အိုယ် ဘေ ဘီနွင်၊ ပီ ဒဲမ် ယေ ဒီ ကာဒဲ့ နီ၊ တဲး ဘေ ဆာခိုဝ် ဘော ဒါင် ယေ၊ တဲး ဒူအီ ကိူန် ဘော ပွိုန် ဒီ ထူမ် ဂြုဝ်း ဇဝ်ဖြာ ဘော ရုဝ်ဆေ ဂြုဝ်း တီ၊ တဲး န့ ပီ ဒေါ ဟဲ့ ထူမ် ဘေ ဂြုဝ်း ဇဝ်ဖြာ တီ။ 2 အာဝ် မုး ဒူအီ ဒွန် အီ ဟဲ့ ညှိုမ်။ ခုဝ်၊ တဲး ဘေ ဆာခိုဝ် ဒါင် ယေ၊ တဲး ဇဝ်ဖြာ စွယ် ယေ၊ တဲး ယေ လွတ် ဒီ ဂေ ဒူအီ ဟာယ် ဒူအီ မိူက်။ 3 မာလဲ၊ ဇဝ်ဖြာ ဟဲ့ မိုဝ်း နဝ်း ဆိူဝ် နဝ်း မှာန်။ အန် ဇဝ် ဒီ တဲး ပ့လူမ်၊ တဲး ဟဲန့် ဘော ဒီ ဘေ။ အန် ဒီ ရဲ ဒီ ဂွင့် ဘေ၊ တဲး ဘော ဘေ လွတ် ဒီ ဒူအီ အီ ဟာယ် အီ မိူက် ကာဆဝ်။ 4 ယေ ယီ ညှိုမ်၊ ဇဝ်ဖြာ ဒီ စွယ် ဘေ၊ တဲး ဘေ ဘူင် ဒူပ် ပီ မာနုဝ် ယေ ဒီ ဘေ။ ယေ ဘော ညှိုမ်၊ ဘေ ဒီ ဘော ဘူင် ဟာဝ် ဆေဆေ ပီ ကာလာင် ယေ ဒီ ဘေ။ 5 တဲး ဇဝ်ဖြာ စွယ် ဘေ၊ တဲး ဘေ ဘော ဝဲ ရွက့် ဇဝ်ဖြာ၊ တဲး ဘေ ဘော ဝဲ ခမ် ဒီ အူတ် နဝ်း ပီ ဇဝ် ယေဆူ။

6 ဇဝ် ယေဆူ အီ မုး ဒါ ကာညာ အီ အိုပ် အေ၊ အန် ဟဲ့ ဒွါ ပွုန် အန် ဒီ ယေ။ ခုဝ်၊ ယေ စ်ု ဘေ၊ တဲး ဘေ ဝး ဂေ ဘီနွင် ဒွန် အီ အီ ဟဲ့ ကြာန်၊ အီ တူ ဘူင် ဒူပ် ပီ မာနုဝ် ယေ ဒီ ဂေ။ 7 ဘေ မိူဝ် ဟဲ့ နပ် ဆီချာ၊ ဒေါ ကွယ် ရိုမ် ယေ ဒူပ် ဘေ၊ ယေ မိူဝ် တူ ကြာန်။ ခုဝ်၊ ဘေ လုဝ် ညိုင် ပီ ဘူင် ယေ။ 8 ယေ မိူဝ် တူ ဟူမ် ဒီလူယ် ဒီလာယ် ကြုဝ် အာဆေ။ ယေ ဟဲ့ ဂျုဝ်ဂျာ ဒီ ဘူင် ဂါန် ဒွင် ဝန် ဒွင် ခိူန်၊ ကွဲ့ တဲး န့ ညှာပ် ဒီ ဘေ။ 9 အာဝ် မုး ယေ တူ ပွိုန်၊ တူ ကာအာပ် မှာန့် ဒီ ဘေ။ မာလဲ၊ ယေ ဘူင် ပါယ် တီ၊ တဲး န့ ဘဲန် အူဖာမာ ဒီ ဘေ၊ တဲး ဘေ ဝီ ပွိုန် ဒီ ညိုင် ပီ ဘူင် ယေ။ 10 ဒေါ ကွယ် ရိုမ် ယေ ဒူပ် ဘေ၊ ယေ ဟဲ့ ဒမ် အုန် တဝ်း၊ “အာဆေ ကြာန် ဒီ ရန့် ဂါန်၊ အာဝ် လုဝ် ဟူမ် ဘူမ်။”

11 ယေ တဝ်း ပါယ် တီ ခုဝ်၊ ယေ ယိုဝ် အီ ခဲ လွင် ဒူအီ မင် အီ အီ ကွယ် ကာတဲ ဘေ တဝ်း၊ ဂေ ကြာန်။ ဂေ တူ ဘူင်၊ တူ ရန့် မာဆေ။ ဂေ ဘော အိုင် ဒီ ကွယ် ဂိတ် အီ ဟဝ် အီ ဘူင် ဂါန်။ 12 ဇဝ် ယေဆူ အီ မုး ဒါ ကာညာ အီ အိုပ် အေ၊ အန် ဟဲ့ ဒွါ ပွုန် အန် ဒီ ယေ။ ခုဝ်၊ ယေ ဒွါ အာမိင် ဘော ကာဆုး ဂေ၊ တဲး ဂေ မိုဝ်း နဝ်း ဂျီတ် နဝ်း ယေန်၊ တဲး ဂေ ဘူင် ဆီချာ ဂါန်၊ တဲး ဂေ ဟျီင် ဒုဝ် ဘြိမ် ဂေ။ 13 မာလဲ၊ အီ မုး ဘေ ဘီနွင်၊ ခဲ့ ပီ ဘူင် ဘေ နာ မှာန် နာ မွှိုမ်၊ ကွဲ့ တဲး န့ ယူမ်။

14 ဆေ န့ မိုဝ်း အီ တူ ဆီ ထူမ် ဂြုဝ်း ပီ မာနုဝ် ယေ ခဲင် ပဲ့ နီ၊ တဲး ဘေ နုဝ် ဒူအီ ဝီ တီ။ ကွဲ့ ကာဂိုက် ဒီ အန်၊ တဲး အန် ဆာယ် အီ ဟဝ်။ 15 မာလဲ၊ ကွဲ့ မာတ် အန် ပီ ရန်ဆူ ဘေ။ မာတ် အန် ပီ ဘီနွင် ဘေ။

16 ဇဝ်ဖြာ ယီ မုး ဒါ ကာညာ အီ နပ် ဒီ ဒွါ နဝ်း ဂျီတ်။ ခဲ့ မိုဝ်း ဘေ အာရေ ဘဲန် မျုဝ် ဘဲန် မျုဝ်၊ တဲး အန် ဇဝ် ဒွါ နဝ်း ဂျီတ် ဒီ ဘေ ဆေဆေ။ တဲး အန် ဇဝ် ကွယ် ရိုမ် ဒူပ် ဘေ ဒွန် အီ။

17 အုဝ် အာပေါလူ ဝီ ဒဲမ် ဂြုဝ်း နမ်လှုဝ်း နီ ရာင် အုဝ်။ ပဲ့ ပီ ဒဲမ် အုဝ် ဒွန် ဖိူန်၊ အုဝ် ဟဲ့ ဒဲမ် စိူဝ် အုဝ်။ ပါယ် တီ တဲး အီ နပ်၊ န့ မုး အုဝ် အီ ဟဲ့ ဒဲမ်။

18 တဲး ဇဝ် ယေဆူ အီ မုး ဒါ ကာညာ အီ အိုပ် အေ ဂေဇူ ဘေ ဒွန် အီ။