အာတ့် ကာလာင် အုဝ် မျုဝ် ဟဝ်၊ အုဝ် ဆီ ကာဆုး တဲး မဲ ဆာခိုဝ် မှာန့် ဒီ ဇဝ်ဖြာ ဘော ဒါင် ဂုင် ဂေဇူ ဒီ ဇဝ်ဖြာ ဒါင် ဒူအီ ဒွန် အီ။ 2 ဆာခိုဝ် ဘော ဒါင် ခုန်ဒီခမ် ဘော ဒါင် ဂေ ဒါ ကာညာ အီ မိုဝ်း ပွုန် ဒွန် အီ၊ တဲး အေ ဘောကာဂ့လျီတ် ပွိုန် ဒီ ကွယ် ဂတ် ဂျီတ်၊ ဘော ပွိုန် ဒီ ဒူပ် ဆီချာ ဇဝ်ဖြာ၊ တဲး အေ ပွိုန် ဒီ ဘူင် နာ ဘွတ် ဆေဆေ။ 3 ဆေ ဟီ ဘူင် ပါယ် တီ၊ န့ ဘော ဘဲန် နာ မွှိုမ်၊ န့ ဘော ဒူပ် ဘော ပီ အိုင် ဇဝ်ဖြာ အီ ချွတ် အေ။ 4 ဇဝ်ဖြာ ဆီ ချွတ် ဒူအီ ဘောကာဂ့လျီတ်၊ တဲး ဂေ နပ် နာ မုး နာ မှာန်။ 5 ခုဝ်၊ န့ မိုဝ်း မီ ဇဝ်ဖြာ အူ ကာဒင်။ န့ ဘော မိုဝ်း မီ အူ ဝီ အီ ဟဲ့ ချွတ် အေ၊ တဲး အေ ကွယ် ရိုမ် ဒူပ် ဇဝ်ဖြာ။ န့ မုး ဇဝ် ယေဆူ၊ အီ ဟဲ့ ဒွိုမ် ဘဲန် ဒူအီ။ 6 အန် ဇဝ် ဟဲ့ ခမ် ဒီ ယမ်၊ တဲး အန် ပွိုန် ဒီ ထုတ် လေး ဒူအီ ဘောကာဂ့လျီတ်၊ ကွဲ့ ဟူ တဲး ဘုဝ် ကာနမ် အိုပ် ဂေ။ လွင် အန် တီ၊ ဇဝ်ဖြာ ဆီ တဲး အေ ကာလာင် ဒေါ ဆင်ဒုဝ်။ 7 အုဝ် မိူဝ် ဟဲ့ ဘဲန် ဒူအီ ပီ ရဝ်း ပီ တိုယ် ဇဝ် ယေဆူ၊ ဘဲန် ဒူအီ အီ ကာလာင် လွင် အန် တီ။ အုဝ် ဘော မာနုဝ် ဒူအီ အာမျုဝ် ဟဝ်၊ တဲး ဂေ ညှိုမ် ဆီချာ နာ မုး နာ မှာန်။ အုဝ် မိူဝ် တူ ကာလုဝ်၊ ကာလာင် ဂြုဝ်း အီ မုး အီ မှာန်။

8 အုဝ် မိူဝ် စ်ု ဂေ ဒူအီ ခဲင် ဖိုင် ဇဝ် ယေဆူ ဒွန် ပ့လုဝ့်၊ တဲး ဂေ အီမာယ် ဒွန် အီ မိုဝ်း နဝ်း လုယ်၊ ဆာခိုဝ် ဒီ ဇဝ်ဖြာ။ ကွဲ့ တဲး ဂေ လာယ် ကာထဲန့်၊ လာယ် ရူ။

9 ပါယ် တီ ဘော ဂေ အီဘိုန့်၊ အုဝ် ဆီ တဲး ဂေ မိုဝ်း ဆာရေ၊ တဲး ဂေ တာ ခြိုင် အီ မွှိုမ် ယွတ်။ အာဝ် မုး၊ ဂေ လုဝ် မ့ပြာယ် ဒုဝ်၊ လုဝ် မ့ပြာယ် ဟိုက် ဂိန့် တဲး န့ စှိတ်။ ဂေ တူ လုဝ် ဟွယ် မာကာဝဲ့ ခြိဝ် ဘော ဆဲန့်၊ ဟွယ် ဘော ပွိုန် မာဟွယ်။ ဂေ တူ လုဝ် စှိုပ် ခြိုင် အီ ငဝ်း တာင်။ 10 န့ ယီ မုး နာ မွှိုမ် ပီ ဘူင် ဂေ၊ တဲး န့ စှိတ်၊ တဲး န့ မွှိုမ်၊ တဲး န့ ကာဒါန် ဒီ မုး ဂေ အီဘိုန့် အီ ရုဝ်ဆေ ဇဝ်ဖြာ။

11 တဲး ဂေ အီဘိုန့် ဟေန် ဂြုဝ်း ဇဝ်ဖြာ၊ တဲး ဂေ ကွယ် ယေန် ဘော မိုဝ်း နဝ်း ဂူမ်။ 12 အုဝ် တူ ခ့ဝါင် အီဘိုန့် မာနုဝ် အီမာယ်၊ တူ တဲး ဂေ မိုဝ်း ပွုန် ဒီ အိုပ် အီမာယ်။ အီဘိုန့် လုဝ် ကွယ် နှိမ်၊ ကွယ် ယေန်။ 13 ခုဝ်၊ ဇဝ်ဖြာ ဟဲ့ ဖာန် ဘ့လေး အာဒါမ် ဒီ အာတ့်။ ဟဲ့ ဟွတ့်၊ အန် ကော ဝီ ဖာန် ဘ့လေး နာင် အေဝါ။ 14 ဒဲင် တီ၊ အာဝ် မုး အာဒါမ် အီ ကာလိုပ် ဒီ ထူမ် ပီ ကာလုဝ် မာ ဟန့်။ န့ မုး အီဘိုန့်၊ အီ ကာလိုပ်၊ အီ လှိုဝ် ဂြုဝ်း ဇဝ်ဖြာ။ 15 မာလဲ၊ ပီ ဘော ဟဲ့ ပါယ် တီ မိူဝ်၊ အီဘိုန့် ဒီ ဝီ လွတ် ဒေါ ခမ် အန် ဒီ မိုဝ်း ဂွန်။ ဘော ဆေ အန် မိုဝ်း နဝ်း ညှိုမ်၊ နဝ်း ရွက့် ဘော နဝ်း ဆီငါ ဘွတ်။ ပါယ် တီ အန် ဒီ ဘော ဆာဒိက် ဒုဝ် အန် ဘော မိုဝ်း ဆာရေ။