မဲ ကွဲ့ အေး၊ ကွဲ့ တဝ်း ဂြုဝ်း အီ တူ မွှိုမ် ဒီ အီမာယ် အီ ဟဲ့ ကတ် ဟဲ့ ဂဲ။ တဲး မဲ မာနုဝ် ဂေ နာ ဒါခိုယ်၊ မာတ် ဂေ ပီ ဂုန့် မဲ။ ဂေ အီ ဆီ နှိုမ် လွှိုမ် မဲ၊ တဲး မဲ မာတ် ဂေ ပီ ဝါ မဲ။ 2 အီဘိုန့် အီ ဟဲ့ ဂဲ ဟဲ့ ကတ်၊ တဲး မဲ မာတ် ဂေ ပီ မာ မဲ။ အီဘိုန့် အီ ဆီ နှိုမ်၊ တဲး မဲ မာတ် ဂေ ပီ ဝါ မဲ။ တဲး ဂြုဝ်း မဲ လေး ခဲင် နဝ်း ဆီငါ၊ နဝ်း ဘွတ်။

3 တဲး မဲ ရုဝ်ဆေ ယာ ဆီပြး အီ တူ မိုဝ်း ဒူင် ဒီ ဘိုင် အာခါခ်ု။ 4 ဆေ န့ မုး ယာ ဆီပြး အီ မိုဝ်း လှုက်လှာန်၊ တဲး ဂေ လှုက်လှာန် အန် ဘူင် ဒူပ် ပီ ညှိုမ် ဂေ၊ တဲး ဂေ စွယ် ဒူအီ ခဲင် န့ဟူမ် ဂေ ဒီ အာတ့်၊ ကွဲ့ တဲး ဂေ ပိဝ် ဂေဇူ ပီ ဒွိုမ် ဒွါ ဂုန့် မာ ဒါ ယာ ဒီ ဂေ။ ဆေ ဂေ ဘူင် ပါယ် တီ၊ န့ ဒီ ဘော လဝ့် ဘော နဝ်း ဇဝ်ဖြာ။ 5 ဆေ န့ မုး ယာ ဆီပြး အီ ကွယ် ရာင် အန်၊ အန် မိူဝ် တူ မိုဝ်း မှာန် လှုက်လှာန်၊ အန် ဒီ လှုဝ်း မီ ဇဝ်ဖြာ ဘော ဆာခိုဝ် ဒွင် ခိူန် ဒွင် ဝန် မှာန့်၊ တဲး ဇဝ်ဖြာ စွယ် အန်။ 6 မာလဲ၊ ဆေ န့ မုး ယာ ဆီပြး အီ ဒူပ် နဝ်း ကာဝါတ့် အန်၊ အန် ဟဲ့ ပီ ဒူအီ ယမ် အီ တူ ဒိပ်။ 7 မဲ လုဝ် ဒမ် အုန် ဂြုဝ်း ဇဝ်ဖြာ နီ ဒီ ဂေ ဒူအီ ညှိုမ် အန်၊ ကွဲ့ တဲး အီ ဟဝ် ပွိုန် ဒီ ကာလာင် နာ တူ မွှိုမ် လွင် ဂေ။ 8 အာဆေ တူ ဟျီင် တူ လိုမ်လာ ဒူအီ ခဲင် န့ဟူမ် အန်၊ အန် ဟဲ့ ဝဲန် ဂြုဝ်း ဇဝ်ဖြာ ပီ ညှိုမ် အန်။ အန် ဟဲ့ ဟာယ် လွှိုမ် ဂေ ဒူအီ အီ တူ ညှိုမ်။

9 အာဝ် ပွိုန် ဟပ် စိူဝ် ယာ ဆီပြး ဒွန် အီ ခဲင် ဇာရာင် ဘေ။ ဆေ န့ မိုဝ်း ယာ ဆီပြး အာဆာက် အီ ဟဲ့ နုဝ့် ဒဝ် ဂိုဝ် ဆီနမ် လူယ်၊ ဆေ အန် မိူဝ် ဟဲ့ ဒွိုမ် ကွယ် ရိုမ် ဒူပ် အီမာယ် အန် ဆေဆေ၊ ယာ ဆီပြး ဇိုဝ် တီ၊ ဟဲ့ ပွိုန် ဟပ် စိူဝ် အန် ခဲင် ဇာရာင် ဘေ။ 10 ဆေ အန် မိူဝ် မုး ယာ ဆီပြး အီ မိုဝ်း အာဂျာင် ဆီချာ၊ အီ ဟဝ် မိူဝ် တဝ်း၊ အန် နပ် ဒီ ဘူင် နာ ဘွတ် နာ မွှိုမ်၊ ဆေ အန် မိူဝ် နပ် ဒီ မာနုဝ် ဂွန် အန်၊ နပ် ဒီ ရွုး ခဲတ့်၊ နပ် ဒီ ဘာယ် ပ့လဝ် ဂေ ဒူအီ အီ ညှိုမ် ဇဝ် ယေဆူ၊ ဆေ အန် နပ် ဒီ စွယ် ဂေ အီ ဇမ် ဒုက် ဘော နပ် ဒီ ဂျုဝ်ဂျာ ဒီ ဘူင် နာ ဘွတ် နာ မွှိုမ် ဒွန် မျုဝ်၊ ဟဲ့ ကာအာပ် စွယ် ယာ ဆီပြး ဇိုဝ် တီ။

11 ဆေ န့ ယီ မုး ယာ ဆီပြး အီ ဆီ နှိုမ်၊ ကွဲ့ ဟပ် စိူဝ် ဂေ ခဲင် ဇာရာင် ယာ ဆီပြး။ ခုဝ်၊ ဆေ ဟီ ဇမ် ပန် ဒီ ဝီ ဆီ ခတ် ဂေ၊ နဝ်း ဆီ ခတ် ဂေ တီ ဒီ ဝီ တာင် လွှိုမ် နဝ်း ဆီ ဘူင် ဂေ ဂါန် ဇဝ် ယေဆူ။ 12 ဆေ ဂေ ဟဲ့ ဟွတ့် ကာဆဲန့် ဒီ ဘူင် ဂါန် ဇဝ်ဖြာ၊ ဝီ ဝဲန် ပီ ဒွိုမ် ကာဆဲန့် ဂေ တီ၊ န့ ဒီ ဘဲန် မှာပ် ဒီ ဂေ။ ဂေ လုဝ် ဝီ ခမ် မှာပ် ဂေ တီ။ 13 ဒဲင် တီ၊ ဂါန် မိူဝ် ဂေ တူ ရန့်။ ဂေ ဘော ဟုဝ့် ကာင် ကွာ၊ လူင် ကာင် တေတ့်၊ ဂေ ဘော ကြာန် ကာဆဝ်။ ဂေ ဘော အွန် ဒီ ခဲ အာဂျာင် အီ ဟဝ်၊ နပ် ဒီ ပျာတ့် န့ဟူမ် အီ ဘော ကာလာင် ပီ တူ ကာအာပ် ကာလာင်။ 14 ခုဝ် အန် တီ အုဝ် ဆီ တဲး ဂေ ယာ ဆီပြး အီ ဆီ နှိုမ် ဝီ ခတ် ဒိုဝ်း အီမာယ် ပေါ အူ ဇေန့်၊ ဝီ မိုဝ်း ဂွန်၊ တဲး ဂေ ယွတ် မဲန် ဆီချာ န့ဟူမ် ဂေ၊ ကွဲ့ တဲး ရန်ဆူ အေ ပွိုန် ဒီ ဖျာက် အေ။ 15 ယာ ဆီပြး မင် အီ ယီ ဟဲ့ ဝဲန် ဇဝ် ယေဆူ၊ ဝီ ဘိုင် ဘုဝ် ကာနမ်။

16 ဆေ န့ မုး အီဘိုန့် အီ ညှိုမ် ဇဝ်ဖြာ၊ ဆေ အန် မိုဝ်း ဘီနွင် ဝေါဝဲ အီ မုး ယာ ဆီပြး၊ တဲး အန် ခမ် ဒီ ယွတ် လိုမ်လာ ယာ ဆီပြး တီ။ ကွဲ့ တဲး န့ ညှာပ် ဒီ ဂေ ဒူအီ ခဲင် ဖိုင် ဇဝ် ယေဆူ။ တဲး ဂေ ဒူအီ ခဲင် ဖိုင် ဇဝ် ယေဆူ ယွတ် မဲန် မီ ယာ ဆီပြး အီ တူ မိုဝ်း မှာန် ဒူင် ဒီ ဘိုင်၊ အီ ကွယ် ရာင် အန် အူ ဝီ။

17 ဂေ ဒါ တာင် အီ ယွတ် ဆီချာ ဖိုင် ဇဝ် ယေဆူ၊ တဲး န့ ကာဇီ ဒွန် မျုဝ်၊ ဟဲ့ ကာအာပ် ဘေ ရုဝ်ဆေ ဂေ လွှိုမ် အီ ဟဝ်။ ဂေ ဒါ တာင် အီ ဟုဝ် ဒါရာ ဇဝ်ဖြာ ဘော မာနုဝ် အီ၊ ဟဲ့ ဝဲ ကာအာပ် ရုဝ်ဆေ လွှိုမ် တီ။ 18 ခုဝ်၊ ခဲင် ဘပ် ဇဝ်ဖြာ ဟဲ့ ဒဲမ် တဝ်း၊ “ကွဲ့ ဒိုဝ်း ဆီဘ့လုဝ်း စှိုပ် ဒီ မူတ့် မာမက် ဒေါ ညဲတ့် အန် ဒီ ငှုဝ်။” ပါယ် တီ၊ န့ ဟဲ့ ဒဲမ် ပေါ မ့ပွါ တဝ်း၊ “ဒူအီ အီ ရန့် ဂါန်၊ အန် လုဝ် ပွိုန် ရုး ရန့် အန်။” 19 ဆေ ဒူအီ ဆီ ဖျာက် ဂေ ဒါ တာင် ခဲင် ဖိုင် ဇဝ် ယေဆူ၊ ဆေ အာဝ် မိုဝ်း ဆက်ဆေ အာ အူယ် ဝီ၊ အာဝ် လုဝ် ထူမ် ဂြုဝ်း ဂေ တီ။ 20 ဆေ ဒါ တာင် ယီ ဘူင် မှာပ်၊ လုဝ် မာနုဝ် ဂေ နာ အာတ့် ဒူအီ ဘောကာဂ့လျီတ်၊ တဲး ဒူအီ ဘောကာဂ့လျီတ် ယုဝ်၊ ကွဲ့ တဲး ဂေ ယ ညိုင်။

21 အုဝ် စ်ု မဲ၊ တဲး မဲ ဘူင် ဒူပ် ဂြုဝ်း ပီ ကာလာင် အုဝ် နီ၊ ကွဲ့ တဲး မဲ မိုဝ်း ဒူင် ရွက့် ဒူင် ဇွင့်၊ တဲး မဲ ဘူင် တဲး န့ ကာရမ် ဒွန် မျုဝ်။ ဘော ဇဝ်ဖြာ၊ ဘော ဇဝ် ယေဆူ၊ ဘော ဂေ အာမူ အာမာတ် ဇဝ်ဖြာ ပဲ့ ဟဲ့ ရဝ်း ဇဝ်ဖြာ၊ ဂေ ဟဲ့ နပ် လွင် အန် တီ။

22 မဲ ကွဲ့ ကာတဝ် ဒီ မွင့်ကာရာ ဒါင် ဒဲ ဒဲင် ဂိန့် ဒူအီ။ ယုဝ် န့ ဒီ ဘော ဘာ့ ဘော မဲ ဆေ ဂေ ကာလိုပ် ဒီ ဝီ ဘူင် မှာပ်။ တဲး မဲ ဆာဒိက် နဝ်း မဲ၊ တဲး န့ ဆီငါ။

23 မဲ ကွဲ့ ဒျီင် မီ အိုမ် ဒီလူယ်။ တဲး မဲ ဒျီင် ဘော အိုမ် မာငုန် အီ စဲက်၊ တဲး န့ ပဲ ဝတ့် ဆဝ် မဲ ဘော ရောဂါ ပီ ဒွိုမ် မိုဝ်း မဲ ဆေဆေ။

24 မှာပ် ပီ ဘူင် မင် အီ၊ န့ ဘော လိုဝ်း ဆီချာ ဆိန့် အာတ့် ဆုင်ဖျာတ် အီ အာမူ ဂေ။ မာလဲ၊ မှာပ် ပီ ဘူင် မင် အီ၊ န့ ကော လှေန့်၊ ကော ဝီ လိုဝ်း။ 25 လွင် ပီ ဘူင် ဒူအီ မင် အီ နာ ဘွတ် နာ မွှိုမ် မိူဝ်၊ န့ ဘော ပါယ် တီ။ ပီ ဘူင် ဒူအီ မင် အီ နာ မွှိုမ်၊ န့ ပီ ဆ လိုဝ်း ဆီချာ အူ ဇေန့် မိူဝ်၊ န့ ယီ တူ ပွိုန် ချြီင် ဒေါ မှဝ်။