ဆီငဲ အန် တီ ဂေ ဒူအီ ခဲင် န့ကြိုဝ်း ခုန်ဒီခမ် အာဒါဝိတ် ဘော ဂေ ဒူအီ ခဲင် မိူင် ယေရူဆာလဲမ် ဂေ ဒီ ပွိုန် ဘာယ် ဝဲန် မှာပ် ဂေ အီ မွှိုမ် ကာအိး၊ တဲး န့ ပီ အိုမ် တုဝ်း အီ လှဲ ဆေဆေ။

2 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း၊ ဆီငဲ အန် တီ အုဝ် ဒီ ဘော ဒိုဝ်း ဝဲန် တူတ့် ခဲ့ ကွယ် အာရိုပ် ရာင် ခဲင် မိူင် ပီ အိုပ် အန် ဇဝ်။ ဝါယ် အန် တီ န့ မိူဝ် တူ မိုဝ်း အီ နမ်လှုဝ်း စိူဝ် အာရိုပ် ရာင် ခေါ အူ မျုဝ်။ အုဝ် ဒီ ဟုဝ် တဝ် ဂေ ဒါ အီ ဘျာန် ဂြုဝ်း ဇဝ်ဖြာ အီ တူ ကာလာင် နာ မှာန် ဘော အီ ဒူပ် ဇဝ် အီ တူ ဆီငါ။ 3 ဒေါ အန် တီ ဆေ န့ ဝီ မိုဝ်း ဒူအီ အီ ဘျာန် ဂြုဝ်း ဇဝ်ဖြာ၊ ဂုန့် မာ အန် ဒီ တဝ်း ဒီ အန်၊ ‘မဲ လုဝ် ခမ် ဒီ ယမ် ကူပ် တဝ်း မဲ ဒီ ညှိုမ် ဘိုင် ပွုန် ဇဝ်ဖြာ ဘော ကာလာင် ဂြုဝ်း တူ မှာန်။’ ဟဲ့ ဟွတ့်၊ ဂုန့် မာ အန် ဒီ ဘော ဆတ် တဲး အန် ကော ကာလှုး။

4 ဒေါ အန် တီ၊ အာဝ် မိုဝ်း ဒူအီ အီ ပီခိုက် နဝ်း ဂေ ကူပ် ဘျာန် ဂေ ဂြုဝ်း ဇဝ်ဖြာ။ ဂေ မိူဝ် တူ စှိုပ် ဒီ တာ ခြိုင် ပီ စှိုပ် ဂေ ဒါ အီ ဘျာန် ဂြုဝ်း ဇဝ်ဖြာ။ ဂေ မိူဝ် အာဝ် ဟူ ယ ညိုင်ရာင် ပေါ မ့ပွါ လွင် ဘျာန် ဂေ ဂြုဝ်း ဇဝ်ဖြာ။ 5 ဂေ ဘဲန် ဝီ ဘဲန် ဝီ ဒီ ဘော ကာလာင် တဝ်း၊ “အုဝ် နီ၊ အုဝ် တူ မုး ဒူအီ ဘျာန် ဂြုဝ်း ဇဝ်ဖြာ။ အုဝ် မုး ဒူအီ အီ ရန့် မာန် ဂေ ဒူင် နာ ဆိန့် ဒေါ ဒီတဲတ် အုဝ်။” 6 ဆေ အီ ဟဝ် ဒီ ဒီမွှတ် တဝ်း၊ “ဒိမ် ဒီ ဘင်နဝ်း မဲ၊ န့ မုး မာဆေ။း” အန် ဒီ ဘော ဝီ ကာလာင် တဝ်း၊ “ဒိမ် အုဝ် နီ၊ န့ မုး တူတ့် ဒိမ် ပီ ကာဒုး အုဝ် ခဲင် ကာင် ဂိုက် အုဝ်။”

7 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “အိုယ် မဲ အီ ဂူင့် မာပွါ့ လာင်၊ တဲး မဲ ယိတ့် ဘော မး ယမ် ဒါ အီ ဟျီင် မာဘူ အုဝ်၊ အီ လာယ် ဖြူမ် ရိုမ် ဒူပ် အုဝ်။ တဲး မဲ မး ယမ် ဒါ အီ ဟျီင် မာဘူ တီ။ ဆေ မဲ ဘူင် ပါယ် တီ၊ မာဘူ ဂေ ဒီ ဘော ကာယဝ်း ဟာဝ် ဘဲန် ပ့လုဝ့် ဘဲန် ပ့လုဝ့်။ အုဝ် ဒီ ဘော ကာဂုဝ်း ဒီ ဂွန် ဂေ။

8 ဇဝ်ဖြာ ဘော တဝ်း၊ ခဲင် မိူင် ဘော မိူင် ကာန်ု အူယ် ဘုန် အုဝ် ပျာတ့် ဝဲန် အာဒါ အာ ဘုန်။ အာဒါ အူ ဘုန် ဒီ ကွယ် ဒီ အိမ်။

9 ဂေ အီ ကွယ် ခဲင် ဘုန် ဟာအူယ် တီ၊ ဂေ ဒီ လုဝ် ခမ် ဒုက် တာင် ပီ ဂေ ကွယ် ခဲင် ငဝ်။ န့ ဘော ပီ အုဝ် ဒီ ထာရွင် ဂေ ပီ အီ ထာရွင် ရွိုန်။ အုဝ် ဒီ ဘော ဇဲတ် ဒီ ယွတ် ဂေ၊ တဲး န့ ပီ အီ ဇဲတ် ဒီ ယွတ် ခြိဝ်။ ဂေ ဒီ ဘော ဆာခိုဝ် ဂါဝ် ပွုန် အုဝ်၊ အုဝ် မိူဝ် ဒီ ထူမ် ဂြုဝ်း ဂေ။ အုဝ် မိူဝ် ဒီ တဝ်း၊ ‘ဂေ မုး ဒူအီ ပီ အိုပ် အုဝ်။’ ဟဲ့ ဟွတ့် ဂေ မိူဝ် ဒီ တဝ်း၊ ‘ဇဝ်ဖြာ မုး ဇဝ်ဖြာ ပီ ကြိုပ် ယေ။’”