ဒါခိုယ်။ ဆေ ဒူအီ လုဝ် အီ စွယ် အန်၊ တဲး ဘေ စွယ်။ တဲး ဘေ ဘော အူတ် နဝ်း၊ ကွဲ့ တဲး ဘေ ငှိုယ် ရူ ဒီ အီ။ 15 ဘေ ဘော လုဝ် ဆာဒိက်။ ဆေ န့ မိုဝ်း ဒူအီ အီ ဘူင် နာ စာဝ် ဒီ ဘေ၊ ဘေ ကွဲ့ ဝီ ဘူင် ဝျီ့ နာ စာဝ် ဒီ အန်။ ဘေ လုဝ် လာယ် ဘူင် နာ မွှိုမ်၊ ဘော ဘူင် နာ မွှိုမ် ဒီ ဒူအီ ဒွန် အီ။

16 တဲး နဝ်း ဘေ ဒါခိုယ် ဆေဆေ။ 17 ဆာခိုဝ် ဇဝ်ဖြာ ဆေဆေ။ 18 ဘေ ဘော ကာဒုး မာဆေ၊ တဲး ဘေ ဒါင် ဂုင် ဂေဇူ ဒီ ဇဝ်ဖြာ ဆေဆေ။ ဘေ ဒူအီ အီ ညှိုမ် ဇဝ် ယေဆူ၊ ဘေ လုဝ် ဘူင် ဇိုဝ် တီ။ ဇဝ်ဖြာ ဟဲ့ စ်ု ဘေ ပါယ် တီ။

19 နဝ်း ဖွိုမ် ဇဝ်ဖြာ အီ ကွယ် ခဲင် နဝ်း ဘေ၊ န့ ပီ ငဝ်။ ကွဲ့ တဲး ဘေ ဘျတ် ငဝ် တီ။ 20 ဆေ န့ မိုဝ်း ဒူအီ အီ ဘျာန် ဂြုဝ်း ဇဝ်ဖြာ၊ ဘေ လုဝ် ထူမ်။ ကွဲ့ ဝဲန် ဂြုဝ်း အန်။ 21 ဘေ ယီ လုဝ် ထေဝ် ဂြုဝ်း အန် တီ၊ ယုဝ် န့ မှာန် အာဝ် မှာန်။ ဆေ န့ မုး ဂြုဝ်း မှာန် ဂြုဝ်း မွှိုမ်၊ ဘေ လုဝ် လှုဝ်း၊ လုဝ် ဒူပ်။ 22 ဆေ န့ ယီ မုး နာ တူ မွှိုမ် ဒွန် မျုဝ်၊ ဘေ လုဝ် ဝဲန်၊ ကွဲ့ တဲး ဘေ ဒူပ်။

23 ဇဝ် ယေဆူ မုး ဇဝ်ဖြာ အီ တဲး နဝ်း ဂတ် ဂျီတ်။ တဲး အန် ဇဝ် တီ ဒွါ ဘော နဝ်း ဆီငါ ဘွတ် ဒီ ဘေ။ ဘော နဝ်း ဘော ဖွိုမ် ဘော ဒုဝ် ဘူင့် ဘေ၊ တဲး န့ ဘွတ် တူတ့်၊ ကွဲ့ တဲး ဒူအီ ပွိုန် ဒီ ကာလာင် နာ တူ မွှိုမ် လွင် ဘေ။ အူ ဆိန့် ဒေါ တီ နီ ကော ဇမ် အာခြာဝ် ဒီ တး ဇဝ် ယေဆူ၊ တဲး ဘေ ဘွတ် ပါယ် တီ ဆေဆေ။ ဇဝ် ယေဆူ မုး ဒါ ကာညာ အီ အိုပ် အေ။ 24 အန် ဟဲ့ ဒဲ့ ဘေ ဒူပ် အန်။ အန် ဘော မိုဝ်း နဝ်း ဆိူဝ် နဝ်း မှာန်။ ပီ တဝ်း အန် ဒီ ဘူင်၊ အန် ဒီ ဘော ဘူင်။

25 ဘေ ဘီနွင်၊ တဲး ဘေ ဘော ဆာခိုဝ် ဒါင် ယေ။ 26 တဲး ဘေ ကာလာင် ဒီ ဘီနွင် ဒွန် အီ လွင် ဟဲ့ နမ်လှုဝ်း ယေ ဒီ ဂေ။ ဆေ ဘေ လာယ် ယိုဝ် ဘေ လုဝ် လာယ် ရွုး ပီ ဘီနွင်။ 27 ပီ ဒီ စ်ု အုဝ် ဒီ ဘေ ဒေါ တီ နီ၊ န့ ပီ ဇဝ် ယေဆူ ဟဲ့ စ်ု ဘေ။ ဘေ လုဝ် တိး ပဲ့ နီ၊ တဲး ဂေ ဘီနွင် ဒွန် အီ ပွိုန် ဒီ ထူမ်။

28 တဲး ဇဝ် ယေဆူ ဂေဇူ ဘေ၊ ဒွါ ဂျာမ်ဆာ ဒီ ဘေ ဆေဆေ။

ခဲ့ နီ ပဲ့ ပီ တိုယ် ယေ ဒီ ဘေ။