1 ဇဝ်ဖြာ ဝီ ကာလာင် ဂြုဝ်း လွင် ဂေ ဒူအီ အီဆာရေလ။ ဇဝ်ဖြာ အီ ဟဲ့ ဘ့လေး အုန် ဘ့လေန့် ဘော ဂါင်ဟြာဝ်၊ အီ ဟဲ့ တဲး န့ မိုဝ်း ဒင် ကာဒါယ်၊ ဘော ဟဲ့ တဲး ဒူအီ မိုဝ်း နဝ်း ဖွိုမ်၊ အန် ဟဲ့ ကာလာင် အုန် ပါယ် နီ။ 2 “အုဝ် ဒီ ဘူင် တဲး မိူင် ယေရူဆာလဲမ် ဘော မိူင် ယူဒါ ပီ ဆီလယ့် အိုမ် မာငုန် အီ တဲး ဒူအီ အီ ကွယ် ကာတတ် ဒျီင် ကော ယိုတ့်။ ဂေ ဘောကာဂ့လျီတ် လုဝ် ဒျီင် ခဲင် ဆီလယ့် တီ။ ဂေ ရန်ဆူ ဘော တး ဝဲင် ရူပ် အီ ဟဝ် ဒီ မိူင် ယေရူဆာလဲမ်။ 3 ဆီငဲ တီ၊ အုဝ် ဒီ ဘူင် တဲး မိူင် ယေရူဆာလဲမ် ပီ မာဝ် အီ စန် ကာဆဝ် ဒီ ဂေ ဒူအီ ဘောကာဂ့လျီတ် ဒဲင် ကာဒါယ်။ ဂေ အီ ကာဖြူမ် ဒီ စုဝ့် မာဝ် တီ၊ ဂေ ဒီ ဘော ကာဒုး ဆဝ် ဒွန် အီ။” 4 ဇဝ်ဖြာ တဝ်း၊ “ဆီငဲ တီ အုဝ် ဒီ ဘူင် တဲး မင်ပြွင့် ဂေ ရိုဝ် ကာဝှ်ု ကာဝျှီန်။ ဂေ အီ ပဝ့် မင်ပြွင့်၊ ဂေ ဒီ ဘော ဘဲန် ရိုဝ် ဘဲန် ဝှိုန့်။ အုဝ် ဒီ ဘော ဘ်ု ဒီ ယွတ် မဲန် ဂေ ဒူအီ အာယူဒါ ဘော တဲး ငါယ် မင်ပြွင့် ဂေ ဝီ အပ်။” 5 ဂေ ဒါ တာင် အီ ယဲတ့် ဒူအီ အာယူဒါ၊ ဂေ ဒီ ဘော ကာဖာ ခဲင် နဝ်း ဂေ တဝ်း၊ “ဒူအီ ခဲင် မိူင် ယေရူဆာလဲမ်၊ ဂေ ဟဲ့ ဝီ မိုဝ်း ပ့လူမ် မိုဝ်း ဟဲန့် ခုဝ်၊ ဇဝ်ဖြာ ပီ ကြိုပ် ဂေ မုး ဇဝ်ဖြာ အီ အိုပ် တူတ့် ဒွန် မျုဝ်။”

6 ပန် အန် တီ အုဝ် ဒီ တဲး ဂေ ဒူအီ အီ ယဲတ့် ဂေ ဒူအီ အာယူဒါ ပီ ကာလုဝ့် ငဝ် အီ ကွယ် ခဲင် မ့ပိုမ် ဟေ ဘော ငဝ် ရာင် အီ ကွယ် ကာတဲ ဟျြီင်။ ဂေ ဒီ ဘော ကာဆိုမ် ဒူအီ ဘောကာဂ့လျီတ် အီ ကွယ် ခူပ် ဂေ ဘော ဘ့လာက် အာဂ ဘ့လာက် အာအး မိူင် ယေရူဆာလဲမ်။ ဂေ ဒူအီ အီ ကွယ် ခဲင် မိူင် ယေရူဆာလဲမ် ယီ ဒီ ကွယ် ဆီချာ။

7 ဇဝ်ဖြာ ဒီ ဘော တဲး ဂေ ဒါ ဆိုက် ယူဒါ အွင် အာတ့် အီ ဟဝ်၊ ကွဲ့ တဲး အာဖုင် ဒင်ခုဝ် ခြိုဝ် ခုန်ဒီခမ် အာဒါဝိတ် ဘော အာဖုင် ဒင်ခုဝ် ဒူအီ ခဲင် မိူင် ယေရူဆာလဲမ် တာင် လွှိုမ် အာဖုင် ဒင်ခုဝ် ဂေ ဒူအီ ဒွန် အီ ခဲင် မိူင် ယူဒါ။ 8 ဆီငဲ တီ ဇဝ်ဖြာ ဒီ ဘော ဘ်ု ဂွင့် ရဲ ဒူအီ ခဲင် မိူင် ယေရူဆာလဲမ်။ ဝီ အီ မိုဝ်း ဟဲန့် ပြေတ့်၊ အန် ဒီ ဘော မိုဝ်း ပ့လူမ် တာင် ပီ ခုန်ဒီခမ် အာဒါဝိတ်။ ဂေ ခြိုဝ် အာဒါဝိတ် တီ၊ ဂေ ဒီ ဘော ဘဲန် ပီ ဇဝ်ဖြာ၊ ပီ ဘော အာမူ အာမာတ် ဇဝ်ဖြာ အီ ယဲတ့် ဂေ။ 9 အုဝ် ဒီ ဘော ပျာတ့် ဂေ ဒူအီ ဒွန် ဇိုဝ် ဒွန် မျုဝ် အီ ဟဲ့ တး တဝ်း ဒီ ပျာတ့် မိူင် ယေရူဆာလဲမ်။

10 ဒေါ အန် တီ အုဝ် ဒီ ဒွါ နဝ်း အီ ဒီ ဂေဇူ ဘော နဝ်း အီ ဆီ ဆာခိုဝ် တဲး န့ ကွယ် ဒူပ် လှုက်လှာန် အာဒါဝိတ် ဘော ဂေ ဒူအီ ခဲင် မိူင် ယေရူဆာလဲမ်။ ဂေ ဒီ ဘော ဝီ ယိုဝ် အုဝ် ဝီ ပဲ့ ဟဲ့ ဘ့လုး ဂေ။ ဂေ ဒီ ဘော ဝီ ယာမ် ဝီ ငှုန်၊ တဲး န့ ပီ ဂုန့် အီ ဟဲ့ ငှုန် ဟဲ့ ယာမ် ကူပ် ဟဲ့ ယမ် ဂွန် အီမာယ် အန် အီ မုး ခဲ့ အူ ဝီ။ 11 န့ ဒီ ဘော မိုဝ်း အီ ငှုန် တာင်၊ ယာမ် တာင် ခဲင် မိူင် ယေရူဆာလဲမ် ပီ အီ ဟဲ့ ဒွိုမ် ယာမ် တာင် ဒီ မိူင် ဟာဒတ်ရီမူန် အီ ကွယ် ဒူပ် ဒီလယ့် မီကီတော တွိုန်။ 12 ဂေ ဒူအီ ခဲင် မိူင် ဘော မိူင် ဒီ ဘော ငှုန် ဘော ယာမ် ကူပ် ဟဲ့ က့လိုဝ် ကာဆဝ် ဂေ။ ဒွန် န့ဟူမ် ဒီ ကာယဝ်း ဖိုင် အီမာယ် ဘော ဖိုင် အီဘိုန့်။ ခဲင် န့ဟူမ် အာဒါဝိတ် ဂေ ယာမ် ဒူပ် န့ဟူမ် အာနာထာန်။ 13 န့ဟူမ် ဒူအီ အာလေဝီ ဘော က့လိုဝ် ဒူပ် န့ဟူမ် အာဆီမီ။ 14 ဂေ ဘီနွင် အီ ဆီ ဂိတ် ဆီ ကွယ် ခဲင် န့ဟူမ် ဂေ ဒူအီ အာယူဒါ၊ ဂေ ဘော ကာယဝ်း ယာမ် ခဲင် ဖိုင် အီဘိုန့် ဘော ခဲင် ဖိုင် အီမာယ်။