နဝ်း ဖွိုမ် ဇဝ်ဖြာ ဟဲ့ ကာလာင် ဆီချာ တဝ်း၊ နာ အာတ့် နီ ဟာဝ်၊ ဒူအီ မင် အီ ဂေ ဒီ ဝဲန် ပီ ညှိုမ် ဂေ၊ ဝီ ညှိုမ် ကာနမ် အီ ကာလုဝ် အီ။ ဂေ ဒီ ဝီ ဘူင် ဒူပ် ပီ မာနုဝ် ကာနမ်။ 2 ပီ မာနုဝ် ဇိုဝ် တီ၊ န့ တး ဒီ ဒူအီ အီ ညိုင်ရာင် ဘွတ်၊ ယီ ဆီမာ ကာလုဝ်။ ဂေ ဟူ နပ် အီ မွှိုမ် အီ တူ မွှိုမ်။ နဝ်း ဂေ ဟဲ့ ပီ ယင် အီ ဟဲ့ ဆိန် ကူပ် ဟဲ့ တာတ် ဒီ ငဝ်။ 3 ဂေ ဘော မာနုဝ် တဝ်း၊ “အာဝ် လုဝ် ခတ်။ အာဝ် မွှိုမ် ဟူမ် ပီ ဒီ ဟူမ် မျုဝ် နီ မျုဝ် နီ။” မာလဲ၊ အေ ယီ ဟဲ့ နပ်၊ ဇဝ်ဖြာ ဟဲ့ ဖာန် ဘ့လေး ပီ ဒီ ဟူမ် ဒွန် မျုဝ်၊ တဲး ဂေ ဒူအီ အီ ညှိုမ် အန် ဘော ဂေ ဒူအီ အီ နပ် နာ မုး နာ မှာန် ဘော ပွိုန် ဒီ ဟူမ် ဘော ဒါင် ဂုင် ဂေဇူ ဒီ ဇဝ်ဖြာ။ 4 ပီ ဖာန် ဘ့လေး ဇဝ်ဖြာ ဒွန် မျုဝ် ဟဲ့ မွှိုမ်။ ဆေ အေ ဟဲ့ ဆာခိုဝ် ဒါင် ဂုင် ဂေဇူ ဒီ ဇဝ်ဖြာ၊ အာဝ် မိုဝ်း ဒီ လုဝ် ကမ် လုဝ် ဝး ခေါ အူ မျုဝ်။ 5 ခုဝ်၊ ဇိုဝ် တီ ဒွန် မျုဝ် ဟဲ့ ဟွတ့် ဆီငါ ဘွတ် ကူပ် ဂြုဝ်း ပီ ကာလာင် ဇဝ်ဖြာ လွင် အန် တီ ဘော ကူပ် ပဲ့ ဟဲ့ ဆာခိုဝ် အေ။

6 ဆေ မဲ မာနုဝ် ပါယ် တီ ဒီ ဂေ ဘီနွင် ခဲင် ဖိုင် ဇဝ် ယေဆူ၊ မဲ ဒီ ဘဲန် ဒူအီ အီ ဘူင် ဆီချာ ဂါန် ဇဝ် ယေဆူ။ ခုဝ်၊ ဆိန့် ဒီတဲတ် မဲ၊ မဲ ဟဲ့ ထူမ် ပီ မာနုဝ် အီ လွင် အီ မုး အီ မှာန် ဘော လွင် လုဝ် ညှိုမ် လွင် အန် တီ။ မဲ မိူဝ် ဟဲ့ ဒူပ် ဆီချာ ပီ မာနုဝ် တီ။ 7 ကွဲ့ တဲး မဲ ထူမ် အာဘိုမ် ဘဲန် မျုဝ် ဘဲန် မျုဝ် အီ တူ မုး လွင် ဇဝ်ဖြာ။ ကွဲ့ တဲး မဲ ထူမ် ပီ ခဲ ယာ ကတ် ဂေ အီ တူ ဒူပ် ဒါရာ ဇဝ်ဖြာ၊ ကွဲ့ တဲး န့ လိုပ် နဝ်း မဲ။ တဲး မဲ ယီ ဖိုက် ဒီ ဒူပ် ဇဝ်ဖြာ။ 8 ခုဝ်၊ ဆေ မဲ ခတ် နဝ်း ဒီ ဖိုက် ဒုဝ် ဘူင့် မဲ၊ န့ ဘဲန် အာဂျိုဝ် မင် မျုဝ် မင် မျုဝ်။ ဆေ မဲ ယီ ဝီ ဂျုဝ်ဂျာ ဒီ ဒူပ် ဇဝ်ဖြာ၊ န့ ဟဲ့ ဝဲ မိုဝ်း အာဂျိုဝ် ဒွန် မျုဝ်။ ဘော ဇာတ် နီ ဘော ဇာတ် ဒီ တး ဟဲ့ မိုဝ်း အာဂျိုဝ် အန်။

9 ဂြုဝ်း တီ ဟဲ့ မုး ဂြုဝ်း မှာန် အာခါခ်ု။ န့ ဟဲ့ မွှိုမ် ညှိုမ် မွှိုမ် ဒူပ်။ 10 ခုဝ်၊ အေ ဘော ခတ် နဝ်း ဒီ ဘူင် ဂါန် ဇဝ်ဖြာ ဘော ဂျုဝ်ဂျာ ဒီ ဘူင် ပီ အိုင် အန်။ အေ ဘော ညှိုမ် ဘိုင် ဇဝ်ဖြာ အီ ကွယ် ဆေဆေ၊ အီ မုး ဇဝ်ဖြာ အီ နပ် ဒီ ချွတ် ဒူအီ ဘောကာဂ့လျီတ်။ အန် ဒီ ချွတ် ဂေ အီ ညှိုမ် အန် အာခ်ု မှာန်။

11 တဲး မဲ မာနုဝ် အီ လွင် အန် တီ ဘော စ်ု ဂေ ဒူပ် ပီ မာနုဝ် တီ။ 12 ကွဲ့ တဲး အီ လုက်တာယ် မဲ ကူပ် ဆီ နှိုမ် မဲ။ တဲး ဂေ အီ ညှိုမ် ဒွန် အီ ယွတ် ပီ ပါယ် မဲ။ န့ ဘော မုး ပီ ကာလာင် မဲ ဂြုဝ်း၊ ပီ ဘူင် မဲ ဒွန် မျုဝ်၊ ပီ ရွက့် မဲ အီ ဟဝ်၊ ပီ ညှိုမ် မဲ အန် ဇဝ် ဘော ပီ ဆာဒိက် မဲ နဝ်း မဲ၊ တဲး န့ ဆီငါ၊ ကွဲ့ တဲး န့ မွှိုမ် ကာအိး၊ တဲး ဇိုဝ် တီ ဒွန် မျုဝ် ဘဲန် အူဖာမာ ဒီ အီ ဟဝ်။ 13 တဲး မဲ အွန် ဒီ တိး ဘပ် ဇဝ်ဖြာ ဒူင် တး ကာဇု ဂေ ဒူအီ ခဲင် ဖိုင် ဇဝ် ယေဆူ။ တဲး မဲ ဘော ဟုဝ် ဒါရာ ဘော မာနုဝ် ဂြုဝ်း ဇဝ်ဖြာ၊ တဲး န့ ကော ဇမ် ပန် ဒီ တး အုဝ်။ 14 မဲ ကွဲ့ ဆာဒါက် ဆာရာယ် ပီ ဂေဇူ နဝ်း ဖွိုမ် ဇဝ်ဖြာ ဒီ မဲ။ မဲ ဟဲ့ ပွိုန် ဂေဇူ တီ ဒေါ ကာလာင် ဂေ ဒါ တာင် ခဲင် ဖိုင် ဇဝ် ယေဆူ ဂြုဝ်း ဇဝ်ဖြာ ဒီ မဲ၊ ဘော ဒေါ ဒါင် ဂေ ဒဲ ဂေ ဒဲင် ဂိန့် မဲ၊ ဆာခိုဝ် ဒါင် မဲ။ ကွဲ့ တဲး မဲ ပိဝ် လွင် အန် တီ။

15 တဲး မဲ လှုဝ်း လွင် အန် တီ ဆေဆေ။ တဲး မဲ ဂျုဝ်ဂျာ ဒီ ဘူင် တူတ့် ဒွန် မျုဝ် ပီ တဝ်း အုဝ် တီ၊ တဲး န့ ဘော လိုဝ်း ဆီချာ ဒီ ဒူအီ ဒွန် အီ၊ ခဲ့ ဟဲ့ တာင် အာဂျိုဝ် ပီ ဘူင် မဲ တီ။ 16 တဲး မဲ နပ် ဒီ ဆာဒိက် ဒုဝ် မဲ ဘော ပီ မာနုဝ် မဲ၊ တဲး န့ မှာန် ဆေဆေ။ ဆေ မဲ ဘူင် ပါယ် တီ၊ န့ ဒီ စွယ် ဘော မဲ ဘော ဂေ ဘီနွင် အီ ထူမ် ဂြုဝ်း မဲ တီ၊ တဲး န့ ချွတ် ဘေ။