ဂေ အီ မုး မှာယ် အီ ဟဲ့ ကာအာပ် ရုဝ်ဆေ ဒါ ကာညာ ဂေ၊ ကွဲ့ တဲး အီ ဟဝ် ပွိုန် ဒီ လုက်တာယ် ဇဝ်ဖြာ ဘော ပီ မာနုဝ် အေ။ 2 မှာယ် ဂေ တီ၊ ဆေ ဒါ ကာညာ ဂေ မုး ဒူအီ အီ ညှိုမ် ဇဝ် ယေဆူ၊ အာဝ် ပွိုန် တဝ်း၊ ကူပ် မုး အေ အူ ဘီနွင် ကူပ် ညှိုမ် အေ ဇဝ် ယေဆူ၊ အာဝ် ဘော လုဝ် ရုဝ်ဆေ အန်။ မာလဲ၊ ဂေ ဟဲ့ ဝဲ လုဝ် ဘူင် ဆီချာ ဂါန် ဒါ ကာညာ ဂေ တီ။ ခုဝ်၊ ဂါန် ပီ ဘူင် ဂေ န့ ဘဲန် အာဂျိုဝ် ဒီ ဘီနွင် ပီ ရွက့် ဂေ။ တဲး မဲ မာနုဝ် ဂေ ဘော ကာဆုး ဂေ၊ တဲး ဂေ ဘူင် ဒူပ် ပါယ် တီ။

3 ဆေ န့ မိုဝ်း ဒူအီ အီ တး မာနုဝ် အီ လာယ် ဘ့လိူင် ဒီ ပီ မာနုဝ် အုဝ်၊ ဆေ ပီ မာနုဝ် အန် တီ အာဝ် ဒူပ် နာ မုး နာ မှာန် ပီ မာနုဝ် ဇဝ် ယေဆူ အီ မုး ဒါ ကာညာ အေ၊ ဆေ န့ မိူဝ် တူ ဒူပ် ဂြုဝ်း ဇဝ်ဖြာ ပီ ရုဝ်ဆေ အေ၊ 4 ဒူအီ ဝီ တီ၊ အန် မုး ဒူအီ ပီခိုက်၊ တူ နပ် မာဆေ။ ခဲင် နဝ်း အန်၊ အန် ဆီ ကာထဲန့် ဒီ အီ၊ ဘူင် တဲး ဂြုဝ်း အန် ပဲ အီ၊ ဘူင် တဲး အီ လာယ် လှယ့်၊ လာယ် ကာလုတ့်။ အန် ဆီ ဘူင် တဲး အီ လာယ် ကာယွင့်၊ တူ လာယ် ညှိုမ် နဝ်း။ 5 အန် တဲး ဂေ အီ မိုဝ်း နဝ်း တူ မွှိုမ် လာယ် ကာအေး ကာထဲန့်။ ဒူအီ တီ အာဝ် ဟူ နပ် နာ မုး နာ မှာန်။ အန် ဘော ထာင် ဆေ အန် ရုဝ်ဆေ ဇဝ်ဖြာ၊ အန် ဒီ ပွိုန် ရွိုန် ကိူန် တဲး အန် ခြမ်။ 6 န့ ယီ ဟဲ့ မှာန်၊ ဆေ အေ ရုဝ်ဆေ ဇဝ်ဖြာ၊ ဆေ ခဲ့ ပီ မိုဝ်း အေ တဲး န့ ဘြေ့ ဒီ နဝ်း၊ န့ ဘဲန် အာဂျိုဝ် ကိူန် ကာဆဝ် ဒီ အေ။ 7 ခုဝ်၊ ဒေါ ဂွိုတ် တး အေ ဒဲင် ကာဒါယ် နီ၊ အေ မိူဝ် တူ မိုဝ်း ဒီ ဒိုဝ်း တး မာဆေ။ ဆေ အေ ပီ ဝီ လေး ဟာဝ်၊ အေ မိူဝ် တူ ပွိုန် ဒိုဝ်း ဟာဝ် မာဆေ အီ ကွယ် ဒဲင် ကာဒါယ် နီ။ 8 ဆေ န့ ပါယ် တီ၊ ဆေ အေ ဟဲ့ မိုဝ်း ဒီ ဟူမ် ဘူမ်၊ မိုဝ်း ဒီ တာ ခြိုင်၊ တဲး နဝ်း အေ ဒါခိုယ်၊ တဲး န့ စူ ခဲ့ တီ။ 9 မာလဲ၊ ဂေ အီ မိုဝ်း နဝ်း ဆီ ခြမ်၊ ဂေ ဒီ ကာဒုး အီ ပျာတ့် အီ ကဝ် ဂေ၊ န့ ဘော ပီ ဂေ ဟဲ့ ခြေ ယွတ့်။ နဝ်း လောဖ ဂေ၊ န့ ဒီ ယဲတ့် ဂေ ဘူင် အီ ရိုဝ် ကာဆဝ်၊ တဲး ဂေ လိုဝ် စှိုမ် တူတ့်။ 10 ခုဝ်၊ နဝ်း အီ ရွက့် ရွိုန်၊ န့ ဘော ပီ ရျီး ဟေ။ ဆေ န့ လတ့်၊ န့ ဒီ လေး အီ တူ မွှိုမ် ဒွန် မျုဝ်။ ဒူအီ မင် အီ ဟဲ့ ကာဒိုက် ကာဒဝ့် ဒီ ရွိုန် ဂေ ခြိဝ် ဘော ဝဲန် ပီ ညှိုမ် ဂေ။ နဝ်း ဂေ မိူဝ်၊ အာဝ် ဟူ ဒါခိုယ် ကူပ် ကာဒုး ဂေ ဒုက် ဘဲန် မျုဝ် ဘဲန် မျုဝ်။

11 မာလဲ၊ အီ မုး မဲ၊ မဲ မုး ဒူအီ ပီ အိုပ် ဇဝ်ဖြာ၊ တဲး မဲ ဝး မှာပ် ဇိုဝ် တီ။ တဲး မဲ နင်ဂန် ဒီ ဘူင် နာ မုး နာ မှာန် ဘော ရုဝ်ဆေ ဇဝ်ဖြာ။ တဲး မဲ မိုဝ်း နဝ်း ညှိုမ်၊ နဝ်း ရွက့်၊ ဘော ခမ် ဒီ အူတ် နဝ်း၊ ဘော မိုဝ်း နဝ်း န့စု န့စမ်။ 12 တဲး မဲ ညှိုမ် ဆီချာ ဒွန် မျုဝ် လွင် အာဆာက် ကာမာယ် ပီ ဒွါ ဇဝ်ဖြာ ဒီ မဲ။ ဇဝ်ဖြာ ဟဲ့ ဒဲ့ မဲ ဘော ဒွါ အာဆာက် ကာမာယ် တီ ဒီ မဲ ဒေါ ကာလာင် မဲ ဒီ အာတ့် ဒူအီ ကိူန် လွင် ဟဲ့ ညှိုမ် မဲ ဇဝ် ယေဆူ။ 13 ဘော ဇဝ်ဖြာ အီ ဟဲ့ ဒွါ အာဆာက် ဒီ ဒွန် မျုဝ်၊ ဘော ဇဝ် ယေဆူ အီ ဟဲ့ ကာလာင် ဆိူဝ် ဒီ ဒါ ကာညာ အာဖီလာတ် တွိုန်၊ ဂါယ် ဟဲ့ နပ် လွင် ပီ ကာလာင် အုဝ် ဒီ မဲ။ 14 တဲး မဲ ဘူင် ဒူပ် ဂြုဝ်း ပီ စ်ု အန် ဇဝ် ဒီ မဲ။ ကွဲ့ တဲး မဲ ကာလိုပ်၊ ကွဲ့ တဲး အီ ဟဝ် ပွိုန် ဒီ ကာလာင် နာ တူ မွှိုမ် လွင် မဲ၊ တဲး န့ ကော ဇမ် ပန် ဒီ တး ဇဝ် ယေဆူ အီ မုး ဒါ ကာညာ အီ အိုပ် အေ။ 15 ဇဝ်ဖြာ ဒီ တဲး ဇဝ် ယေဆူ ဝီ တး ပန် ဒီ ဇမ် အာခြာဝ် အန်။ ခုဝ်၊ တဲး အေ အိူပ် ဇဝ်ဖြာ။ အန် ဇဝ် အူ ကာဒင် တီ အီ အိုပ် တူတ့် ဘောကာဂ့လျီတ်၊ အန် ဘော မုး ခုန်ဒီခမ် အီ အိုပ် တူတ့် ခဲ့ ကွယ် ခုန်ဒီခမ် ဒဲင် ကာဒါယ်။ အန် ဘော မုး ဒါ ကာညာ အီ အိုပ် တူတ့် ခဲ့ ကွယ် ဒါ ကာညာ ဒွန် နာ ဒွန် ပ့လုဝ့်။ 16 မီ အန် ဇဝ် အူ ကာဒင် တီ တူ ယမ် ဒေါ မှဝ်။ အန် ဘော ကွယ် ဒူင် ဘ့လာင်၊ ဒူင် တူ ပွိုန် အာဆေ တး ကာတတ်။ အာဝ် မိုဝ်း အာဆေ အီ ဟဲ့ ဒွိုမ် ယိုဝ်။ အာဝ် မိုဝ်း အာဆေ အီ ပွိုန် ယိုဝ်။ အန် ဇဝ် ဘော မိုဝ်း ပွုန် ဒီ အိုပ် ဆေဆေ။ တဲး အေ ရုဝ်ဆေ အန် ဇဝ် တီ။ ဆာတူ။

17 အီ မုး ဂေ ဒူအီ အီ မိုဝ်း ကြုဝ်ကြာမ် ဒဲင် ကာဒါယ် နီ၊ မဲ လုဝ် မာနုဝ် ဂေ၊ ကွဲ့ တဲး ဂေ ပီခိုက် နဝ်း ဂေ။ ကွဲ့ တဲး ဂေ ဘိုင် ကြုဝ်ကြာမ် ဂေ အီ နပ် ဒီ ဟြာယ်။ တဲး ဂေ ဘိုင် မီ ဇဝ်ဖြာ အီ နပ် ဒီ ဒွါ တူတ့် ဒွန် မျုဝ် ဒီ အေ၊ တဲး န့ ဘဲန် နဝ်း ဒါခိုယ် ဒီ အေ။ 18 မဲ လုဝ် စ်ု ဂေ၊ တဲး ဂေ ဘူင် နာ မွှိုမ်။ နာ ဘွတ် နာ မွှိုမ် ပီ ဘူင် ဂေ တီ တဲး န့ ကိူန်၊ တဲး ဂေ မိုဝ်း နဝ်း ဒီဟာင် အီ နပ် ဒီ ကာဆာင် ဒွါ ဒီ အီ ဟဝ်။ 19 ဆေ ဂေ ဘူင် ပါယ် တီ၊ န့ ပီ ဂေ ဘ့လေး အုန် ကြုဝ် အီ ဘွတ် အီ မွှိုမ် အီ နပ် ဒီ စွယ် ဂေ။ ဇာတ် ဒီ တး တဲး ဂေ ပွိုန် ဒီ ဘိုင် အာဆာက် ကာမာယ် အီ မုး အီ မှာန် အာခါခ်ု။

20 အိုယ် အာထီမုဝ်ထေ၊ တဲး မဲ ယွတ် မဲန် ဆီချာ ဒွန် မျုဝ် ပဲ့ ဟဲ့ အာပ် အုန် ဇဝ်ဖြာ ဒီ မဲ။ တဲး မဲ ဝး ဂြုဝ်း အီ တူ ရုဝ်ဆေ ဇဝ်ဖြာ ဘော ဂြုဝ်း အီ တူ မိုဝ်း ဒီခုဝ်၊ ဂြုဝ်း အီ ကာဘး ဒီ ဇဝ်ဖြာ ပီ ကာလိုပ် ဒူအီ ဒီ တဝ်း ဟဲ့ မုး အာငျာန်။ 21 ဒူအီ မင် အီ ဂေ ဟဲ့ ဒူပ် အာငျာန် ဇိုဝ် တီ။ ဂေ ဟဲ့ ဝဲန် ပီ ညှိုမ် ဂေ။

တဲး ဇဝ်ဖြာ ဂေဇူ ဘေ ဒွန် အီ။