ဒူအီ နပ် ဒီ တဝ်း၊ ဆေ န့ မိုဝ်း ဒူအီ အီ ဆီ ဘဲန် ဒါ တာင် ခဲင် ဖိုင် ဇဝ် ယေဆူ၊ အန် မိုဝ်း နဝ်း ဆီ ဘူင် ဂါန် နာ ဘွတ် နာ မွှိုမ်။ ဂြုဝ်း တီ ဟဲ့ မုး ဟဲ့ မှာန် အာခါခ်ု။ 2 ခုဝ်၊ ဒူအီ အီ ကာအာပ် ဘဲန် ဒါ တာင် ခဲင် ဖိုင် ဇဝ် ယေဆူ၊ အန် လုဝ် မုး ဒူအီ ပီ တူ မိုဝ်း အီ ဟဝ် ဒီ ကာလာင် နာ တူ မွှိုမ် လွင် အန်။ အန် လုဝ် မိုဝ်း အီဘိုန့် အူ ဝီ။ အန် လုဝ် အူတ် နဝ်း ဘော ပဲ ဒီ အိုပ် ဒုဝ် ဘြိမ် အန်။ အန် လုဝ် မိုဝ်း ဆာရေ ဘော နပ် ဒီ ရွုး ခဲတ့်၊ ဘော ပွိုန် မာနုဝ် အီ ဟဝ်။ 3 ကွဲ့ တဲး န့ မုး ဒူအီ အီ မွက့် ပဝ်း၊ ဒူအီ အီ ကာဟဝ်း။ တဲး အန် မိုဝ်း နဝ်း န့စု န့စမ် ဘော ခမ် ဒီ အူတ် ဒီ ယိူန် ဒီ အီ ဟဝ်။ အန် မိူဝ် တူ လုဝ် ကာအေး ကာထဲန့် ဒီ အီ၊ တူ မိုဝ်း နဝ်း လောဖ၊ ဆီ ပွိုန် ရွိုန် ဂေ ခြိဝ်။ 4 အန် လုဝ် မုး ဒူအီ အီ ပဲ ဒီ အိုပ် ဆီချာ န့ဟူမ် အန် ဘော နပ် ဒီ မာနုဝ် ဂွန် အန်၊ တဲး ဂေ ရုဝ်ဆေ အန် ဘော ထူမ် ဂြုဝ်း အန်။ 5 ဆေ အန် တူ ပဲ ဒီ အိုပ် န့ဟူမ် အန်၊ မှဝ် အန် ဒီ ပါယ် ဒီ အိုပ် ဒူအီ ခဲင် ဖိုင် ဇဝ် ယေဆူ ဘောကာဂ့လျီတ် အီ မုး ဒူအီ ပီ အိုပ် ဇဝ်ဖြာ။း 6 ဒဲင် တီ၊ ကွဲ့ တဲး န့ မုး ဒူအီ အီ ညှိုမ် ကာမာယ်။ ယုဝ် အန် မိုဝ်း နဝ်း ပီခိုက်၊ ဝီ ကာဒုး ဒီ ခမ် မှာပ် အန် အီ ပီ ပီ လုဝ် ခမ် ဘုဝ် ကာနမ်။ 7 အန် လုဝ် မုး ဒူအီ ပီ ရုဝ်ဆေ အီ ဟဝ်၊ အီ တူ ညှိုမ် ဇဝ်ဖြာ။ ဆေ အာဝ် ပါယ် တီ၊ ယုဝ် အန် ဝီ ကာဒုး ဒီ ဆာယ် အီ၊ ယုဝ် န့ ပီ အန် ဟဲ့ စုဝ်း ခဲင် ယွတ့် ပဲ့ ဟဲ့ ဒိန့် အုန် ဘုဝ် ကာနမ်။

8 ပါယ် တီ၊ ဘော ဒူအီ အီ စွယ် ဒါ တာင် ခဲင် ဖိုင် ဇဝ် ယေဆူ၊ ဂေ လုဝ် မုး ဒူအီ အီ မိုဝ်း ဆာရေ၊ ဘော ကာလာင် ဂြုဝ်း ဆိူဝ် ဆိူဝ် မှာန် မှာန်၊ တူ ဒျီင် ကိူန် အိုမ် မာငုန်၊ တဲး န့ ကော ယိုတ့်။ ဂေ မိူဝ် တူ ပွိုန် မိုဝ်း နဝ်း ကာပြာ ဒီ မိုဝ်း ကြုဝ်ကြာမ် ကိူန်။ 9 ခဲင် နဝ်း ဂေ၊ ဂေ လုဝ် ညှိုမ် ဆီချာ ဂြုဝ်း ဇဝ်ဖြာ ပီ တူ ဒွိုမ် ကာလာင် အန် ဒီ အီ ဟဝ်။ ဂေ ဘော လုဝ် ဒူပ် ဆီချာ ဂြုဝ်း တီ၊ ကွဲ့ တဲး နဝ်း ဂေ ဖျာက် ဒုဝ် ဘြိမ် ဂေ။ 10 ဘေ လုဝ် ထေဝ် ဒီ ယွတ် ဒူအီ အီ လုဝ် စွယ် ဒါ တာင် တီ ဒီ အာတ့်။ ဆေ အာဝ် မိုဝ်း ဒီ ကာလာင် နာ တူ မွှိုမ် လွင် ဂေ၊ ဟဲ့ ပွိုန် တဲး ဂေ ဘူင် ဂါန် အီ စွယ် ဒါ တာင် အီ အိုပ် ဒူအီ ခဲင် ဖိုင် ဇဝ် ယေဆူ။

11 အီဘိုန့် ဂေ ဒါ တာင် ဘော အီဘိုန့် ဂေ ဒူအီ အီ စွယ် ဒါ တာင် မိူဝ် ပါယ် တီ။ ဂေ လုဝ် မုး အီဘိုန့် အီ မိုဝ်း အာဂျာင် မွှိုမ်၊ အီ တူ ဝိန် ဒီ ကာယွင့် အီ ဟဝ်။ ဂေ လုဝ် မုး အီဘိုန့် အီ နပ် ဒီ အူတ် နဝ်း၊ ဘော ဘူင် နာ ဆိူဝ် နာ မှာန် ဒွန် မျုဝ်။

12 အီ စွယ် ဒါ တာင် အီ အိုပ် ဂေ ဒူအီ ခဲင် ဖိုင် ဇဝ် ယေဆူ၊ ဘော ဂေ လုဝ် မိုဝ်း အီဘိုန့် အူ ဝီ၊ ဘော လုဝ် ပဲ ဒီ မာနုဝ် ဂွန် ဂေ၊ ဘော နပ် ဒီ ယွတ် လိုမ်လာ ဆီချာ န့ဟူမ် ဂေ။ 13 ခုဝ်၊ ဂေ အီ ယွတ် မဲန် ဆီချာ ဂေ ဒူအီ ခဲင် ဖိုင် ဇဝ် ယေဆူ၊ ဂေ ဒီ မိုဝ်း ဆာရေ။ ဂေ ဘော ယ ကာလာင် လွင် ညှိုမ် ဂေ ဇဝ် ယေဆူ။

14 အုဝ် ဟဲ့ ခြာမ် ဒီ စေဝ် တး ဒူင် ကွယ် မဲ။ မာလဲ၊ အုဝ် ဟဲ့ ဝီ ဒဲမ် ပဲ့ နီ တိုယ် ဒီ မဲ။ 15 ဆေ အုဝ် ဘော နာန် တး၊ ပဲ့ နီ ဒီ တဲး မဲ နပ် ပီ ဒီ လုဝ် ဘူင်၊ လုဝ် ပါယ် ခဲင် န့ဟူမ် ဇဝ်ဖြာ။ န့ဟူမ် ဇဝ်ဖြာ တီ ဘော မုး ဂေ ဒူအီ ခဲင် ဖိုင် ဇဝ် ယေဆူ၊ အီ မုး ဒူအီ ပီ အိုပ် ဇဝ်ဖြာ အီ မုး ဇဝ်ဖြာ အိမ်။ ဂေ ဒူအီ ခဲင် ဖိုင် ဇဝ် ယေဆူ တီ၊ ဂေ မိူဝ် ဒူပ် ဆီချာ နာ မုး နာ မှာန်၊ တဲး ဂေ ပီ ရွင့် ဘော စေန့် ရွင့် အီ တဲး ကာင် ကွယ် မန် ဆီချာ။ 16 ဂြုဝ်း ဇဝ်ဖြာ ပီ တူ နပ် အီ ဟဝ်၊ အီ တဲး အေ ညှိုမ် ဘိုင် အန်၊ န့ ဟဲ့ မွှိုမ် အာမ် ကာဆဝ်။ အာဝ် မိုဝ်း အာဆေ အီ ပွိုန် ထဲန့်။ ဂြုဝ်း ဇဝ်ဖြာ တီ ဘော ကာလာင် လွင် ဇဝ်ဖြာ ဟဲ့ ဘဲန် ဒူအီ။ နဝ်း ဖွိုမ် ဇဝ်ဖြာ ဟဲ့ ဘျ လွင် အန် တီ ဟဲ့ မှာန် ဟဲ့ မုး။ ဘော အာမူ အာမာတ် ဇဝ်ဖြာ ဟဲ့ ပွိုန် ဒီ ယိုဝ် ဒူအီ တီ။ ဒူအီ ဘဲန် ဝီ ဘဲန် ဝီ ဟဲ့ ဟာဝ် ကာလာင် လွင် ဒူအီ တီ၊ တဲး ဒူအီ ဘဲန် မျုဝ် ဘဲန် မျုဝ် ပွိုန် ဒီ ထူမ်၊ တဲး ဒူအီ ဘော ကာဒါယ် ပွိုန် ဒီ ညှိုမ်။ ဟဲ့ ဟွတ့်၊ ဇဝ်ဖြာ တဲး အန် ဝီ ဟုဝ့် ခဲင် ဂါင်ဟြာဝ်၊ ဝီ မိုဝ်း အာဖုင် ဒင်ခုဝ် တာင် ကာဆဝ်။